Esndraa̱ 5
5
Nga ítsꞌi̱yá nginií kui xaá
1Kósꞌe̱ jáchji̱ni̱e̱ꞌe̱én Néná xi ꞌmí Ajeoo̱ ko̱jo Sakariyaa̱, ndií Indoo̱, tsíchji̱a̱ én xí Néná katsjaá kjo̱a̱a̱ xota̱ xi chji̱a̱ni nangi Jundáa̱, ko̱jo xi síndo na̱xi̱ńdáꞌniú Jerusalee̱n, nga katsꞌénkjién jaꞌeén Néná xí chji̱a̱ni xota̱ Israee̱l, kui xi ki̱a̱ síndojo̱. 2Kui ni̱xtjin jàn katsꞌéngaꞌniú Sorobabee̱l, ndií Salatiee̱l, ko̱jo Jesuaa̱, ndií Josandaa̱k, kó ítsꞌi̱yanii̱ nga iskjininkꞌa nginí Ndiꞌaa̱ Néná xí tikón ki̱a̱ na̱xi̱ńdáꞌniú Jerusalee̱n, kó kui jaá ko̱jo jáchji̱ni̱e̱ꞌe̱én Néná xi ki̱a̱ síndojo̱ asíko̱jo. 3Ta̱nga ti̱kuii ni̱xtjin jachó ngindyi̱ko̱n kui jaá Tatnai̱, nda̱ xtitjón xi botixómá nangi xi kjin ngasenii̱ ndejeèꞌ, ko̱jo Setaa̱r-Bosnai̱, ko̱jo já xí nijan ma, kó bi̱ katsoó nga tsíchji̱a̱jo: ꞌYá xí katsjájnúkjo̱a̱ tsi̱ꞌe̱ nga kachjaninkꞌa nginíjnú kui Ndiꞌaa̱, ko̱jo tsi̱ꞌe̱ nga si̱ꞌando̱jòjnú xoó. 4Ko̱jo bi̱ katsoó nga asíyaá nga: Kó, kó ꞌmí jaꞌeén kui já xí ndyi̱kjininkꞌa kui Ndiꞌaa̱ nga. 5Ta̱nga Néná tsꞌénkoón nga tsꞌénkotsijee̱n xota̱ xi xchá jundíoo̱, kó katsꞌénjiín kjo̱a̱ꞌniú kuí jaá nga katsꞌénkasién xá xí ndyi̱tsꞌèn, ngaskande nga kꞌuiyaá kui nii̱ nda̱ re Ndariyoo̱, kósꞌe̱ kui sa̱ngíyá ngo xo̱jo̱n nga tsja̱a kjo̱a̱. 6Kósꞌe̱ Tatnai̱, nda̱ xtitjón xi botixómaá nangi xi kjin ngasenii̱ ndejeèꞌ ko̱jo Setaa̱r-Bosnai̱, ko̱jo já xi nijan majo̱, ko̱jo xtitjón xi chji̱a̱ni xi ingoboaá ndejeèꞌ katsangiyaa̱ nda̱ re Ndariyoo̱, 7ngo xo̱jo̱n xi bi̱ tsó én xí akjatꞌaa̱: Ngatꞌieé kjo̱a̱xió ji nda̱ re Ndariyoo̱. 8Chjiéngá xche̱ ji nga nda̱ re, nga tsangínjne̱ ki̱a̱ ndí nangi Jundea̱, ki̱a̱ Ndiꞌaa̱ Néná xí ta̱nisién jeé, kui xi a xi̱xi̱ yiꞌi ndi̱jo̱ ko̱jo yá kjimandani xoó. Kui xaá achichí kjo̱a̱kjínkón tjíniꞌánkjién nga kjimanda, kó tsá kjima ngi̱ya tsá kui xotaa̱. 