Xota̱ Kolosa̱ 2

1Mejénna nga xcha̱jnú nga ta̱nisién tsie kjo̱a̱ni̱ma̱ xi tsꞌénfoaꞌatio an nganda tsa̱jún, ko̱jo ngandaa̱ xota̱ na̱ngo̱xi̱ xi chji̱a̱ni Laondisea̱, ko̱jo ngandaa̱ xota̱ xi kji̱e̱ bejín kje̱n án. 2Tsjàa̱ kjo̱a̱ni̱ma̱ yojona, tsi̱ꞌe̱ nga sa̱kó ngaꞌniuú ini̱ma̱a̱ xota̱ na̱ngo̱xi̱i̱, nga ta̱ ngo tjín ko̱a̱ꞌa̱ xkjín nga kꞌuieé kjo̱a̱tjó, ko̱jo nga kꞌuieé kjo̱a̱cho̱o̱n kjo̱a̱kjíntakón xi ndaa̱, tsi̱ꞌe̱ nga ka̱makjiín ni xi íjña ꞌma Néná ngasꞌe̱, kui xi Kristoo̱ ngotꞌe̱. 3Kuíni nga kjiꞌanga xcha̱ Kristoo̱ sa̱kóná ngayeje kjo̱a̱kjínkón, ko̱jo kjo̱a̱kjíntakón xi ꞌniú chjínií. 4Kui nii̱ tsꞌén xiyàjnúꞌun tsi̱ꞌe̱ nga ngojín xi kꞌo̱ṉcha̱jojnú, nga sa̱ꞌínkjién éndísó xi tsjatsó. 5Ngatꞌa̱ ndatsi ki̱a̱jín tikónjinjnúꞌun nga án má, ki̱a̱ tikónjo̱jnú ini̱ma̱na, kó tsja mana nga kixi̱ tindyiónjnú, ko̱jo nga ta̱kó ꞌniú tindyiónjnú nga sꞌijinjnú Kristoo̱.

6Kó kuíni nga, ngije kiniꞌánjo̱ꞌojnú Jesukristoo̱ kui xi Ndi̱a̱ná, chjiéngá bo̱a̱ tsꞌén kongintjingíjnúu̱ xikoó xota̱ xi kui chji̱a̱ni. 7ꞌNiú ti̱ꞌanꞌniátakónjnú Kristoo̱, xikoó tsi ngo yá xí na̱nga̱ tikón ja̱ma̱a̱ ngatamajnú. ꞌNiú ti̱ndyiàjnú kjo̱a̱a̱ kui kjo̱a̱sꞌijii̱n xikótsꞌèn akakoyájnú, kó ngatsjéni̱xtjin te̱ꞌéjnúu̱ ndokꞌóchjì Néná.

Bi̱ tsꞌén akóyá Pabloo̱ kjo̱a̱a̱ kjo̱a̱mindyion xi tsjá Kristoo̱

8Chónjnú yojojnú, kó ngata̱ boeꞌéndièjínjnú nga tjín xí kꞌo̱ṉcha̱jojnú nga ko̱kóyájnú ngo én xí jmí ni chjíjiín xi fítji̱ngi kjo̱a̱xcha̱á xotaa̱. Kui nii̱, nii̱ a̱si̱énni̱xtjii̱n kui nga̱sondiee̱ boá, kó jmí tsi kjo̱a̱bokoyá xi tsi̱ꞌe̱ Kristoo̱.

9Néná tikónjin ndo̱jò ndójo̱ ngi̱jin yojoo̱ Kristoo̱. 10Kó jún jè kamándo̱jojnú ngatꞌa̱ Kristoo̱ je kiniꞌángojo̱jnú yojojnú. Kristoo̱ xí botixómaá ngayeje a̱siénni̱xtjin xi tjiín ngaꞌniú ko̱jo xá. 11Kjiꞌanga kisꞌijinjnú Kristoo̱ kiniꞌánjnú ngo sirkunsisio̱n, ta̱nga jmí tsi ngo sirkunsisio̱n xi niꞌaán yojoo̱ xotaa̱ xi kiniꞌánjnú, ngo sirkunsisio̱n xi jaꞌáxín jé xí kiniꞌánjnú, kó Kristoo̱ boá xi bo̱a̱ katsꞌénjo̱jnú. 12Kó nga kastindájnú, jún jè nijan akjanijínjnú ko̱jo Kristoo̱, kó ti̱ bo̱a̱ tsꞌén nijan jaꞌáꞌyájnú ko̱jo kui nga, ngatꞌa̱ kisꞌijinjnú ngaꞌniuú Néná, kui xi katsꞌénkjaꞌáꞌyaá Kristoo̱ ngi̱jii̱n xota̱ xi je jesoón. 13Ngindiee̱ nga sa̱kójnú kui sirkunsisioo̱n, xota̱ xi je jesón kamájnú ngindyi̱ko̱n Néná, ta̱ngatꞌanii̱ jé xí kiniꞌánjnú. Ta̱nga Néná nijan katsjá nginíjnú kjo̱a̱mindyion jún, ngatꞌa̱ kiniꞌángojo̱jnú yojojnú Kristoo̱, kó bo̱a̱ tsꞌén Néná katsꞌénjetakón ngayeje jéná. 14Néná iskjíndiyá kui xo̱jo̱n xi kjitꞌa jé xí tjitjíe̱nná kui xi tikón kondra̱ tsa̱ñá, kó katsꞌénkjié nga ki̱a̱ yítꞌa kroo̱. 15Néná katsꞌénkjién kuí Kristoo̱ nga kui xi katsꞌén, nga jaꞌáxiín ngaꞌniuú kui a̱siénni̱xtjin xi tjiín ngaꞌniú ko̱jo xaá, kó ngayeje xi kamábe nga katsjaá kjo̱a̱soboá.

