Éksondo̱ 8

Kjo̱a̱botíjé xí ma joó: Nga kisꞌikitsie xkji̱e̱ nangi Ejipto̱

1Kósꞌe̱ Néná bi̱ katsoó Moisee̱:

Tꞌenchín nginíi̱ nda̱ ree̱ nangi Ejipto̱, kó bo̱a̱ tꞌíi̱n nga án boá xi tsꞌéntsangiyaa, tsi̱ꞌe̱ nga bo̱a̱ sée̱ nga kꞌo̱xiéjnú, kó nga sa̱ꞌínkjíjnú ki̱a̱ nangi kixií tsi̱ꞌe̱ nga ki̱a̱ si̱ꞌantsjajnúꞌun. 2Kó tsi tsja̱ndièjínjnú nga kjo̱tjojnú, án boá xi sa̱ꞌin an nga ngayeje nangi Ejipto̱ sꞌi̱kitsie má xkji̱e̱. 3-4Kó kꞌuié xkji̱e̱ ndejèꞌ Niloo̱, ko̱jo ndiꞌa nínga botixómá nda̱ ree̱, ko̱jo ndiꞌaa̱ já mosoo̱, ko̱jo ngayeje kui nangii̱. Kó kꞌo̱sꞌien ngi̱yaꞌmaa̱, ko̱jo kꞌuitsómasón nga̱són ṉchan nínga fojña nda̱ ree̱, ¡ngaskande nínga niꞌánda nda̱ꞌyo̱paa̱n kꞌuié kuí cho̱o̱!

5Kó Moisee̱ kijíchji̱a̱jo nda̱ ree̱ nangi Ejipto̱, ta̱nga kui nda̱a̱ katsjandièjiín nga kjo̱tjo kui xota̱ na̱xi̱ńdaá, kósꞌe̱ Néná bi̱ katsoó Moisee̱: Bo̱a̱ tꞌíi̱n Aaroo̱n nga nga kjíbé yánísieé, kó ngatiején nínga síndo ndejèꞌ, xo̱ngàndántꞌié ko̱jo ngi̱ndiò, tsi̱ꞌe̱ nga kjo̱tjo xkji̱e̱e̱, kó ngasꞌikitsieni nangi Ejipto̱.

6Kósꞌe̱ Aaroo̱n yején tsja nga̱soón ngayeje nínga tjín ndáfoa ki̱a̱ nangi Ejiptoo̱, kó ki̱a̱ jatjoni xkji̱e̱ xi kisꞌikitsié má ngayeje kui nangii̱. 7Kó já tjiꞌee̱ ti̱ bo̱a̱ ti̱ katsꞌén nga nga katsꞌénkjién kjo̱a̱tjiꞌee̱ kó katsꞌénkjatjo xkji̱e̱ ngi̱jin ndáfoaa̱, xi íkitsieni ngayeje nangi Ejiptoo̱. 8Kósꞌe̱ nda̱ ree̱ tsíchji̱a̱a̱ Moisee̱ ko̱jo Aaroo̱n, kó bi̱ katsoó:

—Chji̱a̱ꞌajnúu̱ Nejnú tsi̱ꞌe̱ nga kjo̱a̱ꞌáxín kui xkji̱e̱e̱, ngatꞌa̱ jè ngiti̱ chikjo̱a̱jínjne̱, tsi bo̱a̱ sa̱ꞌín, an tsjandiè an nga kjo̱tjo xota̱ Israee̱l, tsi̱ꞌe̱ nga sa̱ꞌínkꞌasꞌiee̱n kjo̱a̱tjó.

9Kósꞌe̱ Moisee̱, bi̱ katsoó nda̱ ree̱:

—Ndakjiꞌi nda̱ re. Ngotꞌe̱ ꞌne̱, tꞌíyéní kjiꞌání nga mejeén ji nga kuíꞌáa̱ Néná kjo̱a̱a̱ ji, kjo̱a̱a̱ mosòo̱ ko̱jo kjo̱a̱a̱ xota̱ na̱xi̱ńdáa̱, tsi̱ꞌe̱ nga kjo̱tjo kui xkji̱e̱e̱ ki̱a̱ ndiꞌàa̱, kó ta̱ ki̱a̱ ngatꞌíndo tsí ngi̱jin ndejeèꞌ.

10-11—¡Ja̱ ndyiojón ngatjatjo tji̱ꞌni̱u̱! Katsó nda̱ ree̱.

