Amoo̱ 8
8
Ngo ni̱se̱nyá to
1Kó Ndi̱a̱ná kui xi Néná akóna ingo ni: Kamábe an ngo ni̱se̱nyá toꞌingo̱ xi je kichjí. 2Kó bi̱ katsóna:
—Mí xí tiye ji Amoo̱.
—Kó bi̱ kixiáa̱n:
—Ngo ni̱se̱nyá to toꞌingo̱ xi je kichjí.
Kósꞌe̱ bi̱ katsóna Ndi̱a̱ná kui xi Néná:
—Xota̱ na̱xi̱ńdána Israee̱l, jè jachó ni̱xtjii̱n, jè xikoó tsi ngo to xi je kichjí kamá, kó jè ngiti̱ sa̱ꞌinchíkjo̱a̱jín ngasée̱. 3Kó kui ni̱xtjin jàn, nda̱a̱ ínchjín xi sie ki̱a̱ ndo̱bo̱a̱xa̱á, xikó maá tsi skja̱ndáyaboa. Tsó Ndi̱a̱ná kui xi Néná. Kó achichí ka̱ma yojoo̱ xota̱ xi je jesón, xi ta̱ si̱e̱n ku̱i̱chíjmi ta̱jñà ngi̱ndiení.
4Nda má tasiénnijónjnú jún xi jnániéjnú xota̱ xi ni̱ma̱kjo̱a̱a̱,
kó niꞌánkjiejnú xota̱ xi ni̱ma̱ xi jmí to̱njiín xi chji̱a̱ni kui na̱xi̱ńdaá,
5tji̱e̱nga bi̱ ꞌmíjnú: Kjiꞌání nga kju̱i̱e̱ sꞌueé sá tja̱tsi̱e̱e̱,
tsi̱ꞌe̱ nga ko̱tíñá ni xi kamáxcháná.
Axa̱ kjiꞌání nga kju̱i̱e̱ ni̱xtjin ndikoón,
tsi̱ꞌe̱ nga ko̱tíñá to ndso̱ko̱a̱n ṉño̱paa̱n,
tsi̱ꞌe̱ nga chiboa ngase ko̱e̱ꞌé nga xꞌi̱chi̱bo̱a̱,
kó chjí ngase si̱ꞌán nga ko̱tíñá,
kó bo̱a̱ tsꞌén si̱ꞌankjién baskula̱ chejé,
6kó ko̱tíñá ngaskande to ndso̱ko̱a̱n ṉño̱pan xi je ngiti̱ ndajiín nga,
tsi̱ꞌe̱ nga to̱n si̱ꞌantsié ñá, xota̱ ni̱ma̱ xi jmí to̱njiín,
kó ngo ꞌniú ndiétjíbo̱a̱ si̱ꞌantsié ñá, xota̱ xi tjimásoón.
7Ta̱nga ta̱ngatꞌanii̱ kjo̱a̱nkꞌatakoón Jakoo̱b,
nga bi̱ katsó Néná nga katsjátsꞌoá:
Jmíni̱xtjin xchi̱yana ngayeje ni xi je katsꞌén.
8A kjo̱tsièjín tꞌanangii̱ kjo̱a̱a̱ kui nii̱,
a kꞌuíndoxa̱ꞌya̱jín ngayeje xotaa̱.
Jo̱o̱n, ngayeje tꞌanangii̱ nga ko̱e̱je̱nijíngí xikoó ndejèꞌ Niloo̱, kó kjo̱ni̱e̱ngí,
kósꞌe̱ kji̱ndi̱bájaya nginí xikoó ndejeèꞌ nangi Ejiptoo̱, kó ki̱a̱ kju̱i̱e̱ ngaꞌniuú ngijee̱.
9Bi̱ tsó Ndi̱a̱ná kui xi Néná:
Kui ni̱xtjin jàn, nga ka̱ma masien ndisꞌué, kꞌuijñájñó An tsꞌueé,
kó ni̱xtjin ni̱xtjin sꞌi̱jñó tꞌanangii̱.
10Kó sꞌué xí niꞌánjnú, kjo̱a̱xa̱ꞌya̱ sa̱ꞌin An,
kó ngayeje sójnú, kjo̱a̱chaꞌándasén ka̱ma,
Án boá xi sa̱ꞌin An nga ngayeje xi ńjño tokjuie ko̱a̱ja̱,
ko̱jo nga ngayeje xi ku̱i̱ꞌíjón taka takaa̱ to̱ko̱,
ngo xa̱ꞌya̱ xi foaꞌa xota̱ xi ꞌme ndí tjoón xi sa̱ꞌinkjaꞌa An,
xikó má má nga fetꞌanii̱ ngo ni̱xtjin xi ta̱nisién ndajín, bo̱a̱ má ka̱maa̱.
11Bi̱ tsó Ndi̱a̱ná kui xi Néná:
Jè ndibá ni̱xtjin nga sangiya An ngo kjindiá tꞌanangii̱,
ta̱nga jmí tsi kjindiá nga bojó nga xíndá ka̱maa̱ kjo̱a̱a̱ nichiniee̱,
kuí boá ngo kjindiá, nga ka̱mamejeén nga ku̱i̱ntꞌie̱é énna.
12Kó kꞌuitsómasón ja̱kꞌi̱e̱ ja̱ngaján ndáchíkón,
ko̱e̱je̱ ndeskande nínga ta̱ꞌii̱n, ngaskande nínga fotjo tsꞌueé,
nga ko̱ngase énna, ta̱nga sa̱kójiín.
13Kui ni̱xtjin jàn ko̱yà xíndá má ínchjín xo̱ngò xí tsjakoo̱n, ko̱jo já xo̱ngo̱ò,
14kui xi ngiboanéná tsó nga chji̱a̱ kjo̱a̱a̱ kui a̱sie̱én ne xi chji̱a̱ni nangi Samariaa̱,
kó bi̱ tsó: ¡Tsie ngatamaa̱ Nèe̱ ji Ndaa̱n!
Ko̱jo, ¡tsie ngatamaa̱ ndi̱yà xí fí Beersebaa̱!
Ku̱i̱xo̱ kui xotaa̱, kó jmíni̱xtjin xtjonínkꞌá ngasee̱ yojoo̱.
Currently Selected:
Amoo̱ 8: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
