Éksondo̱ 25

Kjo̱a̱tjó xi si̱ꞌankꞌasꞌiee̱n ndiꞌandikoón Néná

1Néná bi̱ katsoó Moisee̱:

2Ndókjo̱e̱je ji xota̱ Israee̱l kó ngatjandibájo̱na ngo kjo̱a̱tjó. Ta̱nga nga jmí kjo̱a̱ꞌniú niꞌínjíi̱n. Mejénna nga ngayeje kon ko̱jo nga ngayeje ini̱ma̱a̱ nga tsja̱ana. 3Kuí bí kui kjo̱a̱tjoó xi mejénna nga tsja:

Ni xi to̱nsinié, ko̱jo ni xi to̱ntiboa, ko̱jo ni xi ki̱cha̱ kobre̱,

4ko̱jo ńjño xi koán, ko̱jo ńjño xi aso, ko̱jo ńjño xi iní ꞌniú, ko̱jo ńjño xi nda,

ko̱jo tsja̱a̱ tindso̱,

5ko̱jo tji̱xi̱ín ndií cho̱tsa̱nga̱ xi iní kiniꞌánkꞌi, ko̱jo tji̱xin xí ꞌniú nda,

ko̱jo yáꞌakasia̱,

6ko̱jo isti̱ xi mindyiaa̱ ndiꞌí xí tsꞌentsíjenná,

ko̱jo ndásíje̱n xi mindyiaa̱ isti̱ xi nanginjon xotaa̱ nga boeꞌéxaá, ko̱jo ndásíje̱n xi mindyiaa̱ ndso̱ko̱a̱n sije̱e̱n,

7ko̱jo ndi̱jo̱ tsjakon, xikoó ndi̱jo̱ ónise̱ xi kjín a̱si̱én xí kꞌuíndoo̱ ńjño xi ko̱a̱ja̱ ko̱jo ńjño xi kjótꞌa ni̱se̱e̱n chináꞌmii̱.

8Kó ti̱ mejénna nga sa̱ꞌíndana ngo ndiꞌandikón, tsi̱ꞌe̱ nga ki̱a̱ kotíjña̱jinjnúꞌun. 9Kui ndiꞌandikoón ko̱jo ngayeje ni xi ka̱machjieén, bo̱a̱ má tsꞌén si̱ꞌanda xikoó xi kokoo ji.

Koxa̱a̱ kjo̱a̱ꞌbíndaa̱

10Mejénna nga si̱ꞌinde ji ngo koxa̱ xi yáꞌakasia̱. Chjiéngá ngo metro̱ ko̱jo tie sentímetro̱ ka̱ma nga ndojó, kó ichítié ko̱jo tjiꞌún sentímetro̱ ka̱ma nga tiyaá, kó ti̱ ichítié ko̱jo tjiꞌún sentímetro̱ ngatama nga nkꞌa. 11Chjiéngá to̱nsinié soboá soboá kjojén ji xtji̱e̱e̱n ngi̱ya ko̱jo xtji̱e̱e̱n ndi̱tsen, kó ngo ndi̱yà xi to̱nsinié tꞌíjñíi̱ nga ngo foaꞌatjiyajoo̱n. 12Nga ngo nga ngo nga nijón sé, ngo ni ńtsó xí to̱nsinié tꞌíjñíi̱, jó kui ni ńtsoó kꞌuíndo nga ngo nga ngo nga̱ndee̱ kui koxa̱a̱. 13Kósꞌe̱ jaskan ti̱ꞌinde ji jó yá ndojó xi yáꞌakasia̱ nga, kó to̱nsinié tjajin ji. 14Kó kui yaá ndojoó ki̱a̱ nangísꞌín ji nínga síndo kui ni ńtsó xí síndo nga̱ndee̱, ki̱a̱ ka̱maa̱ nga ka̱ma chjanínkꞌá nga tjín nínga kongínjo̱ kui koxa̱a̱. 15Kui yaá ndojoó chjiéngá ki̱a̱ kjoyá nínga síndo kui ni ńtsoó, kó ka̱májín chje̱ꞌéxín ji. 16Ngije katsꞌenkꞌasꞌieen ndi̱jo̱ tie xi kjitꞌa nga tie kjo̱a̱botíxomaa̱, ki̱a̱ tꞌíyé ji ngi̱yaa̱ kui koxa̱a̱.

17Jaskan ngije kamá kui nii̱, ti̱ꞌinde ji ngo yátie xi to̱nsinié soboá soboá xi kjoꞌmáni kui koxa̱a̱. Chjiéngá ngo metro̱ ko̱jo tie sentímetro̱ ngatama nga ndojoó, kó ichítié ko̱jo tjiꞌún sentímetro̱ ngatama nga tiyaá. 18Nga ngo nga ngo nga̱ndee̱ kui yátie xi kjoꞌmáni koxa̱a̱, jó keruu̱b xi to̱nsinié tꞌíndesén ji, kui xi chjiéngá martiyo̱ ko̱jo ndsa̱ ngatamandani. 19Kui yátiee̱ ko̱jo nga jó keruu̱b xi kꞌuíndosoón ta̱ ngo ndo̱jò ngatama ngayejee̱. 20Nga jó kui keruu̱b nga koaꞌa xkjín, ta̱nga ndyi̱ko̱n, ki̱a̱ nga kotsijensón kui yátiee̱, kó ngatjoninkꞌa nga̱a̱ nga ngataꞌmáni kui koxa̱a̱. 21Ngije akjaye ji ngi̱yaa̱ kui koxa̱a̱ ndi̱jo̱ tie xi kjitꞌa nga tie kjo̱a̱botíxomaa̱, tjaꞌme ji koxa̱a̱. 22Kó ngi̱jii̱n nga jó kui keruu̱b, ki̱a̱ boá nínga sa̱kóná xingi̱ ji ko̱jo an, kó ki̱a̱ boá nínga xiyaá ni xi ka̱maa̱ ko̱jo ni xi ka̱májiín sa̱ꞌín xota̱ Israee̱l.

