Esndraa̱ 3
3
Nga kiniꞌánda ṉchandikoón
1Kjiꞌanga jachó sá xí ma yitoo̱, ko̱jo kjiꞌanga xota̱ Israee̱l síndo ki̱a̱ na̱xi̱ńdáꞌniuú, xotaa̱ na̱xi̱ńdaá ngo xtín kamá nga kamátikó ki̱a̱ na̱xi̱ńdáꞌniú Jerusale̱n. 2Kósꞌe̱ katsꞌéngaꞌniú Jesuaa̱, ndií Josandaa̱k, ko̱jo já chináꞌmi xi ntsꞌi̱e̱ ma, ko̱jo Sorobabee̱l, ndií Salatiee̱l, ko̱jo ntsꞌi̱e̱ kui jaá, kó kuí katsꞌénda ṉchaa̱n Néná xí tsi̱ꞌe̱ xota̱ Israee̱l, tsi̱ꞌe̱ nga ki̱a̱ si̱ꞌankꞌasꞌiee̱n kjo̱a̱tjó, xikótsꞌèn kjitꞌa xo̱jo̱n kjo̱a̱kitii̱ Moisee̱, kui nda̱ xi xotaa̱ Néná. 3Kó bo̱a̱ tsꞌén ndatsi katsakjónnií xota̱ na̱xi̱ńdaá, ti̱ kuí xí katsꞌéndani kui ṉchaa̱n, kósꞌe̱ ki̱a̱ katsꞌénkꞌasꞌiee̱n kjo̱a̱tjó Néná, kósꞌe̱ katsꞌénkꞌasꞌien kjo̱a̱tjó nga ta̱jño̱ó, ko̱jo nga kamángixoón. 4Kó katsꞌén sꞌueé ndiꞌa ti̱ki̱e̱e̱n, xikótsꞌèn kjitꞌa xo̱jo̱o̱n, ko̱jo xikótsꞌèn chjiéngá si̱ꞌankꞌasꞌien kui kjo̱a̱tjoó, xikó tsó kjo̱a̱botíxoma xi tikoón nga sa̱ꞌín ndyiojón ndyiojón. 5Ko̱jo nga sa̱ꞌín kjo̱a̱tjó xi tsꞌenkꞌásꞌién síkijií kjiꞌanga ma sá tja̱tsi̱e̱e̱, ko̱jo ngayeje ni̱xtjin xi je tikón nga niꞌándikón Néná, kó nga ngo nga ngo kui xotaa̱ jachójoo̱ Néná chji̱e̱ xi ngayeje kon nga katsꞌénkꞌasꞌiee̱n. 6Ndeskande ni̱xtjin tjoón sá xí ma yitoo̱ katsꞌénkꞌasꞌiee̱n kjo̱a̱tjó Néná, ndatsi na̱ngo̱xi̱i̱ Néná kji̱e̱ ꞌbítsi̱yajiín nga ka̱manda. 7Já xí chji̱ni̱e̱xo̱ó ko̱jo já xí chji̱ni̱e̱ya̱á to̱ntiboa ikꞌíchjínií, kó xota̱ sindonioo̱, ko̱jo xota̱ tirioo̱ nichinie ko̱jo, ko̱jo niꞌyó, ko̱jo isti̱ kamáchjínií tsi̱ꞌe̱ nga kijíkjaꞌá yákón xi chji̱a̱ni nangi Líbano̱, kó ngi̱jin ndáchíkoón kijíni xtji̱e̱e̱n na̱xi̱ńdáꞌniú Jope̱, xikótsꞌèn atíxoma Siroo̱, nda̱ ree̱ nangi Persia̱. 8Kó xi ma joó nó nga ja̱ bo̱a̱ je jachó ki̱a̱ Ndiꞌaa̱ Néná ki̱a̱ na̱xi̱ńdáꞌniú Jerusale̱n, sá xi ma joó, ítsꞌi̱yanii̱ Sorobabee̱l, ndií Salatiee̱l, ko̱jo Jesuaa̱, ndií Josandaa̱k, ko̱jo ngayeje já ntsꞌi̱e̱ xi ngasee̱, ko̱jo já chináꞌmii̱, ko̱jo xota̱ tji̱e̱e̱ Lebii̱, ko̱jo ngayeje xota̱ xi je jachóꞌoyá nginí ki̱a̱ na̱xi̱ńdáꞌniú Jerusale̱n nga tsangínjo̱ꞌniú, kó jaꞌájin xota̱ tji̱e̱e̱ Lebii̱ xi je tsꞌatio kan noó, tsi̱ꞌe̱ nga kui kꞌuíndotjoón nga ka̱manda Ndiꞌaa̱ Néná. 9Kósꞌe̱ Jesuaa̱, ko̱jo ndií, ko̱jo ntsꞌi̱e̱ xi ꞌmí Kandmiee̱l ko̱jo ndií, ko̱jo ndií Jundáa̱, ko̱jo ndií Enandaa̱nd ko̱jo ndií, ko̱jo já ntsꞌie xi xota̱ lebitaa̱, kó achichí tsjá kamá nga kui kꞌuíndotjoón xaá ki̱a̱ Ndiꞌaa̱ Néná. 10Kó kjiꞌanga já chji̱ni̱e̱xo̱ó indyiá xó xí ꞌbítjatsꞌennii̱ na̱ngo̱xi̱i̱ Néná, jachó já chináꞌmii̱, ko̱jo já lebitaa̱, ko̱jo ndií Asaa̱f nga ndyi̱yajá ńjñondioo̱, nga ndyi̱tsꞌènkjánié tjio, ko̱jo platiyo̱ tsi̱ꞌe̱ nga sa̱ꞌíntsjaà Néná, xikótsꞌèn atíxoma Ndabii̱, nda̱ ree̱ nangi Israee̱l. 11Kó kisie ngo só xi niꞌántsjaá ko̱jo xi boeꞌénii̱ ndokꞌóchji̱ì Néná, ngatꞌa̱ achichí nda xota̱, kó ngatsjéni̱xtjin nga tjiín kjo̱a̱ni̱ma̱takón kjo̱a̱a̱ xota̱ Israee̱l. Kósꞌe̱ ngayeje xota̱ na̱xi̱ńdaá, ꞌniú askjandáyátsjá má nga katsꞌéntsjaà Néná, ngatꞌa̱ je ikindyia xó xí ꞌbítjatsꞌennii̱ Ndiꞌaa̱ Néná. 12Ta̱nga achichí má já chináꞌmi, xi chji̱a̱ni xota̱ lebitaa̱ ko̱jo xi chji̱a̱ni ngito̱ko̱o̱ xtín xota̱ ndiꞌaa̱, kui já xchá xí kamábe Ndiꞌa xi tjoón Néná, nga kamábe nga je ikindyia xoó kui Ndiꞌaa̱ ngindyi̱ko̱n kui, ꞌniú askjandá, kó kje̱ꞌení xi askjandáyátsjá má, 13kó xotaa̱ nde kamákjínjiín ꞌyání bo̱a̱ xi ndyi̱kjandayàtsjaá, ko̱jo xota̱ xi ni̱ma̱ ndyi̱tsó nga ndyi̱kjandaá, ngatꞌa̱ ꞌniú askjandáyà xota̱ na̱xi̱ńdaá, kó ta̱ kjin kandaꞌyánii̱ xi, xiyé xibó katsoó.
Currently Selected:
Esndraa̱ 3: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
