Xota̱ Éfeso̱ 1

Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Éfeso̱

1Án boá xi ꞌmína Pabloo̱, nda̱ xi apostroo̱#1:1 “Xi kanangiyaa̱” tsó “nda̱ apostro̱” axa̱ “já apostro̱” nga én ngriengo̱. Jesukristoo̱ kamá, ngatꞌa̱ bo̱a̱ tsꞌén kamámejeén Néná, tsꞌentindejnúꞌun jún xota̱ xi tsjie ko̱jo xi sꞌijinjnú Kristo̱ Kjisoo̱, xi tindyiónjnú na̱xi̱ńdáꞌniú Éfeso̱. 2Néná xí Na̱ꞌminá ko̱jo Ndi̱a̱ná Jesukristoo̱, ngatsjájnú kjo̱a̱ndaa̱, ko̱jo kjo̱a̱xioó.

Bi̱ tsꞌén akóyá Pabloo̱ kjo̱a̱a̱ kjo̱a̱niꞌánchikonñé xi Néná tsjáná

3Nganiꞌántsjaà Néná, kui xi Na̱ꞌmii̱ Ndi̱a̱ná Jesukristoo̱. Kui xi katsꞌén nga ngi̱jii̱n Kristoo̱ kasakoná ngayeje to̱ko̱ya kjo̱a̱niꞌánchikonñé, xi ndibání ndiꞌakꞌajmi jàn xi tsjáná a̱si̱énni̱xtjii̱n. 4Kristoo̱ katsꞌénkjién Néná nga jaꞌájinná ndeskande ngindiee̱ nga kamánda nga̱sondiee̱, tsi̱ꞌe̱ nga tsjietsꞌén ku̱i̱ndyión, kó jmí jé kꞌuiéjínná ngindyi̱ko̱n kui. 5Ta̱ngatꞌanii̱ nga tjoó ñá Néná, kuíni nga índa ndeskande koó ngasꞌe̱, tsi̱ꞌe̱ nga Jesukristoo̱ sa̱ꞌínkjién nga ndií sa̱ꞌínná ñá, xikótsꞌèn kamámejeén, kó tsja kamaá kui. 6Kuíni nga, nganiꞌántsjaà Néná kjo̱a̱a̱ kui kjo̱a̱nda je xi akó xi ta̱ katsjáná, xi kasakojinná ngi̱jii̱n kui ndí xí tjoó kui. 7Kuí ndií xi kꞌien tsi̱ꞌe̱ nga Néná tsꞌaxiéꞌáná ñá, kó kuíni nga tjínná kjo̱a̱niꞌánjetakoón jéná, xikó kjiꞌi tsie kjo̱a̱nda je xi katsjáná Néná, 8ko̱jo tsie kjo̱a̱kjínkón, ko̱jo kjo̱a̱kjíntakón xi katsjáná, 9kó akóná ni xi kamámejeén nga sa̱ꞌín, xi íjñá ꞌma kje̱ꞌe ni̱xtjin, ngatꞌa̱ kamátsjaá nga índa tjón tjón ni xi sa̱ꞌín Kristoo̱. 10Kjiꞌanga kjo̱chó ni̱xtjin xi íjñá, Néná sa̱ꞌíndo̱jo ni xi índa nga ku̱i̱ꞌítikó ngi̱jii̱n Kristoo̱ ngayeje ni xi tjín ndiꞌakꞌajmii̱, ko̱jo ni xi tjín tꞌanangii̱.

11Xikó tsꞌén índa tjón tjón Néná, bo̱a̱ tsꞌén katsꞌénkjién Kristoo̱ tsi̱ꞌe̱ nga ko̱jo ji̱n jaꞌájinjne̱ nga katsjájne̱ ni xi tsja̱á ndií, ngatꞌa̱ Néná tsꞌénkjátjosón ngayeje ni xi mejeén nga sa̱ꞌín kuí. 12Kó nga ji̱n xi tjón kamájne̱ nga kisꞌiejne̱ kjo̱a̱chiyákjo̱a̱a̱ ni nda xi sa̱kójinjne̱ Kristoo̱, kuíni nga ndyi̱niꞌántsjáa̱ kui Néná xí tjiín kjo̱a̱jee̱. 13Kó ko̱jo jún kandaꞌyájnú, kó kisꞌijinjnú éntjatsi̱e̱ ja̱koxi̱i̱ Jesukristoo̱, kui éntjatsi̱e̱ xi tsꞌaxiéꞌájnú, kó nga kisꞌijinjnú Kristoo̱, A̱si̱énni̱xtjii̱n Néná íjñájnú ngo chi̱bo̱a̱ nga je Néná ndokjo̱a̱nijnú, xikótsꞌèn katsóyàtjón kuí. 14A̱si̱énni̱xtjii̱n xí ikꞌíjñangi tsi̱ꞌe̱ nga xcha̱ nga sa̱kóná ni xi katsóyàná Néná nga tsja̱á ndií, ngije ka̱mandé ngayeje xota̱ xi je kamáchjítjé kjo̱a̱ndeé, kó nga ndií ka̱ma ñá, tsi̱ꞌe̱ nga ngayeje ñá, si̱ꞌantsjàa̱ kui Néná xí tjiín kjo̱a̱jee̱.

