Ajeoo̱ 2

Xi ma joó én xí katsóyà Ajeoo̱

1Ni̱xtjin kan ngoo̱ sá xí ma yitonii̱, Ndi̱a̱ná kui xi Néná ti̱ tsíchji̱a̱jo nginí nda̱chji̱ni̱e̱ꞌén Ajeoo̱, nga bi̱ katsoó:

2Ndókjo̱e̱je ji Sorobabee̱l ndií Salatiee̱l, xtitjoón nangi Jundáa̱, ko̱jo Josuee̱ ndií Josandaa̱k, kui xi chináꞌmi ngito̱ko̱o̱, ko̱jo xota̱ na̱xi̱ńdá xí ngasee̱, kó bi̱ tꞌíi̱n:

3ꞌYá xota̱ xi síndo ngase ngi̱jinjnú xi kamábe kjo̱a̱tsjakjiꞌi xi tjón kisꞌiee̱ kui Ndiꞌaa̱.

Kó kótsꞌèn be ngotꞌe̱ ꞌne̱.

A mí tsí nde ngiti̱ jmí ni chjíjiín kjo̱a̱a̱ xikó kisꞌie nga tjón tjón.

4Ja̱ ngotꞌe̱ ꞌne̱ ji Sorobabee̱l, ti̱ꞌingaꞌní jí. Tsó Ndi̱a̱ná kui xi Néná,

kó ti̱ ti̱ꞌingaꞌní jí nga Josuee̱ ndií Josandaa̱k, ji xi chináꞌmi ngito̱ko̱o̱ ji,

kó ti̱ ngatsꞌénngaꞌniú ngayeje xota̱ na̱xi̱ńdá xí tjín kuí tꞌanangii̱ nga. Tsó Ndi̱a̱ná kui xi Néná,

kó ti̱ꞌanxájnú, ngatꞌa̱ ki̱a̱ tikónjo̱jnúꞌun. Tsó Ndi̱a̱ná kui xi Néná xí tsi̱ꞌe̱ jájuún.

5Ngatjaꞌátsjienjnú ni xi indajo̱jnúꞌun nga akjatjojnú ki̱a̱ nangi Ejiptoo̱,

kjiꞌanga A̱si̱énni̱xtjinna to̱kó ki̱a̱ kisꞌijña ngamasienjnú,

nga bi̱ kixian An: Ngata̱ ndakonjínmájnú.

6Ngatꞌa̱ bi̱ tsó Ndi̱a̱ná kui xi Néná xí tsi̱ꞌe̱ jájuún:

Ngi chiboa ngase ni̱xtjin chaja nga kꞌuitsanieyá An nkꞌajmii̱,

ko̱jo tꞌanangii̱, ko̱jo ndáchíkoón, ko̱jo tꞌanangi nínga kixií.

7Kꞌuitsanieyá An ngayeje na̱xi̱ńdaá,

kósꞌe̱ kjiꞌá boá nga kji̱ndi̱bá kjo̱a̱cho̱n xi tjiín ngayeje na̱xi̱ńdaá,

kó kꞌuikítsie máa̱ kjo̱a̱je kui Ndiꞌaa̱. Tsó Ndi̱a̱ná kui xi Néná xí tsi̱ꞌe̱ jájuún.

8Án tsa̱ꞌa̱n to̱ntiboaa̱, ko̱jo to̱nsinieé. Tsó Ndi̱a̱ná kui xi Néná xí tsi̱ꞌe̱ jájuún.

9Kjo̱a̱je xi jaskan kꞌuieé kui Ndiꞌaa̱, je ngase ka̱ma, ta̱bo̱a̱jiín xi tjón kisꞌiee̱,

kó kꞌi̱e̱ bí nínga tsjàa̱ kjo̱a̱xió xotaa̱. Tsó Ndi̱a̱ná kui xi Néná xí tsi̱ꞌe̱ jájuún.

Ni xi katsóyàtjón Néná

10Ni̱xtjin kan nijoón sá xí ma nijaa̱n, nó xí ma joó nga atíxoma nda̱ re Ndariyoo̱, Ndi̱a̱ná kui xi Néná ti̱ tsíchji̱a̱jo nginí nda̱chji̱ni̱e̱ꞌén Ajeoo̱, nga bi̱ katsoó: 11Bi̱ tsó Ndi̱a̱ná kui xi Néná xí tsi̱ꞌe̱ jájuún: Tasíyée̱ já chináꞌmi xi be kjo̱a̱kitii̱, nga bi̱ tꞌíi̱n:

12Tsi tjín xí nga̱ndee̱ ńjño xi yajá kjo̱a̱ꞌajon chií yojoo̱ cho̱ xi je Ndi̱a̱ná kui xi Néná kiniꞌánkꞌasꞌiee̱n, ko̱jo tsi pan, ko̱jo tsi nichinie, ko̱jo tsi bino̱, ko̱jo tsi isti̱, ko̱jo tsi kje̱ꞌe ngase nichinie, kó, a ka̱matsjie kuí ńjñoo̱ nga.

