Xota̱ Ebreoo̱ 3

Bi̱ tsꞌén tjibóko nga Kjisoo̱ nkꞌa ngase xaá ta̱bo̱a̱jínnii̱ Moisee̱

1Kó kuíni ntsꞌie, jún xi xota̱ na̱xi̱ńdá tsjiee̱, jún xí je tsíchji̱a̱jnú Néná, tsi̱ꞌe̱ nga kui ko̱ndókjo̱a̱nijnú, ti̱ꞌankjó cha̱n cha̱njnú kjo̱a̱a̱ Kristo̱ Kjisoo̱ kui xi apostroo̱ Néná, ko̱jo xi chináꞌmi xi ꞌniú nkꞌa xaá, kjo̱a̱a̱ kjo̱a̱sꞌijin xi tikónná. 2Kjisoo̱ kixi̱ katsꞌén xaá ngindyi̱ko̱n xi katsjaá kui xaá, xikótsꞌèn Moisee̱ kixi̱ katsꞌén xá xí katseꞌeé ngi̱jii̱n ngayeje xotaa̱ Néná. 3Ngatꞌa̱ Kjisoo̱, tsie ngase kjo̱a̱je tjiín ta̱bo̱a̱jínnii̱ Moisee̱, kó mejénjne̱ nga xcha̱jnú nga xotaa̱ Néná, kuí boá xi kamá ngo ndiꞌa xi katsꞌénda Néná, kuíni nga ꞌniú ngase yandikón ngo xota̱ xi katsꞌénda ndiꞌaa̱, ta̱bo̱a̱jiín kui ndiꞌaa̱. 4Ta̱jñà ndiꞌaní chjiéngá tjín xí sa̱ꞌínda, ta̱nga Néná boá xi katsꞌénda ngayeje nii̱.

5Kó Moisee̱ nga ja̱koxi̱, ngo moso̱ xi kixi̱ katsꞌén xaá kamá ngi̱jii̱n xotaa̱ Néná, kó akó ni xi jaskan ka̱tso̱yà Néná, 6ta̱nga Kristoo̱, nga kui xi ndií Néná, kixi̱ tsꞌén xaá nga botixómaá ndiꞌaa̱ Néná, kó kui ndiꞌaa̱ ñá boá, bo̱a̱ ka̱ma tsi ꞌniú sꞌi̱jinná, ko̱jo tsi ka̱maꞌniátakón nga tsja ka̱máná nga xchiyàa̱ ni xi tsja̱aná Néná.

Bi̱ tsꞌén tjibóko ni xi kamaá xota̱ xi katsꞌénkitikjo̱a̱ yojoo̱

7Kó kuíni nga, ti̱ꞌansénjnúu̱ xikótsꞌèn tjítꞌa ni xi tsó A̱si̱énni̱xtjii̱n Néná:

Tsi ngotꞌe̱ ko̱nda̱ꞌyájnú nda̱a̱.

8Ngata̱ niꞌántajajínjnú ini̱ma̱jnú,

xikoó kui xota̱ katsꞌénkitikjo̱a̱ yojoo̱,

kó askotꞌayákónna ki̱a̱ nangi kixií.

9Nínga xota̱ tji̱e̱ xchájnú askotꞌayákónna,

ndatsi yichán nó kamábe xá xí katsꞌen An.

10Kuíni nga katsꞌenxchánjo̱ An kui xotaa̱,

kó bi̱ kixian An: “Ngatsjéni̱xtjin nga tjimá kichajá ngi̱jii̱n ini̱ma̱a̱,

kó mejénjiín ko̱e̱je̱tji̱ngii̱ ndi̱yàna.”

11Kó kuíni nga katsꞌenxchán Án, ja̱koxi̱ nga bi̱ sa̱ꞌin An kixiáa̱n:

“Kꞌo̱sꞌienjín kui xotaa̱ ngi̱ndie xi tsjàa̱ nínga tsꞌénkjaꞌyá xota̱ xi tsa̱ꞌa̱n.”

12Chónjnú yojojnú ntsꞌie, nga ngojín jún xi ꞌbeé ngo ini̱ma̱ xi ta̱nisién ndajín, ko̱jo tsi xi sꞌijinjiín tsi̱ꞌe̱ nga xín si̱ꞌankjaꞌájnúu̱ yojojnú kui Néná xí tikoón. 13Ta̱sá ndyiojón ndyiojón te̱ꞌéngaꞌniújnúu̱ xingi̱jnú, tji̱e̱nga kꞌuijñá kui ni̱xtjii̱n ngotꞌe̱, xikó tsó xo̱jo̱n eén Néná, tsi̱ꞌe̱ nga ngojín xi sa̱ꞌíntajá ini̱ma̱a̱ ta̱ngatꞌanii̱ nga ꞌboṉcha̱joná jeé. 14Ngatꞌa̱ jè nijan tjisákóná ni xi tsi̱ꞌe̱ Kristoo̱, tsi ngaskande nga kju̱i̱e̱tꞌa ꞌniú ku̱i̱ndyionjo̱ kui kjo̱a̱ꞌniátakón xi kisꞌiená nga tjón.

15Xikó je katsó xo̱jo̱n eén Néná:

Tsi ngotꞌe̱ ko̱nda̱ꞌyájnú nda̱a̱.

Ngata̱ niꞌántajajínjnú ini̱ma̱jnú,

xikoó kui xota̱ xi katsꞌénkitikjo̱a̱ yojoo̱.

16Ngatꞌa̱ ꞌyání xi katsꞌénkitikjo̱a̱ yojoo̱, ngije ja̱bo̱a̱ je tsintꞌieé nda̱a̱ Néná. A ngayejejín kuí xota̱ xi jatjoni nangi Ejiptoo̱ xi kijíjo̱ Moisee̱. 17Kó ꞌyá xotaa̱ bo̱a̱ xi Néná yichán nó katsꞌénxchánjo̱ kui. A kuijín xota̱ xi katsꞌénjeé, kui xi ixó nga jesón ki̱a̱ nangi kixií. 18Kó ꞌyá xotaa̱ xi Néná katsjaá tsꞌoa, nga bi̱ sa̱ꞌin an katsoó, nga tsíchji̱a̱jo nga kꞌo̱sꞌienjín kui xotaa̱ ngi̱ndie xi tsja̱á nínga tsꞌénkjaꞌyá xota̱ xi tsi̱ꞌe̱. A mí tsi kui xota̱ xi tsintꞌiéꞌénjiín. 19Kó jè ya nga kasakojiín kui ngi̱ndie nínga niꞌánkjaꞌyaá, ta̱ngatꞌanii̱ nga kisꞌijinjiín.

Currently Selected:

Xota̱ Ebreoo̱ 3: MAIX

Highlight

Compare

Copy