Ni xi kamá 18

Bi̱ tsꞌén kisꞌijña Pabloo̱ na̱xi̱ńdáꞌniú Korinto̱

1Jaskan ngije kamá kui nii̱, Pabloo̱ jatjo na̱xi̱ńdáꞌniú Atena̱, sꞌe̱ kijí na̱xi̱ńdáꞌniú Korinto̱. 2Kó ki̱a̱ kasakoo̱ ngo nda̱ jundío̱ xi ꞌmí Akila̱, xi chji̱a̱ni nangi Ponto̱, ngi̱chí ngi̱ndie ni̱xtjin, Akilaa̱ ko̱jo chjo̱ón xi ꞌmí na̱ Prisilaa̱ nangi Italia̱ kjindibáni, nínga jatjo, ngatꞌa̱ nda̱ xi atíxomaa̱ Roma̱ xi ꞌmí Klaundioo̱ katsjákjo̱a̱ nga kaꞌnaxié ngayeje xota̱ jundío̱ xi síndo na̱xi̱ńdá Roma̱, kó Pabloo̱ kijíkoón kui xotaa̱, 3kó nga ti̱kuíní xá katsꞌén kui jaá, nga katsꞌénda ndiꞌańjño ndichjon, ki̱a̱ kisꞌijñajo̱ tsi̱ꞌe̱ nga nijan katsꞌénxájo̱ kui jaá. 4Kó xki̱ ni̱xtjin ndikón Pabloo̱ fí ki̱a̱ ngi̱ya ndiꞌa nínga ndokjo̱a̱ eén Néná, nínga tsíchji̱a̱jo, ko̱jo katsꞌénꞌindakon tsi̱ꞌe̱ nga sꞌi̱jii̱n eén Néná xota̱ xi jundío̱ ko̱jo xi ngriengo̱.

5Kó nga jachó Silaa̱ ko̱jo Timoo̱ nga kjindibáni nangi Masendonia̱, Pabloo̱ ta̱ kui xá katsꞌén nga íni̱jmì eén Néná, ko̱jo nga akoó xota̱ jundíoo̱ nga ja̱koxi̱ nga Kjisoo̱ boá xi Kristoo̱. 6Ta̱nga kui xotaa̱ ta̱ kje̱ꞌe tsꞌén katsꞌénkjó, kósꞌe̱ chꞌo katsó, sꞌe̱ Pabloo̱ ítsanie xa̱a̱ ńjñoo̱ nga akó nga chꞌo kamaá ni xi kiꞌmií, kó bi̱ katsoó:

–Ti̱ júnní ndyi̱mindyijnúu̱ jé yojojnú nga xcha̱jàjnú, ánjín konna ni xi ka̱majnú, ngatꞌa̱ tsjie án, ngotꞌe̱ ꞌne̱, ta̱sá xota̱ xi jundío̱jín xi kjuinkóo̱n.

7Kó jatjo Pabloo̱ ki̱a̱ ndiꞌa nínga ndokjo̱a̱ eén Néná, kósꞌe̱ kijí ndiꞌaa̱ ngo nda̱ xi ꞌmí Tisio̱ Justoo̱, xi achichí kamábendikón Néná, xi tikón tiña tꞌa ndiꞌa nínga ndokjo̱a̱ eén Néná. 8Kó kui nda̱ xi ꞌmí Krispoo̱, xi ngito̱ko̱o̱ ndiꞌa nínga ndokjo̱a̱ eén Néná, ko̱jo xota̱ ngi̱ya ndiꞌaa̱, kisꞌijii̱n Ndi̱a̱ná, kó ti̱ bo̱a̱ ti̱ tsꞌén kjín má xota̱ xi chji̱a̱ni na̱xi̱ńdáꞌniú Korinto̱ xi ngije tsintꞌieé Pabloo̱, kisꞌijii̱n kósꞌe̱ kastindá. 9Kó ngo ni̱xtji̱e̱n, Ndi̱a̱ná bi̱ katsoó Pabloo̱ nga akoó ngo ni:

–Ngata̱ ndakinjín má ji, ta̱kó ndókjo̱e̱ra ji énna kó ngata̱ fokjejín ji ndso̱ꞌbe, 10ngatꞌa̱ án tsoꞌbájoo̱ kó jmíjín xikó sa̱ꞌínjoo̱, ngatꞌa̱ achichí je kjín má xota̱ xi je tsa̱ꞌa̱n xi síndo kui na̱xi̱ńdaá.

11Kó bo̱a̱ tsꞌén Pabloo̱ ngo nó ko̱jo jun sá kamaá nga kisꞌijña na̱xi̱ńdáꞌniú Korinto̱, nga akóyaá kui xotaa̱ eén Néná.