Yámíxa̱ nínga ꞌbíndo pan xi niꞌánkꞌasꞌiee̱n Néná

23Ti̱ mejénna nga si̱ꞌinde ji ngo yámíxa̱ xi yáꞌakasia̱ nga. Chjiéngá ichítié ko̱jo yichán sentímetro̱ nga ndojó ngatama, kó yichán ún sentímetro̱ nga tiyá ngatama, kó ichítié ko̱jo tjiꞌún sentímetro̱ nga nkꞌa ngatama. 24Kó to̱nsinié tjajin ji, kó ngo ndi̱yà tꞌíjñíi̱ nga ngo foaꞌatjiyajoo̱n xi to̱nsinié nga. 25Ti̱ ngo nga̱nde xi yito sentímetro̱ nga tiyá tꞌíjñíi̱ nga ngo foaꞌatjiyajoo̱n nga, kó kui nga̱ndee̱ ngo ndi̱yà xí to̱nsinié tꞌíjñíi̱ nga. 26-28Nga ngo nga ngo nga nijón sé ngo ni ńtsó xí to̱nsinié ti̱ꞌindèe̱, ki̱a̱ boá nínga kjoyá yá xí xꞌi̱nkꞌajo̱ni nga tjín nínga kongínjo̱ kui yámíxa̱a̱. Yáꞌakasia̱ boá xi si̱ꞌandani kui yaá, kó to̱nsinié tjajin ji nga. 29Ti̱bo̱a̱a̱ kui yámíxa̱a̱, ko̱jo ki̱cha̱chꞌa̱a̱, ko̱jo ni xi mindyia ndáfoaa̱, ko̱jo ni xi mindyia binoo̱, chjiéngá to̱nsinié ka̱ma ngayejee̱. 30Nga̱soón kui yámíxa̱a̱ ki̱a̱ boá nínga kꞌuijñájnú pan xi si̱ꞌankꞌasꞌienjnúꞌun ngatsjéni̱xtjin.

Ni to̱nsinié xi ꞌbítíyá ndiꞌí xí tsꞌentsíjee̱n

31-36Ti̱ mejénna nga si̱ꞌinde ji ngo ni xi ꞌbítíyá ndiꞌí xí tsꞌentsíjen xi ndsa̱ ko̱jo martiyo̱ si̱ꞌandani, kó ta̱ ngo ndo̱jò si̱ꞌan ngayejee̱. To̱nsinié soboá soboá ti̱ꞌin ji ko̱jo naxó xí kꞌuíndoo̱ nga. Yojoo̱ kui nii̱ nijón naxoó yáꞌalmendra̱ tꞌíndée̱, kó ján kui naxoó xí síndo ngindie jàn xi kꞌuieé jun tjia, ján nga ngo ngoboá sꞌe̱ ján xi ingoboaá. Kó naxó xi tikón nkꞌaa̱ ki̱a̱ kjo̱tjonii̱ ngo tjia xi kꞌuijñá ngamasiee̱n. Nga ngo nga ngo kui tjiaa̱ ján naxoó yáꞌalmendra̱ kꞌuíndoo̱, kó ngo ndiꞌí xí tsꞌentsíjen kꞌuijñaá, kó bo̱a̱ tsꞌén nga kui ni xi ꞌbítíyá ndiꞌí xí tsꞌentsíjee̱n, yito ndiꞌí kꞌuíndoo̱. Kui ndiꞌií bo̱a̱ kon ka̱ma xi kókón naxoó yáꞌalmendraa̱, 37kó kuí ndiꞌií xi sa̱ꞌíntsijen xtji̱e̱e̱n kje̱n kui ngi̱ndiee̱. 38Ni xi chjábéjo̱ni ńchjónsieén ko̱jo nínga xi̱ndyiá ndisoo̱ ti̱ chjiéngá to̱nsinié soboá soboá ngatama nga.

39Kantié ján kilo̱ to̱nsinié xi kui soboá soboá ti̱ꞌinkjìn jí nga si̱ꞌinde ji kui ni xi ꞌbítíyá ndiꞌí xí tsꞌentsíjee̱n ko̱jo ngayeje ni xi fíjo̱. 40Nda nda má tsitsíjin ji, kó bo̱a̱ má tsꞌén ti̱ꞌinde ji xikó kjiꞌi xi je akoo ki̱a̱ na̱xi̱i̱.

Currently Selected:

Éksondo̱ 25: MAIX

Highlight

Copy