Xota̱ Ngalasia̱ 3

Bi̱ tsꞌén íni̱jmì Pabloo̱ nga ta̱ngatꞌanii̱ kjo̱a̱sꞌijii̱n nga sakóná A̱si̱énni̱xtjii̱n Néná

1Jún xota̱ Ngalasia̱, ¡mí xí ta̱ chi̱ninijnú! ꞌYá xí tsꞌenṉcha̱jojnú jún tsi̱ꞌe̱ nga ko̱nda̱ꞌyáꞌénjínjnúu̱ kui én xí ja̱koxi̱i̱. Ngatꞌa̱ jè akako cha̱n cha̱n xikoó tsi jún má xi kamáyàjnú kui Jesukristo̱ xi akjatꞌa kroo̱. 2Ta̱kuítsí ni xi mejénna skuie an kjo̱a̱a̱ jún: A katseꞌéjnú A̱si̱énni̱xtjii̱n Néná, kjo̱a̱a̱ nga ngo nii̱ kjo̱a̱kitii̱ xi ndyi̱niꞌánjnú, axa̱ kjo̱a̱a̱ nga kisꞌijinjnú nga kandaꞌyájnú eén Néná. 3A ta̱nisién ꞌniú chi̱nijnú. Nga tjón tjón A̱si̱énni̱xtjii̱n Néná asíko̱jojnú kjo̱a̱a̱ kótsꞌèn ku̱i̱ndyionjnú, kó ngotꞌe̱ ꞌne̱, ánní nga jún so̱bo̱a̱ xi bo̱a̱ ndyi̱niꞌánkonjnú. 4Achichí má kjo̱a̱ni̱ma̱ xi je ikitjatiójnú, kó a ta̱kjo̱a̱ndaní kui nii̱. 5Néná katsjájnú A̱si̱énni̱xtjii̱n, kó katsꞌén kjo̱a̱ndikón ngi̱jinjnú, kó, ánní nga bo̱a̱ ma. A kjo̱a̱a̱ nga ndyi̱niꞌánkjatjosónjnú kjo̱a̱kitii̱. Axa̱ kjo̱a̱a̱ nga kisꞌijinjnú nga kandaꞌyájnú éntjatsi̱e̱e̱.

Bi̱ tsꞌén íni̱jmì Pabloo̱ kjo̱a̱a̱ ni xi índajo̱ Néná Abraa̱n

6Abraa̱n kisꞌijii̱n Néná, kó kui nii̱ xi Néná katsꞌénchjínií nga ngo nda̱ xi kixi̱ kamá. 7Kó kuíni nga jún chjiéngá xcha̱jnú nga xota̱ tji̱e̱e̱ Abraa̱n kuí boá xota̱ xi sꞌijii̱n Néná. 8Kó xo̱jo̱n eén Néná kisitꞌa tjón tjón nga Néná sa̱ꞌínkixi̱ xota̱ nga̱sondiee̱, ta̱ngatꞌanii̱ nga Néná sꞌijii̱n, kó Néná katsóyàtjoón Abraa̱n nga bi̱ katsoó: “Ji boá xi sa̱ꞌinkjieén tsi̱ꞌe̱ nga ta̱ngatꞌanii̱ ji nga ka̱machikonñé ngayeje na̱xi̱ńdá xí tjín nga̱sondiee̱.” 9Kó kuíni nga ngayeje xota̱ xi sꞌijii̱n Néná machikonñé xikótsꞌèn kamáchikonñé Abraa̱n, kui xi kisꞌijii̱n Néná.

