Oseaa̱ 7
7
Néná mejeén ko̱síko̱jo xota̱ na̱xi̱ńdaá
1Kjiꞌanga kamámejénna sa̱ꞌindaya An xota̱ Israee̱l,
kamáyá ni xi ꞌniú ndajín xi katsꞌén xota̱ tji̱e̱e̱ Efraii̱n,
ko̱jo ni xi ndajín xi kamá ki̱a̱ nangi Samariaa̱,
ngatꞌa̱ kjo̱a̱ndisoo̱ katsꞌénkjién kjo̱a̱a̱ ni xi katsꞌén,
kó tji̱e̱nga xota̱ xi chejeé tsꞌasꞌien ngi̱yaa̱,
xtín xota̱ xi ndajiín jaꞌáxiín nii̱ xotaa̱ ki̱a̱ ndi̱tsee̱n.
2Kó tsꞌénkjójín ngi̱jin ini̱ma̱a̱ nga tjíjinko̱n An ngayeje ni xi ꞌniú ndajín xi ndyi̱tsꞌèn,
ti̱kuíní ni xi ndyi̱tsꞌèn xi je íchjáꞌyáni yojoo̱,
kó kui nii̱ je síndo ngindyikón Án.
3Mindyiatsjaà nda̱ ree̱ nga tsꞌénkjién ni xi ndajín xi katsꞌén,
kó mindyiatsjaà já xí botixómaá nga tsꞌénkjién kjo̱a̱ndisoo̱.
4Ngayejee̱ nga tsꞌéntꞌaa̱kjo̱a̱ xkjín,
bo̱a̱ má kón xikoó ngo orjno̱ xi tjítíngá,
xi ngiti̱ botsiéjiín nda̱ xi tsꞌénda paa̱n,
ndeskande nga tsꞌénda̱ꞌyo̱ paa̱n, ngaskande nga xongatjo̱.
5Ni̱xtjin nga kamá sꞌueé rejne̱,
já xí botixómaá katsꞌéndándí yojoo̱,
ngije iskjíbé xán xí katsꞌe,
kó nda̱ ree̱ katsjaá tsja xota̱ xi mojnókiee̱.
6Ngatꞌa̱ xikó maá ngo orjno̱ katsꞌén ini̱ma̱a̱,
nga kamámejeén índa nga kisꞌińdochjá nga ndajín sa̱ꞌín,
nde tsꞌénkjaꞌyájín nga ngo ni̱xtji̱e̱e̱n,
kó nga kamángindyiojón tíngá xikoó ngo ndiꞌí.
7Ngayejee̱ nga tjítíngá xikoó ngo orjno̱,
xi ndyi̱ꞌbítí ndo̱jò ndójo̱ xota̱ xi botixómaá,
ngayeje já ree̱ xi bixó,
ta̱nga ngi̱jii̱n kui xotaa̱ nde ngojín xi mejeén ku̱i̱chji̱a̱na.
8Xota̱ tji̱e̱e̱ Efraii̱n, je ki̱a̱ nijan kamá xota̱ na̱xi̱ńdaá,
xota̱ tji̱e̱e̱ Efraii̱n, kuí boá xi je kamá xikoó ngo ṉño̱ xi kiniꞌánkꞌafóyàjín
9Xota̱ xi xín nangi chji̱a̱nii̱, tsꞌenkjié ngaꞌniuú,
ta̱nga kui, nde makjínjiín, ngaskande je kjiꞌbeé tsja̱kichjí,
ta̱nga kui, nde makjínjiín kui nii̱.
10Ti̱kuii kjo̱a̱nkꞌakoo̱n xota̱ Israee̱l xi chji̱a̱ kondra̱ tsi̱ꞌe̱,
ta̱nga nde ngiti̱ fíkónjiín Néná, kui xi Nee̱ kui,
ndatsi bo̱a̱ kjiꞌi ni xi kjimaa̱, nde mongasejín Néná.
11Xota̱ tji̱e̱e̱ Efraii̱n xikónií ngo tójo chi̱ni xi jmí ni makjínjiín,
xota̱ Ejiptoo̱ míꞌaá nga ko̱síko̱jo, ko̱jo ki̱a̱ fíkoón xota̱ Asiriaa̱ nga.
12Kjiꞌanga ki̱a̱ ko̱e̱je̱, kꞌojminiée̱ nda̱ꞌyana,
kó bo̱a̱ sa̱ꞌinjo̱ An xikoó tsi ni̱sie nga kjo̱yana,
kó stsoboa An kjiꞌanga kuintꞌiée̱ nga ka̱matikó.
13¡Xi̱xꞌi̱a̱n xò kuí xotaa̱, ngatꞌa̱ kjin tjíndonii̱ An!
¡Chjiéngá si̱ꞌankjie, ngatꞌa̱ katsꞌénkitikjo̱a̱ yojoo̱!
A kꞌoxiéꞌá Án kjiꞌanga An ndyi̱chji̱a̱taꞌinna.
14Ta̱nga jmí tsi An xi tsíchji̱a̱na ngayejeni ini̱ma̱a̱,
ndatsi ꞌniú askjandáyà nga kjiyojosón ṉchaa̱n,
katsꞌénkjinna yojoo̱, ta̱nga ta̱ngatꞌanií to ndso̱ko̱a̱n ṉño̱paa̱n,
ko̱jo bino̱ xi tja̱tsi̱e̱e̱ nga matikó.
15Kó ndatsi An akoyáa̱, ko̱jo ndatsi An katsjangaꞌniúu̱,
ndajín tsꞌén tsꞌénkjó kondra̱ tsa̱ꞌa̱n.
16Ko̱e̱je̱ꞌoyá nginí, ta̱nga jmí tsi xtji̱e̱e̱n nkꞌa jàn,
bo̱a̱ má kón ka̱ma xikoó yáchjonyá xi ti̱ki̱e̱e̱n,
xota̱ xi botixómaá, ki̱cha̱ndojó si̱ꞌankjiesónni,
ta̱ngatꞌanii̱ ti̱kuii kjo̱a̱xcha̱án ni xi tsíchji̱a̱ na̱je̱n,
kó kuí bí kui nii̱ xi ko̱jno̱chani ki̱a̱ nangi Ejiptoo̱.
Currently Selected:
Oseaa̱ 7: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
