Oseaa̱ 11
11
Néná tjoó xota̱ na̱xi̱ńdaá
1Kjiꞌanga xota̱ na̱xi̱ńdá Israee̱l kjindí kamá xikoó ngo nda̱ xo̱ngò, achichí tjó kamána,
Án boá xi tsíchjiáa̱ ki̱a̱ nangi Ejiptoo̱ xikoó tsi ndína.
2Ta̱nga kjiꞌanga tjó ngase kamána kui,
katsꞌénkjin ngasena yojoo̱,
kó katsꞌénkꞌasꞌiee̱n kjo̱a̱tjó ne Baa̱l, ko̱jo ítií nisije̱n ni xi ne katsoó.
3Án boá xi akoyáa̱ kótsꞌèn kꞌuitsómá xota̱ tji̱e̱e̱ Efraii̱n, nga iskjíbengí An,
ta̱nga katsꞌénkiejín yojoo̱ nga Án boá xi katsꞌendaya An.
4Kó tjó katsꞌén An, xikótsꞌèn tjó niꞌánjo̱ ngo xota̱ nga̱sondie,
kó xikoó tsi An xi jaꞌaxíi̱n yá xi kjingi ngasen,
ko̱jo tjó katsꞌenjo̱ An nga katsjáa̱ nichinie,
5ngiti̱ chjiénjín nga nangi Ejipto̱ ko̱e̱je̱ nginí katsaki,
ta̱nga ngotꞌe̱ ꞌne̱, xota̱ Asiriaa̱ boá xi ka̱ma ree̱,
ngatꞌa̱ kamámejénjiín katsꞌénkꞌoyá yojoo̱.
6Ku̱i̱ꞌeé kjo̱a̱xchán ngayeje na̱xi̱ńdáꞌniú nínga síndo,
kó ndiꞌií boá xi sa̱ꞌínkjié ki̱cha̱ xi ꞌbíchjájo̱ni nga̱ntjo̱a̱a̱,
ngatꞌa̱ ki̱a̱ kijítji̱ngi ni xi índa soboá kuí.
7Ta̱nga xota̱ na̱xi̱ńdána jè katsjaákon nga ku̱i̱ꞌíjñámasienna,
ndatsi Án boá, xi Ne xi tikón ndiꞌakꞌajmii̱ ndyi̱tsóna,
ta̱nga nga ja̱koxi̱ ndyi̱tsꞌentsjájínna.
8Ta̱nga, kótsꞌèn ka̱mana kꞌuijñámasiénjnúꞌun jún xota̱ tji̱e̱e̱ Efraii̱n,
ko̱jo kótsꞌèn ka̱mana sa̱ꞌinkꞌasꞌienjnúꞌun jún xota̱ Israee̱l,
a sa̱ꞌinkjiéjnúꞌun xikótsꞌèn katsꞌenkjié An nangi Andmaa̱,
axa̱ xikó katsꞌénjo̱ An nangi Seboii̱n,
achichí nda̱ maa̱ ini̱ma̱na, achichí ni xi kjimaa̱ ngi̱jin yojona.
9Sa̱ꞌinkjiénjín An kjo̱a̱xchánna, ti̱nde ngiti̱ sa̱ꞌinkjiéjín An xota̱ tji̱e̱e̱ Efraii̱n,
ngatꞌa̱ Án boá xi Ne An, kó jmí tsi ngo xota̱ nga̱sondie An,
Án boá xi tsjie An, xi tikón An ngamasienjnú,
kó kji̱ndi̱bájín An nga sa̱ꞌinkjiéjnúꞌun.
10Kó xota̱ na̱xi̱ńdaá kꞌuitsómátji̱ngii̱ Néná,
kó Néná skja̱ndáyà xikó ngo xandi̱je̱, jo̱o̱n, kuí boá xi skja̱ndáyà,
kó ndií kui xotaa̱ kjo̱tsièndíkón má nga kji̱ndi̱báni
ndeskande xtji̱e̱e̱n nínga ꞌbosꞌien tsꞌueé.
11Ndeskande nangi Ejipto̱ kji̱ndi̱báni nga kjo̱tsiè xikó maá ni̱sie,
ndeskande nangi Asiriaa̱ kji̱ndi̱báni nga kjo̱tsiè xikó maá tójo,
kó ki̱a̱ sa̱ꞌínkꞌíndo nginí An ndiꞌaa̱. Tsó Néná.
12Xota̱ tji̱e̱e̱ Efraii̱n ta̱ngongá ndyi̱ꞌbindísojo̱na,
kó xota̱ ndiꞌaa̱ na̱xi̱ńdá Israee̱l ta̱ngongá ndyi̱ꞌboṉcha̱jona,
kó xota̱ tji̱e̱e̱ Jundáa̱ to̱kó kjin síndonii̱ Néná,
kui Néná xí tsjiee̱, ko̱jo xi ma maꞌniátakoón.
Currently Selected:
Oseaa̱ 11: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
