Xota̱ Ngalasia̱ 5

Bi̱ tsꞌén íni̱jmì Pabloo̱ kjo̱a̱a̱ nga ꞌniú ku̱i̱ndyiajnú ngi̱yaa̱ kjo̱a̱ndéjnú

1Kristoo̱ katsꞌéndéná, tsi̱ꞌe̱ nga ku̱i̱ṉtsomandé, kó kuíni nga ꞌniú ti̱ndyiàjnú, kó ngata̱ boeꞌéndièjínjnúu̱ nga ta̱jmì niní xi ku̱i̱ꞌíjñaꞌniú nginíjnú.

2Ndaꞌyájnúꞌun, an Pabloo̱, tsꞌénxiyàjnúꞌun nga tsi si̱ꞌánjnúu̱ sirkunsisioo̱n yojojnú, xikónií tsi ndyi̱niꞌánchjíjínjnúu̱ ni xi katsꞌén Kristoo̱. 3Kó ti̱ tsꞌénxiya nginí an, nga ta̱ ꞌyání xi tjítsꞌeén sirkunsisio̱n yojoo̱, tjínrií kjo̱a̱ꞌniú tsi̱ꞌe̱ nga sa̱ꞌínkjatjosón ngayeje ni xi tjítꞌa kjo̱a̱kitii̱. 4Xota̱ xi ndyi̱mongase nga kixi̱ kꞌuíndo ngindyi̱ko̱n Néná, nga ndyi̱tsꞌènkjátjosón kjo̱a̱kitii̱, jè katsꞌénkjii̱n yojoo̱ Kristoo̱, kó katsꞌénchꞌó kjo̱a̱ndaa̱ Néná. 5Ta̱nga ñá, tikónná A̱si̱énni̱xtjii̱n Néná, kuíni nga ndyi̱chiyá nga sa̱kóná ngo kjo̱a̱kixi̱ ta̱ngatꞌaa̱ kjo̱a̱sꞌijii̱n. 6Ngatꞌa̱ ndokꞌóchji̱nií Kristo̱ Kjisoo̱, nga ngiti̱ chjíjiín tsi kiniꞌán ko̱jo tsi kiniꞌánjáa̱n sirkunsisioo̱n yojoná. Kjo̱a̱sꞌijii̱n Néná xí chjínií, ngatꞌaa̱ kjo̱a̱tjoó kui.

7Achichí ndakjiꞌi ndi̱yà xí ndyi̱mongínjnú jún katsaki. Kó ꞌyá xí katsꞌénniꞌínjnú, tsi̱ꞌe̱ nga kandaꞌyáꞌénjínjnúu̱ ni xi ja̱koxi̱i̱. 8Én xí ndyi̱ndaꞌyájnú ngotꞌe̱, jmí tsi én xí tsi̱ꞌe̱ kui Néná xí jaꞌájinjnú. 9Bi̱ tsó xotaa̱ nga: “Ndeta̱ chií tsí nisaa̱n xi mindyiakátjo̱ ngayeje nda̱ꞌyo̱paa̱n.” 10Kó ꞌniátakón án Ndi̱a̱ná nga kje̱ꞌejín tsꞌén si̱ꞌankjójnú, ta̱nga Néná ko̱tíjérií kui xi tsꞌénmindyiátsobéjnú, jmí ndasénjín ta̱ꞌya kuíní bo̱a̱.

11Jún ntsꞌie, tsi an xi kꞌuini̱jmì án kjo̱a̱a̱ sirkunsisioo̱n, míkjo̱a̱a̱ nga ku̱i̱yotjingina. Tsi bo̱a̱ kjiꞌi, a mí tsí sa̱ꞌínxchán xotaa̱ nga ko̱ndókjo̱a̱jo kjo̱a̱a̱ kui Kristo̱ xi akjatꞌa kroo̱. 12¡Ta̱sá ti̱kuii ngatatietꞌa yeje yojo ndikoón kui xota̱ xi ndyi̱mindyiátsobéjnú!

13Jún ntsꞌie, Néná boá xi tsíchji̱a̱jnú, tsi̱ꞌe̱ nga xota̱ ndé kamájnú, ta̱nga ngata̱ niꞌánkjiénjínjnú kui kjo̱a̱ndeé, tsi̱ꞌe̱ nga ni xi ndajínkjiꞌi xi si̱ꞌánjnú, ta̱sá tjótsꞌèn ti̱ꞌansénjnúu̱ ja̱kꞌi̱e̱ ja̱ngaján xingi̱jnú. 14Ngatꞌa̱ ngayeje kjo̱a̱kitii̱, nga ta̱ ngo tsí én, bi̱ tsó: “Ti̱ꞌintjé ji xotaa̱ xikó má tsꞌén tjoó yojòo̱.” 15Ta̱nga tsi ti̱ juún tjínjnú kjo̱a̱xti, chónjnú yojojnú nga ti̱ júnjín xi si̱ꞌankjiejnú xingi̱jnú.

