Amoo̱ 6
6
Néná ko̱tíjeé xota̱ Israee̱l
1Xi̱xꞌi̱a̱n xò xí achichí xió tsꞌén síndo ki̱a̱ na̱xi̱ńdáꞌniú Sioo̱n,
ko̱jo kui xi kjimaꞌniátakón xi síndo na̱xi̱i̱ nangi Samariaa̱,
ko̱jo xota̱ xi tjiín xá xí ngito̱ko̱ ngi̱jii̱n na̱xi̱ńdaá, kui xi xota̱ Israee̱l ndyi̱koyaa̱.
2Ti̱tjajnú ki̱a̱ na̱xi̱ńdáꞌniú Kalne̱, kó tsitsíjenjnú,
kósꞌe̱ ki̱a̱ tangínnijnú ki̱a̱ na̱xi̱ńdáꞌniú Amaa̱t,
sꞌe̱ jaskan tanginjáyajnú ki̱a̱ na̱xi̱ńdáꞌniú Ngaa̱t, nangii̱ xota̱ Filisteaa̱.
A nda ngase májnú yojojnú, ta̱bo̱a̱jiín kui na̱xi̱ńdaá.
A tsie ngase ma nangii̱ kui xotaa̱, ta̱bo̱a̱jiín xi tsa̱jún.
3Jún nde ndasénjín májnú ni̱xtjin xi ndajiín,
ta̱nga ni xi ꞌniú ndajín ndyi̱niꞌánjnú.
4Kui xi foyojosón ṉchan xi ndi̱ja̱a̱ ki̱ña̱ kamándanii̱,
nga̱soón ngo yáxíríe̱ tsꞌénkjaꞌyá nga kjinie cho̱tsa̱nga̱,
ko̱jo ndií cho̱yojo xi ꞌboxiéni nchꞌoá xí tsi̱ꞌe̱.
5Kó ta̱chiboa niꞌánkjaniejnú salterioo̱,
kó xikoó tsi Ndabii̱ jún, nga niꞌándajnú ni xi niꞌánkjaniejo̱ só.
6A xi̱xi̱ yiꞌi chi̱tsen xí ꞌyóyájnú bino̱,
kó ndásíje̱n xi nda ngasee̱ xi mindyiájnúu̱ yojojnú,
kó nde ndasénjín májnú kjo̱a̱a̱ kjo̱a̱ni̱ma̱ xi jaꞌatio xota̱ tji̱e̱e̱ Kosiee̱.
7Kuíni nga ngotꞌe̱ ꞌne̱, jún kongíntjónjnúu̱ xota̱ xi kongínjo̱ꞌniuú,
kó kju̱i̱e̱ sꞌué xi niꞌánjnú nga bo̱a̱ nda chiniejnú nichinie.
8Ndi̱a̱ná kui xi Néná, ti̱kuíní bo̱a̱ xi je katsjánitsꞌoá nga bo̱a̱ katsó.
Ndi̱a̱ná kui xi Néná xí tsi̱ꞌe̱ jájuún, je bi̱ katsó:
Chꞌóna kjo̱a̱nkꞌakoo̱n xota̱ tji̱e̱e̱ Jakoo̱b, ko̱jo ndo̱bo̱a̱xa̱á,
kuíni nga kondra̱a̱, sa̱ꞌinkꞌasꞌièe̱n na̱xi̱ńdáꞌniuú, ko̱jo ngayeje ni xi tjín ki̱a̱a̱.
9Kó kjiꞌanga bo̱a̱ ka̱ma, tsi tie jáxíꞌín kꞌuíndo ngase ngo ndiꞌa, ti̱ ko̱ya ndatsa kui nga, 10kó tsi ngo xtín já kꞌuíndo ngase ki̱a̱a̱, tsi̱ꞌe̱ nga kꞌo̱xié ńdaa̱ kui xota̱ xi je jesoón, ki̱a̱ kui ndiꞌaa̱, chjiéngá bi̱ ka̱tso̱o̱ kui xi tikón ngi̱ya kjii̱n ndiꞌaa̱: A tjín xí síndo ngase ki̱a̱a̱. Kó bi̱ ka̱tso̱ kui xi̱ꞌba̱: Jmí, ngiti̱ jmíjín xi tjín. Kósꞌe̱ xi ingoo̱, bi̱ ka̱tso̱: Xió tindyin, ngatꞌa̱ jè ngiti̱ májín niꞌánkaxomá Jaꞌeén Ndi̱a̱ná kui xi Néná.
11Ngotꞌe̱ ꞌne̱, Ndi̱a̱ná kui xi Néná jè katsjákjo̱a̱ nga si̱ꞌankixóndó ngayeje ndiꞌa yiꞌii̱,
ko̱jo nga ka̱maxi̱ ndiꞌa xi xi̱xi̱i̱.
12A ka̱ma ko̱nga ndi̱je̱ nga̱soón ndi̱jo̱o̱.
A ka̱ma si̱ꞌanxájo̱ cho̱yojo xi̱ꞌin xi bokján tꞌanangii̱ ki̱a̱ ngi̱jii̱n ndáchíkoón.
Ngatꞌa̱ jún jè bo̱a̱ kiniꞌánjnú,
kjo̱a̱kixi̱ xi tjiín xotaa̱, xikoó tsi ndikimaya kiniꞌánjnú,
kó kjo̱a̱ndaa̱, xikoó tsi ni sa je kiniꞌánjnú.
13Jún xi tsja májnú nga je kiniꞌántsa̱júnjnú Londebaa̱r, kó bi̱ ꞌmíjnú:
A mí tsí ngaꞌniúná boá xi kiniꞌánkjién nga kiniꞌántsa̱ñá na̱xi̱ńdáꞌniú Karnayii̱n.
14Ja̱ ngotꞌe̱ ꞌne̱, jún xota̱ na̱xi̱ńdá Israee̱l,
ngo na̱xi̱ńdá tsꞌénkjininkꞌa An kondra̱ tsa̱jún,
kó kuí boá xi sa̱ꞌínkjaꞌationijnúꞌun kjo̱a̱ni̱ma̱,
ndeskande ki̱a̱ na̱xi̱ńdáꞌniú Amaa̱t, ngaskande xo̱ngàndántꞌié Arabaa̱.
Tsó Ndi̱a̱ná kui xi Néná, Néná xí tsi̱ꞌe̱ jájuún.
Currently Selected:
Amoo̱ 6: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
