Esndraa̱ 4
4
Kondraa̱ katsꞌeén kjo̱a̱ꞌniú xota̱ xi ndyi̱tsꞌènda Ndiꞌaa̱ tsi̱ꞌe̱ nga sa̱ꞌínkasién kui xaá
1Ta̱nga nga tsintꞌié xota̱ xi kondraa̱ Jundáa̱ ko̱jo xi tsi̱ꞌe̱ Benjaa̱ nga kui xota̱ xi kisꞌińdoꞌniú ngasꞌe̱ je ndyi̱tsꞌènda nginí na̱ngo̱xi̱i̱ Néná, kui xi Nee̱ xota̱ Israee̱l, 2kijíkoón Sorobabee̱l ko̱jo xota̱ xi ngito̱ko̱o̱ xtín xota̱ ndiꞌaa̱, kó bi̱ katsoó: Ji̱n ko̱si̱ko̱jojne̱ jún nga si̱ꞌanda ngíñá kuí ndiꞌaa̱, ngatꞌa̱ ne tsa̱jún boá xi ndyi̱mindyiséjne̱, xikó ndyi̱niꞌánjnú jún, kó kuí boá xi si̱ꞌankꞌasꞌienjne̱ kjo̱a̱tjó, ndeskande ni̱xtjii̱n Esaa̱r-Andoo̱n, nda̱ ree̱ nangi Asiria̱, kui xi bo̱a̱ katsójne̱ nga kꞌi̱e̱ kjindibánijíngíjne̱ kui ngi̱ndiee̱. 3Ta̱nga Sorobabee̱l, ko̱jo Jesuaa̱, ko̱jo xi ngase ngito̱ko̱o̱ xtín xota̱ ndiꞌaa̱ xota̱ Israee̱l bi̱ katsoó kui xotaa̱: Jmí nijínjnú jún kjo̱a̱a̱ ji̱n, tsi̱ꞌe̱ nga jún ko̱si̱ko̱jójnú ji̱n nga si̱ꞌanda Ndiꞌaa̱ Nejne̱, ngatꞌa̱ ji̱n soboá boá xi si̱ꞌandajne̱ Ndiꞌaa̱ Nejne̱, kui xi Nee̱ xota̱ Israee̱l, xikótsꞌèn je atíxomajne̱ Siroo̱ nda̱ ree̱ nangi Persia̱. 4Kósꞌe̱ xota̱ na̱xi̱ńdá xí chji̱a̱ni kui tꞌanangii̱ indyiándikoón xota̱ tji̱e̱e̱ Jundáa̱, tsi̱ꞌe̱ nga sa̱ꞌíndajínni kui Ndiꞌaa̱, 5kó katsjáxaá já xí botixómá tsi̱ꞌe̱ nga ꞌniú sa̱ꞌiín nga ngiti̱ jmí ni sa̱ꞌínjín, kó ngayeje ni̱xtjin nga kisꞌijña Siroo̱, nda̱ ree̱ nangi Persia̱, ngaskande nga atíxoma Ndariyoo̱, nda̱ ree̱ nangi Persia̱ nga. 6Ni̱xtjin nga tjón tjón atíxoma nda̱ re Asueroo̱, kiniꞌánꞌindó ngo xo̱jo̱n nínga akjangitaꞌin xota̱ xi kisꞌińdo nangi Jundáa̱ ko̱jo xi chji̱a̱ni na̱xi̱ńdáꞌniú Jerusale̱n. 7Kó ni̱xtjin nga atíxoma nda̱ re Artajerjee̱, kui já xí ꞌmí Bislaa̱n, Mitríndatee̱, Tabee̱l, ko̱jo xi ngase já xí nijan kamá kui jaá, katsꞌénꞌindoó ngo xo̱jo̱n nga én aramea̱ Artajerjee̱ nda̱ ree̱ nangi Persia̱. 