Éksondo̱ 23

Nga kixi̱ si̱ꞌansee̱n ngayeje xotaa̱

1Ngata̱ ꞌbíndisójínjnú, ti̱nde ngata̱ én ndisojín boeꞌéjnúu̱ xi ko̱siko̱jo xota̱ xi ndajín nga kꞌo̱ṉcha̱jo nendiꞌamasiee̱n.

2Ngata̱ ni xi ndajínjín niꞌánjnú tsi kjo̱a̱a̱ nga bo̱a̱ ndyi̱tsꞌèn xota̱ xi ngasee̱.

Tsi ngindyi̱ko̱n nendiꞌamasiee̱n kjimandajin ngo kjo̱a̱xti, ngata̱ jmí éndísó ndokjo̱a̱jínjnú, tsi kjo̱a̱a̱ nga bo̱a̱ ndyi̱tsꞌèn xota̱ xi ngasee̱. Ni xi ja̱koxi̱ boá xi ndokjo̱a̱jnú. 3Ti̱nde ngata̱ ꞌbíndisójínjnú kjo̱a̱a̱ nga ko̱si̱ko̱jójnú ngo xota̱ xi ni̱ma̱ xi jmí to̱njiín ta̱ngatꞌanii̱ nga xota̱ ni̱ma̱.

4Tsi xcha̱jnú ngo cho̱yojo toro̱ ko̱jo tsi ngo bórró xí kichajá, te̱ꞌéꞌoyá nginíjnú ndi̱a̱a̱ kui cho̱o̱, ndatsi kondra̱jnú má.

5Tsi xcha̱jnú nga ngo bórró tsꞌákajo̱ chꞌiaà, ngatꞌa̱ askajiín, tasíko̱jojnú kó chja̱ꞌáxínjnúu̱ chꞌiaà, ndatsi kondra̱jnú má ndi̱a̱a̱ kui cho̱ xi̱ꞌba̱.

6Tsi tjín kjo̱a̱xti xi si̱ꞌandajinjnú, kixi̱ ti̱ꞌandajinjnú kjo̱a̱xtii̱ xota̱ ni̱ma̱ xi jmí to̱njiín.

7Ngata̱ fongitaꞌínjínjnú jé ngo xota̱ nga kꞌuindísójnú, ti̱nde ngata̱ niꞌánkꞌiénjínjnú ngo xota̱ xi jmí jéjiín ko̱jo xi kixi̱, ngatꞌa̱ an sa̱ꞌinjetakónjáa̱n xota̱ xi tjiín jé.

8Ngata̱ chjábéjínjnú ngo to̱n tsi̱ꞌe̱ nga ngo ni xi kixi̱jín si̱ꞌánjnú. Ngatꞌa̱ kui to̱o̱n tsjandièjiín xotaa̱ nga kixi̱ ka̱ma, kósꞌe̱ nendiꞌamasiee̱n tsꞌénjeé xota̱ xi jmí jéjiín ngijee̱.

9Ngata̱ ndajín niꞌánjo̱jnú xota̱ xi xín nangi chji̱a̱ni, ngatꞌa̱ jún, xota̱ xi xín nangi kamájnú nangi Ejipto̱, kó jè yàjnú kótsꞌèn mindyión nga moso̱ xi stiñá má kje̱ꞌe nangi.

Kjo̱a̱kitii̱ kjo̱a̱a̱ nga niꞌánkjaꞌyá

10Jun nó ka̱ma kꞌuítji̱e̱jnú ni tꞌanangii̱ kó ka̱ma chja̱ꞌáꞌyájnú cha̱a̱n, 11ta̱nga xi ma yitoo̱ noó ngatsꞌénkjaꞌyá tꞌanangii̱. Tsi ngo ni ka̱maxchá soboá ngi̱jin tꞌanangii̱ nga kjíbé xota̱ xi ni̱ma̱ xi jmí to̱njiín tsi̱ꞌe̱ nga skji̱ni̱e̱, kó ni xi kꞌo̱ngii̱ cho̱ tamaá nga kjinie. Bo̱a̱ ti̱ ti̱ꞌánjnúu̱ tostsi̱je̱è ko̱jo toꞌoliboo̱ xi ikꞌítji̱e̱jnú nga.

