Filemoo̱ 1

1Án boá xi ꞌmína Pablo̱, kó tikón ꞌniú án ta̱ngatꞌanii̱ nga tsꞌénꞌbini̱jmì án Kristo̱ Kjisoo̱, ko̱jo nda̱ ntsꞌié xi ꞌmí Timoo̱ niꞌántindejne̱ ji, nda̱ ntsꞌie Filemo̱, ji xi tjójne̱ ngatꞌa̱ ti̱ xaá Kristoo̱ tiniꞌín ji nga. 2Ti̱ niꞌántindejne̱ na̱ ndichjá xi ꞌmí na̱ Apiyaa̱, ko̱jo nda̱ xi ꞌmí Arkipoo̱, nda̱ xi nijan tsꞌénkjántjéjo̱ná ni xi ndaa̱. Niꞌántindejne̱ xota̱ na̱ngo̱xi̱ xi matikó ndiꞌàa̱ nga Filemo̱. 3Néná xí Na̱ꞌminá, ko̱jo Ndi̱a̱ná Jesukristoo̱, ngatsjájnú kjo̱a̱ndaa̱ ko̱jo kjo̱a̱xioó. 4Nga foaꞌátsjienna ji nga chjiáa̱ Néná. Ngatsjéni̱xtjin tsjàa̱ ndokꞌóchjì, 5ngatꞌa̱ jè kiꞌmíyàna kókjiꞌi tjoó xota̱ tsjiee̱ Néná, ko̱jo nga ꞌniú sꞌijii̱n Ndi̱a̱ná Kjisoo̱. 6Míꞌáa̱ Néná tsi̱ꞌe̱ nga kui xi je kisꞌijii̱n Kristoo̱ ta̱ngatꞌanii̱ kui kjo̱a̱sꞌijin xi tjiín ji, nda tsꞌén ka̱makjiín ngayeje ni nda xi ka̱ma si̱ꞌán, ta̱ngatꞌanii̱ Kristo̱ Kjisoo̱. 7Ji ntsꞌie, achichí tsjátjínna kó tsjangaꞌniúna kjo̱a̱tjó xi tjiín, ngatꞌa̱ jí xí katseꞌé ngaꞌníi̱ ini̱ma̱a̱ xota̱ tsjiee̱ Néná. 8Kó kuíni nga, ndatsi ta̱ngatꞌanii̱ jaꞌeén Kristoo̱ nga tikónna ngo kjo̱a̱nda tsi̱ꞌe̱ nga an xi kotixomaa ji, ni xi si̱ꞌin, 9ta̱nga ta̱sá mejénna nga ꞌniú kuíꞌaá ta̱ngatꞌanii̱ kjo̱a̱tjoó. An, Pabloo̱, nga je kamáxchá án, kó nga ta̱ngatꞌanii̱ nga tsꞌénꞌbini̱jmì án Jesukristoo̱ nga tikón ꞌniú an ngotꞌe̱, 10ꞌniú míꞌaá nga si̱ꞌìi̱n Onésimoo̱ ngo kjo̱a̱nda, kui nda̱ xi xikoó tsi ndína kamá, nga kixiyàa̱ eén Néná ki̱a̱ ngi̱ya ndo̱bo̱a̱ya̱à. 11Kui nda̱ xi kje̱ꞌe ni̱xtjin kamáchjiénjiín ji, ta̱nga ngotꞌe̱ ꞌne̱, nga jó ñá boá xi kjima chjiénná. 12Kꞌi̱e̱ sangiya ngiñaá ingo ndi̱yà, nda ti̱ꞌinje̱ ji, xikoó tsi án má xi kjóchó koo̱n. 13Mejénna nga kꞌi̱e̱ kꞌuiñájo̱na katsaki, tsi̱ꞌe̱ nga kui xi kꞌuijñá ngi̱ndiée̱, nga sa̱ꞌínsénna tji̱e̱nga tikòn an ndo̱bo̱a̱yà ta̱ngatꞌanii̱ nga tsꞌénꞌbini̱jmì án éntjatsi̱e̱e̱ Néná. 14Ta̱nga mejénjínna katsꞌen an ngo ni tsi jijín xi bo̱a̱ se ji nga sa̱ꞌin an, tsi̱ꞌe̱ nga kui kjo̱a̱nda xi tiniꞌínní, jmí tsi kjo̱a̱ꞌniú ka̱ma, ta̱sá ngo ni xi si̱ꞌin ji ngayeje ini̱màa̱. 