8Kó nda̱ xtitjón Reuu̱n, ko̱jo nda̱ skribano̱ Simsai̱, katsꞌéndaa̱ ngo xo̱jo̱n nda̱ re Artajerjee̱ kondra̱a̱ na̱xi̱ńdáꞌniú Jerusalee̱n. 9Kó kui ni̱xtjii̱n nda̱ xtitjón Reuu̱n ko̱jo nda̱ skribano̱ Simsai̱, ko̱jo xi ngase já xí nijan kamá kui jaá, kui xi já xí nendiꞌamasiee̱n, ko̱jo já xi nendiꞌamasien xi nkꞌa ngase xaá, ko̱jo jájún xi nkꞌa xaá, ko̱jo já xí tsꞌénxaá na̱xi̱ńdaá, xi chji̱a̱ni Eree̱k, ko̱jo xi chji̱a̱ nangi Babilonia̱, ko̱jo xi chji̱a̱ni Susa̱, kui xi xota̱ elamitaa̱, 10ko̱jo xi ngase xota̱ xi kui nda̱ xi kamáyàndikón ko̱jo xi nkꞌa kamá xaá xi kiꞌmí Asnapaa̱r katsangiya tsi̱ꞌe̱ nga ki̱a̱ kꞌuíndo na̱xi̱ńdá xí chji̱a̱ni nangi Samaria̱, ko̱jo kje̱ꞌe nangi kjin ngasenii̱ ndejèꞌ Éufratee̱. 11Kó kanangiyaa̱ ngo kui xkjín xo̱jo̱o̱n xi bi̱ tsó: Tsi̱ꞌe̱ nda̱ re Artajerjee̱, mosoo̱ boá xi katsangiya, xota̱ xi síndo kjín ngasenii̱ ndejeèꞌ. Ngotꞌe̱ ꞌne̱, 12Ngatamabe ree̱ nga xota̱ jundío̱ xi jatjoni nangi Babilonia̱ kó kꞌi̱e̱ jeꞌekónná kꞌi̱e̱ na̱xi̱ńdáꞌniú Jerusalee̱n jè ndyi̱tsꞌènda nginí kui na̱xi̱ńdá kitikjo̱a̱ ko̱jo xi ndajiín, kó jè ndyi̱mindyiá xó xí fí ngindiee̱. 13Ngatama ree̱ nga tsi ka̱manda nginí kui na̱xi̱ńdáꞌniuú, kó tsi ka̱mando̱jo xoó, jmí ni tsja̱ajín xi ku̱i̱ꞌíchjítjéni yojoo̱, ti̱nde to̱n, ti̱nde ta̱jmìjínni, kó kuíni nga to̱n xi fochó ngi̱ya tsja já ree̱ ka̱maniꞌii̱n. 14Kó ngotꞌe̱ ꞌne̱ nga ji̱n ki̱a̱ tjisákójne̱ ni xi ndyi̱chinie ko̱jo ni xi ndyi̱ꞌyòjne̱ ki̱a̱ ndo̱bo̱a̱xa̱á, kixi̱jín májne̱ nga xcha̱ndikónjiín, kuíni nga kanangiyajne̱ kui xo̱jo̱o̱n, kó akakojne̱ tsi̱ꞌe̱ nga sku̱i̱e̱ nda̱ ree̱, 15tsi̱ꞌe̱ nga ku̱i̱ndyi̱séndi̱ya̱à chꞌo̱ xo̱jo̱n nínga kjitꞌa kjo̱a̱foaꞌátsjiee̱n xota̱ xi xcháa̱, kó ki̱a̱ sa̱ko̱ó ki̱a̱ kui chꞌo̱ xo̱jo̱o̱n, nga kitikjo̱a̱ ko̱jo ndajín boá kui na̱xi̱ńdáꞌniuú, kjo̱a̱a̱ ree̱ ko̱jo nangi xi̱xi̱i̱, kó ndeskande ni̱xtjin xchá jàn boá nga kisꞌiee̱ kjo̱a̱xti, kuíni nga akjatiyani. 