Amoo̱ 5
5
Xota̱ Israee̱l chjiéngá sa̱ꞌínkꞌoyà yojoo̱
1Jún xota̱ Israee̱l, ndaꞌyájnú kui én xí ni̱ma̱ tsó xi tsꞌénsie An kjo̱a̱a̱ jún:
2Jè tsꞌákangí kui na̱xi̱ńdá Israee̱l xi xo̱ngo̱ò,
jè ki̱a̱ kjiꞌijña tꞌanangii̱, kó jmíjín xi ka̱maa̱ sa̱ꞌínkjastjíe̱n nginí.
3Ngatꞌa̱ Ndi̱a̱ná kui xi Néná, bi̱ katsoó xota̱ Israee̱l:
Na̱xi̱ńdáꞌniú xí ngo mi̱ jájún jatjojoo̱,
ta̱ ngi úchán tsí má jájún xi kji̱ndi̱bájo̱ nginí,
kó xi úchán jájún jatjojoo̱,
ta̱ ngi tie tsí má jájún xi kji̱ndi̱bájo̱ nginí.
4Ndi̱a̱ná kui xi Néná, bi̱ katsoó xota̱ Israee̱l:
¡Ti̱ndyi̱séjnúꞌun, kó ka̱ma ku̱i̱ndyion ngasejnú nga̱sondie!
5Ta̱nga nga ki̱a̱jín mindyiséjnúꞌun ki̱a̱ na̱xi̱ńdáꞌniú Betee̱l,
ti̱nde nga bitjasꞌi̱e̱njínjnú Ngilngaa̱l,
ti̱nde nga ki̱a̱jín bitjájnú na̱xi̱ńdáꞌniú Beersebaa̱,
ngatꞌa̱ xota̱ xi chji̱a̱ni Ngilngaa̱l, kongínjo̱ꞌniú,
kó xota̱ xi chji̱a̱ni na̱xi̱ńdáꞌniú Betee̱l, si̱ꞌankjie.
6Ti̱ndyi̱séjnú Ndi̱a̱ná kui xi Néná, kó ka̱ma ku̱i̱ndyion ngasejnú nga̱sondie.
Ngo ndiꞌí sangiyáa̱ xota̱ tji̱e̱e̱ Kosiee̱, kó sa̱ꞌinkjié An na̱xi̱ńdáꞌniú Betee̱l,
kó jmíjín xi ka̱maa̱ sa̱ꞌínkꞌó kui ndiꞌií.
7¡Xi̱xꞌi̱a̱n xò jún nga kjo̱a̱kixi̱i̱, ni xi sa ndyi̱niꞌánjnú,
kó xikoó tsi ki̱a̱ ndyi̱fojmi tꞌanangijnú!
8Ti̱ndyi̱séjnú Kui xi katsꞌénda ńño xi tjín nkꞌa jàn,
ko̱jo xtín ńño xi ꞌmí Orioo̱n,
kui xi maa̱ tsꞌénsísién nga jñoó,
kui xi maa̱ tsꞌénjñó nga ni̱xtjii̱n xikoó tsi nga jñoó,
kui xi maa̱ chji̱a̱a̱ ndáfoaa̱ ndáchíkoón, kó ki̱a̱ kjitjónjón tꞌanangii̱.
Ndi̱a̱ná kui xi Néná boá xi bo̱a̱ tsꞌeén.
9Kuí boá xi foaꞌáxiín ngaꞌniuú xota̱ xi tamaá,
kó tsꞌénkjátsón ngi̱ndie nínga síndo ngaꞌniuú.
10Jún xi niꞌánchꞌójnú xota̱ xi tsjá kjo̱a̱botíxoma ki̱a̱ nga̱ntjo̱a̱a̱ na̱xi̱ńdáꞌniuú,
kó achichí chꞌo májnú kui xi chji̱a̱ kixi̱ kixi̱i̱.
11Kuíni nga ta̱ngatꞌanii̱ nga ndajín kiniꞌánjo̱jnú xota̱ ni̱ma̱ xi jmí to̱njiín,
nga kiniꞌánjnúu̱ kjo̱a̱ꞌniú nga to ndso̱ko̱a̱n ṉño̱paa̱n íchjítjéni yojoo̱.
Ndiꞌa ndi̱jo̱ tsjakon kiniꞌándajnú, ta̱nga nde ki̱a̱jín ku̱i̱ndyionyàjnú,
Kó ndatsi chja̱ꞌàjin májnú ńꞌniuú tostsi̱je̱è xí kꞌuítji̱e̱jnú,
nde bo̱a̱ tsꞌén sꞌi̱o̱jínjnú binoo̱.
12Jè be cha̱n cha̱n An nga ta̱nisién kitikjo̱a̱jnú,
ko̱jo ngayeje jé xí ndyi̱niꞌánjnú,
be Án nga kjo̱a̱ꞌniú niꞌánjnúu̱ xota̱ xi kixi̱i̱,
kó to̱n chjábéngíjnú kjo̱a̱a̱ ni xi niꞌánjnú,
kó boeꞌéndièjínjnú nga kixi̱ tsꞌén si̱ꞌansee̱n xota̱ ni̱ma̱ xi jmí to̱njiín ki̱a̱ nínga niꞌánseén.
