Sakariyaa̱ 1

Néná je tikónda nga sa̱ꞌínjetakoón xotaa̱

1Sá xí ma jii̱n nó nga tsꞌénbotixómá nda̱ re Ndariyoo̱, Néná tsíchji̱a̱jo nda̱chji̱ni̱e̱ꞌén xi ꞌmí Sakariyaa̱ ndií Berekiyaa̱, ndíndeè Indoo̱, nga bi̱ katsoó: 2Néná achichí ꞌniú katsꞌénxchán kjo̱a̱a̱ xota̱ xi xchájnú. 3Kuíni nga ngotꞌe̱ ꞌne̱, bi̱ tꞌíi̱n:

Bi̱ tsó Néná xí tsi̱ꞌe̱ jájuún: Ndibáchon nginíjnúꞌun, tsó Néná xí tsi̱ꞌe̱ jájuún, kó Án kjuínkón nginíjnúꞌun, tsó Néná xí tsi̱ꞌe̱ jájuún. 4Ngata̱ bo̱a̱jín kón májnú xikoó xota̱ xi xchájnú, kui xi jáchji̱ni̱e̱ꞌén xí tjoón, bi̱ katsoó nga tsíchji̱a̱jo: Bi̱ tsó Néná xí tsi̱ꞌe̱ jájuún: Ti̱ꞌankꞌoyàjnú ndi̱yà xí ndajín xi timájnú, ko̱jo kjo̱a̱a̱ ni xi ndajín xi ndyi̱niꞌánjnú. Ta̱nga kui xotaa̱ tsintꞌiéjín, ti̱nde katsꞌénsénjínna. Tsó Néná xí tsi̱ꞌe̱ jájuún.

5Kó xota̱ xi xchájnú, ñá síndo ngotꞌe̱ ꞌne̱, kó jáchji̱ni̱e̱ꞌe̱én, a ngatsjéni̱xtjin nga síndo. 6Ta̱nga énna, ko̱jo kjo̱a̱botíxoma xi katsja an xi kixiyàa̱ moso̱na, kui xi jáchji̱ni̱e̱ꞌénna, a jachótꞌajínrií kui eén xota̱ xi xchájnú. Kósꞌe̱ kui xotaa̱ katsꞌénsénna nga bi̱ katsó: Xikó má katsó Néná xí tsi̱ꞌe̱ jájuún nga sa̱ꞌínjo̱ná kjo̱a̱a̱ ndi̱yà nínga ndyi̱mongín ko̱jo xáná, bo̱a̱ má kjiꞌi ni xi katsꞌénjo̱ná.

Ndi̱je̱ xi kjín a̱sie̱én

7Ni̱xtjin kan nijoón sá xí ma tiengonii̱, kui sá xí sebaa̱t ꞌmií, nó xí ma joó nga tsꞌénbotixómá nda̱ re Ndariyoo̱, Néná tsíchji̱a̱jo nginí nda̱chji̱ni̱e̱ꞌén xí ꞌmí Sakariyaa̱ ndií Berekiyaa̱, ndíndeè Indoo̱, kó bi̱ katsoó: 8Nga jñoó kamábe an ngo nda̱ xi tikónsoón ngo ndi̱je̱ iní, kui xi ki̱a̱ tikónjin ngi̱jii̱n xka̱ mirto̱ xi kjiꞌi ki̱a̱ nínga chꞌa̱yaa̱, kó nga̱xto̱n kui, kisꞌie ngase ndi̱je̱ xi iní, ko̱jo xi chjanga, ko̱jo xi tiboa, 9kósꞌe̱ bi̱ kixiáa̱n:

—Ndi̱a̱ xi tsa̱ꞌa̱n, ꞌyá kuí bo̱a̱ xi̱ꞌbi̱.

Kó kui ndítsjie xi tsꞌénchji̱a̱jona, bi̱ katsóna:

—Án boá xi kokoo, ꞌyá kuí bo̱a̱ xi̱ꞌba̱.

10Kó kui nda̱ xi ki̱a̱ tikónjin tsjé ki̱a̱ ngi̱jii̱n xka̱ mirtoo̱, bi̱ katsóna:

—Kuí bí kui xotaa̱ xi katsangiya Néná, tsi̱ꞌe̱ nga ko̱e̱je̱ ngayeje són nga̱sondiee̱.

11Kósꞌe̱ kui jaá katsóyaà ndítsjie xi Néná, kui xi tikónjin ki̱a̱ ngi̱jii̱n xka̱ mirtoo̱, nga bi̱ katsoó:

—Jè tsangínjne̱ ngayeje són nga̱sondiee̱, kó xiyaa nga xió kjíꞌí, tjínrií kjo̱a̱xió nga̱sondiee̱.