16Mejénjne̱ nga xche̱ ji nda̱ re, (mejénjne̱ nga si̱ꞌankiejne̱) nga tsi ka̱mandaya nginí kui na̱xi̱ńdáꞌniuú, kó tsi ka̱mando̱jo xoó, ta̱ngatꞌanii̱ kui nii̱ nga sa̱kójiín ngo chikjan tꞌanangi kꞌi̱e̱ xtji̱e̱e̱n ndejeèꞌ. 17Kósꞌe̱ nda ree̱ katsangiyaa̱ ngo én, nda̱ xtitjón Reuu̱n, ko̱jo nda̱ skribano̱ Simsai̱, ko̱jo ngayeje xota̱ xkjín kuí jaá xi nijan síndo ki̱a̱ nangi Samaria̱, ko̱jo xota̱ xi ngase xi síndo kjin ngasenii̱ ndejeèꞌ, kó bi̱ tsó én xí kjitꞌa kui xo̱jo̱o̱n: Ngasꞌiejnú kjo̱a̱xió, ko̱jo kjo̱a̱nda. 18Kui xo̱jo̱n xi kanangiyejne̱, jè kiniꞌányá cha̱n cha̱n ngindyikón án, 19kó jè katsja an ngo kjo̱a̱, tsi̱ꞌe̱ nga ku̱i̱ndyi̱sé, kó jè kasakosé nga kui na̱xi̱ńdáꞌniú jàn askjanjo̱ já ree̱ ni̱xtjin xchá ján, kó tsꞌaxié kjo̱a̱se nga índa kjo̱a̱xchán, 20ko̱jo nga ki̱a̱ na̱xi̱ńdáꞌniú Jerusale̱n kisꞌie já re xi ꞌniú kamá nga kui atíxomaa̱ ngayeje nangi xi kisꞌie kjin ngasenii̱ ndejeèꞌ, kó kuí boá xi kamáchjií to̱n xi machjítjé ni, ko̱jo tsangínjoo̱ ni kamáxchaá xotaa̱, ko̱jo kamáchjí saá. 21Kó ngotꞌe̱ ꞌne̱, ngi̱ya ndsa̱jnú síndo kui xotaa̱ tsi̱ꞌe̱ nga sa̱ꞌínkꞌíxió xaá, kó nga kui na̱xi̱ńdáꞌniuú ngiti̱ chjaninkꞌajín, ngaskande nga an xi kꞌo̱xié an ngo xo̱jo̱n nínga kjótꞌa kjo̱a̱ xi tsja an. 22Kó chónjnú nga si̱ꞌankjatjosónjnú kui kjo̱a̱ xi tsꞌéntsja an, tsi̱ꞌe̱ nga ngiti̱ ka̱ma tsiejín ngase ni xi ndajín xi kjimataꞌin já ree̱.
23Kó ngije kiniꞌányà kui xo̱jo̱n xi katsangiya nda̱ re Artajerjee̱ ngindyi̱ko̱n Reuu̱n, ko̱jo skribano̱ Simsai̱, ko̱jo já xí nijan síndojo̱, achichí tsá kijí ki̱a̱ nínga síndo já jundíoo̱ ki̱a̱ na̱xi̱ńdáꞌniú Jerusalee̱n, kó katsꞌeén kjo̱a̱ꞌniú tsi̱ꞌe̱ sa̱ꞌínkasién xá xí ndyi̱tsꞌèn, kó ꞌniú katsꞌeén nga katsꞌénkjién ngaꞌniú xí tjiín. 24Kó ngiti̱ kiniꞌánjín ngase xá xí kjima ki̱a̱ Ndiꞌaa̱ Néná ki̱a̱ na̱xi̱ńdáꞌniú Jerusalee̱n, kó bo̱a̱ tsꞌén kisꞌijña masien ngaskande nó xí ma joó nga atíxoma Ndariyoo̱, nda̱ ree̱ nangi Persia̱.
Currently Selected:
Esndraa̱ 4: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
