Éksondo̱ 10

Kjo̱a̱botíjé xí ma jii̱n: Chjo̱bo̱a̱ xi katsꞌénkjié ni tjieé

1Néná bi̱ katsoó Moisee̱: Tꞌen nginí ji ngindyi̱ko̱n nda̱ ree̱. Án boá xi katsꞌen an nga ree̱ ko̱jo mosoo̱, sa̱ꞌín tajárá ini̱ma̱a̱, tsi̱ꞌe̱ nga kokòo̱ ngaꞌniúna nga sa̱ꞌin an chi̱bo̱a̱ ko̱jo ni xi fíndikónná. 2Bo̱a̱ tsꞌén ka̱ma kꞌuiyée̱ ndíi̱ ko̱jo ndíndée̱ ngayeje ni xi katsꞌenjo̱ an xota̱ Ejiptoo̱, ko̱jo kótsꞌèn nga tsajnókie an, tsi̱ꞌe̱ nga sku̱i̱e̱ nga án boá xi Nee̱ xota̱ Israee̱l.

3Kósꞌe̱ Moisee̱ ko̱jo Aaroo̱n kijíkoón nda̱ ree̱, kó bi̱ katsoó:

Nejne̱ kui xi Nee̱ xota̱ Israee̱l, kuí boá xi katsangiyajne̱ tsi̱ꞌe̱ nga ko̱si̱yajne̱ ji nga ngaskande kjiꞌání nga to̱kó nkꞌa ko̱ꞌna̱xié ji yojòo̱, kó ngaskande kjiꞌání nga ko̱nda̱ꞌyéꞌíi̱n. Te̱ꞌéndièjne̱ nga kongín niꞌántsjájne̱ Nejne̱. 4Tsi bo̱a̱jín si̱ꞌin ji, Néná ndyiojón sa̱ngíyá ꞌniú kjín chjo̱bo̱a̱ ngayeje kui nangii̱, 5kó kui cho̱o̱ sꞌi̱kitsie má ngayeje nga̱són tꞌanangii̱. Kui chjo̱bo̱a̱a̱ skji̱ni̱e̱ ngayeje xka̱ ko̱jo yá xí tsꞌangi ngije jaꞌa stseé ko̱jo ndókoaá, 6kó sꞌi̱kitsieni ngayeje nangi Ejipto̱. ¡Xota̱ xi xcháa̱ ko̱jo na̱ꞌmindyiboáa, ngojín ndi̱yà kamábe kui ni xi ka̱maa̱!

Ngije bo̱a̱ katsó Moisee̱ jatjo ndiꞌaa̱ nda̱ ree̱, 7kó já mosoo̱, bi̱ katsoó nda̱ ree̱: Ngaskande kjiꞌání nga si̱ꞌanchíkjo̱a̱jne̱ kui nda̱a̱, ji nda̱ re. ¡Ta̱ soboá kjo̱a̱xti tsꞌén foeꞌejo̱ná! Ta̱sá te̱ꞌéndièe̱ nga ko̱e̱je̱jo kui xotaa̱ nga ko̱e̱je̱ tsꞌéntsjaà Nee̱. A yejín ji nga ngayeje nangi Ejipto̱ je tjichájá.

8Kó nda̱ ree̱ tsíchji̱a̱a̱ Moisee̱ ko̱jo Aaroo̱n kó bi̱ katsoó:

—Ndakjiꞌi tsobo̱a̱, ja̱ tangínni̱ꞌantsjájnúu̱ Nejnú, ta̱nga ngindiee̱ nga kongínjnú, tꞌíyájnúꞌun, ꞌyání bo̱a̱ xi ko̱e̱je̱e̱.

