Xota̱ Ngalasia̱ 6
6
1Jún ntsꞌie, tsi ngo xi kamáyà nga ngo jé tjítsꞌén, jún xi je tindyiónjnú xikótsꞌèn mejeén A̱si̱énni̱xtjii̱n Néná, chjiéngá ni̱ma̱takón ka̱majnú nga ko̱si̱ko̱jójnú, tsi̱ꞌe̱ nga sa̱ꞌíndaya yojoo̱ kui xi tjítsꞌénjeé, ta̱nga chónjnú yojojnú nga ngo nga ngojnú, tsi̱ꞌe̱ nga jmí tsi ko̱jo jún chjátꞌayákónjnú nga. 2Ja̱kꞌi̱e̱ ja̱ngaján tasíko̱jojnú xingi̱jnú xi ndyi̱foaꞌatio kjo̱a̱ni̱ma̱, kó nga bo̱a̱ si̱ꞌánjnú, bo̱a̱ tsꞌén nga ndyi̱niꞌánkjatjosónjnú kjo̱a̱kitii̱ Kristoo̱.
3Tsi tjín xí je maa̱ yojoo̱, kó ya nga bo̱a̱jín kjiꞌi ni xi bokó, ta̱ tsꞌénꞌboṉcha̱jo soboá tsí yojoo̱. 4Kó kuíni nga chjiéngá, nga ngo nga ngo ñá xchítꞌa so̱bo̱a̱ yojoná kjo̱a̱a̱ ni xi ndyi̱niꞌán, kó kjiꞌá boá nga tsja ka̱máná kjo̱a̱a̱ ni xi ndyi̱niꞌán, jmí tsi ta̱ngatꞌanii̱ kjo̱a̱a̱ ni xi ndyi̱tsꞌèn kje̱ꞌe xota̱. 5Ngatꞌa̱ chjiéngá, nga ngo nga ngo ñá, xi xꞌi̱a̱nijín ni xi ndyi̱niꞌán.
6Xota̱ xi tjibókoyaá éntjatsi̱e̱e̱ Néná, chjiéngá tsja̱á mostroo̱ chiboa ngayeje kjo̱a̱nda xi sa̱ko̱ó.
7Ngata̱ chꞌíṉcha̱jojínjnú yojojnú, ngatꞌa̱ ngojín xi ka̱maa̱ ko̱jno̱kie Néná. Ngatꞌa̱ ni xi ku̱i̱ꞌítji̱e̱ xotaa̱, kuí nii̱ xi kjo̱a̱ꞌátikó. 8Ngatꞌa̱ kui xota̱ xi ndyi̱tsꞌèn ni xi mejeén yojoo̱, kuí boá xi xikoó tsi xojmá xí ndajín xi ndyi̱ꞌbítji̱e̱, kó cha̱n xi kjo̱a̱ꞌátikó, kjo̱a̱bo̱ya boá. Ta̱nga kui xi ni xi mejeén A̱si̱énni̱xtjii̱n Néná xí ndyi̱tsꞌèn, kuí boá xi xikoó tsi xojmá xí nda xi ndyi̱ꞌbítji̱e̱, kó cha̱n xi kjo̱a̱ꞌátikó, kuí boá xi kjo̱a̱mindyioo̱n, ngatꞌa̱ A̱si̱énni̱xtjii̱n Néná boá xi sa̱ꞌínkꞌíndo ngatsjéni̱xtjin. 9Kó kuíni nga chjiénjín nga kju̱i̱e̱ndà nga si̱ꞌán ni xi ndaa̱, ngatꞌa̱ nga kjo̱chó ni̱xtjin, chja̱ꞌátikó kuí cha̱a̱n ni xi ikꞌítji̱e̱. 10Kó kuíni nga, ngatsjéni̱xtjin nga ka̱ma xi si̱ꞌán, si̱ꞌáa̱n ni xi nda ngayeje xotaa̱, kó ngase má kui xota̱ xi ti̱ Néná sꞌijii̱n kui nga.
Bi̱ tsꞌén íni̱jmì Pabloo̱ kjo̱a̱a̱ nga kisꞌiee̱ kjo̱a̱je kroo̱ Kristoo̱
11Tsitsíjenjnúu̱ kótsꞌèn yiꞌi katsꞌen an kui én xí tjítsꞌenda an ngotꞌe̱. 12Ngayeje xota̱ xi ndyi̱tsꞌènjnú kjo̱a̱ꞌniú, tsi̱ꞌe̱ nga si̱ꞌánjnúu̱ sirkunsisioo̱n yojojnú, kó bo̱a̱ ndyi̱tsꞌèn, ngatꞌa̱ mejeén nga nda sku̱i̱e̱ xotaa̱, kó mejénjiín nga tjín xí ko̱ngatji̱ngii̱, kuíni nga ndyi̱ꞌbini̱jmìjín kjo̱a̱a̱ kroo̱ Kristoo̱. 13Ngatꞌa̱ nde kui xota̱ xi tsꞌeén sirkunsisio̱n yojoo̱, ndyi̱tsꞌènkjátjosónjín kjo̱a̱kitii̱, ta̱nga mejeén nga jún si̱ꞌánjnúu̱ sirkunsisioo̱n yojojnú, tsi̱ꞌe̱ nga je kꞌo̱xié yojoo̱ nga ku̱i̱chji̱a̱, nga ta̱ngatꞌanii̱ kui nga je tikónjnú kui chi̱bo̱a̱a̱. 14Kjo̱a̱ ngaá án ꞌne̱, mejénjínna nga je kꞌoxié an yojona, ngototo kjo̱a̱a̱ ni xi katsꞌén Ndi̱a̱ná Jesukristoo̱ nga kꞌientꞌa kroo̱. Ngatꞌa̱ ki̱a̱ tꞌa kroo̱ jè kꞌienjo̱ an Kristoo̱. Kó ni xi tsi̱ꞌe̱ kui nga̱sondiee̱, jè ngiti̱ jmí ni bejín kjo̱a̱a̱ an, ti̱nde an, ngiti̱ jmí ni bejín an kjo̱a̱a̱ ni xi tsi̱ꞌe̱ kui nga̱sondiee̱. 15Jmí ni chjíjiín tsi kiniꞌánná, ko̱jo tsi kiniꞌánjínná sirkunsisioo̱n, ni xi chjínií, kuí boá nga xota̱ tja̱tsi̱e̱ katsꞌénná Néná. 16Ngayeje xota̱ xi ndyi̱fítji̱ngi kui kjo̱a̱botíxomaa̱, ngatꞌieé kjo̱a̱xió, ko̱jo kjo̱a̱ni̱ma̱takón, ko̱jo ngayeje xota̱ xi tsi̱ꞌe̱ Néná, xi xota̱ Israee̱l xi tsi̱ꞌe̱ Néná tjíꞌmií.
17Ngotꞌe̱ ꞌne̱ mejénjínna nga tjín xí sa̱ꞌínxtína, ngatꞌa̱ jè kjitꞌaa̱ yojona chi̱bo̱a̱ xi bokó, nga Ndi̱a̱ná Kjisoo̱ chjiá an.
Pabloo̱ bi̱ tsꞌén katsꞌénkjietꞌa xo̱jo̱o̱n
18Jún ntsꞌie, Ndi̱a̱ná Jesukristoo̱ ngatꞌíkitsiee̱ ini̱ma̱jnú kjo̱a̱ndaa̱. Bo̱a̱ kjiꞌi.
Currently Selected:
Xota̱ Ngalasia̱ 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
