Amoo̱ 3
3
1¡Jún xota̱ Israee̱l,
ndaꞌyájnúu̱ én xí Ndi̱a̱ná kui xi Néná tsꞌénchji̱a̱ kondra̱ tsa̱jún!
Kondraa̱ kui xota̱ ndiꞌa xi tsꞌaxié An ki̱a̱ nangi Ejiptoo̱, kui én xí bi̱ tsoó:
2Ta̱ jún tsí bo̱a̱ xi jaꞌajinjnúꞌun,
ngi̱jii̱n ngayeje xota̱ ndiꞌa xi tjín kui tꞌanangii̱,
kuíni nga kuíꞌájnúꞌun xki̱ kjo̱a̱a̱ ngayeje ni xi ndajín xi kiniꞌánjnú.
Tjín ngo míkjo̱a̱a̱, kjo̱a̱a̱ ngayeje nii̱
3A ka̱má tsí jó xota̱, nijan kꞌuímajo̱ xkjín, tsí ndse̱je̱njín ka̱ma.
4A ka̱má skja̱ndáyà xandi̱je̱e̱ ngi̱jin kꞌijñaá, tsi jmí cho̱ kasakojiín.
A ka̱má skja̱ndáyà ndií xandi̱je̱e̱, ki̱a̱ ti̱xa̱na̱xi̱ nínga tikón, tsi jmí cho̱ katsoboájín.
5A ka̱ma ko̱ndo̱bo̱a̱ ngo ni̱sie, tsi jmíjín xi ku̱i̱ꞌíjñá ngo chja̱ya̱.
A ska̱ya soboá kuí chja̱ya̱a̱ ki̱a̱ tꞌanangii̱, tsi jmí cho̱ kjíyájiín.
6A si̱ꞌankjanie kjo̱a̱nda tjioo̱, nga ka̱makjánjiín xota̱ na̱xi̱ńdaá,
A tjín ngo ni xi ndajín xi kamá na̱xi̱ńdáꞌniuú, tsi Nénájín xi bo̱a̱ sa̱ꞌín.
7Kó bo̱a̱ tsꞌén nga Ndi̱a̱ná kui xi Néná, jmíjín ni xi sa̱ꞌín,
tsi kuijín jáchji̱ni̱e̱ꞌe̱én xi ka̱tso̱yaa̱ ni xi tjiꞌmaá nga sa̱ꞌín.
8Tsi skja̱ndáyà xandi̱je̱e̱. ꞌYá xí stsa̱kjonjín.
Tsi Ndi̱a̱ná kui xi Néná xí ku̱i̱chji̱a̱. ꞌYá xí ka̱tso̱yàtjónjín ni xi ka̱tso̱.
Nangi Samariaa̱ si̱ꞌankjie
9¡Tꞌíyájnú kui nii̱ ki̱a̱ ndo̱bo̱a̱xa̱á na̱xi̱ńdáꞌniú Asndoo̱nd,
kó tꞌíyájnú ki̱a̱ ndo̱bo̱a̱xa̱á nangi Ejiptoo̱ nga!
Ngatamatikójnú ki̱a̱ na̱xi̱i̱ nangi Samaria̱,
kó tsitsíjenjnúu̱ kjo̱a̱se xi kjima ngamasiee̱n,
ko̱jo ni xi ndajín xi kjima ngi̱jii̱n kui ngi̱ndiee̱.
10Májínjnú niꞌán ni xi kixi̱i̱. Tsó Ndi̱a̱ná kui xi Néná.
Ngatꞌa̱ ki̱a̱ ngi̱ndie xi ꞌniuú ndyi̱chjaꞌátjójnú kjo̱a̱cho̱n xi kiniꞌánchejéjnú, ko̱jo ni xi ndajiín.
11Kuíni nga bi̱ tsóni Ndi̱a̱ná kui xi Néná:
Ngo xtín kondra̱ kji̱ndi̱bá xi kjo̱a̱ꞌatjiyajoo̱n kui tꞌanangii̱,
kó kjo̱a̱ꞌáxiín ngayeje kjo̱a̱jee̱, sꞌe̱ ko̱ótiya nga sa̱ꞌínchejé ni xi tjiín ngi̱ndie xi ꞌniuú.
12Bi̱ tsó Ndi̱a̱ná kui xi Néná:
Xikótsꞌèn nga ngo nda̱ xi koo̱n cho̱tsa̱nga̱a̱ ꞌboxiéꞌá ngi̱ya tsꞌoa xandi̱je̱e̱,
jó sé ko̱jo tsi chií tji̱bo̱a̱nijon ngo cho̱tsa̱nga̱,
bo̱a̱ tsꞌén ko̱ꞌna̱xiéꞌá An xota̱ Israee̱l xi síndo nangi Samaria̱:
Xikó maá nijon ngo yáxíríe̱ xi tsjayojosón,
ko̱jo tsi xikó maá tsi ngo xi̱i̱ yaá sé ngo ṉchan xi tsjayojosón.
13Tasiénnijónjnú, kó tꞌíyájnúu̱ kui nii̱ xota̱ ndiꞌaa̱ Jakoo̱b. Bi̱ tsó Ndi̱a̱ná kui xi Néná, kui Néná xí tsi̱ꞌe̱ jájuún:
14Ni̱xtjin nga kuíꞌáa̱ xki̱ xota̱ Israee̱l kjo̱a̱a̱ jé xí katsꞌén,
ti̱ kuíꞌáa̱ xki̱ kjo̱a̱a̱ ṉchan xi síndo ki̱a̱ na̱xi̱ńdáꞌniú Betee̱l nga,
kó chjátꞌosón ni xi ja̱kon ndi̱ja̱ kon xi síndoo̱ kui ṉchaa̱n,
kó ki̱a̱ kjoyójo tꞌanangii̱.
15Kó sa̱ꞌinkjatsón Án ndiꞌa xi niꞌánkjién nga má cho̱nchꞌaàn,
ko̱jo xi niꞌánkjién nga ma cho̱ndoboaá,
kó sa̱ꞌinkjié An ndiꞌa xi ndi̱ja̱a̱ ki̱ña̱ kamándanii̱,
ko̱jo sa̱ꞌinkjié An ndiꞌa yiꞌii̱ nga. Tsó Ndi̱a̱ná kui xi Néná.
Currently Selected:
Amoo̱ 3: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