12Kósꞌe̱ kui ndítsjie xi Néná, bi̱ katsó nga tsíchji̱a̱:

—Ji Ne xi tsi̱ꞌe̱ jájuún, ngaskande kjiꞌání nga ni̱ma̱ ka̱maa̱ na̱xi̱ńdáꞌniú Jerusalee̱n, ko̱jo na̱xi̱ńdáꞌniú xí chji̱a̱ni xota̱ tji̱e̱e̱ Jundáa̱, kui xi je ichítié ko̱jo kan nó nga tiniꞌínxchínje̱ ji.

13Kó kui ndítsjie xi tsꞌénchji̱a̱jona, Néná tsíchji̱a̱jo én nda ko̱jo én xí tsꞌéndájónná. 14Kósꞌe̱ kui ndítsjie xi tsꞌénchji̱a̱jona, bi̱ katsóna:

ꞌNiú ndókjo̱e̱ ji nga bi̱ sé jí:

Bi̱ tsó Néná xí tsi̱ꞌe̱ jájuún:

Achichí ꞌniú chi̱ni̱ kjima an kjo̱a̱a̱ na̱xi̱ńdáꞌniú Jerusalee̱n,

ko̱jo kjo̱a̱a̱ na̱xi̱ńdáꞌniú Sioo̱n,

15ta̱nga achichí ꞌniú tjítsꞌenxchán án

kjo̱a̱a̱ kui na̱xi̱ńdá xí ti̱kuíní bo̱a̱ xi kjimaꞌniátakón yojoo̱,

kui xi be nga tjítsꞌénxchánjo̱ chií án xota̱ na̱xi̱ńdána,

ta̱nga ta̱sá má ndyi̱tsꞌènꞌniú ngase kjo̱a̱xtina kjo̱a̱a̱ na̱xi̱ńdá Israee̱l.

16Kuíni nga bi̱ tsóni Néná:

Achichí ni̱ma̱ je kamána na̱xi̱ńdáꞌniú Jerusalee̱n,

ki̱a̱ boá nínga ka̱manda Ndiꞌana, tsó Néná xí tsi̱ꞌe̱ jájuún,

kó jè tsjién ńchjón ki̱a̱ nga̱soón na̱xi̱ńdáꞌniú Jerusalee̱n.

17ꞌNiú ndókjo̱e̱ ngase ji, nga bi̱ sé jí: Bi̱ tsó Néná xí tsi̱ꞌe̱ jájuún:

Ingo ndi̱yà nginí nga achichí kjo̱a̱cho̱n kꞌuieé na̱xi̱ńdáꞌniú xí tsa̱ꞌa̱n,

kó Néná sa̱ꞌíndajon nginií na̱xi̱ńdáꞌniú Sioo̱n,

kó ingo ndi̱yà nginí nga na̱xi̱ńdáꞌniú Jerusale̱n boá xi na̱xi̱ńdáꞌniú xí jaꞌájin kui ka̱ma.

Ndi̱ja̱a̱ ko̱jo já chji̱ni̱e̱ki̱cha̱a̱

18Jaskan iskjininkꞌa an kje̱n án, kó kamábe an nijón ndi̱ja̱, 19kó bi̱ kixiáa̱n kui ndítsjie xi tsꞌénchji̱a̱jona:

—Mí nii̱ bo̱a̱ xi̱ꞌbi̱.

Kó kuí, bi̱ katsóna:

—Kuí bí kui ndi̱ja̱a̱ xi bokó nga kastsojoboa xota̱ na̱xi̱ńdá Jundáa̱, ko̱jo na̱xi̱ńdá Israee̱l, ko̱jo na̱xi̱ńdáꞌniú Jerusalee̱n.

20Kó Néná akóna nijón xota̱ xi tsꞌénda ni tsjakoo̱n, 21kó bi̱ kixiáa̱n:

—Mí nii̱ bo̱a̱ xi sa̱ꞌín kui xotaa̱.

Kó kuí, bi̱ katsóna:

—Kuí boá kui ndi̱ja̱a̱ xi bokó nga kastsojoboa xota̱ na̱xi̱ńdá Jundáa̱, kui xi nde ta̱ꞌyajínni xi iskjininkꞌa to̱ko̱, ta̱nga kuí boá kui nii̱ xi je jeꞌekindyiándíkoón, tsi̱ꞌe̱ nga kꞌo̱jmingí ndi̱ja̱a̱ kui na̱xi̱ńdá xí iskjininkꞌa xotaa̱, kondraa̱ na̱xi̱ńdá Jundáa̱, tsi̱ꞌe̱ nga sa̱ꞌínkjatsón.

Currently Selected:

Sakariyaa̱ 1: MAIX

Highlight

Copy

Compare