Amoo̱ 7
7
Chjo̱bo̱a̱a̱
1Ndi̱a̱ná kui xi Néná, bi̱ kjiꞌi ni xi akóna: Kamábe an nga Ndi̱a̱ná kui xi Néná tjítsꞌénda kjín chjo̱bo̱a̱, ni̱xtjin nga je kjimaxchá ni tjié xi sájín foaꞌaá, kui xi ꞌbítji̱e̱ ngije jachó cha̱a̱n ni tjieé nda̱ ree̱. 2Kó nga kamábe an nga kui chjo̱bo̱a̱a̱ ndyi̱kjinie xka̱ xi tjín tꞌanangii̱, bi̱ kixian an:
—¡Ji Ndi̱a̱, Ji xi Néná Jí, ꞌniú míꞌaá nga ti̱ꞌinjetakín Ji! Kótsꞌèn kjo̱chíkjo̱a̱a̱ xota̱ Israee̱l, xi sꞌe̱ tsí chiboa ma ngotꞌe̱.
3Kósꞌe̱ Ndi̱a̱ná kui xi Néná kijíkjaꞌaniíko̱n, kó bi̱ katsó:
—Jmí, bo̱a̱jín sa̱ꞌin An.
Ndiꞌií
4Kó Ndi̱a̱ná kui xi Néná, kui nii̱ akóna: Kamábe an nga Ndi̱a̱ná kui xi Néná ndiꞌí tjitsꞌénkjién nga tsꞌénbotíjeé xotaa̱, ko̱jo nga kui ndiꞌií je katsꞌénkjiéni ngayeje ndáchíkón na̱nga̱a̱, ko̱jo tꞌanangii̱. 5Kósꞌe̱ bi̱ kixiáa̱n:
—¡Ji Ndi̱a̱, Ji xi Néná Jí, ngo kjo̱a̱nda míꞌaá, ngiti̱ bo̱a̱jín niꞌín ngase Ji! Kótsꞌèn kjo̱chíkjo̱a̱a̱ xota̱ Israee̱l, xi sꞌe̱ tsí chiboa ma ngotꞌe̱.
6Kósꞌe̱ Ndi̱a̱ná kui xi Néná kijíkjaꞌaniíko̱n, kó bi̱ katsó:
—Ti̱nde kui nii̱, sa̱ꞌinjín An nga.
Plomoo̱
7Kó Ndi̱a̱ná kui xi Néná ingo ni akóna: Ndi̱a̱ná kui xi Néná ki̱a̱ tikóntꞌa ngo xó xí tikón na̱xo̱ na̱xo̱, kó ngi̱ya tsja tsꞌényaꞌa ngo plomo̱ xi tsꞌénkjién já chji̱ni̱e̱xo̱ó. 8Sꞌe̱ bi̱ katsóna Ndi̱a̱ná kui xi Néná:
—Mí xí tiye ji Amoo̱.
Kó án bi̱ kixiáa̱n:
—Ngo plomo̱ xi tsꞌénkjién já chji̱ni̱e̱xo̱ó.
Kósꞌe̱ kui bi̱ katsóna:
—Ngotꞌe̱ ꞌne̱, ngo plomo̱ sa̱ꞌinkjièn án tsi̱ꞌe̱ nga kixi̱ kꞌuíndo xota̱ na̱xi̱ńdána Israee̱l, ngatꞌa̱ jè ngiti̱ ingojín ni xi sa̱ꞌinchíkjo̱a̱ ngasèe̱. 9Ngi̱ndie nínga nkꞌaa̱ xota̱ tji̱e̱e̱ Isaa̱ sꞌi̱ńdomasien, kó ndiꞌandikoón xota̱ Israee̱l si̱ꞌankjatsón, kó ki̱cha̱ndojó sa̱ꞌinkjièn Án kondra̱a̱ xota̱ ndiꞌaa̱ Jeroboaa̱n.