—Ja̱ bo̱a̱ ka̱ma —katsó Moisee̱—. Ndyiojón ko̱e̱je̱, kó ta̱ ki̱a̱ tsí kꞌuíndo ndejeèꞌ. Kó jè ngiti̱ sa̱ꞌínxtíjiín xota̱ Ejiptoo̱, kó bo̱a̱ tsꞌén nga ka̱ma xche̱ ji nda̱ re, nga jmíjín ingo xi xikoó Nee̱ xota̱ Israee̱l.

12Kósꞌe̱ Moisee̱ ko̱jo Aaroo̱n jatjoni ndiꞌaa̱ nda̱ ree̱. Sꞌe̱ jaskan Moisee̱ ꞌniú tsíchji̱a̱a̱ Néná tsi̱ꞌe̱ nga kjin sa̱ngíyá kui xkji̱e̱ xi katsangiyaa̱. 13Kó Néná katsꞌénseén ni xi katsó Moisee̱, kó jesón ngayeje xkji̱e̱ xi kisꞌie ngi̱ya ndiꞌaa̱, ko̱jo ndi̱tsee̱n ndiꞌaa̱, ko̱jo ngi̱jin kꞌijñaá. 14Kó xota̱ Ejiptoo̱ jaꞌátikó kui xkji̱e̱ kjín xi kꞌiee̱n, kó achichí chꞌoje̱n kamá kui nangii̱. 15Ta̱nga xikó má katsó Néná nga ka̱ma, bo̱a̱ má kamá, ngije kamábe nda̱ ree̱ nga je jaꞌa ngayeje kui nii̱, katsꞌénsénjín, kó ti̱ katsꞌéntajá nginí ini̱ma̱a̱, kó katsjandièjiín nga kjo̱tjo xota̱ Israee̱l.

Kjo̱a̱botíjé xí ma jaán: Nga ndi̱ꞌi̱ kamá xa̱a̱

16Kósꞌe̱ Néná bi̱ katsoó Moisee̱: Bo̱a̱ tꞌíi̱n Aaroo̱n nga yánísieé ngatꞌanié xa̱a̱ tꞌanangii̱ nangi Ejipto̱, tsi̱ꞌe̱ nga kui xa̱a̱ ndi̱ꞌi̱ ngatama.

17Kó Moisee̱ ko̱jo Aaroo̱n bo̱a̱ katsꞌén xikó katsoó Néná nga sa̱ꞌín. Aaroo̱n yején tsja, kó yánísieé tsꞌanié xa̱a̱ tꞌanangii̱. Kó ti̱ kjiꞌa ngayeje xa̱ xi tjín nangi Ejipto̱ ndi̱ꞌi̱ kamá, kó iskjiniee̱ ngayeje xotaa̱ ko̱jo cho̱o̱. 18Kó já tjiꞌe xi tjín nangi Ejipto̱ kamámejeén ti̱ bo̱a̱ ti̱ katsꞌén nga, ta̱nga kamájiín. Kó nga kui ndi̱ꞌi̱i̱ iskjinieraa̱ xotaa̱ ko̱jo cho̱o̱, 19kuíni nga já tjiꞌee̱ kijíkoón nda̱ ree̱ kó bi̱ katsoó: ¡Néná boá xi tjítsꞌén ngayeje kui nii̱!

Ingo ndi̱yà nginí kamá kui nii̱ xikó má katsó Néná, kó nda̱ ree̱ katsꞌéntajá nginí ini̱ma̱a̱, kó katsꞌénsénjiín ni xi katsó Moisee̱ ko̱jo Aaroo̱n.

Kjo̱a̱botíjé xí ma nijoón: Chisien xi kisꞌie Ejiptoo̱

20Kósꞌe̱ Néná bi̱ katsoó Moisee̱:

