Xota̱ Ngalasia̱ 4

1Ta̱nga ti̱ bi̱ ti̱ xiánjnúꞌun nga: Tji̱e̱nga ndí chichí kui nda̱ xi sa̱ko̱ó nii̱ na̱ꞌmii̱, bo̱a̱ fóyanii̱ xikoó ngo moso̱ chichí xi kastiñá, ndatsi kui tsi̱ꞌe̱ ka̱ma ngayeje nii̱ na̱ꞌmii̱. 2Ta̱nga tjín xota̱ xi skoón, kó kuí xí sku̱i̱e̱ ngayeje kui nii̱, ngaskande nga kjo̱chó ni̱xtjin xi íjñá na̱ꞌmii̱ nga si̱ꞌankꞌasꞌiee̱n kui nii̱. 3Kó ti̱ bo̱a̱ ti̱ kjiꞌinii̱ ñá, kjiꞌanga kji̱e̱ yàjín ñá Ndi̱a̱ná, moso̱ xi kastiñaá ni a̱si̱énni̱xtjii̱n kui nga̱sondiee̱ kamá ñá. 4Ta̱nga nga jatjosón kui ni̱xtjii̱n, Néná katsangiya ndií, xi ngo xota̱chjo̱on katsennii̱, kó kui ndií, kjo̱a̱kitii̱ tikónjin ndeskande koó nga katsen, 5tsi̱ꞌe̱ nga sa̱ꞌíndé xota̱ xi kjo̱a̱kitii̱ síndojin, kó bo̱a̱ tsꞌén nga Néná, ndí tsi̱ꞌe̱ sa̱ꞌínná ñá.

6Ngatꞌa̱ nga jè ndií Néná kamá ñá, Néná katsangiya ngi̱jin ini̱ma̱ná A̱si̱énni̱xtjii̱n ndií, kó kuí xí bi̱ tsó nga chji̱a̱: “¡Abba, Na̱ꞌmi!” 7Kó bo̱a̱ tsꞌén nga ji ngiti̱ moso̱ xi kastiñájín ji ngotꞌe̱, ndií Néná boá ji, kó tsi ndí jí, ja̱ ti̱ sa̱ko̱óri kui ni xi tsja̱á Néná ngayeje xi ndií kuí nga.

Bi̱ tsꞌén íni̱jmì Pabloo̱ nga ngiti̱ moso̱ xi kastiñájín chjiéngá ka̱ma ñá

8Ngasꞌe̱ kjiꞌanga kji̱e̱ yàjínjnú Néná, kjín ne xi Nénájín atíxomájnú. 9Ta̱nga ngotꞌe̱ ꞌne̱, ngije yàjnú Néná, ko̱jo tsi Néná jè bejnú jún, kuíni nga, kótsꞌèn nga ti̱ ingo ndi̱yà nginí kongintjingíjnúu̱ kui ni xi jmíjiín ngaꞌniú, ko̱jo ni xi jmí ni chjíjiín. A mejénjnú nga ti̱ ko̱tíxoma nginíjnú ne xi Nénájiín. 10Ngatꞌa̱ ta̱kó ndyi̱yandikonjnú ni̱xtjin ndikón xí má xki̱ sá, ko̱jo xki̱ nó. 11¡Achichí nda̱ kjimana tsi ta̱kjo̱a̱nda ngayeje xá xí katsꞌen an nganda tsa̱jún!

12Jún ntsꞌie, ꞌniú míꞌájnúꞌun tsi̱ꞌe̱ nga bo̱a̱ kon ka̱majnú xi kókón an, ngatꞌa̱ jè bo̱a̱ kon kjima an xikó kónjnú jún. Ngojín ni xi ndajínkjiꞌi xi kiniꞌánjo̱jnúꞌun jún. 13Ta̱nga je yàjnú jún nga kastie chiꞌin an, nga tjón tjón kixiyajnúꞌun éntjatsi̱e̱e̱ Néná. 14Kó ndatsi katsꞌenxtìjnúꞌun kjo̱a̱a̱ chiꞌin xi kisꞌiena, kiniꞌánchꞌójínjnúꞌun, ta̱sá nda kiniꞌánsénjnúꞌun xikoó tsi ngo ndítsjiee̱ Néná án, ngaskande xikó maá tsi Kristo̱ Kjisoo̱ an. 15Kuíni nga, ñá tikón kui kjo̱a̱tsja xi kisꞌiejnú kui ni̱xtjii̱n. Ngatꞌa̱ ka̱mana xiyà an nganda tsa̱jún, nga ngaskande ndyikonjnú kaꞌnaxiéjnú tsi an tsíꞌájnúꞌun, kó kamá án katseꞌéjnúꞌun. 16Kó ngotꞌe̱ ꞌne̱, a kondra̱ tsa̱jún kjimá an, kjo̱a̱a̱ nga ni xi ja̱koxi̱i̱ tsꞌénxiyàjnúꞌun.

