Amoo̱ 4
4
Ínchjín cho̱n xi chji̱a̱ni nangi Samaria̱
1Ndaꞌyájnú kui eén, jún xi ja̱kon cho̱yojo xi chji̱a̱ni nangi Basaa̱n má kónjnú,
xi tindyiónjnú ki̱a̱ na̱xi̱i̱ nangi Samaria̱,
jún xi xá ꞌniú ꞌbíniéjnúu̱ xota̱ xi ni̱ma̱ xi jmí to̱njiín,
kó niꞌánchejéjnúu̱ xota̱ xi ni̱ma̱ xi ni chjieén,
jún ínchjín xí bi̱ ꞌmíjnúu̱ xi̱ꞌinjnú: Ndibájo̱jnú ngase bino̱ xi sꞌi̱o̱jne̱.
2Ndi̱a̱ná kui xi Néná jè katsjátsꞌoá, ta̱ngatꞌanii̱ kjo̱a̱tsjiee̱, kó bi̱ katsó:
Jè ndibá ni̱xtjin nga jún ínchjín,
nga ni̱se̱n kꞌuiyájnú nga kongínjo̱jnú jún,
kó ndíjnú tsitin ko̱na̱ngísꞌieén nga kongínjo̱ni kui.
3Kó ki̱a̱ nínga katsee̱n xoó ki̱a̱ ku̱i̱chíjminijnú ńgó ńgójnú,
ngaskande nga kjóchójnú ki̱a̱ ngi̱jin xtjieé. Tsó Ndi̱a̱ná kui xi Néná.
Ndatsi je kamájeé xota̱ Israee̱l, ti̱ kuí xí ntꞌiéꞌénjín
4¡Tangínjnú ki̱a̱ na̱xi̱ńdáꞌniú Betee̱l, kó ti̱ꞌanjéra ngasejnú!
¡ꞌNiú ngase ti̱ꞌankitikjo̱a̱jnú yojojnú ki̱a̱ Ngilngaa̱l!
¡Ndibájo̱jnú kjo̱a̱tjójnú ndyiojón ndyiojón xki̱ ta̱jñó,
kó ndibájo̱jnú tie nga úchaán ni xi sakójnú xki̱ ján ni̱xtjin!
5Ti̱ꞌankꞌasꞌiénjnú kjo̱a̱tjó nga si̱ꞌantsjajnú, nga ko̱e̱ꞌéjnú pan xi tjiín nisan,
kó ngayeje xi tꞌíyájnúu̱,
tꞌíyájnú chji̱e̱ xi ngayejee̱ takónjnú nga ko̱e̱ꞌéjnú,
tsi jún xi bo̱a̱ tsꞌén mejénjnú, jún xota̱ Israee̱l. Tsó Ndi̱a̱ná kui xi Néná.
6Án boá xi katsꞌenkjaꞌájnúꞌun kjindiá ngayeje na̱xi̱ńdáꞌniú,
kó ngiti̱ jmí nichinie kisꞌiejín ngayeje tꞌanangii̱,
ta̱nga jún, nde bo̱a̱ tsꞌén kiniꞌánkꞌoyàjínjnú yojojnú,
nga kiniꞌánsénjnúꞌun. Tsó Ndi̱a̱ná kui xi Néná.
7Kó ti̱ Án boá xi ichjáa̱ stseé, ján sá ngindiee̱ nga kjo̱chó cha̱a̱n ni tjieé,
kó tjín nangi nínga katsꞌenkaꞌa An stsé, kó ti̱ tjín nínga katsꞌenkaꞌajín an nga.
Ngo ngi̱ndie tsaꞌá stseé, kó xi ingoo̱ tsaꞌájiín kó kixí.
8Kó xota̱ xi jó xi ján na̱xi̱ńdáꞌniú kamá xi jachó ngo na̱xi̱ńdáꞌniú nínga jachókꞌi ndáfoaa̱,
kó kixixiójín xíndaá, kó nde bo̱a̱ tsꞌén kiniꞌánkꞌoyàjínjnú yojojnú nga kiniꞌánsénjnúꞌun. Tsó Ndi̱a̱ná kui xi Néná.
9Tjo̱ sibé ko̱jo chi̱ndo katsꞌenꞌónijnúꞌun,
kó chjo̱bo̱a̱a̱ katsꞌénkjié ngayeje ni tjieé,
ko̱jo ńꞌniuú tostsi̱je̱è, ko̱jo yáꞌingoo̱, ko̱jo yáꞌoliboo̱,
ta̱nga nde bo̱a̱ tsꞌén kiniꞌánkꞌoyàjínjnú yojojnú nga kiniꞌánsénjnúꞌun. Tsó Ndi̱a̱ná kui xi Néná.
10Katsangiyajnúꞌun chiꞌin xi sa̱ꞌínkꞌiénjnú, xikó má katsꞌenjo̱ An xota̱ Ejiptoo̱.
Katsjandiè an nga ki̱cha̱ndojó kiniꞌánkꞌiénni já xo̱ngòjnú nga kijíkján,
katsjandiè An nga kondra̱jnú katsꞌéntsi̱ꞌe̱ ndi̱je̱jnú,
katsjandiè An nga jaꞌándájnú nda̱ chꞌojee̱n jájúnjnú xi je jesoón, ki̱a̱ nínga síndo ndiꞌańjñoo̱,
ta̱nga nde bo̱a̱ tsꞌén kiniꞌánkꞌoyàjínjnú yojojnú nga kiniꞌánsénjnúꞌun. Tsó Ndi̱a̱ná kui xi Néná.
11Katsꞌenkjiéjnúꞌun xikoó kjiꞌanga Néná katsꞌénkjié na̱xi̱ńdáꞌniú Sondoma̱ ko̱jo na̱xi̱ńdáꞌniú Ngomorra̱,
kó ngaskande bo̱a̱ má kón kamájnú, xikoó xꞌué xí je kachjenboaꞌaá ndiꞌií,
ta̱nga nde bo̱a̱ tsꞌén kiniꞌánkꞌoyàjínjnú yojojnú nga kiniꞌánsénjnúꞌun. Tsó Ndi̱a̱ná kui xi Néná.
12Kuíni nga jún xota̱ Israee̱l, bo̱a̱ má sa̱ꞌinjo̱jnúꞌun jún,
kó kjo̱a̱a̱ nga bo̱a̱ má sa̱ꞌinjo̱jnúꞌun, ti̱ndyiondajnú nga sa̱kójnú Ndi̱a̱jnú kui xi Nejnú.
13Ngatꞌa̱ kꞌi̱e̱ tikón kꞌi̱e̱e̱, kui xi katsꞌénda na̱xi̱i̱, ko̱jo xi katsꞌénda tjo̱o̱,
ko̱jo xi tsóyà ni xi tsꞌénkjó xota̱ nga̱sondiee̱,
ko̱jo kui bosíkjoyá nga jñoó, kó ni̱xtjin tsꞌén,
kui xi tsjájón ngi̱ndie xi nkꞌa xi tjín nga̱són tꞌanangii̱,
Kuí boá xi Ndi̱a̱ná kui xi Néná, Néná xí tsi̱ꞌe̱ jájuún.
Currently Selected:
Amoo̱ 4: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
