Éksondo̱ 9

Kjo̱a̱botíjé xí ma uún: Nga jesón cho̱ xi kamátji̱e̱ nangi Ejipto̱

1Kósꞌe̱ Néná bi̱ katsoó Moisee̱:

Tꞌenchíi̱n nda̱ ree̱, kó bo̱a̱ tꞌíi̱n nga nga tsjandièjnú nga kongín niꞌántsjájnúꞌun. 2Ngatꞌa̱ tsi tsja̱ndièjínjnú nga kjo̱tjojnú, 3án boá xi sa̱ꞌin an nga ngo chiꞌin xi ta̱nisién ꞌniú kꞌuieé ngayeje cho̱ xi ndyi̱ꞌbítji̱e̱. Kó sa̱kó chiꞌii̱n ndi̱je̱e̱, bórroó, cho̱toꞌoyitsꞌeèn, cho̱yojoo̱, ko̱jo cho̱tsa̱nga̱a̱, kó jmíjín xi ka̱maa̱ sa̱ꞌíndikii̱. 4Ta̱nga cho̱ tji̱e̱é xota̱ Israee̱l jmí ni sa̱ꞌínjo̱jín an, kuíni nga nde ngojín cho̱o̱ xi kju̱i̱e̱són. 5¡Ti̱ ndyiojónní nga sa̱ꞌinꞌóo̱n cho̱ tji̱e̱é xota̱ Ejiptoo̱!

6Nga kamángindyiojón, Néná katsangiyaa̱ ngo chiꞌin xi ta̱nisién ꞌniú ngayeje cho̱ tji̱e̱é xota̱ Ejiptoo̱, kó jesón ngayejee̱, ta̱nga cho̱ xi kisꞌiee̱ xota̱ Israee̱l nde ngo jesónjín. 7Bo̱a̱ tsꞌén kamábe xota̱ Ejipto̱ xi katsangiya nda̱ ree̱ nga kijíkatsijee̱n ni xi kamaá. Ta̱nga nda̱ ree̱ to̱kó katsꞌén tajárá ini̱ma̱a̱, kó katsjandièjiín xota̱ Israee̱l nga ko̱e̱je̱tsꞌèntsjaà Nee̱.

Kjo̱a̱botíjé xí ma juu̱n: Nga kisꞌiee̱ ṉdo xota̱ Ejiptoo̱ ko̱jo cho̱ xi ítji̱e̱

8Kósꞌe̱ Néná bi̱ katsoó Moisee̱ ko̱jo Aaroo̱n:

Chjábéjnú chií ndiso xi tjiín ngo orjno̱, kó tangínchonjnúu̱ nda̱ ree̱. Ngije tindyiónjnú ngindyi̱ko̱n, mejénna nga ji Moise̱, chjatjén ji kui ndisoo̱ xtji̱e̱e̱n nkꞌa jàn. 9Kó kui ndisoo̱ ngo xa̱ xi ꞌniú ndso̱ko̱a̱n ka̱ma, kó nga xtjonjón xota̱ ko̱jo cho̱ tjié xi tjín nangi Ejipto̱, ṉdo xi on kꞌo̱xieé tji̱xin yojoo̱.

10-11Kó Moisee̱ ko̱jo Aaroo̱n iskjíbé ndisoo̱, kó kijíkoón nda̱ ree̱. Nga jachó ngindyi̱ko̱n nda̱ ree̱, Moisee̱ iskjíbé kuí ndisoo̱ kó iskjitjón xtji̱e̱e̱n nkꞌa jàn, kó kuí ndisoo̱ xi katsꞌén nga xota̱ Ejiptoo̱ ko̱jo cho̱ tji̱e̱é tsajaá ṉdo xi on tji̱xin yojoo̱. Kó já tjiꞌee̱ nde ngiti̱ jachójín nínga tikón Moisee̱ nga sa̱ꞌínkjién kjo̱a̱tjiꞌee̱ tsi̱ꞌe̱ nga ti̱ bo̱a̱ ti̱ sa̱ꞌín, ngatꞌa̱ ngaskande kui tsajaá ṉdo ngayeje yojoo̱ nga. 12Ta̱nga Néná katsꞌéntajá nginí ini̱ma̱a̱ nda̱ ree̱, kó nde ngiti̱ kamámejénjiín nga sku̱i̱e̱ kjo̱a̱a̱ Moisee̱ ko̱jo Aaroo̱n, bo̱a̱ má kamá xikó má katsoó Néná Moisee̱ nga ka̱ma.

