Esndraa̱ 6
6
Nga kasako kjo̱a̱ xi katsjá nda̱ re Siroo̱
1Kósꞌe̱ nda̱ re Ndariyoo̱ katsjákjo̱a̱, sꞌe̱ ikindyiséyà ki̱a̱ ndiꞌa nínga tjoꞌótjó ngayeje xo̱jo̱o̱n, ki̱a̱ nínga chjaꞌátjó ni to̱nsinieé ki̱a̱ nangi Babilonia̱. 2Kó ki̱a̱ na̱xi̱ńdáꞌniú Akmeta̱ ki̱a̱ ndo̱bo̱a̱xa̱á xí tikón ki̱a̱ nangi Mendia̱, kasako ngo chꞌo̱ xo̱jo̱n nínga bi̱ tsó én xí kjitꞌaa̱: Kjo̱a̱foaꞌátsjien: 3Kó nó tjón nga kamá re Siroo̱, kuí má kui ree̱ xi katsjá ngo kjo̱a̱ kjo̱a̱a̱ Ndiꞌaa̱ Néná xi tikón ki̱a̱ na̱xi̱ńdáꞌniú Jerusale̱n xi bi̱ tsó: Nga chjaninkꞌa nginí kui Ndiꞌaa̱, ki̱a̱ ngi̱ndie nínga niꞌánkꞌasꞌien kjo̱a̱tjoó, kó xó xí ꞌbítjatsꞌennii̱ ꞌniú nga xindyiá. Kó nga kan yito metro̱ nga nkꞌa, ko̱jo nga tiyá ngatama. 4Kó ján ndi̱yà ndi̱jo̱ xi kiniꞌánchoo̱n ngatꞌieé, ko̱jo ngo ndi̱yà yá xí tja̱tsi̱e̱, kó to̱n xi kju̱i̱e̱e̱, to̱n xi tjiín nda̱ ree̱ ngatamachjíní. 5Kó kjo̱a̱a̱ ni to̱nsinié ko̱jo ni to̱ntiboa xi tsꞌaxié Nabukondonosoo̱r ki̱a̱ na̱ngo̱xi̱i̱ Néná xi tikón ki̱a̱ na̱xi̱ńdáꞌniú Jerusalee̱n, sꞌe̱ ki̱a̱ kijíjo̱ na̱xi̱ńdáꞌniú Babilonia̱, nga tangínjo̱ꞌoyá nginí kui nii̱ ki̱a̱ na̱ngo̱xi̱i̱ Néná ki̱a̱ na̱xi̱ńdáꞌniú Jerusalee̱n, kó ngatꞌíndo nginí ngi̱ndiee̱ ki̱a̱ Ndiꞌaa̱ Néná. 6Kó kuíni nga jún Tatnai̱, nda̱ xtitjón xi botixómaá nangi xi kjin ngasenii̱ ndejeèꞌ, ko̱jo Setaa̱r-Bosnai̱, ko̱jo já xí nijan ma, ko̱jo já xá xí tsꞌénxá kui ngi̱ndiee̱, ti̱ꞌankjinjnú yojojnú kui ngi̱ndiee̱, 7kó te̱ꞌéndièjnú nga ka̱ma xá xí kjima ki̱a̱ Ndiꞌaa̱ Néná, kó nga nda̱ xtitjoón xota̱ jundíoo̱ ko̱jo xota̱ xi xchaá kui xotaa̱ nga kjininkꞌá nginí Ndiꞌaa̱ Néná ki̱a̱ ngi̱ndie nínga kisꞌijña ngasꞌe̱. 