Esndraa̱ 8
8
Xota̱ xi jeꞌeꞌoyá nginí ndiꞌaa̱ Esndraa̱
1Kuí bí kui jaá xi ngito̱ko̱o̱ ndiꞌaa̱ xota̱ tji̱e̱ xi kijíjo̱na nga tsangínnijíngíjne̱ ndeskande Babilonia̱, ngaskande na̱xi̱ńdáꞌniú Jerusale̱n, kjiꞌanga atíxoma nda̱ re Artajerjee̱:
2Ngersoo̱n, xi chji̱a̱ni xota̱ tji̱e̱e̱ Finee̱,
ko̱jo Ndanii̱, xi chji̱a̱ni xota̱ tji̱e̱e̱ Itamaa̱r,
ko̱jo Jatuu̱, xi chji̱a̱ni xota̱ tji̱e̱e̱ Ndabii̱,
3ko̱jo Sakariyaa̱, xi chji̱a̱ni xota̱ tji̱e̱e̱ Sekaniyaa̱, kui xi ndií Paroo̱ kamá,
ko̱jo ngi úchán ichítié ngase jáxíꞌín,
4ko̱jo Elioenai̱, xi chji̱a̱ni xota̱ tji̱e̱e̱ Pajaa̱t-Moaa̱b, ndií Seraiyaa̱,
ko̱jo ngi jó úchán ngase jáxíꞌín,
5ko̱jo ndií Jaasiee̱l, xi chji̱a̱ni xota̱ tji̱e̱e̱ Sekaniyaa̱,
ko̱jo ngi ján úchán ngase jáxíꞌín,
6ko̱jo Ebee̱nd, xi chji̱a̱ni xota̱ tji̱e̱e̱ Andii̱n, ndií Jonataa̱n,
ko̱jo ngi ichítié ngase jáxíꞌín,
7ko̱jo Jesayiaa̱, xi chji̱a̱ni xota̱ tji̱e̱e̱ Elaa̱n, ndií Ataliyaa̱,
ko̱jo ngi ichítié ko̱jo kan ngase jáxíꞌín,
8ko̱jo Sebandiyaa̱, xi chji̱a̱ni xota̱ tji̱e̱e̱ Sefatiyaa̱, ndií Mikaee̱l,
ko̱jo ngi ichítié ko̱jo kantié ngase jáxíꞌín,
9ko̱jo Obandiyaa̱, xi chji̱a̱ni xota̱ tji̱e̱e̱ Joaa̱b, ndií Jeiee̱l,
ko̱jo ngi jó úchán ko̱jo tjiꞌún ján ngase jáxíꞌín,
10ko̱jo ndií Josifiyaa̱, xi chji̱a̱ni xota̱ tji̱e̱e̱ Selomii̱t,
ko̱jo ngi úchán ichítié ko̱jo kan ngase jáxíꞌín,
11ko̱jo Sakariyaa̱, ndií Bebai̱, xi chji̱a̱ni xota̱ tji̱e̱e̱ Bebai̱,
ko̱jo ngi kan jin ngase jáxíꞌín,
12ko̱jo Jonataa̱n, ndií Akataa̱n, xi chji̱a̱ni xota̱ tji̱e̱e̱ Asngaa̱nd,
ko̱jo ngi úchán ko̱jo tie ngase jáxíꞌín,
13ko̱jo Elifelee̱t, ko̱jo Jeiee̱l, ko̱jo Semayiaa̱, ndií Andonikaa̱n, xi jaskan kisꞌiee̱,
ko̱jo ngi ichítié ko̱jo kan ngase jáxíꞌín,
14ko̱jo Utai̱, ko̱jo Sabuu̱nd, xi chji̱a̱ni xota̱ tji̱e̱e̱ Bijbaii̱,
ko̱jo ngi ichítié ko̱jo kan ngase jáxíꞌín.
