Oseaa̱ 12
12
1Efraii̱n xikoó tsi tjo̱o̱ boá xi tsꞌéntjénjén,
ngatꞌa̱ ki̱a̱ tsꞌénmongatji̱ngii̱ tjo̱ xi ndibání xtji̱e̱e̱n nínga fotjo tsꞌueé,
kjín ngase kjo̱a̱ndiso xi tsꞌénda, ko̱jo kjín ngase ni xi ndajín tsꞌén,
ngo ni índajo̱ xota̱ Asiriaa̱, kó istii̱ toꞌolibo̱, ki̱a̱ fíjo̱ nangi Ejipto̱.
Bi̱ tsꞌén chji̱a̱ xota̱ chji̱ni̱e̱ꞌe̱én
2Néná kjo̱a̱xti tjítsꞌénjo̱ xota̱ tji̱e̱e̱ Jundáa̱,
kó kotijeé xota̱ tji̱e̱e̱ Jakoo̱b kjo̱a̱a̱ ndi̱yà xí tjimá,
bo̱a̱ tsꞌén ku̱i̱ꞌíchjií kjo̱a̱a̱ ni xi katsꞌén.
3Ndeskande ngi̱ya ndo̱bo̱a̱ndií na̱aa̱n nga yíꞌniú tji̱ngi̱ se ntsꞌi̱e̱,
kó ngaꞌniuú boá xi katsꞌeén nga askjanjo̱ ndítsjie xi Néná.
4Askjanjo̱ ndítsjie xi Néná, kó katsꞌeén,
askjandá, kó kasakoo̱ kjo̱a̱ni̱ma̱takón,
ki̱a̱ na̱xi̱ńdáꞌniú Betee̱l kasakoo̱, ki̱a̱ tsíchji̱a̱jojne̱.
5Jo̱o̱n, Néná xí tsi̱ꞌe̱ jájuún boá, Kuí boá xi ꞌmí Néná.
6Kó jún ti̱ꞌankꞌoyájnúu̱ yojojnú Néná,
ngatꞌiéjnú kjo̱a̱ni̱ma̱takón ko̱jo kjo̱a̱kixi̱,
kó ngatsjéni̱xtjin chiyájnúu̱ Nejnú.
7Xota̱ Kanaa̱n baskula̱ chejé boá xi tsꞌénkjién,
kó achichí tsjá maá nga ndajín tsꞌénjo̱ xotaa̱.
8Xota̱ tji̱e̱e̱ Efraii̱n, bi̱ katsó: ¡Jè kamácho̱n ñá! Jè kasakóná kjo̱a̱cho̱n,
kó jmíjín xi sku̱i̱e̱ jéná.
9Ta̱nga ndeskande nangi Ejipto̱, Án boá xi Nejnú Án,
to̱kó ndiꞌańjño sa̱ꞌinkꞌíndoyajnúꞌun xikoó ni̱xtjii̱n sꞌueé.
10Ngatꞌa̱ jè tsíchji̱a̱jo An jáchji̱ni̱e̱ꞌe̱én, kó jè kjín ngase ni xi je akóo̱,
kó énkjín boá xi katsóyà jáchji̱ni̱e̱ꞌe̱én.
11Ta̱nga xotaa̱ nangi Ngalaa̱nd, a ni xi ndajín boá xi ndyi̱tsꞌèn.
Ni xi ta̱kjo̱a̱ndaní boá xi ndyi̱tsꞌèn,
ki̱a̱ nangi Ngilngaa̱l ndyi̱tsꞌénkꞌién cho̱yojo xi̱ꞌin xi bokján tꞌanangi,
ta̱nga ṉchandikoón si̱ꞌankixóndó yeje, ki̱a̱ ndi̱yà nínga ꞌbítji̱e̱ nii̱.
12Xota̱ tji̱e̱e̱ Jakoo̱b ki̱a̱ tsanga ki̱a̱ nangi Araa̱n,
kó Israee̱l ngo chjo̱on katsꞌénxángíni, kó ta̱ngatꞌanii̱ ngo chjo̱on, nga cho̱tsa̱nga̱ askoo̱n.
13Néná katsꞌénkjién ngo nda̱chji̱ni̱e̱ꞌén,
tsi̱ꞌe̱ nga tsꞌaxiéni xota̱ Israee̱l ki̱a̱ nangi Ejiptoo̱,
kó ngo nda̱chji̱ni̱e̱ꞌén katsꞌénkjién nga askoo̱n kui xotaa̱.
14Xota̱ tji̱e̱e̱ Efraii̱n katsꞌénkjaán Néná,
kuíni nga kui sa̱ꞌínkꞌíchjí jín xí iskjitjón,
kó Néná boá xi ti̱kuii kꞌo̱jminieé ni xi ndajín xi katsꞌén.
Currently Selected:
Oseaa̱ 12: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
