Oseaa̱ 10
10
1Na̱xi̱ńdá Israee̱l boá xi ngo ńꞌniuú tostsi̱jè xí tsingá tikón,
ta̱nga to xi boajaá, ti̱kuíní xi tsi̱ꞌe̱ ma,
kó tji̱e̱nga kjín ngase to tsjá, kjín ngase ṉchandikón tsꞌénda,
tji̱e̱nga ꞌniú ngase tsjaꞌbé tꞌanangii̱, ꞌniú ngase tsja tsꞌénkꞌié a̱sie̱én ne xi tsꞌénda.
2Jè jó tjín katsꞌén ini̱ma̱a̱, kó kuí boá xi sa̱sie̱én jé,
kuíni nga Néná ko̱kján a̱sie̱én ni xi ne ndyi̱tsoó.
3Jo̱o̱n, jè ka̱ma bi̱ kꞌuínjnú: Jmíjínjne̱ re, kó yandikónjínjne̱ Néná,
mí xí ka̱maa̱ sa̱ꞌínjo̱jne̱ ree̱.
4Én nkꞌakon boá xi chji̱a̱ nga ꞌbínda ngo ni, kó tsꞌénkjatjosónjín ni xi chji̱a̱,
kuíni nga ta̱jñàní ꞌbeé kjo̱a̱xti, xikó má tsꞌén tjo kꞌijñá xí tjiín ndikimayaa̱.
5Xota̱ na̱xi̱ńdá Samariaa̱ tsakjón maá ndií cho̱yojo xi tikón Bee̱t-Abee̱n,
xota̱ na̱xi̱ńdaá ko̱jo chináꞌmii̱ kꞌuíndo xa̱ꞌya̱ kjo̱a̱a̱ nee̱,
kó ndyi̱ꞌbitíkjá ma ngatꞌa̱ kjo̱a̱jee̱ je kachjeꞌéxiín.
6Kó nangi Asiria̱ ndyi̱fíjo̱ xikoó ngo kjo̱a̱tjó
xi si̱ꞌankꞌasꞌiee̱n re xi ꞌniú yandikoón,
kó xota̱ tji̱e̱e̱ Efraii̱n kjo̱a̱soboá kjo̱a̱ꞌa,
sꞌe̱ xota̱ Israee̱l kꞌuieé kjo̱a̱soboá kjo̱a̱a̱ ni xi índa.
7Nangi Samariaa̱ si̱ꞌankjie, kó ree̱ xcha̱ja xikó maá xó xi ꞌbé nga̱són ndáfoaa̱.
8Kó ngi̱ndie xi ꞌniú nkꞌaá Bee̱t-Abee̱n, nínga katsꞌénjé xota̱ Israee̱l si̱ꞌankjie,
kó nga̱soón ṉchandikoón ka̱maxchá ndaꞌyá ko̱jo xka̱ xi ndajín,
kósꞌe̱ kjiꞌa boá nga bi̱ ka̱tso̱o̱ na̱xi̱i̱: Tjaꞌmejne̱,
kó tji̱ngi̱i̱ bi̱ ka̱tso̱o̱: Ngatꞌákaniéjne̱ ji.
Néná katsꞌénxchánjo̱ xota̱ Israee̱l
9Ndeskande ni̱xtjii̱n Ngabaa̱ ítsꞌi̱yanii̱ nga katsꞌénjé xota̱ Israee̱l,
kó to̱kó ndyi̱tsꞌénjé ngaskande ngotꞌe̱,
kuíni nga kjo̱a̱xchán, ta̱niján má sa̱ꞌínkjié xota̱ xi ndajiín ki̱a̱ Ngabaa̱.
10Jè jéꞌe̱ An tsi̱ꞌe̱ nga kotijée̱ xota̱ xi ndajiín,
kó xota̱ xi kje̱ꞌe na̱xi̱ńdá ka̱matikónié nga skjánjo̱,
kjiꞌanga ko̱tíjeé kjo̱a̱a̱ jó jé xí katsꞌén.
11Xota̱ tji̱e̱e̱ Efraii̱n xikónií ngo cho̱yojo chjo̱on xí je kamántꞌié,
xi tsjaa̱ tsꞌénxá nínga niꞌántsjie to ndso̱ko̱a̱n ṉño̱paa̱n,
kó Án boá xi yingí An kjásen tsjakjiꞌi yá xí tsꞌénxájoo̱,
xota̱ tji̱e̱e̱ Efraii̱n kuí boá xi ko̱a̱ꞌa̱nijín kui yaá,
kó xota̱ tji̱e̱e̱ Jundáa̱ boá xi skjién,
sꞌe̱ xota̱ tji̱e̱e̱ Jakoo̱b boá xi sa̱ꞌíndso̱ko̱a̱n tꞌanangii̱.
12Xikoó tsi kjo̱a̱kixi̱i̱ tꞌítji̱e̱jnúu̱ yojojnú,
kó chja̱ꞌátikójnú kjo̱a̱ni̱ma̱takoón,
tꞌíjñandajnú tꞌanangi xi ndaa̱,
ngatꞌa̱ jè jachó ni̱xtjin nga ku̱i̱ndyi̱séjnú Néná,
ngaskande nga kjo̱e̱ꞌe nginí kuí,
kó tsie kjo̱a̱kixi̱ sa̱ngíyaniéjnú.
13Ta̱nga jún ni xi ndajín boá xi ikꞌítji̱e̱jnú,
kuíni nga ni xi ꞌniú ndajín boá xi chja̱ꞌátikójnú,
nii̱ kjo̱a̱ndiso xi kandokjo̱a̱jnú boá xi xi̱ni̱e̱jnú,
ngatꞌa̱ ngaꞌniújnú boá xi kamáꞌniátakónjnú,
ko̱jo kamáꞌniátakónjnú xota̱jnú xi ꞌniú chꞌokon ngasee̱.
14Kuíni nga kjo̱a̱xchán sa̱ꞌín xotaa̱, kondraa̱ nangìi̱,
kó si̱ꞌankjatsón ngayeje ngi̱ndie nínga síndo ngaꞌniuú,
xikó má tsꞌén Salmaa̱n katsꞌénkjatsón Bee̱t-Arbee̱l ni̱xtjin nga kamá kjo̱a̱xcha̱án, kó bi̱ kamá:
Xi na̱an ko̱jo xi ndí ikicháyà.
15Kó bo̱a̱ má sa̱ꞌínjo̱jnú jún xota̱ na̱xi̱ńdáꞌniú Betee̱l,
ta̱ngatꞌanii̱ ni xi ta̱nisién ndajínkjiꞌi xi kiniꞌánjnú,
kó nga ndibáꞌásie̱én ko̱yà ree̱ na̱xi̱ńdá Israee̱l.
Currently Selected:
Oseaa̱ 10: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
