Ni xi kamá 19

Bi̱ tsꞌén kisꞌijña Pabloo̱ na̱xi̱ńdáꞌniú Éfeso̱

1Kó tji̱e̱nga nga nda̱ xi ꞌmí Apoloo̱ kisꞌijña na̱xi̱ńdáꞌniú Korinto̱, Pabloo̱ jaꞌajin na̱xi̱i̱, sꞌe̱ jachó nginí ngaskande na̱xi̱ńdáꞌniú Éfeso̱, nínga kasakoo̱ kjín xota̱ xi je sꞌijii̱n Kjisoo̱, 2xi bi̱ katsoó nga asíyaá:

–A kisꞌijñajinjnú jún A̱si̱énni̱xtjii̱n Néná kjiꞌa ngije kisꞌijinjnú eén Néná.

Kó kui xotaa̱, bi̱ katsó:

–Nde kji̱e̱ chií ndaꞌyájne̱ kjo̱a̱a̱ A̱si̱énni̱xtjii̱n Néná.

3Kósꞌe̱ Pabloo̱ bi̱ katsó:

–Kó mí kjo̱a̱botíndá xi katseꞌéjnú.

Kó bi̱ katsó kui xotaa̱:

–Kjo̱a̱a̱ xikótsꞌèn atíndá Juaa̱ boá.

4Sꞌe̱ bi̱ katsoó Pabloo̱:

–Jo̱o̱n, Juaa̱ atíndá ngayeje xota̱ xi katsꞌénkꞌoyá yojoo̱, kó katsóyaà kui xotaa̱ nga sa̱ꞌínsꞌijin xi jaskan kji̱ndi̱bákoón kui, kó kuí Kjisoo̱ xi̱ꞌba̱.

5Kó ngije tsintꞌié kuí nii̱, tji̱e̱nmá kastindá yejeni jaꞌeén Ndi̱a̱ná Kjisoo̱. 6Kó ngije Pabloo̱ íjñasoón tsja, ti̱ bo̱a̱ ti̱ tsꞌén kjindibánié A̱si̱énni̱xtjii̱n Néná, kósꞌe̱ tsíchji̱a̱ tji̱ꞌni̱u̱ én xí makjínjínná, kó tsíchji̱a̱ xikoó chji̱ni̱e̱ꞌe̱én Néná. 7Mara̱ tsi ta̱ tiejó jáxíꞌín xi síndojii̱n ngayeje kui xotaa̱.

8Kó Pabloo̱ ján sá kamaá nga kijí ki̱a̱ ndiꞌa nínga ndokjo̱a̱ eén Néná, nínga jmí ndikón kisꞌiejiín nga tsíchji̱a̱ eén Néná, kó tsíchji̱a̱jo ko̱jo katsꞌénꞌindakon ngayeje xotaa̱ kjo̱a̱a̱ xikótsꞌèn botixómá Néná. 9Ta̱nga tjín xota̱ xi ta̱ngatꞌanii̱ kjo̱a̱kitikjo̱a̱a̱ nga kisꞌijinjiín én xí kandokjo̱a̱jo, kó chꞌo tsꞌén tsíchji̱a̱ ngindyi̱ko̱n xotaa̱ kjo̱a̱a̱ ndi̱yà tja̱tsi̱e̱e̱, ta̱nga Pabloo̱ tsꞌaxiétꞌaxín yojoo̱, kó kijíjo̱ ngayeje xota̱ na̱ngo̱xi̱i̱ ki̱a̱ na̱xko̱ya̱á kui nda̱ xi ꞌmí Tiranoo̱, nínga ndyiojón ndyiojón akóyá kui eén. 10Kó jó nó kamaá nga ta̱ kui xá katsꞌén, kó kuíni nga bo̱a̱ tsꞌén ngayeje xota̱ xi síndo nangi Asia̱ xi jundío̱ ko̱jo xi ngriengo̱ tsintꞌié eén Ndi̱a̱ná Kjisoo̱. 11Kó Néná achichí kjo̱a̱ndikón katsꞌén ngi̱ya tsja Pabloo̱, 12ngaskande poñoo̱, ko̱jo ńjño xi katsꞌénkjién Pabloo̱ tsangínjoo̱ ngayeje xota̱ xi oo̱n, kó kamándaya ngayeje chiꞌin xi koo̱n, kó bo̱a̱ ti̱ tsꞌén a̱siénni̱xtjin xi ndajín xi kisꞌińdojii̱n yojoo̱ xotaa̱ jatjo.