13Kó kui ni̱xtjii̱n xota̱ xi kjínkoón bókjo tsꞌoa,
ngatꞌa̱ ni̱xtjin xi ndajín boá.
14Ni xi ndaa̱ ti̱ndyi̱séjnú, jmí tsi ni xi ndajiín, tsi̱ꞌe̱ nga ku̱i̱ndyion ngasejnú nga̱sondie,
kó Ndi̱a̱ná kui xi Néná, kui xi tsi̱ꞌe̱ jájuún, kui kꞌuijñájo̱jnú, xikó ꞌmíjnú jún.
15Ti̱ꞌanchꞌójnú ni xi ndajiín, kó ti̱ꞌantjójnú ni xi ndaa̱,
kó ki̱a̱ nínga niꞌánseén xotaa̱, takoyajnú kjo̱a̱kixi̱i̱,
tsita̱ nda ni̱xtjin, kui Ndi̱a̱ná kui xi Néná, Kui xi tsi̱ꞌe̱ jájuún,
ni̱ma̱ ka̱maa̱ xota̱ xi kꞌo̱ngi xi xota̱ tji̱e̱e̱ Kosiee̱.
Nga askjandá xota̱ Israee̱l
16Bi̱ tsó Ndi̱a̱ná kui xi Néná xí tsi̱ꞌe̱ jájuún:
Ngayeje ndi̱tse̱n nga kꞌuié kjo̱a̱chaꞌá,
kó ngayeje ndi̱yàtié nga ai, ai ka̱tso̱ xotaa̱,
kó xota̱ xi tsꞌén xájno̱o̱, bo̱a̱ kꞌuiín nga kꞌuíndo xa̱ꞌya̱,
kó nga ni̱ma̱ ka̱tso̱ xota̱ xi maa̱ sie só xi ndasen tsoó.
17Ngayeje ngi̱ndie nínga tjitjíe̱ tostsi̱je̱è xchaꞌá,
ngatꞌa̱ ki̱a̱ kjoaꞌa An ngi̱jinjnú. Tsó Ndi̱a̱ná kui xi Néná.
18Xi̱xꞌi̱a̱n xò xí je mejeén nga kjo̱chó ni̱xtjii̱n Ndi̱a̱ná kui xi Néná.
Míkjo̱a̱a̱ nga je mejeén nga kjo̱chó kui ni̱xtjii̱n Ndi̱a̱ná kui xi Néná,
xi ni̱xtjin xi jñó boá, jmí tsi ni̱xtjin xi tsijen.
19Bo̱a̱ ka̱ma xikó maá kjiꞌanga tjín xí mongatjoón ngo xandi̱je̱,
kó ngo cho̱ꞌoso̱ sakoó,
ko̱jo tsi nga ꞌbosꞌien ndiꞌaa̱, ki̱a̱ bóꞌniú xoó, kó ngo ye̱ kjiniee̱.
20Ni̱xtjii̱n Ndi̱a̱ná kui xi Néná, ni̱xtjin xi jñó boá, jmí tsi ni̱xtjin xi tsijen,
ni̱xtjin xi ꞌniú jñó ka̱ma, kó nde chiíjín tsijen ka̱ma.
21¡Achichí chꞌóna sꞌué xí niꞌánjnú!
¡Nga matikójnú nde chiíjín tsja mana kui nii̱!
22Ndatsi tsie kjo̱a̱tjó, ko̱jo chji̱e̱ xi ko̱e̱ꞌéjnúꞌun, skjíbéjín An,
ti̱nde skotsijenjáa̱n cho̱ yiꞌi xinié xí kjo̱a̱tjoó nga kjóndajnúꞌun ndyi̱ꞌmìjnú nga ndyi̱niꞌánkꞌasꞌiénjnúꞌun.
23Chja̱ꞌáxínjnú ngindyikón Án kui xota̱ kjín xi ndyi̱siee̱,
mejénjínna kuintꞌièe̱ soó arpa̱jnú.
24Ta̱sá mejénna nga xikótsꞌèn monga ndáfoaa̱,
bo̱a̱ má ngatama kjo̱a̱ndaa̱,
kó xikó má má nga monga xo̱ngàndántꞌieé xi xíyájiín,
bo̱a̱ má ngatama kjo̱a̱kixi̱i̱.
25Jún xota̱ Israee̱l, a Án boá xi kiniꞌánkꞌasꞌienjnúꞌun kjo̱a̱tjó,
ko̱jo chji̱e̱ ki̱a̱ nangi kixií nga yichán nó nga ki̱a̱ kisꞌiṉtso̱majnú.
26Ta̱sá kichínkꞌájnú a̱sie̱én ne Sikuu̱t kui xi rejnú kamá,
ko̱jo a̱sie̱én ne Kiyuu̱n, kui xi ja̱kjiꞌi ńño má kjiꞌi xi kiniꞌándajnú jún.
27Kuíni nga kjin ngasenii̱ na̱xi̱ńdáꞌniú Ndamasko̱ sa̱ꞌinkjíjnúꞌun. Tsó Ndi̱a̱ná kui xi Néná, kui Néná xí tsi̱ꞌe̱ jájuún.
Currently Selected:
Amoo̱ 5: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
