Oseaa̱ 2
2
1Bi̱ tꞌínjnúu̱ ntsꞌiejnú: Xota̱ na̱xi̱ńdaá Néná.
Bi̱ tꞌínjnúu̱ ndichjajnú: Kui xi tjóna.
2Ndókjo̱a̱tijo̱jnú na̱anjnú, ndókjo̱a̱tijo̱jnú,
ngatꞌa̱ kuijín bo̱a̱ xi chjo̱onna, ti̱nde Ánjín bo̱a̱ xi xi̱ꞌii̱n kui,
kó ngiti̱ tsꞌénmasiénjín ngase yojoo̱,
ko̱jo ngatjaꞌáxiín yojoo̱ nga tjítsꞌéntꞌaa̱kjo̱a̱ xi̱ꞌii̱n.
3Ngatꞌa̱ tsi jmí, tsita̱ An kjoaꞌaxíi̱n ńjñoo̱,
kó kꞌuijñá kjiꞌixtí kjiꞌixtí An,
kó bo̱a̱ sa̱ꞌinkꞌié Án xikoó ni̱xtjin nga katsen,
kó ki̱a̱ sa̱ꞌinkꞌijñá An ki̱a̱ nangi kixií,
kó ńdie xi jmí ni chjíjín sa̱ꞌin An,
kó sa̱ꞌinkꞌién xíndá Án,
4kó nde ni̱ma̱jín ka̱mana ndií,
ngatꞌa̱ ndií, nga katsꞌénmasien yojoo̱ boá.
5Jo̱o̱n, ngatꞌa̱ na̱masien kamá na̱aa̱n,
kui na̱ xi katsee̱n kui ndií, ngiti̱ kamáyàndikónjín,
ngatꞌa̱ bi̱ katsó: Ki̱a̱ kjuíntjíngíi̱ xi̱ńꞌniúna,
ngatꞌa̱ kuí boá xi tsjána nichiniena ko̱jo ni xi ꞌyóna,
ko̱jo tsjána ńjño lino̱na, ko̱jo isti̱na, ko̱jo bino̱na.
6Ngotꞌe̱ ꞌne̱, Án boá xi yándáꞌyá sarsa̱ kꞌuindòo̱ ndi̱yàa̱,
kó xó kꞌuichjáꞌyá An xoó, tsi̱ꞌe̱ nga jmí ndi̱yà sa̱kójiín.
7Ko̱ngatji̱ngii̱ xi̱ńꞌniuú, ta̱nga kjo̱chótji̱ngíjiín,
ko̱ngase, kó sa̱kójiín, kó bi̱ ka̱tso̱:
Kjuínkón ngiñáa̱ xi̱ꞌin xi tjónna,
ngatꞌa̱ nda ngase kamátaꞌin an ngasꞌe̱, ta̱bo̱a̱jiín ngotꞌe̱ ꞌne̱.
8Kamákjínjiín kui naa̱ nga Án boá xi katsjáa̱
to ndso̱ko̱a̱n ṉño̱paa̱n, ko̱jo binoo̱, ko̱jo istii̱,
ko̱jo nga Án boá xi katsꞌenkjín An to̱ntiboa ko̱jo to̱nsinié
xi katsꞌénkjién nga katsꞌéndikón ne Baa̱l.
9Kuíni nga, nga kjo̱chó ni̱xtjin kjoaꞌaxín ngiñáa̱ to ndso̱ko̱a̱n ṉño̱paa̱n,
kó kjoaꞌaxín ngiñáa̱ binoo̱ nga kjo̱chó ni̱xtjii̱n cha̱a̱n,
kó skjíbé ngiñá An tsa̱nga̱na, ko̱jo lino̱na xi yíꞌmáni kjo̱a̱kjiꞌixtií,
10kó ngindyi̱ko̱n xi̱ńꞌniuú koko An ni xi ndajín xi katsꞌén,
kó nde ngojín xi ka̱maa̱ kꞌo̱xiéꞌáni ngi̱ya ndsa̱ Án.
11Ta̱ ki̱a̱ tsí tji̱e̱n kjo̱chó ngayeje kjo̱a̱tsjaa̱,
ko̱jo sꞌué xí katsꞌén, ko̱jo sꞌueé sá tja̱tsi̱e̱e̱,
ko̱jo ni̱xtjin xi niꞌánkjaꞌyaá,
ko̱jo ngayeje sꞌué ndikón xí katsꞌén.
