Esndraa̱ 7
7
Esndraa̱ jachó na̱xi̱ńdáꞌniú Jerusalee̱n
1Jaskan ngije kamá kui nii̱ nga tsꞌénbotixómá Artajerjee̱, nda̱ ree̱ nangi Persia̱, jachó ki̱a̱ na̱xi̱ńdáꞌniú Jerusalee̱n ngo nda̱ xi ꞌmí Esndraa̱, kui xi ndií Asariyaa̱ kamá, ndíndeè Ilsiyaa̱, 2ndínde xí ma joó Saluu̱n, ndínde xi ma jaán Sandoo̱k, ndínde xi ma nijoón Aitoo̱b, 3ndínde xi ma uún Amariyaa̱, ndínde xi ma juún Meriayoo̱t, 4ndínde xi ma yitoo̱ Serariyaa̱, ndínde xi ma jii̱n Usii̱, ndínde xi ma tiee̱ Bukii̱, 5ndínde xi ma tiengoo̱ Aisuaa̱, ndínde xi ma tiejoó Finee̱, ndií chináꞌmi Eleasaa̱, ndií Aaroo̱n, chináꞌmi xi tjoón. 6Kó kuí nda̱ Esndraa̱ jatjoni nangi Babilonia̱, kó skribano̱ kamá, achichí ꞌniú kamábe kjo̱a̱kitii̱ xi Moisee̱ katsjaá xotaa̱, kui xi Nee̱ xota̱ Israee̱l katsꞌénkꞌasꞌiee̱n, kó nda̱ ree̱ katsꞌénkjatjosón ngayeje ni xi tsíꞌá Esndraa̱, ngatꞌa̱ Néná kisꞌijñajii̱n kui nda̱a̱. 7Kó nga jachó nó xí ma yitoo̱ nda̱ re Artajerjee̱, ti̱ kijínijíngí ki̱a̱ na̱xi̱ńdáꞌniú Jerusalee̱n chiboa xota̱ Israee̱l, ko̱jo já chináꞌmi, ko̱jo já lebita̱, ko̱jo já xí siee̱, ko̱jo já xí konda nga̱ntjo̱a̱a̱, ko̱jo já xi tsꞌénxá ki̱a̱ na̱ngo̱xi̱i̱, 8kó xi ma uún sá xí ma yitonii̱ nó nga atíxoma nda̱ ree̱, jachó ki̱a̱ na̱xi̱ńdáꞌniú Jerusalee̱n, 9ngatꞌa̱ ni̱xtjin tjoón sá xí tjoón, ítsꞌi̱yanii̱ nga jatjoni nangi Babilonia̱ xotaa̱, kó ni̱xtjin tjoón sá xí ma uún nga jachó na̱xi̱ńdáꞌniú Jerusalee̱n, kó Néná ki̱a̱ asíko̱jo. 10Ngatꞌa̱ Esndraa̱ ja̱bo̱a̱ je katsꞌénꞌinda ini̱ma̱a̱ tsi̱ꞌe̱ nga skjítꞌoyà kjo̱a̱kitii̱ Néná, kó nga sa̱ꞌínkjatjosón, ko̱jo nga ko̱kóyaá xota̱ Israee̱l kjo̱a̱botíxoma xi kjitꞌa kui kjo̱a̱kitii̱. 11Kó kuí bí ni xi kjitꞌa kui xo̱jo̱n xi nda̱ re Artajerjee̱ katsjaá chináꞌmi Esndraa̱, kui nda̱ skribano̱ kjínkoón xi katsꞌénꞌindó kjo̱a̱botíxomaa̱ Néná, ko̱jo kjo̱a̱kiti xi Néná katsjaá xota̱ Israee̱l, kó bi̱ tsó: 12Artajerjee̱, nda̱ ree̱ já ree̱, tsꞌentínde Esndraa̱, kui nda̱ chináꞌmi, xi skribano̱ kjínkón xi tsꞌénꞌindó kjo̱a̱kitii̱ Néná xí tsi̱ꞌe̱ nkꞌajmii̱, ngatꞌieé kjo̱a̱xió. 13Án boá xi tsꞌénbotixoma an nga ngayeje xotaa̱ xi chji̱a̱ni Israee̱l, ko̱jo tsi chináꞌmi, ko̱jo tsi xota̱ lebita̱ xi síndo ngi̱ndie nínga botixoma an, nga xi mejeén ko̱e̱je̱joo̱ na̱xi̱ńdáꞌniú Jerusalee̱n, ngatjíjoo̱, 14ngatꞌa̱ an ree̱, ko̱jo nga yito xota̱ xi tsjána kjo̱a̱botíxoma, jè ikꞌíndajne̱ nga ji ko̱na̱ngíyájne̱ nga kꞌuin na̱xi̱ńdáꞌniú Jerusalee̱n, xikó tsó kjo̱a̱kitii̱ Néná xi je tikón ngi̱ya ndse̱ ji, 15ko̱jo nga ji xꞌe̱ ji to̱ntiboa ko̱jo to̱nsinié xi nda̱ ree̱ ko̱jo xota̱ xi tsjaá kjo̱a̱botíxoma je ngayejeni ini̱ma̱a̱ nga Néná xí tsi̱ꞌe̱ xota̱ Israee̱l je katsꞌénkꞌasꞌiee̱n na̱xi̱ńdáꞌniú Jerusalee̱n tikón Ndiꞌandikoón. 16Kó chꞌi̱e̱ ji ngayeje to̱ntiboa ko̱jo to̱nsinié xi sa̱ko̱ó ngayeje ndí nangì xi chji̱a̱ni Babilonia̱, ko̱jo chji̱e̱ xi ngayejeni kon xota̱ na̱xi̱ńdaá, ko̱jo xi já chináꞌmii̱ je katsꞌénkꞌasꞌien tsi̱ꞌe̱ Ndiꞌaa̱ Néná xi tikón ki̱a̱ na̱xi̱ńdáꞌniú Jerusalee̱n. 17Kó kui to̱o̱n xi sꞌi̱tsieni ji ndií cho̱yojo, ko̱jo cho̱tsa̱nga̱ xi jaꞌatji ndi̱ja̱a̱, ko̱jo cho̱tsa̱nga̱, ko̱jo ni xi maxchá jno̱o̱ ko̱jo ni xi niꞌánkjién nga niꞌánkꞌasꞌien kjo̱a̱tjó, kó ki̱a̱ si̱ꞌankꞌasꞌien kui nii̱ ki̱a̱ Ndiꞌaa̱ Nèe̱ xi tikón ki̱a̱ na̱xi̱ńdáꞌniú Jerusalee̱n. 18Kó to̱ntiboa ko̱jo to̱nsinié xi kꞌo̱ngii̱, jí xí ye ji mí ni xi nda xi si̱ꞌin ji nganda tse̱, ko̱jo tsi̱ꞌe̱ ntsꞌie ji, nda ti̱ꞌin ji xikótsꞌèn mejeén Nèe̱. 19Kó kui ni xi niꞌánkjién xí ndikón xí si̱ꞌankꞌasꞌiee̱n tsi̱ꞌe̱ nga si̱ꞌan xaá Nèe̱ ki̱a̱ Ndiꞌaa̱, tꞌenje̱ꞌoyé nginí ji ki̱a̱ na̱xi̱ńdáꞌniú Jerusalee̱n. 20Kó ngayeje ni xi ngase xi ka̱machjieén tsi̱ꞌe̱ Ndiꞌaa̱ Néná, ki̱a̱ ngatsꞌítsiéni to̱n xi tsi̱ꞌe̱ nda̱ ree̱. 21An Artajerjee̱, nda̱ ree̱ boá xi tsꞌéntsjàa̱ kui kjo̱a̱botíxomaa̱ ngayeje já xí koón to̱o̱n nangi xi kjin ngase manii̱ ndejeèꞌ, tsi̱ꞌe̱ nga ngayeje ni xi ku̱i̱ꞌa nda̱ chináꞌmi Esndraa̱, kui xi nda̱ kjínkón xi tsꞌénꞌindó kjo̱a̱kitii̱ Néná xí tsi̱ꞌe̱ nkꞌajmii̱, tsá ngateꞌeé. 