Esndraa̱ katsjákjo̱a̱ nga ikindyisé xota̱ xi sa̱ꞌínxá ki̱a̱ Ndiꞌaa̱ Néná
15Kó an Esndraa̱ itikó án ngayeje kui xotaa̱ ki̱a̱ tꞌa ndejèꞌ Ajabaa̱, kó ján ni̱xtjin kamájne̱ nga kixindyionjne̱ ki̱a̱a̱, kó tsangasejin an ngi̱jii̱n xota̱ na̱xi̱ńdaá chináꞌmi, ta̱nga kasakojínna xi chji̱a̱ni xota̱ tji̱e̱e̱ Lebii̱. 16Kósꞌe̱ kijíchjaꞌána Eliesee̱r, ko̱jo Ariee̱l, ko̱jo Semayiaa̱, ko̱jo Elnataa̱n, ko̱jo Jarii̱b, ko̱jo Elnataa̱n, ko̱jo Nataa̱n, ko̱jo Sakariyaa̱, ko̱jo Mesulaa̱n, kui xi já ngito̱ko̱o̱, ko̱jo Joyarii̱b, ko̱jo Elnataa̱n, kui xi já kjínkoón, 17kó atixomáa̱ tsi̱ꞌe̱ nga kijíkoón Indoo̱, nda̱ xi ngito̱ko̱o̱ kui ngi̱ndie xi ꞌmí Kasifiaa̱, kó kixiyàa̱ ni xi ka̱tso̱o̱ Indoo̱, ko̱jo ntsꞌi̱e̱, kui xi tjiín xá kuí ngi̱ndiee̱, tsi̱ꞌe̱ nga sa̱ngíyájne̱ xota̱ xi ko̱síko̱jojne̱ nga ka̱manda Ndiꞌaa̱ Néná. 18Kó nga Néná ki̱a̱ tikónjinjne̱, kanangiyajne̱ ngo nda̱ xi kjínkón, ndií Majlii̱, xi chji̱a̱ni xota̱ tji̱e̱e̱ Lebii̱, ndií Israee̱l, ko̱jo Serebíaa̱, ko̱jo nga tjiꞌún ján já ntsꞌi̱e̱, 19ko̱jo Asabiaa̱, ko̱jo Jesayiaa̱, xi chji̱a̱ni xota̱ tji̱e̱e̱ Merarii̱, ko̱jo nga kan já ntsꞌi̱e̱, 20ko̱jo xota̱ xi tsꞌénxá ki̱a̱ na̱ngo̱xi̱i̱, kui xi Ndabii̱ ko̱jo xota̱ xi botixómaá índo tsi̱ꞌe̱ nga ki̱a̱ sa̱ꞌínxátꞌaa̱ xota̱ lebitaa̱, jó úchán ko̱jo kan kamá xota̱ xi katsꞌénxá ki̱a̱ na̱ngo̱xi̱i̱, kó ngayejee̱ nga jaꞌeén má xi kichꞌáxki̱.
Esndraa̱ atíxoma tsi̱ꞌe̱ nga sa̱ꞌínkjaꞌa kjindiá yojoo̱ xotaa̱
21Kó ki̱a̱ tꞌa ndejèꞌ Ajabaa̱, atixoma an tsi̱ꞌe̱ nga si̱ꞌanjne̱ kjindiá, tsi̱ꞌe̱ nga ni̱ma̱kjo̱a̱ si̱ꞌanjne̱ yojojne̱ ngindyi̱ko̱n Néná, tsi̱ꞌe̱ ꞌniú chji̱a̱ꞌaa̱ kui nga nda ka̱ma ndi̱yà nínga ndyi̱mongínjne̱ ji̱n ko̱jo ndíjne̱, ko̱jo ngayeje ni xi tjínjne̱. 22Ngatꞌa̱ soboá kamána nga nda̱ ree̱ tsíꞌáa̱ jájún xi ꞌbítso̱mayise ko̱jo jájún ndi̱je̱ tsi̱ꞌe̱ nga skónjne̱ ki̱a̱ ndi̱ya̱à tsi̱ꞌe̱ nga kondra̱ jmí ni sa̱ꞌínjo̱jínjne̱, ngatꞌa̱ ja̱ bo̱a̱ jè bi̱ kiꞌmíjne̱ nda̱ ree̱: Néná kjo̱a̱ndaa̱ ngayeje xota̱ xi mongase kui tikón, ta̱nga ngaꞌniuú, ko̱jo kjo̱a̱xcha̱án tikónni ngayeje xota̱ xi ꞌbijñámasien kui. 23Kó kiniꞌánkjaꞌajne̱ kjindiá yojojne̱, kó kichjiáꞌájne̱ Nejne̱ ngayeje kui nii̱, kó kuí katsꞌénseén ni xi ꞌniú kichjiáꞌájne̱. 24Kósꞌe̱ ijñátꞌaxín an tiejó ngito̱ko̱ ngi̱jii̱n chináꞌmii̱, kui Serebiyaa̱, ko̱jo Asabiyaa̱, kó ko̱jo ngi tie já ntsꞌi̱e̱, 25kó ngindyi̱ko̱n kui jaá kichꞌíchi̱bo̱a̱jne̱ to̱ntiboaa̱ ko̱jo to̱nsinieé, ko̱jo ni ndikón xí niꞌánkjién ngi̱yaa̱ Ndiꞌaa̱ Néná, ko̱jo chji̱e̱ xi katseꞌeé nda̱ ree̱ ko̱jo xota̱ xi tsjaá kjo̱a̱botíxoma, ko̱jo xota̱ xi botixómaá ko̱jo ngayeje xota̱ xi kisꞌińdo ki̱a̱ na̱xi̱ńdá