Éksondo̱ 24

Ni xi índajo̱ Néná xota̱ Israee̱l

1-2Néná bi̱ katsoó Moisee̱:

Mejénna nga kji̱ndi̱bénijíngí ji kui na̱xi̱i̱, tsi̱ꞌe̱ nga kꞌi̱e̱ ko̱ndókjo̱e̱jení. Ka̱ma kji̱ndi̱béje̱ ji Aaroo̱n, ko̱jo Nandaa̱b, ko̱jo Abiuu̱, ko̱jo ichítié ko̱jo kan xota̱ ngito̱ko̱o̱ na̱xi̱ńdá Israee̱l. Ta̱nga ka̱májín kji̱ndi̱bá boaꞌá kui xotaa̱ nínga tikòn an. Ta̱ jí tsí xi ka̱ma kji̱ndi̱béchin tiñaní. Nga kjóchójnú, mejénna nga ta̱ kjin ko̱si̱e̱nnijnú tikójnú. Ta̱nga ka̱májín kji̱ndi̱bá ngase kje̱ꞌe xota̱ kꞌi̱e̱e̱.

3Kó Moisee̱ kijíkoón xota̱ Israee̱l, kó katsóyaà ngayeje ni xi atíxoma Néná nga sa̱ꞌín. Kó kui xotaa̱ ndse̱je̱n kamá nga bi̱ katsó: Bo̱a̱ si̱ꞌanjne̱ ngayeje ni xi je atíxoma Néná nga si̱ꞌanjne̱.

4Kó Moisee̱ ki̱a̱ katsꞌénꞌindó ngayeje ni xi katsó Néná. Kó nga kamángindyiojón achichí ta̱jñó jastjíe̱n sꞌe̱ ngo ṉchandikón katsꞌénda ki̱a̱ tꞌa se na̱xi̱i̱, kó tiejó ndi̱jo̱ índoxó, kui xi bokó nga tiejó xota̱ tji̱e̱e̱ xota̱ Israee̱l. 5Kósꞌe̱ íxaá já xo̱ngò xí chji̱a̱ni xota̱ Israee̱l, xi katsꞌénkꞌasꞌiee̱n Néná cho̱yojo toro̱ kjo̱a̱a̱ kjo̱a̱xioó. 6Kó Moisee̱ ngo ni indyiá masien jiín kui cho̱o̱, kó xi ngi masien kui jiín ki̱a̱ iskjitjónjón nga̱soón ṉchandikoón. 7Jaskan iskjíbé ni xi kjitꞌa kjo̱a̱ꞌbíndaa̱, kó katsꞌényaà xota̱ Israee̱l. Kósꞌe̱ kui xotaa̱ bi̱ katsó: Si̱ꞌankjatjosónjne̱ ngayeje ni xi je atíxoma Néná nga si̱ꞌanjne̱.

8Kósꞌe̱ Moisee̱ iskjíbé kuí jín xí ndyi̱a̱ kui nii̱, kó iskjitjónjón xota̱ na̱xi̱ńdaá, nga bi̱ katsó: Kui jiín, kuí boá xi bokó kui ni xi jún ko̱jo Néná je ikꞌíndajnú.

9Kó Moisee̱ kijínijíngí nginí kui na̱xi̱i̱ ko̱jo Aaroo̱n ko̱jo Nandaa̱b, ko̱jo Abiuu̱ ko̱jo kui xi ichítié ko̱jo kan ngito̱ko̱o̱ xota̱ Israee̱l. 10-11Kó ki̱a̱a̱ ngayeje kui xota̱ Israee̱l kamábe Néná, kó iskjiniejo̱ nichinie, kó katsꞌejo̱ niꞌyó, ta̱nga Néná jmí ni katsꞌénjo̱jín. Ngindie se Néná kisꞌijña ngo ni xi achichí ꞌna̱ kamá xikó maá nkꞌajmii̱, ¡ngaskande bo̱a̱ má kisꞌie xikoó ngo tꞌanangi xi ndi̱jo̱ aso xi chi̱tsen kamándani!

Nga kijínijíngí Moisee̱ na̱xi̱ Sinaii̱

12Jaskan Néná bi̱ katsoó Moisee̱: Ndibénijíngí ji na̱xi̱i̱, kó ki̱a̱ chiyéní, ngatꞌa̱ ki̱a̱ sa̱ꞌinkꞌasꞌiee̱n ndi̱jo̱ tie nínga kjitꞌa kjo̱a̱kitii̱ ko̱jo kjo̱a̱botíxoma xi katsꞌenꞌindó an tsi̱ꞌe̱ nga ko̱ko̱yée̱ xota̱ Israee̱l.

13Kó jastjíe̱n Moisee̱ sꞌe̱ kijínijíngí kui na̱xi̱i̱ kó kijíjo̱ Josuee̱ kui nda̱ xi bosikójo. 14Ngindiee̱ nga ko̱e̱je̱nijíngí, bi̱ katsoó ngito̱ko̱o̱ xota̱ Israee̱l: Kꞌi̱e̱ chiyárajnú ngaskande nga an ko̱jo Josuee̱ kji̱ndi̱báꞌoyá nginí ji̱n. Aaroo̱n ko̱jo Uu̱r kꞌi̱e̱ kꞌuíndojo̱jnú tsi̱ꞌe̱ nga ko̱síko̱jójnú ta̱jmì kjo̱a̱xtiní xi kꞌuiéjnú.

15-17Jaskan ngije katsó kui nii̱, Moisee̱ kijínijíngí na̱xi̱ Sinaii̱. Kó ki̱a̱ nínga ꞌniú nkꞌaa̱ na̱xi̱i̱, Néná akó ngayeje ngaꞌniuú. Ngayeje xota̱ Israee̱l kamábe kjo̱a̱jee̱ Néná nga ja̱kjiꞌi ndiꞌí xi tsꞌenkjiéná má kisꞌie. Jun ni̱xtjin nga kui na̱xi̱i̱ kisꞌijñajin ngo ṉdi̱, kó xi ma yito ni̱xtjin Néná tsíchji̱a̱a̱ Moisee̱ ngi̱jii̱n kui ṉdi̱i̱. 18Kó Moisee̱ tsꞌasꞌienjin kui ṉdi̱i̱, kó ki̱a̱ kisꞌijñajin yichán ni̱xtjin, yichán ni̱xtji̱e̱n.

Currently Selected:

Éksondo̱ 24: MAIX

Highlight

Copy