Bi̱ tsꞌén íni̱jmì Pabloo̱ kjo̱a̱a̱ ni xi mejeén yojoo̱ ko̱jo ni xi mejeén A̱si̱énni̱xtjii̱n Néná

16Kuíni nga bi̱ xiánjnúꞌun: Ti̱ndyiónjnú xikótsꞌèn mejeén A̱si̱énni̱xtjii̱n Néná, kó ngata̱ niꞌánkjatjosónjínjnúu̱ ni xi mejeén yojojnú. 17Ngatꞌa̱ ni xi mejeén yojojnú, kondra̱ tikónnii̱ ni xi mejeén A̱si̱énni̱xtjii̱n Néná, kó ni xi mejeén A̱si̱énni̱xtjii̱n Néná, kondra̱ tikónnii̱ ni xi mejeén yojojnú, kó nga jó kui nii̱ satíkjo boá, kuí nii̱ xi tsjandièjín nga chje̱ꞌéjin ni xi ndaa̱, ndatsi mejénná si̱ꞌán. 18Ta̱nga tsi ni xi mejeén A̱si̱énni̱xtjii̱n Néná xí ndyi̱niꞌánkjatjosónjnú, ngiti̱ kjo̱a̱kitii̱jín xi ko̱tíxomájnú.

19Kó ya tsijen tsijen ni xi míꞌá yojoo̱ xotaa̱, kó kuí bí xota̱ xi tsꞌén kuí nii̱: Xi ndyi̱tsꞌèntꞌaa̱kjo̱a̱ xkjín, ko̱jo xi tondo̱, ko̱jo xi ndyi̱tsꞌèn ta̱jmì niní, 20ko̱jo xi ndyi̱tsꞌèntsjàjo̱ a̱sie̱én ngo ne xi tsꞌénda xotaa̱, ko̱jo xi ndyi̱tsꞌèn kjo̱a̱tjiꞌe, ko̱jo xi chꞌoo̱ xkjín, ko̱jo xi ndyi̱ꞌboxié kjo̱a̱xti, ko̱jo xi tjiín kjo̱a̱chi̱ni̱, ko̱jo xi ngotjón ngotjón ndyi̱kjànní, ko̱jo xi ndyi̱tsꞌènchꞌó xkjín, ko̱jo xi ndyi̱bokjángá yojoo̱ nga ndyi̱ꞌboxié kjo̱a̱xchán, kósꞌe̱ ngo ndiè ndyi̱tsꞌèn yojoo̱, 21ko̱jo xi tjiín kjo̱a̱ꞌontakón, ko̱jo xi ndyi̱tsꞌènkꞌién ini̱ma̱, ko̱jo xi tjimáchꞌi̱, ko̱jo xi chꞌo tsꞌén ndyi̱tsꞌèntsjàjo̱ xtín xkjín. Ngayeje ni xi̱ꞌbi̱, ko̱jo ni xi xikoó kui ni xi̱ꞌbi̱, tsꞌenkjaꞌátsjienjnúꞌun, xikó je kixianjnúꞌun ngasꞌe̱, nga kui xota̱ xi ndyi̱tsꞌèn kuí nii̱, sa̱kójiín nga Néná xí ko̱tíxomaa̱.

22Ta̱nga ni xi ꞌbítji̱e̱jinná A̱si̱énni̱xtjii̱n Néná, kuí bí kui ni xi̱ꞌbi̱: kjo̱a̱tjoó, ko̱jo kjo̱a̱tsjaa̱, ko̱jo kjo̱a̱xioó, ko̱jo kjo̱a̱jekoo̱n, ko̱jo kjo̱a̱ni̱ma̱takoón, ko̱jo kjo̱a̱ndaxotaa̱, ko̱jo kjo̱a̱sꞌijii̱n, 23ko̱jo kjo̱a̱ndaꞌyáꞌeén, ko̱jo kjo̱a̱a̱ nga ka̱máná kꞌuíꞌniúu̱ yojoná ni xi chꞌokjiꞌii̱. Tsi kui nii̱ xi si̱ꞌán, jmíjín ngo kjo̱a̱kiti xi ku̱i̱ꞌíchjáná. 24Xota̱ xi je tsi̱ꞌe̱ Kristo̱ Kjisoo̱, jè nijan yítꞌa kro yojoo̱, kui yojo jé xí mejeén sa̱ꞌín ni xi ndajín xi tjín kuí nga̱sondiee̱. 25Kó tsi tindyión ta̱ngatꞌanii̱ A̱si̱énni̱xtjii̱n Néná, chjiéngá ko̱e̱ꞌéndièe̱ A̱si̱énni̱xtjii̱n Néná nga kui xi ko̱tíxománá.

26Nga nkꞌakonjín ko̱ꞌna̱xié yojoná, ti̱nde nga si̱ꞌanxtijáa̱n ja̱kꞌi̱e̱ ja̱ngaján xingi̱, ti̱nde nga kꞌuiéjínná kjo̱a̱ꞌontakón nga ngo nga ngo.

Currently Selected:

Xota̱ Ngalasia̱ 5: MAIX

Highlight

Compare

Copy