Xota̱ Ebreoo̱ 2

Bi̱ tsꞌén tjibóko nga chjiéngá si̱ꞌansée̱n én xi katsangiyaná Néná

1Kuíni nga chjiéngá si̱ꞌansée̱n kuí én xí je kandaꞌyá, tsi̱ꞌe̱ nga kje̱ꞌejín ndi̱yà kongín. 2Ngatꞌa̱ tsi kui én xí kje̱ꞌe ni̱xtjin Néná katsjaá ndítsjiee̱, tsi̱ꞌe̱ nga tsja̱aná ñá, kisꞌiee̱ ngaꞌniú, kó nga ngayeje xota̱ xi tsintꞌiéꞌénjiín, kamájeé xikó kjiꞌi jé xi kasakoo̱, 3kótsꞌèn ka̱máná nga ku̱i̱yóo̱ kui kjo̱a̱botíjeé, tsi si̱ꞌansénjáa̱n kui kjo̱a̱ꞌnaxiéꞌá xi bo̱a̱ tsꞌén jee̱. Ngatꞌa̱ ti̱kuíní Ndi̱a̱ Kjisoo̱ xi tjón katsóyà kui én xí ꞌboxiéꞌáná, sꞌe̱ jaskan xota̱ xi tsintꞌieé, akóná nga ja̱koxi̱ boá kui nii̱. 4Kó Néná ti̱ akóná nga ja̱koxi̱ boá kuí nii̱ kjiꞌanga katsꞌén chi̱bo̱a̱, ko̱jo ni xi ꞌbíndíkón, ko̱jo kjo̱a̱ndikón, kó katsꞌénkjaꞌasónná kjo̱a̱ndaa̱ A̱si̱énni̱xtjii̱n, xikótsꞌèn kamámejeén Kui.

Bi̱ tsꞌén tjibóko nga Kjisoo̱ xota̱ xi jín xi yojo kamá

5Néná katsjájiín xá ndítsjiee̱ tsi̱ꞌe̱ nga kui xi ko̱tíxomaa̱ kui nga̱sondie xi sꞌe̱ ndibaá, kjo̱a̱a̱ kui xi ndyi̱chiboáni̱jmì. 6Bi̱ tsꞌén tjítꞌa xo̱jo̱n eén Néná, nínga tjín xi bi̱ katsó:

ꞌYá kuií bo̱a̱ xotaa̱, tsi̱ꞌe̱ nga kjo̱a̱ꞌátsjiee̱n kui,

axa̱, ꞌyá kuií bo̱a̱ xotaa̱, tsi̱ꞌe̱ nga kjójintakín Ji.

7Ngindie ngase xikoó ndítsjiee̱ kiniꞌín Ji ngotjón,

ta̱nga katseꞌée̱ kjo̱a̱je ko̱jo nga xcha̱ndikón.

8Ngayeje nii̱ xi ikꞌínde Ji ngi̱ya tsja.

Ngatꞌa̱ ngije ngi̱ya tsja síndo ngayeje nii̱, ngojín nii̱ xi ki̱a̱jín síndo. Ta̱nga jè ndyi̱yà ngotꞌe̱ nga jmí tsi ngi̱ya tsja xotaa̱ síndo ngayeje kui nii̱. 9Ta̱nga yàjne̱ xikótsꞌèn Kjisoo̱ chiboa ngase kiniꞌán ngotjón, ta̱bo̱a̱jiín ndítsjiee̱, kó nga Kuí xí tikoón kjo̱a̱jee̱, ko̱jo kjo̱a̱yandikoón, kjo̱a̱a̱ kui kjo̱a̱ni̱ma̱a̱ xi jaꞌatio nga kiniꞌánkꞌién. Jaꞌajin kjo̱a̱bo̱yaa̱ ta̱ngatꞌanii̱ nga kꞌientjé ngayeje xotaa̱, kó bo̱a̱ tsꞌén katsꞌénkjatjosón kjo̱a̱ndaa̱ Néná.

10Néná kamámejeén nga kjín ka̱ma ndií xí kꞌuieé kjo̱a̱jee̱, kui Néná xí katsꞌénda ngayeje nii̱, ko̱jo nga ngatꞌaa̱ Kui nga síndo kui nii̱, kuí boá xi katsꞌén nga ngi̱jii̱n kjo̱a̱ni̱ma̱ xi jaꞌatio Jesukristoo̱, ka̱ma xi chjiéngá ka̱ma Kui, kui Jesukristoo̱ xi tsꞌaxiéꞌá kui xotaa̱. 11Ngatꞌa̱ Kuí boá xi tsꞌéntsjie xotaa̱ ngindyi̱ko̱n Néná, kó kui xota̱ xi niꞌántsjiee̱, ta̱ ngo tsí má xi na̱ꞌmii̱, kó kuíni nga soboájín maá kui, nga ntsꞌie tsójnú, 12nga bi̱ tsó:

Kꞌuini̱jmìi̱ ntsꞌié án kjo̱a̱a̱ Ji,

kó sa̱ꞌintsjaà Ji ngi̱jii̱n xota̱ xi matikó nga tsꞌéntsjaà.

13Kó ti̱ bi̱ ti̱ tsó nga:

An ka̱maꞌniátakón an Néná.

Kó ti̱ bi̱ ti̱ tsó nginí:

Kꞌi̱e̱ tikòn an kꞌi̱e̱e̱, an ko̱jo ndí xi katsjána Néná.

14Kó xikótsꞌèn nga jín nga yojo kui ndií, ti̱ bo̱a̱ ti̱ tsꞌén Kjisoo̱ jín ko̱jo yojo kamá. Tsi̱ꞌe̱ nga kꞌien, kó katsꞌénkjié kui xi atíxomaa̱ kjo̱a̱bo̱yaa̱, kui xi xindajín ndiabloo̱, 15kó bo̱a̱ tsꞌén nga índondé ngayeje xota̱ xi kisꞌińdo xikoó moso̱ xi kastiñaá, ngatꞌa̱ katsakjónnií kjo̱a̱bo̱yaa̱. 16Ngatꞌa̱ kjénní nga jmí tsi jeꞌe tsi̱ꞌe̱ nga ndítsjiee̱ xi ko̱síko̱jo, jeꞌe tsi̱ꞌe̱ nga xota̱ tji̱e̱e̱ Abraa̱n xi ko̱síko̱jo. 17Kó kuíni nga bo̱a̱ tsꞌén chjiéngá xi kókón ngayeje ntsꞌiee̱ nga bo̱a̱ kisꞌie, tsi̱ꞌe̱ nga ngo chináꞌmi xi ꞌniú nkꞌa xaá xi tsꞌén xaá Néná kamá, xi ni̱ma̱takón ko̱jo ꞌniátakón kamá, xi tsꞌenkꞌásꞌién chji̱e̱, tsi̱ꞌe̱ nga sa̱ꞌínkjié jeé xota̱ na̱xi̱ńdaá. 18Kó xikótsꞌèn nga jaꞌatio kjo̱a̱ni̱ma̱ nga kachjatꞌayákón, ngotꞌe̱ ꞌne̱, tjiín ngaꞌniú, tsi̱ꞌe̱ nga ko̱síko̱jo ngayeje xota̱ xi tjíchjatꞌayákoón.

Currently Selected:

Xota̱ Ebreoo̱ 2: MAIX

Highlight

Compare

Copy