9Kó akasíyájne̱ kui xota̱ xi xchaá, ꞌyá xí katsjaákjo̱a̱ nga tjichjáninkꞌa kui Ndiꞌaa̱, ko̱jo nga ka̱mando̱jo kuí xoó. 10Kó ti̱ akasíyájne̱ jaꞌeén kui já xi ndyi̱tsꞌènxaá, tsi̱ꞌe̱ nga xcha̱jne̱, kó kꞌuiyájne̱ ji ꞌyání bo̱a̱ xi síndotjoón kui xaá, 11kó ta̱ bi̱ tsí katsójne̱: Moso̱ Néná xí tsi̱ꞌe̱ nkꞌajmii̱ ko̱jo tꞌanangii̱ boá ji̱n, kó ndyi̱chjaninkꞌajne̱ Ndiꞌa xi achichí kjín nónií nga kamándaa̱, kui xi katsꞌénda kó kamándo̱jo̱ó nda̱ ree̱ na̱xi̱ńdá Israee̱l, 12ta̱nga kjo̱a̱a̱ nga xota̱ xi xchájne̱ tsintꞌiéꞌénjiín Néná xí tsi̱ꞌe̱ nkꞌajmii̱, kuí boá xi katsꞌénkꞌasꞌien kui xotaa̱ ngi̱ya tsja Nabukondonosoo̱r, nda̱ ree̱ nangi Babilonia̱, kui nda̱ Kalndea̱ xi katsꞌénkjatsón kuí Ndiꞌaa̱, kósꞌe̱ kijíjo̱ꞌniú kuí xota̱ na̱xi̱ńdaá ki̱a̱ nangi Babilonia̱. 13Ta̱nga nó tjoón Siroo̱ nga kamá ree̱ nangi Babilonia̱, katsjá ngo kjo̱a̱ tsi̱ꞌe̱ nga chjaninkꞌa nginí Ndiꞌaa̱ Néná. 14Kó ni to̱nsinié ko̱jo ni to̱ntiboa xi chji̱a̱ni na̱ngo̱xi̱i̱ Néná, kui xi Nabukondonosoo̱r tsꞌaxiéni ki̱a̱ Ndiꞌandikoón Néná xi kisꞌijña ki̱a̱ na̱xi̱ńdáꞌniú Jerusalee̱n, sꞌe̱ ki̱a̱ kisꞌińdo na̱ngo̱xi̱i̱ nangi Babilonia̱, nda̱ re Siroo̱, tsꞌaxiéni ki̱a̱ na̱ngo̱xi̱i̱ nangi Babilonia̱ kósꞌe̱ katsꞌénkꞌasꞌiee̱n ngo nda̱ xi ꞌmí Sesbasaa̱r, kui xi nda̱ xtitjón katsꞌén, 15kó bi̱ katsoó kui nda̱a̱: Chjábé jí ngayeje kui nii̱, kó tꞌen sꞌe̱ ki̱a̱ tꞌínde ji Ndiꞌandikón xí tikón ki̱a̱ na̱xi̱ńdáꞌniú Jerusalee̱n, kó na̱ngo̱xi̱i̱ Néná nga chjaninkꞌa nginí ngi̱ndie nínga kisꞌijña. 16Kó ti̱kuíní Sesbasaa̱r xi kjindibá kó indyiá xó xí tjoón Ndiꞌaa̱ Néná xí tikón na̱xi̱ńdáꞌniú Jerusalee̱n, kó ndeskande koó kjiꞌa, ngaskande ngotꞌe̱, ikꞌítsꞌi̱yanii̱ nga kjimanda nginí, ndatsi ngotꞌe̱ ꞌne̱, kji̱e̱ ma ndo̱jòjín. 17Kó ngotꞌe̱ ꞌne̱, tsi sasieén nda̱ ree̱, ka̱má ku̱i̱ndyi̱séndi̱ya̱à ki̱a̱ ndiꞌa nínga machjí to̱o̱n xi chji̱a̱ni ree̱ xi tikón ki̱a̱ nangi Babilonia̱, tsi̱ꞌe̱ nga xchi̱a̱ tsi nda re Siroo̱ xi katsjá ngo kjo̱a̱ tsi̱ꞌe̱ nga chjaninkꞌa nginí Ndiꞌaa̱ Néná ki̱a̱ na̱xi̱ńdáꞌniú Jerusale̱n, kó ngatꞌíyájne̱ mí ni xi mejeén nda̱ ree̱ nga ka̱ma kjo̱a̱a̱ kui nii̱.
Currently Selected:
Esndraa̱ 5: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