Kjo̱a̱botíjé xí ma yitoo̱: Néná katsꞌénkixó ndókoá ki̱a̱ nangi Ejiptoo̱

13Kósꞌe̱ Néná, bi̱ katsoó Moisee̱:

ꞌNiú ta̱jñó ti̱sítji̱n ji ndyiojón, kó tꞌen ji ngindyi̱ko̱n nda̱ ree̱, kó bo̱a̱ tꞌíi̱n, nga án boá xi tsꞌéntsangiyaa, an xi Nee̱ xota̱ Israee̱l, kó nga án boá xi bo̱a̱ tꞌíxiáa̱n nga nga tsjandieè nga ko̱e̱je̱ xota̱ na̱xi̱ńdána tsi̱ꞌe̱ nga sa̱ꞌíntsjána. 14Ngatꞌa̱ tsi bo̱a̱jín sa̱ꞌín, ngotꞌe̱ ꞌné nga sangiyáa ngayeje kjo̱a̱botíjéná ngayeje xota̱ Ejiptoo̱. Jmíjín ngayeje tꞌanangii̱ ingo Ne xi xikoó an, kó kokóñáa kui nii̱. 15Tsi an xi bo̱a̱ tsꞌén je kamámejénna, jera̱ katsꞌenjée̱ ngayeje xota̱ Ejiptoo̱ nga katsangiyáa̱ ngo chiꞌin xi ꞌniú, kó jera̱ jesón ngayejee̱ katsaki. 16Tsi kji̱e̱ bo̱a̱jín tsꞌen an, kjo̱a̱a̱ nga mejénna kokòo̱ ngaꞌniúna, ko̱jo kjo̱a̱a̱ nga mejénna nga ngayeje xotaa̱ kui nangii̱ sku̱i̱e̱na.

17Kó bo̱a̱ tꞌíi̱n nga tsi to̱kó tsja̱ndièjiín nga kjo̱tjo xota̱ na̱xi̱ńdána, 18ndyiojón kui chi̱bo̱a̱a̱, sa̱ꞌinkixó an ndókoá xí ꞌniú yiꞌi ko̱jo xi ꞌniú é, xi kji̱e̱ ngo ndi̱yà bixó nangi Ejipto̱ ndeskande koó nga kamánda kui ngi̱ndiee̱. 19Bo̱a̱ tꞌíi̱n nga ngayeje cho̱ xi tjiín ngo ngindie ndiꞌa ngatꞌíndo ko̱jo ngayeje ni xi tjiín ngi̱jin kꞌijñá jàn, ngatꞌa̱ ndókoaá ku̱i̱xo̱nieé ngayeje xota̱ ko̱jo cho̱ xi kꞌuimá ngi̱jinꞌa̱sie̱èn, kó sa̱ꞌínkjiesón xi ki̱a̱jín kꞌuíndo ngindiee̱ ngo ndiꞌa.

20Nga tsintꞌié kui én xí katsangiya Néná, tjín xota̱ xi nkꞌa xaá xi mosoo̱ nda̱ ree̱ xi achichí katsakjónní, kó katsjandieè mosoo̱ ko̱jo cho̱o̱ tsi̱ꞌe̱ nga ngindie ndiꞌa kꞌuíndo, kó ngayeje cho̱ xi tjiín ngindie ndiꞌa nínga xindyiá kuí cho̱o̱ índoꞌyá. 21Ta̱nga kje̱ꞌe xota̱ xi kisꞌijinjiín ni xi kiꞌmií, kó ki̱a̱ índo mosoo̱ ko̱jo cho̱o̱ ki̱a̱ ngi̱jin kꞌijñaá. 22Kósꞌe̱ Néná, bi̱ katsoó Moisee̱: Tjin ji ndse̱ nkꞌa jàn, tsi̱ꞌe̱ nga ku̱i̱xo̱nieé ndókoá ngayeje xota̱ ko̱jo cho̱ tjié ko̱jo ngayeje xka̱ xi tjín nangi Ejipto̱.