Amoo̱ ko̱jo Amasiyaa̱
10Kósꞌe̱ Amasiyaa̱, kui xi chináꞌmii̱ na̱xi̱ńdáꞌniú Betee̱l, katsangiyaa̱ én Jeroboaa̱n, nda̱ ree̱ nangi Israee̱l, kó bi̱ katsoó:
Amoo̱ ni xi ndajín tsꞌénchji̱a̱ kondra̱ tse̱ ji nda̱ re, ki̱a̱ ngi̱jii̱n xota̱ Israee̱l, kó xota̱ na̱xi̱ńdaá xchikjo̱a̱jiín én xí chji̱a̱ kui nda̱a̱. 11Ngatꞌa̱ bi̱ katsó Amoo̱: Ki̱cha̱ndojó si̱ꞌankꞌienni Jeroboaa̱n, kó xota̱ Israee̱l nangi xi kjinnii̱ nangii̱ kongínjo̱ꞌniú.
12Kó Amasiyaa̱, bi̱ katsoó Amoo̱:
—¡Ji nda̱ xi tsóyatjón, chjén ndi̱yàa̱! Kó ta̱sá nangi Jundáa̱ tꞌen ji, kó ki̱a̱ ti̱ꞌinxé jí, tsi̱ꞌe̱ nga sa̱ko̱ó nichinie, kó ki̱a̱ tꞌíyetjén ji kui ngi̱ndiee̱, 13ta̱nga ngiti̱ kꞌi̱e̱jín na̱xi̱ńdáꞌniú Betee̱l ꞌmíyetjén ngase ji, ngatꞌa̱ kꞌi̱e̱ bí nínga tikón ndiꞌandikoón nda̱ ree̱, ko̱jo na̱ngo̱xi̱i̱ na̱xi̱ńdáꞌniú nínga botixómá kuí.
14Kósꞌe̱ Amoo̱, bi̱ katsoó Amasiyaa̱:
—Jmí tsi nda̱chji̱ni̱e̱ꞌén án, ti̱nde jmí tsi ndií ngo nda̱chji̱ni̱e̱ꞌén án, nda̱ xi koo̱n cho̱tsa̱nga̱ boá an, kó án boá xi kóo̱n ngo ngi̱ndie nínga tjitjíe̱ toꞌingo̱, 15ta̱nga Ndi̱a̱ná kui xi Néná boá xi jaꞌáxín tsána xá xí tsꞌen an nga cho̱ tsꞌenxchá án, kó bi̱ katsóna:
—Tꞌen ji, kó tꞌenkꞌíyetjée̱n ngo én xota̱ na̱xi̱ńdána Israee̱l. 16Kuíni nga ngotꞌe̱ ꞌne̱, ja̱ ndaꞌyé ji kui én xí katsjána Ndi̱a̱ná kui xi Néná, kui xi bi̱ tsoó:
Ji bi̱ se ji: Ngata̱ ꞌmíyetjénjín ji én kjo̱a̱a̱ xota̱ na̱xi̱ńdá Israee̱l,
ti̱nde ngata̱ chꞌójíntsꞌèn ndokjo̱e̱ ji kjo̱a̱a̱ xota̱ tji̱e̱e̱ Isaa̱.
17Kuíni nga bi̱ tsóni Ndi̱a̱ná kui xi Néná:
Chjóo̱n na̱masien ka̱ma ki̱a̱ na̱xi̱ńdáꞌniuú,
kó ndí xí xíꞌíi̱n ko̱jo ndí xí ínchjíi̱n ki̱cha̱ndojó si̱ꞌankjiesónni,
kó tꞌanangìi̱ kjín xota̱ xi si̱ꞌankabisoón nga kjo̱a̱chꞌáṉcha̱ końtonni,
kó ki̱a̱ ko̱yè jí ki̱a̱ nangii̱ xota̱ xi bejín Néná,
kó xota̱ Israee̱l kjinnii̱ nangii̱ nga kongínjo̱ꞌniú.
Currently Selected:
Amoo̱ 7: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