8Kó án boá xi tsꞌén tsja an kui kjo̱a̱a̱, tsi̱ꞌe̱ nga ko̱si̱ko̱jójnú kui já xchá jundíoo̱ tsi̱ꞌe̱ nga sa̱ꞌínda nginí Ndiꞌaa̱ Néná, kó nga kui to̱n xi tikoón nda̱ ree̱, kó ngaskande to̱n xi ꞌbíchjítjéni ni xota̱ xi síndo kjin ngasenii̱ ndejeèꞌ, ki̱a̱ nga chjábení tsi̱ꞌe̱ nga ni̱xtjii̱n má nga ka̱machjií xaá kui jaá, tsi̱ꞌe̱ kꞌuijñáxiójín kui xaá. 9Kó ngayeje ni xi ka̱machjién xikoó: Ndií cho̱yojo, cho̱tsa̱nga̱ xi jaꞌatji ndi̱ja̱a̱, ko̱jo cho̱tsa̱nga̱ xi niꞌánkjién tsi̱ꞌe̱ kjo̱a̱tjó xi niꞌánkꞌasꞌiee̱n kui Néná xí tsi̱ꞌe̱ nkꞌajmii̱, ko̱jo to ndso̱ko̱a̱n ṉño̱paa̱n, ko̱jo na̱xa̱a̱, ko̱jo binoo̱, ko̱jo istii̱, xikó katsó chináꞌmi xi síndo ki̱a̱ na̱xi̱ńdáꞌniú Jerusalee̱n, bo̱a̱ tsꞌén ngataꞌeé xki̱ ni̱xtjin, 10tsi̱ꞌe̱ nga ka̱maa̱ sa̱ꞌínkꞌasꞌiee̱n kjo̱a̱tjó xi sije̱n kui Néná xi tsi̱ꞌe̱ nkꞌajmii̱, kó ngatíchji̱a̱tjé nda̱ ree̱ ko̱jo ndií. 11Kó ti̱ bi̱ tsꞌén tsꞌénbotixoma an nga: Ta̱ꞌyaní xi sku̱i̱e̱ndikónjín kui kjo̱a̱kitii̱, ngachjaꞌáxiín ngo yándojoó ndiꞌaa̱, kó ki̱a̱ ngatꞌínijín ki̱a̱ tꞌanangii̱, sꞌe̱ nganiꞌánxtikjaá kui yaá, kósꞌe̱ ngatjatson kui ndiꞌaa̱. 12Kó kui Néná xí jaꞌájin nga ki̱a̱ kꞌuijñá jaꞌeén, ngatsꞌenkjié ngayeje já re ko̱jo nangi xi tsja sa̱ꞌínkjién tsi̱ꞌe̱ nga sa̱ꞌíntsobeé, ko̱jo tsi sa̱ꞌínkjatsón Ndiꞌaa̱ Néná kui xi tikón ki̱a̱ na̱xi̱ńdáꞌniú Jerusalee̱n. An Ndariyoo̱, tjítsꞌenda an kui kjo̱a̱kitii̱, kó tsꞌénbotixoma an nga si̱ꞌankjatjosón cha̱n cha̱n. 13Kósꞌe̱ Talmaii̱, nda̱ xtitjón xi botixómaá kjin ngasenii̱ ndejeèꞌ, ko̱jo Setaa̱r-Bosnai̱, ko̱jo já xí nijan ma, bo̱a̱ má katsꞌén xikó tsó kjo̱a̱ xi katsꞌénda Ndariyoo̱. 14Kó xota̱ xi xchá jundíoo̱ katsꞌénda ko̱jo iskjininkꞌa kui xaá, xikó tsó én xí katsóyà nda̱chji̱ni̱e̱ꞌe̱én Néná xi ꞌmí Ajeoo̱, ko̱jo Sakariyaa̱, ndií Indoo̱. Kó kamaá nga katsꞌéndo̱jò kuí xaá xikótsꞌèn atíxoma Néná xi tsi̱ꞌe̱ xota̱ Israee̱l, ko̱jo xikó katsó kjo̱a̱kitii̱ Siroo̱, ko̱jo Ndariyoo̱, ko̱jo Artajerjee̱, nda̱ ree̱ nangi Persia̱. 15Kó xi ma jaán ni̱xtjii̱n sá xí ꞌmí Andaa̱r, nó xi ma junnii̱ nga atíxoma nda̱ re Ndariyoo̱ nga kamándo̱jo kuí Ndiꞌaa̱. 