23Kó Moisee̱ yején yánísieé xtji̱e̱e̱n nkꞌa jàn. Kó ti̱ kjiꞌa Néná katsꞌéntsennié cho̱ꞌo̱n nangi Ejiptoo̱, kó katsꞌénkjaꞌatꞌe ko̱jo katsꞌénkixó ndókoá. 24¡Kji̱e̱ ngo ndi̱yà má nangi Ejipto̱ ndeskande koó nga kamánda kui ngi̱ndiee̱ ni xi kamaá! Kó ixó stsé, ndókoá ko̱jo ndiꞌí cho̱ꞌo̱n xi ta̱nisién yiꞌi, 25kó kui nii̱ katsꞌénkjié ngayeje xota̱ ko̱jo cho̱ tjié ko̱jo xka̱. Yá xí tjiín iskjítꞌojén má nga katsꞌénxi̱, 26-32kó xka̱a̱ linoo̱ ko̱jo xka̱a̱ sebandaa̱ jatson ngayejee̱, ngatꞌa̱ linoo̱ jè má tjiín naxó kui ni̱xtjin nga bo̱a̱ kamaá, kó sebandaa̱ jè má tjitjó ńtiín. Ta̱ ngototo to ndso̱ko̱a̱n ṉño̱paa̱n ko̱jo sentenoo̱ xi jmí ni kamájiín, ngatꞌa̱ ngi̱chí sájín ma to. Ta̱nga nangi Ngosee̱n nínga síndo xota̱ Israee̱l nde ngo ndókoá tsꞌákajín ki̱a̱. Kuíni nga nda̱ ree̱ nangi Ejipto̱ tsíchji̱a̱a̱ Moisee̱ ko̱jo Aaroo̱n kó bi̱ katsoó:

—Be an nga ndajín katsꞌen an ngotꞌe̱. Ji̱n boá xi konnijne̱, jmí tsi Néná, kó kuíni nga bo̱a̱ tꞌínjnúu̱ nga jè tsjandièe̱ nga kjo̱tjo xota̱ Israee̱l. ¡Jè ngiti̱ chikjo̱a̱jínjne̱ kui ndókoaá ko̱jo kui cho̱ꞌo̱o̱n!

Kó Moisee̱ bi̱ katsoó nda̱ ree̱:

—Koko máraa̱ ji nda̱ re, nga Nejne̱ kuí boá xi tsi̱ꞌe̱ ngayeje tꞌanangii̱. Ta̱niꞌin kjo̱tjo an kui na̱xi̱ńdáꞌniuú, kuichjiájo an Nejne̱, kó ngiti̱ jmí cho̱ꞌo̱n ko̱jo kó ngiti̱ jmí ndókoá ku̱i̱xo̱jín ngase. Sa̱ꞌin an kui nii̱ ndatsi ji ko̱jo xota̱ xi mosoo̱ nde bendikónjín Nejne̱.

33Kó ngije jatjo Moisee̱ ndiꞌaa̱ ko̱jo na̱xi̱ńdáꞌniuú nda̱ ree̱, iskjininkꞌa tsja kó tsíꞌaá Néná tsi̱ꞌe̱ nga xi̱xió cho̱ꞌo̱o̱n ko̱jo ndókoaá. Kó ti̱ kjiꞌa kixixió stseé, ngiti̱ ixójín ndókoaá, kó ngiti̱ kandaꞌyájín ngase cho̱ꞌo̱n. 34Kó ngije kamá ngayeje kui nii̱, nda̱ ree̱ to̱kó katsꞌénra ni xi ndajín: kui ree̱ ko̱jo já mosoo̱ ti̱ katsꞌéntajá nginí ini̱ma̱a̱, kó katsjandièjiín nga kjo̱tjo xota̱ Israee̱l. 35Ta̱nga Néná ja̱bo̱a̱ jè bo̱a̱ katsó nga kui nii̱ ka̱ma, kó Moisee̱ katsóyaà xota̱ na̱xi̱ńdaá.

Currently Selected:

Éksondo̱ 9: MAIX

Highlight

Copy