Israee̱l. 26Jaskan an tsꞌachi̱bo̱a̱ an, kó katsꞌenkꞌasꞌièe̱n tjiꞌún nijón kilo̱ masien to̱ntiboa, ko̱jo ján mi̱ kilo̱ to̱ntiboa kamá ni xi niꞌánkjién ngi̱ya na̱ngo̱xi̱i̱, ko̱jo ján mi̱ kilo̱ to̱nsinié, 27ko̱jo kan tasa̱ yiꞌi xi to̱nsinié xi kan mi̱ to̱n xi to̱nsinié kamáchjínií, ko̱jo jó boso̱ xi ki̱cha̱ bronse̱ xi ꞌna̱ kiniꞌán xi ti̱ bo̱a̱ ti̱ tsꞌén chjínií xikoó to̱nsinieé, 28kó bi̱ kixiáa̱n: Jún jè Néná kiniꞌánkꞌasꞌiee̱n jún nga, kó kui ni xi niꞌánkjieén ni ndikón boá, kó to̱ntiboaa̱ ko̱jo to̱nsinieé ni xi ngayejení ini̱ma̱a̱ xotaa̱ nga katsjaá Néná, kui Ne xi tsi̱ꞌe̱ xota̱ xi xchaá kamá nga. 29Nda tindyiájnú ndyikónjnú kó chindajnú ngaskande nga xꞌi̱chi̱bo̱a̱jnú ki̱a̱ ngi̱yaꞌmaa̱ Ndiꞌaa̱ Néná, ngindyi̱ko̱n chináꞌmi xi ngito̱ko̱o̱ ko̱jo xota̱ lebitaa̱, ko̱jo ngindyi̱ko̱n xota̱ xi ngito̱ko̱ ndiꞌaa̱ xkjín xota̱ xi chji̱a̱ni na̱xi̱ńdá Israee̱l ko̱jo na̱xi̱ńdáꞌniú Jerusalee̱n. 30Kó bo̱a̱ tsꞌén já chináꞌmii̱ ko̱jo xota̱ lebitaa̱ kiniꞌánkꞌasꞌiee̱n to̱ntiboaa̱ ko̱jo to̱nsinieé, ko̱jo ni xi niꞌánkjieén tsi̱ꞌe̱ nga kongínjo̱ ki̱a̱ na̱xi̱ńdáꞌniú Jerusalee̱n, ki̱a̱ Ndiꞌaa̱ Néná. 31Kósꞌe̱ tsangínjne̱ ndeskande ki̱a̱ ndejèꞌ Ajabaa̱ ni̱xtjin tiejoó sá xí tjoón nga tsangínjne̱ na̱xi̱ńdáꞌniú Jerusalee̱n, kó Néná ki̱a̱ kisꞌijñajo̱jne̱, kó kuí boá xi jaꞌáxín kondraa̱ ko̱jo xota̱ xi tsꞌénchéjéná ngi̱ya ndi̱ya̱à. 32Kó ngije jáchójne̱ ki̱a̱ na̱xi̱ńdáꞌniú Jerusalee̱n, ján ni̱xtjin kiniꞌánkjaꞌyájne̱. 33Kó xi ma nijoón ni̱xtjii̱n kichꞌíchi̱bo̱a̱ to̱nsinieé ko̱jo to̱ntiboaa̱, ko̱jo boso̱ xi tsi̱ꞌe̱ Ndiꞌaa̱ Néná, kó chináꞌmi Meremoo̱t kiniꞌánkꞌasꞌienjne̱, kui xi ndií chináꞌmi Uriyaa̱ kamá, kó ti̱ ki̱a̱ nijan kisꞌijñajo̱ Eleasaa̱r, ndií Finee̱, ko̱jo Josabaa̱nd ndií Jesúaa̱, ko̱jo Noandiyaa̱ ndií Binuii̱, xi xota̱ lebita̱ kamá nga. 34Ngayeje kui nii̱ nga kamáxki̱ xikó kjiꞌi é, kó ngo xo̱jo̱n akjatꞌa xikótjín kamá é. 35Kósꞌe̱ xota̱ xi tsangínjo̱ꞌniú kui ni̱xtjin jàn, ta̱nga je jeꞌeꞌoyá nginí, kuí boá xi katsꞌénkꞌasꞌiee̱n kjo̱a̱tjó Néná xí tsi̱ꞌe̱ na̱xi̱ńdá Israee̱l, kó kui nii̱ xi katsꞌénkꞌasꞌien: Jó ndií cho̱yojo kjo̱a̱a̱ ngayeje xota̱ Israee̱l, ichítié ko̱jo yichán jun cho̱tsa̱nga̱ xi jaꞌatji ndi̱ja̱a̱, ichítié ko̱jo kan yito cho̱tsa̱nga̱, tiejó tindso̱ xi̱ꞌin tsi̱ꞌe̱ jé xí katsꞌén xotaa̱, ngayeje kui nii̱ xi kiniꞌánkꞌasiee̱n Néná. 36Jaskan kiniꞌánkꞌasiee̱n kjo̱a̱kitii̱ nda̱ ree̱ kui já xí nkꞌa xaá xi bosikójo ree̱, ko̱jo xtitjón xi kjin ngasenii̱ ndejeꞌ kjindibáni, kui xi kjo̱a̱ndaa̱ xota̱ na̱xi̱ńdaá ko̱jo Ndiꞌaa̱ Néná kisꞌińdoni.
Currently Selected:
Esndraa̱ 8: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
