Esndraa̱ 9
9
Nga tsíchji̱a̱a̱ Néná Esndraa̱
1Kó ngije kamá kui nii̱, jachókón tiñana já xí botixómaá nga bi̱ katsóna: Xota̱ na̱xi̱ńdá Israee̱l, ko̱jo chináꞌmii̱, ko̱jo xota̱ lebitaa̱, to̱kó ki̱a̱ nijan ndyi̱tsꞌénngotjín yojoo̱ ko̱jo xota̱ na̱xi̱ńdá xí tjín nga̱sondiee̱, kó ti̱ ndyi̱tsꞌèn ni xi ꞌniú chꞌokjiꞌi xi ndyi̱tsꞌèn kuí xotaa̱ xikoó xota̱ Kanaa̱n, ko̱jo xota̱ Ee̱t, ko̱jo xota̱ Feree̱, ko̱jo xota̱ Jebuu̱, ko̱jo xota̱ amonitaa̱, ko̱jo xota̱ moabitaa̱, ko̱jo xota̱ Ejiptoo̱, ko̱jo xota̱ Amoo̱r. 2Ngatꞌa̱ kui ko̱jo ndií kisꞌińdojo̱ ínchjín xí chji̱a̱ni kui nangii̱, kó je xkjín je katsꞌén xota̱ tji̱e̱ xi tsjiee̱ Néná ko̱jo xota̱ na̱xi̱ńdá xí tjín nga̱sondiee̱, kó tsja xota̱ xi botixómaá ko̱jo xtitjoón, kuí má bo̱a̱ xi tjón je katsꞌén kui ni xi maꞌniátakónjiín. 3Nga tsintꞌie an kui nii̱, iskjíndiyajón an ńjño xi tsꞌényaja̱ an ko̱jo ńjñobichitjéna, kó iskjinié an tsja̱tokó án, ko̱jo tsja̱ngiꞌboa án, kósꞌe̱ ndasen kisꞌijña an. 4Kósꞌe̱ kijíkón tiñana ngayeje xota̱ xi jatsié má nga tsíchji̱a̱ Néná xí tsi̱ꞌe̱ xota̱ Israee̱l, ta̱ngatꞌanii̱ nga ndyi̱tsꞌènkjátjosónjiín xota̱ xi tsangínjo̱ꞌniú máraa̱, kó án to̱kó ki̱a̱ xió kisꞌijña ndasen an, ngaskande nga kiniꞌánkꞌasꞌien kjo̱a̱tjó xi niꞌánkꞌasꞌien nga kamángixoón. 5Kó nga kiniꞌánkꞌasꞌien kjo̱a̱tjó xi niꞌánkꞌasꞌien nga kamángixoón jastjíe̱n an kó ngiti̱ ndasénjín kisꞌijña an, kó nga bo̱a̱ tsꞌén je katjondiyá ńjñona ko̱jo ńjñobichitjéna, asien an tikóna, kó yejen an ndsa̱ án xtji̱e̱e̱n nínga tikón Néná, kui xi Néna, 6kó bi̱ kixiáa̱n: ¡Ji Ne xi tsa̱ꞌa̱n, ta̱ bejín an mí ni xi sa̱ꞌin an, ko̱jo achichí soboána nga skjininkꞌa an kje̱n án nínga tindyin ji Ne, ngatꞌa̱ ni xi ꞌniú ndajín xi ndyi̱niꞌánjne̱ je kamákjín ngase, je jaꞌatjoón tokojne̱, kó jéjne̱ je kamátsié ngase ngaskande nkꞌa jàn je jachó! 7Ndeskande ni̱xtjii̱n xota̱ xi xchájne̱ nga ndyi̱niꞌánjéjne̱, kó ngaskande kui ni̱xtjin xi̱ꞌbi̱, kó ta̱ngatꞌanii̱ kui ni xi ꞌniú ndajín xi ndyi̱niꞌánjne̱ ji̱n, ko̱jo rejne̱, ko̱jo chináꞌmijne̱, kuíni nga je ki̱a̱ kiniꞌánkꞌasꞌienjne̱ ngi̱ya tsja re xi chji̱a̱ni kui nga̱sondiee̱, nga ki̱cha̱ si̱ꞌankꞌienijne̱, nga kongínjo̱ꞌniújne̱, nga si̱ꞌanchejéjne̱ nijne̱, ko̱jo nga si̱ꞌantsobéjii̱n kje̱njne̱ xikó kjima kui ni̱xtjin xi̱ꞌbi̱. 