10Ngatꞌa̱ ngayeje xota̱ xi ndyi̱koyaa̱ nga kjo̱tjoꞌa nga ndyi̱tsꞌènkjátjosón ni xi tjítꞌa kjo̱a̱kiti xi tikónnieé, ndajín síndo ngindyi̱ko̱n Néná, ngatꞌa̱ jè kjitꞌa xo̱jo̱n eén Néná, nínga bi̱ tsoó: “Ngatꞌíko̱joo̱ ngayeje xota̱ xi sa̱ꞌínkjatjosónjín ngayeje ni xi kjitꞌa xo̱jo̱n kjo̱a̱kitii̱.” 11Kó tikón tsijen tsijen nga ta̱ꞌyajínni xi xcha̱ nga kixi̱, kjo̱a̱a̱ nga sa̱ꞌínkjatjosón kjo̱a̱kitii̱, ngatꞌa̱ bi̱ tsó xo̱jo̱n eén Néná: “Nda̱ xi kixi̱ ngindyi̱ko̱n Néná, ta̱ngatꞌanií kjo̱a̱sꞌijii̱n nga kꞌuijñáni.” 12Ta̱nga jmí tsi tjítsó kjo̱a̱kitii̱, nga xi sꞌijii̱n Néná boá xi kꞌuíndo, ta̱sá bi̱ tsó: “Xi sa̱ꞌínkjatjosón kjo̱a̱kitii̱, kuí nii̱ xi kꞌuijñáni.”

13Tsi̱ꞌe̱ nga kꞌo̱kaniéjínná kjo̱a̱botíjeé kjo̱a̱kitii̱, Kristoo̱ iskjíbé kui kjo̱a̱botíjé xí chji̱a̱ni kjo̱a̱kitii̱ ta̱ngatꞌanii̱ ñá, ngatꞌa̱ bi̱ tsꞌén kjitꞌa xo̱jo̱n eén Néná: “Ngatꞌíko̱jonii̱ ngayeje xota̱ xi tsjiengíboaꞌátꞌa ngo yá.” 14Bo̱a̱ katsꞌén Kristoo̱, tsi̱ꞌe̱ nga si̱ꞌanchikonñé xota̱ xi tjín nga̱sondiee̱, jatjosón ni xi kiꞌmií Abraa̱n, tsi̱ꞌe̱ nga sa̱kóná A̱si̱énni̱xtjii̱n Néná xí katsóyàtjón nga tsja̱á xota̱ xi sꞌijii̱n.

15Jún ntsꞌie, kꞌuijñá chi̱bo̱a̱jnúꞌun ngo ni xi tsꞌén xotaa̱: Kjiꞌanga ngo nda̱ ꞌbínda ngo ni, kó ꞌbijñá chi̱bo̱a̱ tsja, ta̱ꞌyajín xi ka̱ma sa̱ꞌínkjié kui nii̱, ti̱nde ka̱májín tjín xí ko̱ósón ngasee̱ ni. 16Ngotꞌe̱ ꞌne̱ ndakjíꞌí, Néná katsóyàtjoón Abraa̱n ni xi tsja̱á kuí ko̱jo xota̱ tji̱e̱e̱. Ta̱nga xo̱jo̱o̱n chji̱a̱jín kjo̱a̱a̱ xota̱ tji̱e̱ xi kjín, chji̱a̱ nga ta̱ ngo tsí má, nga bi̱ tsó: “Tji̱e̱ xi tse̱”, tjítsó. Kui tji̱e̱e̱, kuí xí Kristoo̱. 17Ni xi mejénna xian an, kuí bí kui nii̱: Ni xi Néná índajo̱ nga atíxomaa̱ nga sa̱ꞌín Abraa̱n, ka̱májiín sa̱ꞌínkjié ngo kjo̱a̱kiti xi jeꞌe nijón úchán ko̱jo kantié nó jaskan, sꞌe̱ ngiti̱ ka̱machjíjiín ni xi Néná jè katsóyàtjón nga tsja̱á Abraa̱n. 18Ngatꞌa̱ tsi kjo̱a̱kitii̱ yaꞌanii̱ ni xi tsja̱aná Néná, ja̱ jè ngiti̱ kuijín ni xi katsóyàtjón Néná yaꞌanii̱ ni xi tsja̱a, ta̱nga Néná, bo̱a̱ katsoó Abraa̱n nga ta̱ tsja̱arií kui nii̱.