13Ta̱nga tjín xota̱ jundío̱ xi kisꞌiṉtso̱maya ndi̱yàtié jàn xi tsꞌaxié a̱siénni̱xtjin xi ndajín xi tjíjii̱n ngi̱jin yojoo̱ xotaa̱, kó kamámejeén katsꞌénkjién jaꞌeén Ndi̱a̱ Kjisoo̱, kó bi̱ katsoó kui a̱si̱énni̱xtjii̱n:

–¡Jaꞌeén Ndi̱a̱ná Kjisoo̱ xi íni̱jmì Pabloo̱, án xí tsꞌénchji̱a̱jojnúꞌun nga ti̱tjaxi̱e̱jinjnú ngi̱jin yojoo̱ xotaa̱!

14Kui nii̱ xi katsꞌén nga yito ndií ngo nda̱ jundío̱ xi ꞌmí Eseba̱, kui xi ngito̱ko̱o̱ chináꞌmi kamá mára. 15Ta̱nga kui a̱siénni̱xtjin xi ndajiín, bi̱ katsoó nga tsíchji̱a̱:

–Be án Kjisoo̱, kó ti̱ be án ꞌyání xi Pabloo̱, ta̱nga jún, ꞌyání jún.

16Kó kui nda̱ xi tjíjii̱n ngi̱jin yojoo̱ kui a̱siénni̱xtjin xi ndajiín kjítsꞌuieé kui jaá, kó nga ta̱nisién tsie ngaꞌniú tjiín, katsꞌeén kui jaá, ꞌniú askjanjo̱, kósꞌe̱ kui jaá tsanga kjiꞌixtí ngije kiniꞌánꞌoón. 17Kó ngayeje xota̱ xi síndo na̱xi̱ńdáꞌniú Éfeso̱ xi jundío̱ ko̱jo xi ngriengo̱, ngije tsintꞌié kuí nii̱, achichí katsakjónní, kó bo̱a̱ tsꞌén ꞌniú kamáyà ngase jaꞌeén Ndi̱a̱ Kjisoo̱.

18Kó achichí kjín má xota̱ xi je kisꞌijii̱n eén Néná xí katsóyà ngindyi̱ko̱n xota̱ na̱xi̱ńdaá ngayeje ni xi ndajínkjiꞌi xi katsꞌén ngasꞌe̱. 19Kó ti̱ bo̱a̱ ti̱ tsꞌén kjín má xota̱ xi iskjítꞌoyà kjo̱a̱tjiꞌe xi jachójo̱ xo̱jo̱n xi katsꞌénkjién, kó ngindyi̱ko̱n xota̱ na̱xi̱ńdaá ítí ngayeje kui xo̱jo̱o̱n. Nga kichisoón kótjín to̱n tjínnií kui xo̱jo̱o̱n, tjínraá tsi ta̱ ichítié mi̱ to̱ntiboa. 20Kó bo̱a̱ tsꞌén eén Néná sa kjimatsie sa kjimatsie ngase, kó kjimaya ngaꞌniuú.

21Kó ngije jatjosón kui nii̱, Pabloo̱ kamámejeén kijí na̱xi̱ńdáꞌniú Jerusale̱n nga jaꞌa nangi Masendonia̱ ko̱jo Akaya̱, kó bo̱a̱ katsó nga jaskan ngije kijí na̱xi̱ńdáꞌniú Jerusale̱n ko̱e̱je̱ na̱xi̱ńdá Roma̱. 22Kó katsangiya nangi Masendonia̱ jó já xí bosikójo, kui xi ꞌmí Timoo̱ ko̱jo Erastoo̱, tji̱e̱nga Pabloo̱ kjín ni̱xtjin kamá ngasee̱ nga kisꞌijña nangi Asia̱.