12Sa̱ꞌinkjatsón Án nínga kjiꞌii̱ tostsi̱je̱è, ko̱jo yáꞌingoo̱,
kui xi bi̱ katsóni: Kuí boá xi chjína, kui xi katsjána xi̱ńꞌniúna.
Án boá xi sa̱ꞌin An nga xka̱ ta̱chiboa ka̱ma,
xi skji̱ni̱e̱ cho̱ tamá xí tjín ngi̱jin kꞌijñaá.
13Sa̱ꞌinjée̱ kjo̱a̱a̱ kui ni̱xtjin xi katsꞌéndikón ne Baa̱l xi kisꞌiee̱, kui xi ítií nisije̱n,
kó kuí, yejéngí nangínijon ko̱jo ni xi jmeyá kjásen.
Kó ki̱a̱ kijítji̱ngii̱ xi̱ńꞌniuú, tji̱e̱nga An katsꞌénchíyána. Tsó Néná.
Néná sa̱ꞌínjetakoón xota̱ na̱xi̱ńdaá
14Ndatsi bo̱a̱ kjiꞌi ni xi je katsꞌén, Án boá xi sa̱ꞌingatꞌa ngiñáa̱ yojona,
tsi̱ꞌe̱ nga ki̱a̱ kjuínjo̱ An nangi kixií, kó sa̱ꞌinꞌinda ngiñá An ini̱ma̱a̱.
15Ki̱a̱ boá nínga tsja ngiñáa̱ nínga ítji̱e̱ tostsi̱je̱è,
ko̱jo nangi soón Akoo̱r xikoó tsi ngo kjo̱a̱chiyá,
kó ki̱a̱ boá nínga ku̱i̱chji̱a̱jona xikoó nga kjindí,
kjiꞌanga jatjoni nangi Ejipto̱.
16Kó kui ni̱xtjin jàn, tsó Néná, Ixí sení, xi̱ꞌinna tsó kui eén,
kó jè ngiti̱ Baalíjín sení, xi̱ńꞌniúna tsó kui eén.
17Ngatꞌa̱ kjoaꞌaxíi̱n ndso̱ꞌbe ji jaꞌeén ne Baa̱l,
kó kui jaꞌeén nginijánjín si̱ꞌankaxoma ngase.
18Ngo ni kꞌuindajo̱ An cho̱ tamaá nganda tsi̱ꞌe̱,
ko̱jo ni̱sie xi tjín nkꞌa jàn, ko̱jo cho̱ xi ꞌbifé yojoo̱ xi tjín tꞌanangii̱,
skjítꞌó Án yáyojoó, ko̱jo ki̱cha̱ndojoó,
kó kjoaꞌaxín An kjo̱a̱xcha̱án ki̱a̱ tꞌanangii̱,
kó sa̱ꞌin An nga achichí nda kjófé.
19Kó chjo̱onna ka̱ma ji ngatsjéni̱xtjin,
chjo̱onna ka̱ma ji ngi̱yaa̱ kjo̱a̱kixi̱i̱ ko̱jo ni xi kixi̱i̱,
ko̱jo kjo̱a̱ndaa̱ ko̱jo kjo̱a̱ni̱ma̱takón xi jee̱.
20Chjo̱onna ka̱ma ji ngi̱yaa̱ kjo̱a̱ꞌniátakoón,
kó xche̱ní nga Án boá xi Ndi̱a̱a̱ ma An.
21Kui ni̱xtjin jàn bi̱ xian Án: Án boá xi tꞌíxián An,
kó kuichjiájo An ndiꞌakꞌajmii̱, kó kuí ku̱i̱chji̱a̱jo tꞌanangii̱,
22kó tꞌanangii̱ ku̱i̱chji̱a̱jo to ndso̱ko̱a̱n ṉño̱paa̱n, ko̱jo binoo̱, ko̱jo istii̱,
kó kui nii̱ ku̱i̱chji̱a̱jo na̱xi̱ńdáꞌniú Jesree̱l, 23kó ki̱a̱ kꞌuitji̱e̱ An ki̱a̱ tꞌanangii̱ tsi̱ꞌe̱ nga tsa̱ꞌa̱n ka̱ma,
kó ni̱ma̱ ka̱mana Lo-ruamaa̱, kó bi̱ xiáa̱n Lo-Amii̱: Nangi xi tsa̱ꞌa̱n.
Kó kuí, bi̱ ka̱tso̱na: ¡Jí boá xi Nejne̱ ji!
Currently Selected:
Oseaa̱ 2: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