8Kó ngotꞌe̱, ngotjón chií Néná kisꞌiee̱ kjo̱a̱ni̱ma̱takón nga katsꞌenkꞌangi ngi chiboa xota̱ xi katsjájne̱ ngo ngi̱ndie xi ꞌniú tikón, ki̱a̱ ngo ngi̱ndie xi tsjie, ko̱jo nga Néná katsꞌéntsijee̱n ndyikonjne̱, ko̱jo nga katsjandièjne̱ nga kisꞌie chiíjne̱ kjo̱a̱tsja, ngi̱jii̱n kui kjo̱a̱mindyion xi tjínjne̱ nga moso̱ xi kastiñá kamájne̱. 9Kó nga kjo̱a̱a̱ nga moso̱ xi kastiñájne̱ ji̱n, ta̱nga ndatsi moso̱ xi kastiñájne̱ jmíni̱xtjin íjñámasienjne̱ Néná, ta̱sá má tsie ngase kjo̱a̱ni̱ma̱takón katsjájne̱ ngindyi̱ko̱n já re xi chji̱a̱ni nangi Persia̱, tsi̱ꞌe̱ nga jmí ni sa̱ꞌínjo̱jínjne̱, tsi̱ꞌe̱ nga ka̱ma si̱ꞌandajne̱ Ndiꞌaa̱ Nejne̱, kó nga chjanínkꞌá nginíjne̱ xó xchaá, ko̱jo nga skónjne̱ na̱xi̱ńdá Jundáa̱ ko̱jo na̱xi̱ńdáꞌniú Jerusalee̱n. 10Ta̱nga ngotꞌe̱ ꞌne̱ ji Ne, mí ni xi kꞌuínjne̱ jaskan ngije kamá kui nii̱. Ngatꞌa̱ jè ikꞌíjñámasienjne̱ kjo̱a̱botíxomáa̱, 11kui xi katseꞌée̱ mosòo̱ kui xi jáchji̱ni̱e̱ꞌée̱n nga bi̱ kasée̱: Kui tꞌanangi xi tsa̱jún ka̱ma, nangi xi ndajín boá, ta̱ngatꞌanii̱ ni chꞌokjiꞌi xi katsꞌén kui xota̱ na̱xi̱ńdá xí kisꞌie kui tꞌanangii̱, ta̱ngatꞌanii̱ kui ni xi ndajín xi katsꞌén, kui xi íkitsie maá ngo ndiè ko̱jo ngaskande xi ingo ndieè, 12kuíni nga ngotꞌe̱ ꞌne̱ ngiti̱ ko̱e̱ꞌejínjnúu̱ ndí ínchjínjnú ndí xíꞌiín kui xotaa̱, ti̱nde ndí ínchjínjnú, ka̱májín kꞌuíndojo̱ ndí xíꞌiín kui xotaa̱, ti̱nde ka̱májín kjo̱a̱xió kꞌuíndajo̱jnú, ko̱jo tsi ni xi nda sa̱ꞌiín kui ngatsjéni̱xtjin, tsi̱ꞌe̱ nga sa̱kóngaꞌniújnú, ko̱jo nga ka̱ma xi̱ni̱e̱jnú ni nda xi tsjá kuí tꞌanangii̱, ko̱jo nga ka̱ma kꞌuijñájnúu̱ ndíjnú kui tꞌanangii̱. 13Ta̱nga kjo̱a̱a̱ ngayeje ni xi je kjindibániéná kjo̱a̱a̱ kui ni xi ndajín xi kiniꞌán, ko̱jo kjo̱a̱a̱ nga ñá xí kónná, nga yajne̱ ji Ne, Ne xi tsa̱ji̱n, tichinjne̱, kó ndatsi ndajín kjiꞌi ni xi kiniꞌánjne̱, katseꞌéjne̱ ji ngo xtín xota̱ xi tsꞌangi ngase xi xikoó xi̱ꞌbi̱: 14A ti̱ ko̱jna̱nié nginíjne̱ kjo̱a̱botíxomáa̱ nga xingi̱jne̱ si̱ꞌán nginíjne̱ xota̱ xi ndyi̱tsꞌèn kuí ni xi ꞌniú chꞌokjiꞌii̱. A mí tsí si̱ꞌinxchín jí ngaskande nga si̱ꞌinkjiejne̱, kó nde ingojín xi kꞌo̱ngi ngase, ti̱ nde jmíjín xi kjo̱tjongii̱ yojoo̱ nga ko̱nga. 15¡Ji Ne, ji xi Nee̱ xota̱ Israee̱l! Jí boá xi kixi̱ ji, ngatꞌa̱ kisꞌiejne̱ ngo xtín xota̱ xi tsꞌangi ngase ngaskande kui ni̱xtjii̱n. Ngotꞌe̱ ꞌne̱, kꞌi̱e̱ tindyionjne̱ ngindyikin ji, ta̱ngatꞌanii̱ jéjne̱, ngatꞌa̱ nde ngojín xo ka̱maa̱ kꞌuíndo kixi̱ ngindyikin ji ta̱ngatꞌanii̱ kui nii̱.
Currently Selected:
Esndraa̱ 9: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