16Kó xota̱ Israee̱l, ko̱jo chináꞌmii̱, ko̱jo já lebitaa̱, ko̱jo xi ngase xota̱ xi tsꞌangi ngasee̱, achichí tsjá kamaá nga katsꞌénchikonñé kui Ndiꞌaa̱. 17Kó kjiꞌanga katsꞌénkꞌasꞌiee̱n kui Ndiꞌaa̱ Néná, katsꞌénkꞌasꞌien úchán ndií cho̱yojo, ko̱jo jó úchán cho̱tsa̱nga̱ xi jaꞌatji ndi̱ja̱a̱, ko̱jo nijón úchán cho̱tsa̱nga̱, ko̱jo tiejó tindso̱ xi̱ꞌin xi kiniꞌánkꞌasꞌien tsi̱ꞌe̱ nga kiniꞌánkjié jeé xota̱ Israee̱l, xikó kjiꞌi ma ngayeje xtín xota̱ tji̱e̱e̱. 18Kó ikꞌíndonda já chináꞌmii̱ tsi̱ꞌe̱ nga sa̱ꞌin xaá, xikó kjiꞌi nga nkꞌa xá xí tjiín nga ngo nga ngo, ko̱jo já lebitaa̱, tsi̱ꞌe̱ nga sa̱ꞌín xaá Néná ki̱a̱ na̱xi̱ńdáꞌniú Jerusalee̱n, xikó tsó ki̱a̱ chꞌo̱ xo̱jo̱n xi katsꞌénꞌindó Moisee̱. 19Kó xota̱ xi je kamándé nga kisꞌińdoꞌniuú katsꞌén sꞌué paskuaa̱ ni̱xtjin tienijoón sá xí tjoón, 20ngatꞌa̱ já chináꞌmii̱, ko̱jo já lebitaa̱ je katsꞌéntsjie yojoo̱ xikoó tsi ta̱ kamá, kó ngayejee̱ nga je tsjie, sꞌe̱ jaskan katsꞌénkꞌasꞌien kjo̱a̱tjó xi niꞌánkꞌasꞌien tsi̱ꞌe̱ sꞌué paskuaa̱ kui xi ngo cho̱tsa̱nga̱ xi jaꞌatji ndi̱ja̱a̱, ngo nga xki̱ nga ngo nga ngo xota̱ xi jeꞌeꞌoyá nginí nga kisꞌińdoꞌniuú, ko̱jo ngo tsi̱ꞌe̱ já chináꞌmii̱ ko̱jo ngo tsi̱ꞌe̱ kui xotaa̱. 21Kó iskjinie kui nichiniee̱ xota̱ Israee̱l xi jeꞌeꞌoyá nginí nga kisꞌińdoꞌniuú, ko̱jo xota̱ xi je katsꞌénkjii̱n yojoo̱ ni xi ndajín xi tjín kuí tꞌanangii̱, tsi̱ꞌe̱ nga ko̱ngase Néná, kui xi Nee̱ xota̱ Israee̱l, 22kó achichí tsjá kamaá nga yito ni̱xtjin katsꞌén sꞌueé pan xi jmí nisanjiín, ngatꞌa̱ Néná katsjaá kui kjo̱a̱tsjaa̱, kó katsꞌénꞌinda ini̱ma̱a̱ nda̱ re xi chji̱a̱ni nangi Asiria̱ tsi̱ꞌe̱ nga tsja̱a tsja nga tsja̱angaꞌniuú xá xí kjima ki̱a̱ Ndiꞌaa̱ Néná, Nee̱ xota̱ Israee̱l.
Currently Selected:
Esndraa̱ 6: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