16Kó kuíni nga, ngata̱ niꞌánsénjínjnúu̱ xota̱ xikó ka̱tso̱ kjo̱a̱a̱ ni xi chiniejnú, ko̱jo ni xi ꞌyójnú, ko̱jo tsi kjo̱a̱a̱ ni̱xtjii̱n sꞌué, ko̱jo tsi kjo̱a̱a̱ sꞌué xí má nga chjindié saá, ko̱jo tsi kjo̱a̱a̱ ni̱xtjin ndikón. 17Ngayeje kui nii̱ mejeén bokó chií ni xi jaskan ndibá, ta̱nga Kristoo̱ boá xi ja̱koxi̱ nga bokó ni xi ndibaá. 18Ngata̱ niꞌánsénjínjnúu̱ xota̱ xi ni̱ma̱kjo̱a̱ ndyi̱tsꞌèn yojoo̱, kó ndítsjie ndyi̱tsꞌéndíkón, kuí boá xi ku̱i̱ꞌíchjaá nga sa̱kójnú ni xi niꞌán xi si̱ꞌánjnú, kui xotaa̱ ndyi̱tsó nga ngo xò ni akakoo̱, kó je ꞌboxié yojoo̱ ta̱nga kjo̱a̱kjíntakón xi tsi̱ꞌe̱ xí ndyi̱tsꞌènkjién. 19Jmí tsi ki̱a̱ ndyi̱fítji̱ngi kui xi tikóntjoón na̱ngo̱xi̱i̱, kui na̱ngo̱xi̱ xi yojoo̱ Kristoo̱. Kristoo̱ kuí boá xi tjitsꞌénngo kui yojoo̱, kó tsꞌéntsjángaꞌniuú nga kjiꞌiꞌniuú ngayeje to̱ko̱ya ni xi yaꞌajo̱ni, kó kjimaxchá kui yojoo̱ xikótsꞌèn mejeén Néná nga ka̱maxchá.

20Tsi jún je nijan kꞌienjnú ko̱jo Kristoo̱, jè kamándéjnú kjo̱a̱a̱ kui nii̱ a̱siénni̱xtjin xi botixómaá nga̱sondiee̱, kó míkjo̱a̱a̱ nga ta̱kó bo̱a̱ tsꞌén tindyiónjnú xikoó tsi kui nga̱sondiee̱ botixómájnú. Ánní nga ndyi̱niꞌánsénjnúu̱ kjo̱a̱botíxoma xi tsó xotaa̱. 21Kui xi bi̱ tsoó: “Ngata̱ niꞌínje̱jín ji kui nii̱. Ngata̱ chitꞌejín kui nii̱. Ngata̱ ndse̱jín chjábéní ji.” 22Kui kjo̱a̱botíxomaa̱, kjo̱a̱bokoyaá xotaa̱ boá, kó ni xi kjife nga tjíniꞌánkjieén boá. 23Ja̱ma xi ja̱koxi̱ makjiín maa̱ nga bo̱a̱ tsꞌén chji̱a̱, ngatꞌa̱ tsꞌénkjo̱a̱ꞌniuú xotaa̱ nga sku̱i̱e̱ndikón Néná, ko̱jo nga ni̱ma̱kjo̱a̱ ka̱ma, ko̱jo nga sa̱ꞌínkjaꞌatio kjo̱a̱ni̱ma̱ yojoo̱, ta̱nga jmí ni chjíjiín kui nii̱ tsi̱ꞌe̱ nga ko̱síko̱joná nga ꞌbíchjaá ni xi míꞌá yojoo̱.

Currently Selected:

Xota̱ Kolosa̱ 2: MAIX

Highlight

Compare

Copy