Kó já chináꞌmii̱, bi̱ katsó:

—Jmí.

13Kó bi̱ katsó ngase Ajeoo̱:

—Kó tsi tjín xí je kamándándí nga katsꞌénjo̱ ngo yojo kꞌiee̱n, kó sa̱ꞌínjo̱ ngo kui nii̱, a ka̱mandándí kuí nii̱.

Kó bi̱ katsó kui já chináꞌmii̱.

—Jo̱o̱n, ka̱mandándí boá.

14Kósꞌe̱ bi̱ katsó ngase Ajeoo̱:

—Bo̱a̱ má kón ngayeje kui xotaa̱, ko̱jo kui na̱xi̱ńdá xí tikón ngindyikón Án, tsó Ndi̱a̱ná kui xi Néná. Ngatꞌa̱ ngayeje xá xí tsꞌén, ko̱jo ni xi tsꞌenkꞌásꞌién ki̱a̱a̱, ni xi ndándí boá. 15Kuíni nga ngotꞌe̱ ꞌne̱, ti̱ꞌankjójnú ndeskande ngotꞌe̱, ndeskande ngindiee̱ nga kꞌuíndojnúu̱ nga ngo nga ngo ndi̱jo̱ Ndiꞌaa̱ Ndi̱a̱ná kui xi Néná. 16Ngindiee̱ nga ka̱ma kui nii̱, kjiꞌanga tjín xí kijíkjaꞌá kan koxta̱ to ndso̱ko̱a̱n ṉño̱pan, ta̱ tie tsí má xi kasakoo̱, kó kjiꞌanga tjín xí ichítié tina̱xa̱ bino̱ kijíkꞌaxié ki̱a̱ nínga mandaa̱, ta̱ kan tsí má xi tsꞌaxié. 17Katsangiyajnúꞌun tjo̱ sibé, ko̱jo ndiꞌí, ko̱jo ndókoá ki̱a̱ ngayeje xá xí kiniꞌánjnú, ta̱nga nde bo̱a̱ tsꞌén kiniꞌánkꞌoyàjínjnú yojojnú nga kjindibáchonjnúꞌun. Tsó Ndi̱a̱ná kui xi Néná.

18Ti̱ꞌankjójnú ndeskande ngotꞌe̱, ndeskande ngotꞌe̱ nga ni̱xtjin kan nijoón sá xí ma nijannii̱, ndeskande kui ni̱xtjin nga ikindyia xoó Ndiꞌaa̱ Ndi̱a̱ná kui xi Néná, ti̱ꞌankjójnú. 19A to̱kó tjín ngase to xi ma chinie ki̱a̱ ngi̱ndie nínga chjaꞌátjó ni xi maxchaá. Kji̱e̱ fochójín cha̱a̱n tostsi̱je̱è, ko̱jo toꞌingoo̱, ko̱jo tongranandaa̱, ko̱jo toꞌoliboo̱, ta̱nga ndeskande ngotꞌe̱ nga An sa̱ꞌinchikonñéjnúꞌun.

Ni xi katsóyàtjón Néná kjo̱a̱a̱ ni̱xtjin xi fetꞌanii̱

20Ni̱xtjin kan nijoón ti̱kuii saá, Ndi̱a̱ná kui xi Néná, ti̱ tsíchji̱a̱jo nginí nda̱chji̱ni̱e̱ꞌén Ajeoo̱, nga bi̱ katsoó:

21Ndókjo̱e̱je ji Sorobabee̱l, xtitjoón nangi Jundáa̱, kó bi̱ tꞌíi̱n: Án boá xi sa̱ꞌinkjatsié Án ngayeje nkꞌajmii̱ ko̱jo tꞌanangii̱. 22Sa̱ꞌintsobéjìi̱n ngi̱ndie nínga botíxomaa̱, kó sa̱ꞌin An nga si̱ꞌankjie ngaꞌniuú ngi̱ndie nínga botíxoma xi tjiín na̱xi̱ńdaá. Ko̱jo sa̱ꞌinkꞌafóyá An karro̱ kjo̱a̱xcha̱án, ko̱jo xota̱ xi ndyi̱a̱, kó ku̱i̱xo̱ ndi̱je̱e̱, ko̱jo xota̱ xi síndosoón, kó ja̱kꞌi̱e̱ ja̱ngaján nga ti̱kuii xkjín ki̱cha̱ndojó sa̱ꞌínkjiesónni. 23Kui ni̱xtjin jàn. Tsó Ndi̱a̱ná kui xi Néná xí tsi̱ꞌe̱ jájuún. Ji Sorobabee̱l ndií Salatiee̱l, moso̱ xi tsa̱ꞌa̱n, jí boá xi ka̱ma ji xikoó ngo sti̱ngaro xi yaꞌa chi̱bo̱a̱a̱ seyo̱na, ngatꞌa̱ jí boá xi je jaꞌajii̱n. Tsó Ndi̱a̱ná kui xi Néná xí tsi̱ꞌe̱ jájuún.

Currently Selected:

Ajeoo̱ 2: MAIX

Highlight

Copy

Compare