15Bee̱ko̱n an nga Onésimoo̱ jaꞌáxíntꞌaxínmaraa yojoo̱ ji chiboa ni̱xtjin, tsi̱ꞌe̱ nga ngotꞌe̱ ꞌne̱, ki̱a̱ kꞌuijñájòo̱ ngatsjéni̱xtjin. 16Jmí tsí xikoó ngo moso̱ xi kastiñá, ta̱sá xikoó ngo xota̱ xi chjí ngasenii̱ ta̱bo̱a̱jiín ngo moso̱ xi kastiñá, xikoó ngo nda̱ ntsꞌié xi tjó, ngatꞌa̱ achichí tjóna kui nda̱a̱, ta̱nga chjiéngá ꞌniú ngase ka̱ma tjoó ji, jmí tsi ta̱ kjo̱a̱a̱ nga xota̱ tsi, ta̱sá kjo̱a̱a̱ nga ntsꞌié boá. 17Kó kuíni nga, tsi xikoó nga ntsꞌie tꞌísení, ngatꞌa̱ ti̱kuíní ni xi sꞌijinná, nda ti̱ꞌinje̱ xikoó tsi án má xi kjóchó koo̱n. 18Kó tsi tjín ni xi ndajínkjiꞌi xi katsꞌénjoo̱, ko̱jo tsi tjín ni xi tjitjieén tse̱, an chje̱ꞌéchjíní. 19An Pabloo̱, án má xi tjítsꞌenda an kui xo̱jo̱o̱n, kó bi̱ xian an: Án boá xi kꞌuichjí án. Ta̱nga ka̱mana sa̱ꞌinkjaꞌátsjiée̱n ni xi tjitjíe̱n tsa̱ꞌa̱n, ngatꞌa̱ ta̱ngatꞌanií én xí íni̱jmi̱ì nga tjiín kjo̱a̱mindyion ngindyi̱ko̱n Néná. 20Jo̱o̱n ntsꞌie, míꞌaá kui kjo̱a̱ndaa̱, ta̱ngatꞌanii̱ nga tjoó Ndi̱a̱ná. Ngatꞌaa̱ Kristoo̱ boá nga ko̱e̱ꞌé ngaꞌníi̱ ini̱ma̱na tsi bo̱a̱ si̱ꞌin. 21Ji xí tjítsꞌenꞌindoó kui xo̱jo̱o̱n, ngatꞌa̱ be án nga ko̱nda̱ꞌyéꞌínní, kó be án nga tsꞌatio ngase si̱ꞌinkjatjosén ji ni xi tsꞌénmíꞌaá. 22Ingo ni ngase, tꞌíjñindení ngo ngi̱ndie nínga tsjayojo ndiꞌàa̱, ngatꞌa̱ tsꞌénkoya an nga Néná tsja̱ndièna nga kjuínkónjnúꞌun, ngatꞌa̱ jún boá xi ndyi̱chjiáꞌájnú kui nii̱ nga. 23Tinde xò bo̱a̱ tsó Epafraa̱, nda̱ xi nijan tikónjo̱ an ndo̱bo̱a̱yà, ta̱ngatꞌanii̱ nga sꞌijii̱n Kristo̱ Kjisoo̱ nga. 24Ko̱jo tinde xò bo̱a̱ tsó Markoo̱, ko̱jo Aristarkoo̱, ko̱jo Ndemaa̱, ko̱jo Rkaa̱, kuí boá kui jaá xí ndyi̱bosikójona xá xí tjítsꞌen an. 25Kjo̱a̱ndaa̱ Ndi̱a̱ná Jesukristoo̱ ngasꞌijñajii̱n ini̱ma̱jnú.

Currently Selected:

Filemoo̱ 1: MAIX

Highlight

Compare

Copy