Bi̱ tsꞌén íni̱jmì Pabloo̱ kjo̱a̱a̱ míkjo̱a̱a̱ nga kisꞌijña kjo̱a̱kitii̱

19Kósꞌe̱, kó mí chjínií kjo̱a̱kitii̱. Jeꞌe tsi̱ꞌe̱ nga sku̱i̱e̱ xotaa̱ nga jé boá ni xi ndyi̱tsꞌèn, kó ta̱ kjiꞌa tsi ka̱machjínií kui kjo̱a̱kitii̱, ngaskande nga kjindibá kui xota̱ tji̱e̱e̱ Abraa̱n xi Néná katsóyàtjoón nga kjo̱e̱ꞌe, kui xi Kristoo̱. Néná katsangiya ndítsjiee̱ nga katsjaá Moisee̱ kjo̱a̱kitii̱, kó Moisee̱ xí katsjaá xotaa̱ kui kjo̱a̱kitii̱. 20Ta̱nga Néná nga tsíchji̱a̱jo Abraa̱n jmíjín xi katsꞌénkjién, ngatꞌa̱ Néná ta̱ ngo tsí má.

21Kósꞌe̱ kjo̱a̱kitii̱, a kondra̱ tikónnii̱ ni xi katsóyàtjón Néná nga tsja̱á Abraa̱n. ¡Jmí! Ngatꞌa̱ tsi kjo̱a̱kitii̱ ka̱maa̱ tsja̱aná kjo̱a̱mindyioo̱n, ja̱ kjiꞌanga ndyi̱niꞌánkjatjosón kuí kjo̱a̱kitii̱, kjiꞌara̱ tsobo̱a̱ nga kixi̱ tindyión ngindyi̱ko̱n Néná. 22Ta̱nga xo̱jo̱n eén Néná tsó, nga ngayeje xotaa̱ ngi̱yaa̱ jeé síndoyáꞌniú, tsi̱ꞌe̱ nga kui xi sꞌijii̱n Jesukristoo̱, Néná tsja̱á ni xi katsóyàtjón nga tsja̱á xi sꞌijii̱n kui.

23Ngotꞌe̱ ꞌne̱ sꞌijinná Jesukristoo̱, ta̱nga ngindiee̱ nga ko̱kó yojoo̱ Jesukristoo̱, kjo̱a̱kitii̱ boá xi íjñaꞌniúná. 24Xikó tsꞌén ngo moso̱ nga kjíbéngí jákjíndií, bo̱a̱ tsꞌén kjo̱a̱kitii̱ nga fíjo̱ná ngindyi̱ko̱n Kristoo̱, tsi̱ꞌe̱ nga sꞌi̱jinná, kó bo̱a̱ tsꞌén nga kixi̱ ka̱ma ñá ngindyi̱ko̱n Néná. 25Ta̱nga ngotꞌe̱ ꞌne̱ ngije sꞌijinná Jesukristoo̱, jè ngiti̱ chjiénjínná nga tjín xí skjíbéngíná.

26Ngotꞌe̱ ꞌne̱ nga ngayejejnú, nga je ndií Néná jún, ngatꞌa̱ sꞌijinjnú Kristo̱ Kjisoo̱. 27Ngayeje jún xi sꞌijinjnú, ko̱jo xi je kastindánijnú Kristoo̱, jè nijan kamángojnú, kó jè xikoó tsi Kristoo̱ xi kjima ngo ńjño xi kichajájnú. 28Jè ngiti̱ jmí ndasénjín tsi xota̱ jundío̱, ko̱jo tsi xota̱ ngriengo̱, tsi moso̱ xi kastiñá, ko̱jo tsi xota̱ xi síndondé, tsi xi xi̱ꞌin ko̱jo tsi xi ínchjín. Ngatꞌa̱ jè kiniꞌángojo̱jnú yojojnú Kristo̱ Kjisoo̱, kuíni nga je ta̱ ngo ndse̱je̱njnú ngindyi̱ko̱n Néná. 29Tsi Kristoo̱ ndokjo̱a̱nijnú, ja̱ xota̱ tji̱e̱e̱ Abraa̱n boá jún, kó jún boá xi sa̱kójnú kui ni xi Néná katsóyàtjón nga tsja̱á Abraa̱n.

Currently Selected:

Xota̱ Ngalasia̱ 3: MAIX

Highlight

Compare

Copy