22Kó ngaskande ján mi̱ ján úchán kilo̱ to̱ntiboa ngateꞌeé, ko̱jo tsi ngaskande kan jó mi̱ kilo̱ to ndso̱ko̱a̱n ṉño̱pan, ko̱jo tsi ngaskande jó mi̱ jó úchán litro̱ isti̱, ko̱jo ngayeje xikó kjiꞌi na̱xa̱ xi ka̱machjieén. 23Ngayeje ni xi ko̱tíxoma Néná xí tsi̱ꞌe̱ nkꞌajmii̱ tsi̱ꞌe̱ nga ka̱manda Ndiꞌaa̱ Néná, nga niꞌánkjatjosón, ngatꞌa̱, míkjo̱a̱a̱ nga ko̱e̱ꞌéndiè nga Néná sa̱ꞌínxchánjo̱ nda̱ ree̱ ko̱jo ndií. 24Kó ngayeje jún xiyàjnúꞌun, nga ngayeje já chináꞌmii̱, ko̱jo já lebitaa̱, ko̱jo já xí siee̱, ko̱jo já xí konda nga̱ntjo̱a̱a̱, ko̱jo já xi tsꞌénxá ki̱a̱ na̱ngo̱xi̱i̱ Néná, ka̱májín kꞌuínieé nga ku̱i̱ꞌichjítjé yojoo̱, ko̱jo tsi kje̱ꞌe ngase ni xi kꞌuínieé nga sa̱ꞌín tsi̱ꞌe̱ kui to̱n xi machjítjé nii̱. 25Kó ji Esndraa̱, ti̱ꞌinkjìn jí kui kjo̱a̱kjínkón xi katsjaá Nèe̱, kó tꞌínde ji nendiꞌamasien, ko̱jo xtitjón, xi ngatsꞌendàjin kjo̱a̱a̱ ngayeje xota̱ na̱xi̱ńdá xí síndo kjin ngasenii̱ ndejeèꞌ ngayeje xi je be kjo̱a̱kitii̱ Néná, kó xi bejín, takoyèe̱. 26Kó ngayeje xota̱ xi sa̱ꞌínkjatjosónjín kjo̱a̱kitii̱ Nèe̱, ko̱jo kjo̱a̱kitii̱ nda̱ ree̱, nga niꞌánjeé tsi tsi̱ꞌe̱ nga si̱ꞌankꞌien, ko̱jo tsi tsi̱ꞌe̱ nga si̱ꞌanjeé, ko̱jo tsi tsi̱ꞌe̱ nga ku̱i̱yòtjíngií, ko̱jo tsi tsi̱ꞌe̱ nga chja̱ꞌáxiín ni xi tjiín, ko̱jo tsi tsi̱ꞌe̱ nga ndo̱bo̱a̱yà kjoꞌyá. 27Ngatamachikonñé Néná, kui xi Nee̱ xota̱ xi xcháná, kui xi bo̱a̱ kjiꞌi ni xi íjñajin ngi̱jin ini̱ma̱a̱ nda̱ ree̱, tsi̱ꞌe̱ nga tsja sa̱ꞌínkꞌié Ndiꞌaa̱ Néná xí tikón ki̱a̱ na̱xi̱ńdáꞌniú Jerusalee̱n. 28Kó an katsjána kjo̱a̱ni̱ma̱takoón, ngatꞌa̱ nda kamábe an nda̱ ree̱, ko̱jo já xí tsjaá kjo̱a̱botíxoma, ko̱jo já xtitjón xi chji̱a̱ni ree̱. Kó Néná boá xi katsjángaꞌniúna án tsi̱ꞌe̱ nga itikó án já ngito̱ko̱o̱ xota̱ Israee̱l, tsi̱ꞌe̱ nga nijan kijíjo̱na nga tsangínnijíngíjne̱.
Currently Selected:
Esndraa̱ 7: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
