Xota̱ Ebreoo̱ 1

Bi̱ tsꞌén tjibóko nga Néná tsíchji̱a̱joná nga katsꞌénkjién ndií

1Ni̱xtjin xchá jàn, Néná kjín ndi̱yà ko̱jo ja̱ kje̱ꞌe ja̱ kje̱ꞌe tsꞌén tsíchji̱a̱jo xota̱ xi xcháná nga katsꞌénkjién jáchji̱ni̱e̱ꞌe̱én. 2Kó ngotꞌe̱ ꞌne̱, kui ni̱xtjin xi kjifetꞌaa̱, Néná katsangiya ndií, kó kuí xí katsꞌénkjién nga tsíchji̱a̱joná, kó kuí boá xi katsꞌénkꞌasꞌiee̱n ngayeje nii̱, ko̱jo ta̱ngatꞌanii̱ kui nga Néná katsꞌénda ngayeje nga̱sondiee̱ ko̱jo ndiꞌakꞌajmii̱.

3Kuí ndií xi tsꞌentsíjen kjo̱a̱jee̱ Néná, kó kuí boá xi bokó xikótsꞌèn tjíjii̱n Néná, kó kuí boá xi tsꞌénkꞌíndo ngayeje ni xi tjiín, ta̱ngatꞌanii̱ ngaꞌniuú én xí chji̱a̱. Ngije katsꞌéntsjiejónná jé xí tjínná ngindyi̱ko̱n Néná, ki̱a̱ kisꞌijña ndiꞌakꞌajmii̱ nga fojnií Néná xi tsꞌénbotixómaá.

Bi̱ tsꞌén tjibóko nga ndií Néná boá xi nkꞌa ngase xaá ta̱bo̱a̱jínnii̱ ndítsjiee̱

4Kuí ndií Néná xí nkꞌa ngase kiniꞌán xaá ta̱bo̱a̱jiín ndítsjiee̱, ngatꞌa̱ ta̱kuítsí bo̱a̱ xi ndí ngototoo̱ Néná. 5Néná, bi̱ katsoó ndií:

Jí xí ndína Ji,

Án xí Na̱ꞌmíi̱ An, ngotꞌe̱.

Kó kui nii̱ jmí tsi ngo ndítsjie xi bo̱a̱ katsoó.

Kó Néná, ti̱ bi̱ ti̱ katsó kjo̱a̱a̱ ndií nga:

Án xí Na̱ꞌmii̱ kui ka̱ma An,

kó Kuí xí ndína ka̱ma Kui.

6Kó kjiꞌanga katsangiya ndí xí tjoón kui nga̱sondiee̱, bi̱ katsó:

Ngayeje ndítsjiee̱ Néná ngatsꞌéndíkón.

7Kó kjénní nga kjo̱a̱a̱ ndítsjiee̱, bi̱ tsó Néná:

Ndítsjiee̱, kuí xí xikoó tsi tjo̱o̱,

kó moso̱na, kuí xí xikoó tsi ndiꞌií.

8Kó Néná nga chji̱a̱ kjo̱a̱a̱ ndií, bi̱ tsó:

Ji Ne, ta̱ kjiꞌání nga Ji xi ko̱ti̱xome,

kixi̱ sa̱tíxoma ngi̱ndie nínga botíxome Ji.

9Jè kiniꞌíntjé ni xi kixi̱i̱, kó kiniꞌínchꞌí ji ni xi ndajiín,

kuíni nga Néná je jaꞌájiin, kui Ne xi tse̱,

kó kuí xí katsjaá tsie kjo̱a̱tsja, tsie ngase ta̱bo̱a̱jiín ndítsjiee̱.

10Kó ti̱ bi̱ ti̱ tsó nga:

Ji Ndi̱a̱, Jí kiniꞌínde Ji nga̱sondiee̱, ndeskande koó nga ítjatsꞌennii̱,

kó ti̱ ndse̱ boá xi katsꞌénda ndiꞌakꞌajmii̱ nga.

11Ngayeje kui nii̱ xi kju̱i̱e̱, ta̱nga Ji ngatsjéni̱xtjin nga ku̱i̱ndyin.

Kó ngayeje kui nii̱ xi ka̱maxchá xikoó ngo ńjño xi chajá.

12Kó kꞌuíchꞌi̱ Ji xikótsꞌèn fochꞌo̱ ngo ńjño,

kó sa̱síkjo xikoó ngo xota̱ xi bosíkjo ńjñoo̱,

Ta̱nga Ji, ko̱si̱kjoyejín Ji,

kó jmíni̱xtjin ka̱maxchá Jí.

13Néná, bi̱ katsoó ndií, kó jmí tsi ndítsjiee̱ xi bi̱ katsoó:

Ti̱ndyintꞌení nga fojnína nínga botixoma An,

ngaskande nga kꞌuindo An ngindie ndsa̱ki kondra̱ tse̱.

14A mí tsí ngayeje ndítsjiee̱ nga kui xi ndyi̱tsꞌèn xaá Néná, kó nga kuí xí kanangiya, tsi̱ꞌe̱ nga kui xi sa̱ꞌiín kjo̱a̱nda kui xota̱ xi sa̱ko̱ó kjo̱a̱ꞌnaxiéꞌaá.

Currently Selected:

Xota̱ Ebreoo̱ 1: MAIX

Highlight

Compare

Copy