12Jun ni̱xtjin si̱ꞌanxájnú, kó ka̱ma si̱ꞌánjnú ngayeje ni xi mejénjnú si̱ꞌánjnú, ta̱nga xi ma yito ni̱xtjii̱n chjiéngá si̱ꞌankjaꞌyájnú. Bo̱a̱ ti̱ tsꞌén ka̱ma sa̱ꞌínkjaꞌyá moso̱jnú, cho̱yojo toro̱jnú ko̱jo bórrójnú, ko̱jo xota̱ xi xín nangi chji̱a̱nii̱ xi tsꞌén xájnú nga.

13Ti̱ꞌankjatjosónjnú ngayeje kui kjo̱a̱kitii̱, kó nga chiíjín chjiáꞌajnúu̱ nga ko̱síko̱jójnú kje̱ꞌe ne, ti̱nde nga niꞌánkaxomájínjnú jaꞌeén.

Kjo̱a̱kitii̱ sꞌué xí niꞌaán

14Xki̱ nó, ján ndi̱yà si̱ꞌánjnúꞌun ngo sꞌué nganda tsa̱ꞌa̱n.

15Sꞌueé pan xi jmí nisanjiín, sá xí ꞌmí Abii̱b boá nga si̱ꞌánjnú, ngatꞌa̱ kuí boá kui saá nga jatjonijnú nangi Ejipto̱. Yito ni̱xtjin kꞌo̱ndíyaá kui sꞌueé, kó ngayeje kui ni̱xtjii̱n nga xi̱ni̱e̱jnú pan xi jmí nisan mindyiajiín. Ta̱ xi kji̱ndi̱bá tsꞌéndíkónna, chjiéngá ko̱a̱ꞌa̱na ngo kjo̱a̱tjó.

16Kjiꞌanga chja̱ꞌáꞌyájnú cha̱a̱n ni xi ikꞌítji̱e̱jnú, jó sꞌué si̱ꞌánjnú. Sꞌué xí tjoón, kjiꞌa si̱ꞌánjnú nga chja̱ꞌátikójnú to xi tjón kamáxchaá, kó sꞌué xí ma joó kjiꞌa si̱ꞌánjnú ngije kamá nga kachjaꞌátikójnú ngayeje ni xi ikꞌítji̱e̱jnú, ngije kjife noó.

17Ngayeje jáxíꞌín xi xchaá chjiéngá ngindyi̱ko̱n an ngatjíkindyia nga ján ndi̱yà nga má kui sꞌueé.

18Kjiꞌanga si̱ꞌankꞌiénjnú ngo cho̱ nganda tsa̱ꞌa̱n, ngata̱ ki̱a̱jín nijan niꞌánkꞌasꞌiénjnúꞌun pan xi tjiín nisan, ko̱jo jiín kui cho̱o̱, ti̱nde ngata̱ chjaꞌátjójínjnú xinieé kui cho̱o̱ tsi̱ꞌe̱ nga kamángindyiojón.

19Ni xi ꞌniú nda ngase xi tjón kamáxchá jno̱jnú, kuí boá kjo̱a̱tjó xi ndibájo̱jnú na̱ngo̱xi̱na.

Ngata̱ ki̱a̱jín ngi̱jii̱n ntsjeén na̱aa̱n ndí tindso̱ chichií niꞌánchjánjinjnú.