17Kui jaá kjimachi̱ni̱ kjo̱a̱a̱ jún, ta̱nga jmí tsi kjo̱a̱a̱ ni xi ndaa̱, ta̱sá kjo̱a̱a̱ nga mejeén nga xín si̱ꞌankjaꞌájnúu̱ yojojnú ji̱n, tsi̱ꞌe̱ nga jún si̱ꞌansenjnúu̱ kui jaá. 18Ndakjiꞌi nga ngatsjéni̱xtjin chi̱ni̱ ka̱ma xotaa̱ kjo̱a̱a̱ ni xi ndaa̱, jmí tsi ta̱ kjiꞌa tsí nga ki̱a̱ tikónjinjnúꞌun. 19Tjóna jún xikó maá tsi ndína ma jún, ta̱nga tji̱e̱nga bo̱a̱jín tsꞌén tindyiónjnú xikoó Kristoo̱, tsꞌénfoaꞌatio an kjo̱a̱ni̱ma̱ xikó maá tsi̱ndi̱o̱o̱ ngo na̱an xi ndí tsꞌénbeꞌé. 20Kó mejénna nga ngotꞌe̱ má ki̱a̱ kotíjña̱jojnúꞌun, tsi̱ꞌe̱ nga kje̱ꞌe tsꞌén kuichjiájojnúꞌun, ngatꞌa̱ nde bejín an mí xí sa̱ꞌinkjó án kjo̱a̱a̱ jún.

Bi̱ tsꞌén íni̱jmì Pabloo̱ kjo̱a̱a̱ chi̱bo̱a̱ xi íjñá na̱ Angaa̱r ko̱jo na̱ Saraa̱

21Tꞌíyájnúꞌun jún, jún xi mejénjnú nga kjo̱a̱kitii̱ xi si̱ꞌankjatjosónjnú: A kji̱e̱ ndaꞌyájínjnúu̱ ni xi tjítꞌa kjo̱a̱kitii̱. 22Jè kjitꞌa nga Abraa̱n jó ndí kisꞌiee̱: Ngo xi katsee̱n na̱ moso̱ xi kastiñaá (Na̱ Angaa̱r), kósꞌe̱ ngo xi katsee̱n chjo̱on ndaa̱ (Na̱ Saraa̱), kui na̱ xi ndeé yojoo̱. 23Ta̱nga kui ndí xi tsi̱ꞌe̱ kui na̱ mosoo̱ xi kastiñaá katsen xikoó ñá, ngatꞌa̱ bo̱a̱ tsꞌén kamámejeén na̱ꞌmii̱ ko̱jo na̱aa̱n, ta̱nga ndií kui xota̱chjo̱on ndaa̱, katsen ngatꞌa̱ Néná boá xi kamámejeén, ngatꞌa̱ ja̱bo̱a̱ jè bo̱a̱ katsoó nga ngo ndí tsja̱á. 24Kui nii̱, ngo chi̱bo̱a̱ bokóná. Nga jó kui ínchjiín, jó kjo̱a̱ꞌbínda ndyi̱bokó: Kjo̱a̱ꞌbínda xi tjoón, kuí boá xi índa Néná ki̱a̱ na̱xi̱ Sinaii̱, kó kuí boá xi na̱ Angaa̱r, na̱an xi beꞌé ndí xí moso̱ xi kastiñaá. 25Na̱ Angaa̱r kuí xí xikónii̱ na̱xi̱ Sinaii̱, xi tikón ki̱a̱ nangi Arabiaa̱, xi xikónii̱ na̱xi̱ńdáꞌniú Jerusalee̱n ngotꞌe̱, ngatꞌa̱ kui na̱xi̱ńdáꞌniuú ko̱jo xota̱a̱, moso̱ xi kastiñá boá. 26Na̱ Saraa̱ kuí boá xi xikónii̱ kjo̱a̱ꞌbínda tja̱tsi̱e̱ xi índa Néná, kuí boá xi na̱xi̱ńdáꞌniú Jerusale̱n xi chji̱a̱ni ndiꞌakꞌajmi jàn, kó tikóndé boá, kó ñá boá xi ndií kuí. 27Ngatꞌa̱ bi̱ tsꞌén kjitꞌa xo̱jo̱n eén Néná:

Tsjangatamaa̱ ji xota̱chjo̱on ndi̱, ji xi ꞌbéjín ji ndí,

tajne̱tsen má ji, ji xi yejín ji tsi̱ndi̱o̱o̱ nga tsen ngo ndí.

Ngatꞌa̱ kui chjo̱on xí ikꞌíjñámasiee̱n, kjín ngase ndií kꞌuieé,

ta̱bo̱a̱jiín kui xota̱chjo̱on xi tjiín xi̱ꞌii̱n.

28Jún ntsꞌie, jún xí xikoó Isaa̱: Jún boá kui ndí xí katsóyàtjón Néná nga tsja̱á Abraa̱n. 29Ta̱nga xikótsꞌèn kui ni̱xtjin jàn, nga kui ndí xí katsen xikoó ñá, tsangatji̱ngii̱ ndí xí katsen xikótsꞌèn mejeén A̱si̱énni̱xtjii̱n Néná, ti̱ bo̱a̱ ti̱ kjima ngotꞌe̱. 30Ta̱nga, kó tsó xo̱jo̱n eén Néná. Ja̱ bi̱ tsó: “Ti̱yítji̱ngìi̱ kui xota̱chjo̱on xí moso̱ xi kastiñaá ko̱jo ndií, ngatꞌa̱ ndií kui xota̱chjo̱on xí moso̱ xi kastiñaá, ka̱májín sa̱ko̱ó ni xi sa̱ko̱ó ndií xota̱chjo̱on xí tikóndeé.” 31Ja̱ kuíni ntsꞌie, jmí tsi ndií kui xota̱chjo̱on xí moso̱ xi kastiñaá ñá, ndií kui xota̱chjo̱on xí tikóndeé boá ñá.

Currently Selected:

Xota̱ Ngalasia̱ 4: MAIX

Highlight

Compare

Copy