ꞌNiú ta̱jñó ti̱sítji̱n ji ndyiojón, kó nga ko̱e̱je̱ ndejeèꞌ nda̱ ree̱ ki̱a̱ tꞌentji̱ngìi̱, kó bo̱a̱ tꞌíi̱n nga án boá xi tsꞌéntsangiyaa, tsi̱ꞌe̱ nga bo̱a̱ sée̱ nga tsja̱ndieè xota̱ na̱xi̱ńdána nga kjo̱tjo kui ngi̱ndiee̱ tsi̱ꞌe̱ nga ko̱e̱je̱tsꞌèntsjàna. 21Kó tsi tsja̱ndièjín nga kjo̱tjojnú, án boá xi sangiyáa kjín chisien tsi̱ꞌe̱ nga sa̱ꞌínxtií kui ko̱jo xota̱ mosoo̱, ko̱jo xota̱ na̱xi̱ńdaá. Ngayeje ndiꞌaa̱ xota̱ Ejiptoo̱ sꞌi̱kitsie má chisien, kó ngaskande nga̱són tꞌanangii̱ kꞌuié kuí cho̱o̱ nga. 22-23Ta̱nga jmí chisien sangiyajín an nangi Ngosee̱n, nínga síndo xota̱ na̱xi̱ńdána, kui chisiee̱n xota̱ Ejiptoo̱ boá xi sa̱ꞌínxtií, ta̱nga jmí ni sa̱ꞌínjo̱jín xota̱ Israee̱l. Ti̱ ndyiojónní nga sa̱ꞌin an kui nii̱. Kó bo̱a̱ tsꞌén nga nda̱ ree̱ nangi Ejipto̱ sku̱i̱e̱ nga Nee̱ xota̱ Israee̱l ki̱a̱ tikón nangii̱.

24Kó Néná katsꞌénkjatjosón ni xi katsóyàtjón nga sa̱ꞌín: Achichí chisien katsangiya xi tsꞌasꞌien ndiꞌaa̱ nda̱ ree̱, ko̱jo ndiꞌaa̱ mosoo̱. Ngayeje nangi Ejipto̱ kisꞌikitsieni kui chisiee̱n, kó jatson kui ngi̱ndiee̱. 25Nga kamábe nda̱ ree̱ nga bo̱a̱ kamá, tsíchji̱a̱a̱ Moisee̱ ko̱jo Aaroo̱n, kó bi̱ katsoó:

—Tangínjnú kó ti̱ꞌantsjàjnúu̱ Nejnú, ta̱nga ngata̱ fotjojínjnú kui nangii̱.

26Kó Moisee̱ bi̱ katsoó:

—Ndajínkjiꞌi nga bo̱a̱ si̱ꞌanjne̱. Xota̱ Ejiptoo̱ tsjajín ka̱maa̱ nga sku̱i̱e̱ nga Nejne̱ ndyi̱niꞌántsjájne̱ ko̱jo nga ndyi̱niꞌánkꞌasꞌienjne̱ kjo̱a̱tjó nga ndyi̱niꞌánkjiénjne̱ cho̱ xi ndikón maá kui. Tsi sku̱i̱e̱jne̱ kui xotaa̱, beriíko̱n an nga ndi̱jo̱ sa̱ꞌínkꞌiénijne̱. 27Ta̱sá ndatsi nangi kixí jàn kongínjne̱, nínga ján ni̱xtjin kongíndsa̱kojne̱, kó ki̱a̱ si̱ꞌankꞌasꞌienjne̱ kjo̱a̱tjó Nejne̱ xikótsꞌèn je atíxomajne̱ kui.

28Kó bi̱ katsó nda̱ ree̱:

—An tsjandièjnúꞌun nga kongínjnú nangi kixií nínga kongínkaꞌéjnú kjo̱a̱tjó Nejnú, ta̱nga nga ꞌniújín kjin mongínjnú, kó chji̱a̱ꞌatjejnúu̱ Nejnú kjo̱a̱a̱ an.

29Kó bi̱ katsó Moisee̱:

—Ngije kjo̱tjo an kꞌi̱e̱e̱, kuíꞌáa̱ Néná tsi̱ꞌe̱ nga ndyiojón kjo̱a̱ꞌáxín ngayeje kui chisien xi tjín nangi Ejipto̱. Ta̱nga bo̱a̱ sa̱ꞌin an, tsi ji xi ko̱e̱ꞌéndiè ji nga kui xota̱ na̱xi̱ńdána kjo̱tjo, kó sa̱ꞌínkꞌasꞌiee̱n kjo̱a̱tjó Nejne̱.

30-31Kósꞌe̱ Moisee̱ jataxie ndiꞌaa̱ nda̱ ree̱, kó tsíchji̱a̱a̱ Néná tsi̱ꞌe̱ nga kjo̱a̱ꞌáxín ngayeje chisien xi kisꞌiee̱ nda̱ ree̱. Kó bo̱a̱ katsꞌén Néná. Nde ingo chisien kisꞌiejín. 32Ta̱nga nda̱ ree̱ ti̱ katsꞌéntajá nginí ini̱ma̱a̱, kó katsjandièjiín nga kjo̱tjo xota̱ Israee̱l.

Currently Selected:

Éksondo̱ 8: MAIX

Highlight

Copy