Ni xi katsóyàtjón Néná ko̱jo ni xi ka̱májín si̱ꞌan

20Kó Néná bi̱ katsoó:

Kꞌi̱e̱ sangiya tjón an ndítsjiena tsi̱ꞌe̱ nga skónjnú ko̱jo ko̱kójnú ndi̱yà nínga kongínjnú, ngaskande nga kjóchójnú ngi̱ndie xi je tikóndana. 21Ndaꞌyáꞌénjnúu̱ ngatsjéni̱xtjin, ngatꞌa̱ án boá xi katsjáa̱ xá tsi̱ꞌe̱ nga kui xi kꞌuijñá ngajona, kuí boá xi sa̱ꞌínjéjnú tsi ko̱nda̱ꞌyáꞌénjínjnúu̱. 22Ta̱nga tsi ko̱nda̱ꞌyáꞌénjnúu̱ ngayeje ni xi ka̱tso̱jnú, ꞌniú skjánjo̱ an kondra̱jnú. 23Ndítsjiena boá xi kjo̱jojnú nangi Kanaa̱n, nínga ngotꞌe̱ achichí má xota̱ na̱xi̱ńdá xi síndo, kui xi sa̱ꞌinkjié ndo̱jò ndójo̱ an.

24Ka̱májín si̱ꞌantsjàjnúu̱ kje̱ꞌe ne xi tjiín kui xotaa̱ na̱xi̱ńdaá. Ta̱sá ti̱ꞌankjatsónjnú ni xi ne tsoó kui xotaa̱ ko̱jo ṉchandikoón.

25Ti̱ꞌantsjàjnúꞌun, ngatꞌa̱ án boá xi Nejnú. Án boá xi sa̱ꞌinchikonñéjnúꞌun nga tsjajnúꞌun tsie nichinie. Jmí ni̱xtjin tsjandiè an nga sa̱kóchiꞌinjnú, 26ti̱nde tsjandièjín an nga kjindí ko̱yàjnú. Ngayeje ínchjín Israee̱l ka̱ma kꞌuieé ndí, kó nda stse̱n ngayeje ndií.

27-28Kjiꞌanga kjóchójnú nangi Kanaa̱n, án boá xi sa̱ꞌin an nga kui xotaa̱ stsa̱kjonní, kó ko̱ngandikón. Kó ngindiee̱ nga kjóchójnú, xo̱ꞌbo̱e̱ sangiyáa tsi̱ꞌe̱ nga skji̱ni̱e̱e̱ kondra̱jnú. 29-30Ta̱nga jmí tsi ngo nó ka̱mana nga kongatji̱ngìi̱ kui xota̱ kondraa̱, chíchi̱ chíchi̱ kꞌoxié an. Tsi ta̱ ngo ndi̱yà kꞌo̱xié an, kjo̱tsòn tꞌanangii̱ kó cho̱ tamá sꞌi̱kitsieni. Ta̱sá skoyáa̱ nga jún kꞌuiéjnú kjín ndí, kó kuí xí ngatꞌíndo ngayeje kui ngi̱ndiee̱.

31Kui ngi̱ndie xi an tsjajnúꞌun, ngo ndiè xi ko̱a̱ꞌa̱nii̱ ndeskande Ndáchíkón Inií ngaskande ndáchíkón Menditerráneoo̱, kó xi ingo ndieè, ki̱a̱ ko̱a̱ꞌa̱nii̱ ndeskande nangi kixií ngaskande ndejèꞌ Éufratee̱. Jún boá xi ko̱ti̱xomájnúu̱ ngayeje xota̱ xi síndo ki̱a̱a̱, kó jún boá xi ku̱i̱yotjingíjnúu̱ nga kjo̱tjo kui ngi̱ndiee̱.

32-33Ka̱májín ngo ni kꞌuíndajo̱jnú kui xotaa̱, ti̱nde ngata̱ boeꞌéndièjínjnúu̱ nga ki̱a̱ kꞌuíndojin ngasejnú, ngatꞌa̱ tsi ki̱a̱ kꞌuíndojinrajnú, kuí boá xi sa̱ꞌín nga jún si̱ꞌanjéjnú kondra̱ tsa̱ꞌa̱n. Ti̱nde ngata̱ niꞌantsjájínjnúu̱ ne xi tsi̱ꞌe̱, ngatꞌa̱ tsi bo̱a̱ si̱ꞌánjnú, ka̱ma ko̱yàjnú ki.

Currently Selected:

Éksondo̱ 23: MAIX

Highlight

Copy