Éksondo̱ 11

Nga kiꞌmíyaà xota̱ Ejiptoo̱ kjo̱a̱a̱ kjo̱a̱botíjé xí ma tiee̱

1Kó jaskan Néná, bi̱ katsoó Moisee̱: Ingo ndi̱yà nginí nga kotijée̱ nda̱ ree̱ ko̱jo xota̱ na̱xi̱ńdaá. Jaskan ngije sa̱tíjeé, tsja̱ndièjnú nga kjo̱tjojnú kui ngindiee̱, kó ngaskande ko̱ngatji̱ngi ndi̱yàjnú kui na̱xi̱ńdaá. 2Tꞌen ji kó ndokjo̱e̱je ji xota̱ Israee̱l, xi chjo̱on xí xi̱ꞌin, tsi̱ꞌe̱ nga kꞌuíndonda nga je kjo̱tjo, kó ngatíꞌaá xota̱ tꞌa ndiꞌaa̱ ni to̱ntiboa ko̱jo ni to̱nsinié xi tjiín.

3Kó Néná katsꞌén nga xota̱ Ejiptoo̱ nda katsꞌénjo̱ xota̱ Israee̱l, kó ngayeje xota̱ Ejiptoo̱ ko̱jo xota̱ xi mosoo̱ nda̱ ree̱ kamábendikón Moisee̱.

4Kó Moisee̱ ingo ndi̱yà bi̱ katsó nginií nda̱ ree̱:

Nejne̱ bi̱ tsó én xí katsangiyaa ji nda̱ re: Nga ka̱ma masien ni̱xtji̱e̱n kjo̱a̱ꞌa an ngamasiee̱n ngayeje nangi Ejipto̱, 5kó sa̱ꞌínkjiesón an ngayeje ndí xíꞌín xi tjoón xota̱ Ejiptoo̱. Ngayejee̱ nga ko̱yà ndeskande ndí xíꞌín xi tjoón nda̱ ree̱, ngaskande ndí xíꞌín xi tjoón ínchjín xí chji̱ni̱e̱ꞌboo̱ nga. ¡Ko̱yà ngaskande ndí tjoón ngayeje cho̱ tjié xi tjínjnú nga! 6Kji̱e̱ ngo ndi̱yà foaꞌatio ngo kjo̱a̱ni̱ma̱ xi ta̱nisién ꞌniú je xota̱ Ejiptoo̱ xikoó xi ka̱maa̱, ti̱nde ngiti̱ kamájín kui nii̱ kje̱ꞌe ni̱xtjin. 7Kó tsi̱ꞌe̱ nga xcha̱jnú nga Néná boá xi bokó ꞌyání xi xota̱ Israee̱l ko̱jo ꞌyání xi xota̱ Ejiptoo̱. Ngojín xota̱ Israee̱l xi ko̱yà ndí xíꞌín xi tjoón, ti̱nde ngojín cho̱ tjié xi tjiín xi ko̱yà ndí tjoón nga, ngaskande nde ngo ńñá skja̱ndáyàjínjne̱. 8Kó ngayeje xota̱ xi mosòo̱ ko̱e̱je̱konna nga ku̱i̱ndyiá má tikoó nga ꞌniú ku̱i̱ꞌana nga bo̱a̱ ka̱tso̱ nga kjo̱tjo an nangi Ejipto̱, kó nga kjuínjo̱ an ngayeje xotaa̱. Kó bo̱a̱ tsí tsꞌén nga kjo̱tjo an kꞌi̱e̱e̱ ngijee̱.

Kó Moisee̱ achichí katsꞌénxchán nga jatjo ndiꞌa nínga botixómá nda̱ ree̱. 9Kósꞌe̱ Néná bi̱ katsoó: Sa̱ꞌínsénjínjnú nda̱ ree̱, kó kuí nii̱ xi tsja̱ndièna nga kjín chi̱bo̱a̱ ko̱jo kjo̱a̱ndikón xí sa̱ꞌin an ki̱a̱ nangi Ejipto̱.

10Kó Moisee̱ ko̱jo Aaroo̱n ngindyi̱ko̱n nda̱ ree̱ katsꞌén ngayeje kui chi̱bo̱a̱ ko̱jo kjo̱a̱ndikón xi katsoó Néná nga sa̱ꞌín, ta̱nga nda̱ ree̱ achichí tajá katsꞌénra ini̱ma̱a̱, kó katsjandièjiín xota̱ Israee̱l nga kjo̱tjoni nangi Ejipto̱.

Currently Selected:

Éksondo̱ 11: MAIX

Highlight

Copy