Bi̱ tsꞌén kisꞌie kjo̱a̱xti na̱xi̱ńdáꞌniú Éfeso̱

23Kui ni̱xtjin jàn kisꞌie na̱xi̱ńdáꞌniú Éfeso̱ ngo kjo̱a̱xti tsie kjo̱a̱a̱ ndi̱yà tja̱tsi̱e̱e̱. 24Ngatꞌa̱ ngo nda̱ xi ꞌmí Ndemetrio̱ xi katsꞌénda ni to̱ntiboa xi ja̱ kon na̱ngo̱xi̱i̱ na̱ ne Artemisaa̱ kon, kó achichí to̱n katsꞌén já xí katsꞌénxájo̱ kui nda̱a̱, 25kó kui Ndemetrioo̱ ítikó já xí ti̱kuii xá tsꞌén, kó bi̱ katsoó:

–Jún bo̱a̱ já, ja̱ je yàjnú nga tsi̱ꞌe̱ nga nda ku̱i̱ndyión, kuí xáná xi tsꞌéntsjáná to̱n, 26kó jè yàjnú, kó jè ndaꞌyájnú nga kui nda̱ xi ꞌmí Pabloo̱ jmí tsi ta̱ Éfeso̱ tsí nga tsꞌénchji̱a̱, mején ngayeje nangi Asia̱ nga je akjángá achichí kjín xota̱ nga bo̱a̱ katsoó, nga kui xò ne xi tsꞌénda xotaa̱, nénájín xò boá. 27Kó kjén nga ta̱ ndikón kjíꞌí kui én xí tsꞌénchji̱a̱ kui nda̱a̱, ngatꞌa̱ xáná ka̱márií ngindie jàn ko̱e̱je̱, kó ti̱ bo̱a̱ ti̱ kjiꞌinii̱ na̱ngo̱xi̱i̱ na̱ ne Artemisaa̱ ka̱márií nga ngiti̱ ꞌniújín xcha̱ jaꞌeén, kó bo̱a̱ tsꞌén ka̱ma chꞌo ngayeje ngaꞌniuú kui na̱ ne xi niꞌándikón ngayeje nangi Asia̱, ko̱jo mején ngayeje nga̱sondiee̱.

28Ngije tsintꞌié kuí nii̱, achichí katsꞌénxchán xota̱ na̱xi̱ńdaá, kó askjandáyà má nga bi̱ katsó:

–¡Tsie ngatamaa̱ Artemisaa̱, na̱ nee̱ xota̱ xi chji̱a̱ni na̱xi̱ńdáꞌniú Éfeso̱!

29Kó ngayeje xota̱ na̱xi̱ńdaá nga nde ngiti̱ kamábejín mí xí sa̱ꞌín kui xotaa̱, kó bo̱a̱ tsꞌén kui xotaa̱ kjítsꞌuieé nda̱ xi ꞌmí Ngayoo̱ ko̱jo Aristarkoo̱, kui xi já xí chji̱a̱ni nangi Masendonia̱ xi nijan kijíjo̱ Pabloo̱, kó kachjafé kui jaá ngaskande ngi̱ndie nínga matikó xotaa̱. 30Kó Pabloo̱ kamámejeén tsꞌasꞌienjii̱n xotaa̱, tsi̱ꞌe̱ nga ku̱i̱chji̱a̱jo, ta̱nga xota̱ xi je sꞌijii̱n eén Néná katsjandièjiín. 31Kó ti̱ bo̱a̱ ti̱ tsꞌén ngi̱jii̱n jáxá xí chji̱a̱ni nangi Asia̱ kisꞌińdojin já xí nda tsaꞌa Pabloo̱ xi katsangiya tsóyaà tsi̱ꞌe̱ nga ki̱a̱jín sa̱ngínjin yojoo̱. 32Tjín í askjandáyà ngo ni, kó tjín xí kje̱ꞌe katsó nga askjandáyà, ngatꞌa̱ ngayeje xotaa̱ je xtii̱, kó kjín ngase ma xi nde bejín míkjo̱a̱a̱ nga kamátikó. 33Kó tjín já ngito̱ko̱ jundíoo̱ xi katsangińña ngo nda̱ xi ꞌmí Rijaá, tsi̱ꞌe̱ nga kje̱n xotaa̱ kjo̱chó kó sku̱i̱e̱ ni xi kjimaa̱. Kó Rijaá yején tsja tsi̱ꞌe̱ nga xió kꞌuíndo xotaa̱ ko̱jo tsi̱ꞌe̱ nga ku̱i̱chji̱a̱ nganda tsi̱ꞌe̱ xota̱ jundíoo̱. 34Ta̱nga nga kamákjiín kui xotaa̱ nga ti̱ jundío̱ní kui nda̱a̱, mara̱ tsi ta̱ jó ora̱ nga askjandáyà ngayeje kui xotaa̱ nga bi̱ katsó:

–¡Tsie ngatamaa̱ Artemisaa̱, na̱ nee̱ xota̱ xi chji̱a̱ni na̱xi̱ńdáꞌniú Éfeso̱!

35Kósꞌe̱ ngije kixixió xota̱ na̱xi̱ńdaá, nda̱ xi tsꞌénda xo̱jo̱o̱n, bi̱ katsoó:

–Jún bo̱a̱ já xí ndokjo̱a̱nijnú na̱xi̱ńdáꞌniú Éfeso̱, kó ꞌyá nda̱ xi bejín nga xota̱ na̱xi̱ńdáꞌniú Éfeso̱, kuí xí ndyi̱konda na̱ngo̱xi̱i̱ na̱ ne Artemisaa̱ ko̱jo a̱si̱én xí kjindibáni nkꞌa jàn. 36Xikoó kui nii̱, nga jmíjín xi bo̱a̱jín kjiꞌi ka̱tso̱, jún xióra̱ ti̱ndyiónjnú, kó nga jmí ni niꞌánjínjnú tsi tjónjín nda si̱ꞌankjójnú. 37Ngatꞌa̱ nga kui já xí jún jéꞌe̱jojnú jmí tsi ngo ni xi ndajínkjiꞌi katsꞌén, ti̱nde jmí tsi chꞌo tsꞌén ndyi̱chji̱a̱ kjo̱a̱a̱ na̱ngo̱xi̱i̱ na̱ ne Artemisaa̱. 38Tsi Ndemetrioo̱ ko̱jo xota̱ xi nijan ndyi̱tsꞌènxájo̱ tjiín ngo ni xi ku̱i̱chji̱a̱ kondraa̱ kui jaá, ja̱ kui xá síndoni jáxaá ko̱jo ndiꞌa ndo̱bo̱a̱xa̱á, ki̱a̱ ngatatíjétaꞌín xkjín, kó ki̱a̱ ngatꞌaxiéꞌá yojoo̱ ja̱kꞌi̱e̱ ja̱ngaján. 39Kó tsi tjín ngase kje̱ꞌe ni xi chji̱a̱ꞌajnú, chjiéngá ngi̱jii̱n nga ka̱matikó ngayeje xota̱ na̱xi̱ńdaá ko̱jo jáxaá, nga kꞌuíndajnú. 40Kjo̱a̱a̱ kui ni xi kamá ngotꞌe̱, tsi ndajín ni̱xtjin tjín xota̱ xi ko̱tíjétáꞌínná nga ñá xí ndyi̱ꞌbítsié kui kjo̱a̱xtii̱, kó ndeta̱ yàjín kó kꞌuíi̱n tsi tjín xí ko̱síyáná míkjo̱a̱a̱ nga ítsꞌi̱yanii̱ kui kjo̱a̱xtii̱.

41Kó ngije tsíchji̱a̱ kui eén, katsꞌénkixotꞌa xota̱ xi kamátikoó.

Currently Selected:

Ni xi kamá 19: MAIX

Highlight

Copy