9Kó Moisee̱ bi̱ katsó:

—Chjiéngá kongín yejejne̱, ngatꞌa̱ ngo sꞌué si̱ꞌanjne̱ nganda tsi̱ꞌe̱ Nejne̱. Kongínjo̱jne̱ já xo̱ngo̱ò ko̱jo xota̱ xi xchaá, ko̱jo ndí xí ínchjínjne̱ ko̱jo xi ndí xí xi̱ꞌinjne̱, kó ti̱ kongínjo̱jne̱ cho̱tsa̱nga̱jne̱ ko̱jo cho̱yojojne̱ nga.

10Kó nda̱ ree̱, tsajnó nga bi̱ katsó:

—¡Ann a bo̱a̱, ja̱ ndakjíꞌí tsobo̱a̱! ¡Ja̱ ti̱ ngatjíjo̱jnú Nejnú nga! A sꞌijinjnú nga tsjandièjnúꞌun nga kongínjo̱jnú ndí xi̱xi̱jnú nga. Bi̱ má ya nga mejénjnú ku̱i̱yòjnú. 11Ta̱nga bo̱a̱jín ka̱ma xikótsꞌèn mejénjnú jún. Tsi ja̱koxi̱ nga mejénjnú si̱ꞌantsjàjnúu̱ Nejnú, ta̱ jáxíꞌiín xí ngatjí.

Kósꞌe̱ xota̱ Ejiptoo̱ tji̱e̱nmá tsꞌaxié Moisee̱ ko̱jo Aaroo̱n ki̱a̱ ndiꞌa nínga botixómá nda̱ ree̱, 12ta̱nga Néná bi̱ katsoó Moisee̱: Tjin ji ndse̱ kó te̱ꞌékjo̱e̱ ji nga kji̱ndi̱bá chjo̱bo̱a̱a̱ nga̱soón nangi Ejipto̱, kó nga kjinie ngayeje xka̱ xi katsꞌénkꞌangi ndókoaá.

13-14Kó Moisee̱ katsꞌénkjatjosón ni xi kiꞌmií. Kó ti̱ kjiꞌa Néná katsꞌénkjaꞌa ngo tjo̱ xi kjindibáni xtji̱e̱e̱n nínga fotjo tsꞌueé, kó nga ngo ni̱xtjii̱n ko̱jo nga ngo ni̱xtji̱e̱e̱n nga jaꞌa kui tjo̱o̱. Nga kisisie̱èn nga kamángindyiojón kui tjo̱o̱ kjindibájo̱ chjo̱bo̱a̱a̱. Kó kisꞌie chjo̱bo̱a̱ ngayeje nangi Ejipto̱. ¡Kji̱e̱ ngo ndi̱yà ya ngo ni xi xikoó xi̱ꞌbi̱ xi kamá! 15¡Nde ngiti̱ kamáyàjín nga̱són tꞌanangii̱! Kó kui chjo̱bo̱a̱a̱ iskjinie ngayeje xka̱ ko̱jo ngayeje too̱ yá xí katsꞌénkꞌangi ndókoaá. 16Kósꞌe̱ nda̱ ree̱ xi tsá xi boaꞌa tsíchji̱a̱a̱ Moisee̱ ko̱jo Aaroo̱n, kó bi̱ katsoó: Ndajín katsꞌenjo̱ an Nejnú ko̱jo jún. 17Ngo kjo̱a̱nda míꞌájnúꞌun, ti̱ꞌanjetakónjnúꞌun ingo ndi̱yà, kó chji̱a̱ꞌajnúu̱ Nejnú, tsi̱ꞌe̱ nga kjo̱a̱ꞌáxín kui chjo̱bo̱a̱a̱, ngatꞌa̱ jè ndyi̱tsꞌènkꞌiénjne̱. ¡Ndatsi ta̱ an xí ngatjaꞌáxínna!