Bi̱ tsꞌén tsíchji̱a̱tjé Pabloo̱ xota̱ na̱ngo̱xi̱ na̱xi̱ńdáꞌniú Éfeso̱ ngindyi̱ko̱n Néná

15Ta̱ngatꞌanii̱ kui nii̱ nga ko̱jo an, ngije tsintꞌie an, kjo̱a̱a̱ nga sꞌijinjnú Ndi̱a̱ná Kjisoo̱, ko̱jo nga tjójnú ngayeje xota̱ na̱xi̱ńdá tsjiee̱, 16ngatsjéni̱xtjin tsjàa̱ ndokꞌóchjì Néná kjo̱a̱a̱ jún, kó tsꞌenkjaꞌátsjienjnúꞌun nga chjiátjejnúꞌun, 17tsi̱ꞌe̱ nga kui Néná xí tsi̱ꞌe̱ Ndi̱a̱ná Jesukristoo̱, kui Na̱ꞌmi xi tjiín kjo̱a̱jee̱, ngatsjájnú A̱si̱énni̱xtjii̱n, tsi̱ꞌe̱ nga kꞌuiéjnú kjo̱a̱kjínkoón, ko̱jo nga ko̱kójnú kókón Néná. 18Ti̱ míꞌáa̱ Néná nga ka̱makjín cha̱n cha̱njnú kókjiꞌi kui kjo̱a̱chiyaá xota̱ xi je Néná tsíchji̱a̱a̱, tsi̱ꞌe̱ nga xcha̱jnú kókjiꞌi je ni xi tsja̱á xota̱ tsjiee̱. 19Kó nga ka̱makjínjnú kókjiꞌi je ngaꞌniú xí tikoón Néná nganda tsa̱ñá xí sꞌijinná kuí. Kui ngaꞌniuú kuí boá xi Néná akó, 20kuí xí katsꞌénkjién nga katsꞌénkjaꞌáꞌyaá Kristoo̱ ngi̱jii̱n xota̱ xi je jesoón, kó Néná ki̱a̱ katsꞌénkꞌíjñátꞌa tsja fojnií ki̱a̱ ndiꞌakꞌajmii̱. 21Néná íjñá Kristoo̱ ngo ngi̱ndie xi nkꞌa nga̱soón ngayeje xi botixómá kui nga̱sondiee̱, ko̱jo xá, ko̱jo ngaꞌniú, ko̱jo xi yandikón, ko̱jo nga̱soón ngayeje ni xi tjiín jaꞌén xí niꞌánkaxoma, jmí tsi ta̱kuítsí ni̱xtjin xi̱ꞌbi̱, ko̱jo ni̱xtjin xi sꞌe̱ ndibaá boá nga, 22kó ngayeje nii̱ xi Néná íjñá ngi̱ya tsja Kristoo̱ kó kuí boá xi katsꞌén nga Kristoo̱ xi ka̱ma ngito̱ko̱o̱ ngayejee̱ nii̱ ngandaa̱ xota̱ na̱ngo̱xi̱i̱, 23ngatꞌa̱ xota̱ na̱ngo̱xi̱i̱ kuí boá xi yojoo̱ Kristoo̱, kui Kristo̱ xi tsꞌén nga ka̱mando̱jo ta̱jmì niní. Tsi jmíjín xota̱ na̱ngo̱xi̱i̱ nde tikón ndo̱jòjínra̱ Kristoo̱.

Currently Selected:

Xota̱ Éfeso̱ 1: MAIX

Highlight

Compare

Copy