18-19Kó jatjo Moisee̱ ndiꞌa nínga botixómá nda̱ ree̱, kó ꞌniú tsíchji̱a̱a̱ Néná, kjo̱a̱a̱ nda̱ ree̱. Kósꞌe̱ Néná katsangiya ngo tjo̱ xi ta̱nisién ꞌniú xi chji̱a̱ni xtji̱e̱e̱n nínga ꞌbosꞌien tsꞌueé, kó kui tjo̱o̱ kijíjo̱ ngayeje kui chjo̱bo̱a̱a̱, kó ki̱a̱ tsꞌajmijin ngi̱jin Ndáchíkón Inií. ¡Nde ingo chjo̱bo̱a̱ kisꞌiejín ngayeje nangi Ejipto̱! 20Ta̱nga Néná ti̱ katsꞌéntajá nginí ini̱ma̱a̱ nda̱ ree̱ tsi̱ꞌe̱ nga katsjandièjiín nga kjo̱tjo xota̱ Israee̱l.

Kjo̱a̱botíjé xí ma nijaa̱n: Nga ꞌniú kisꞌiejñó nangi Ejipto̱

21Kósꞌe̱ Néná bi̱ katsoó Moisee̱: Tjin ji ndse̱ xtji̱e̱e̱n nkꞌa jàn, kó te̱ꞌékjo̱e̱ ji tsi̱ꞌe̱ nga sꞌi̱jñó ngayeje nangi Ejipto̱. ꞌNiú sꞌi̱jñó nga ngaskande xota̱ Ejiptoo̱ ka̱maa̱ sa̱ꞌínjo̱ kui jñoó.

22Kó Moisee̱ yején tsja xtji̱e̱e̱n nkꞌa jàn, kó ján ni̱xtjin nga achichí ꞌniú kisꞌiejñó ngayeje nangi Ejipto̱. 23Achichí ꞌniú kisꞌiejñó nga ngaskande nde ngojín xota̱ Ejiptoo̱ xi kamábe ngase kje̱n xkjín, ti̱nde ngiti̱ kamájín tjín nínga kijí ngase ngatꞌa̱ ta̱soboá kastingí. Ta̱nga ngayeje ndiꞌa nínga kisꞌińdo xota̱ Israee̱l tsijen kamá. 24Nga kamábe nda̱ ree̱ nga kui nii̱ kamá, tsíchji̱a̱a̱ Moisee̱, kó bi̱ katsoó:

—¡Tangínni̱ꞌantsjájnúu̱ Nejnú! Tangínjo̱jnú ndíjnú nga, ta̱nga ngatꞌíndora cho̱tsa̱nga̱jnú ko̱jo cho̱yojojnú.

25-26Kó Moisee̱ bi̱ katsoó:

—Jmí. Chjiéngá ko̱jo cho̱yojojne̱ ko̱jo cho̱tsa̱nga̱jne̱ kongínjo̱jne̱. Yàjínjne̱ kókjiꞌi kjo̱a̱tjó xi si̱ꞌankꞌasꞌienjne̱, ngatꞌa̱ ngaskande nga kjóchójne̱ ka̱tso̱yàjne̱ Néná. Kó jún boá xi ko̱e̱ꞌéjne̱ ji̱n kjín ngase cho̱ xi si̱ꞌankꞌasꞌienjne̱ Nejne̱.

27Ingo ndi̱yà nginí nga Néná katsꞌéntajá ini̱ma̱a̱ nda̱ ree̱, kó katsjandièjiín nga kjo̱tjo xota̱ Israee̱l. 28Kó nda̱ ree̱, bi̱ katsoó Moisee̱:

—¡Chjéndi̱yáa̱ kꞌi̱e̱e̱! Kó ngiti̱ kꞌi̱e̱jín foéꞌe̱kasín ji ngindyikón an, ngatꞌa̱ tsi kji̱ndi̱bé nginí kꞌi̱e̱e̱, án boá xi tsja an kjo̱a̱ nga si̱ꞌankꞌiee̱n.

29Kó Moisee̱ bi̱ katsoó nda̱ ree̱:

—Ndakjiꞌi, ja̱ nginijánjín skuié an kje̱n ji tsobo̱a̱.

Currently Selected:

Éksondo̱ 10: MAIX

Highlight

Copy