12Ta̱nga kui ni̱xtjin jàn nga kamá xtitjoón nangi Akaya̱ nda̱ xi ꞌmí Ngalioo̱n, xota̱ jundíoo̱ kamátikó xtín nga kijií kondra̱ Pabloo̱, kósꞌe̱ kijíjo̱ ngi̱ndie nínga botíjeé, 13kó bi̱ katsoó nda̱ xtitjoón:

–Kui nda̱a̱ ta̱ kui xá tsoꞌbání nga tjítsꞌén indakon xotaa̱ tsi̱ꞌe̱ nga sku̱i̱e̱ndikón Néná, ta̱nga jmí tsi xikó tjítsó kjo̱a̱kitii̱.

14Ta̱ sꞌe̱ tsí ku̱i̱chji̱a̱ Pabloo̱ katsaki nga tji̱e̱nmá kui nda̱ xi ꞌmí Ngalioo̱n, bi̱ katsoó xota̱ jundíoo̱:

–Tsi kjo̱a̱a̱ ngo jé ko̱jo tsi kjo̱a̱a̱ nga ngo xota̱ kiniꞌánkꞌién, an ka̱mara̱ kuintꞌiejnúꞌun jún xi jundío̱jnú, 15ta̱nga tsi ta̱ kjo̱a̱a̱ nga ta̱ én tsí, ko̱jo kjo̱a̱a̱ jaꞌén, ko̱jo tsi kjo̱a̱a̱ kjo̱a̱kiti tsa̱jún, ta̱sá ti̱ juún ti̱ꞌandajin so̱bo̱a̱jnú, ngatꞌa̱ mejénjínna nga an skongajin an kjo̱a̱a̱ kui nii̱.

16Kó xtitjoón tsangatji̱ngii̱ kui xotaa̱ ki̱a̱ ngi̱ndie nínga botíjeé. 17Kósꞌe̱ katsoboá xtín kui xota̱ jundíoo̱ nda̱ xi ꞌmí Sóstenee̱, ngito̱ko̱o̱ ndiꞌa nínga ndokjo̱a̱ eén Néná, sꞌe̱ ikꞌieé ki̱a̱ kje̱n ngi̱ndie nínga niꞌánjeé, ta̱nga nda̱ xtitjón xi ꞌmí Ngalioo̱n nde ngiti̱ ki̱a̱jín katsꞌénseén kui nii̱.

18Kó achichí kjín ni̱xtjin kamá ngasee̱ Pabloo̱ nga kisꞌijña na̱xi̱ńdáꞌniú Korinto̱. Sꞌe̱ jaskan ngije katsꞌénkixotꞌa já ntsꞌiee̱, nijan kijíjo̱ na̱ Prisilaa̱ ko̱jo Akilaa̱ nga kijíyà ngo tjotso je nga kijí nangi Siria̱, kó ki̱a̱ na̱xi̱ńdáꞌniú Senkrea̱ nga tikón ngase Pabloo̱, ngindiee̱ nga ko̱e̱je̱, íjón taka takaa̱ to̱ko̱, tsi̱ꞌe̱ nga katsꞌénkjatjosón ngo ni xi je tsíchji̱a̱tjoón Néná nga sa̱ꞌín. 19Kó ngije jachó na̱xi̱ńdáꞌniú Éfeso̱, Pabloo̱ ki̱a̱ índo na̱ Prisilaa̱ ko̱jo Akilaa̱, sꞌe̱ kijí ndiꞌa nínga ndokjo̱a̱ eén Néná nínga askjotíjo̱ xota̱ jundío̱ xi ki̱a̱ kamátikó kuí ngi̱ndiee̱. 20Kó kui xotaa̱ ꞌniú tsíꞌaá Pabloo̱ tsi̱ꞌe̱ nga kjín ngase ni̱xtjin ka̱maa̱ nga nijan kꞌuíndojo̱, ta̱nga kamájo̱ꞌójiín, 21ta̱sá katsꞌénkixotꞌa kui jaá, kósꞌe̱ bi̱ katsó ngasee̱:

–Tsi ta̱ꞌa Néná xi bo̱a̱ tsó, kjoéꞌe̱katsijén nginíjnúꞌun ingo ndi̱yà.

Sꞌe̱ jatjoni na̱xi̱ńdáꞌniú Éfeso̱ Pabloo̱ nga kijíyà ngo tjotso je, 22kó ngije jachó na̱xi̱ńdáꞌniú Sesarea̱, kijí na̱xi̱ńdáꞌniú Jerusale̱n nínga kijítsꞌentínde xota̱ na̱ngo̱xi̱i̱, sꞌe̱ jaskan kijí xtji̱e̱e̱n na̱xi̱ńdáꞌniú Antiokiya̱. 23Kó ngije jaꞌa ni̱xtjin, Pabloo̱ kijí kó kistsoꞌbá nginí ingo ndi̱yà nga ngo nga ngo ngi̱ndie xi chji̱a̱ni nangi Ngalasia̱ ko̱jo Frijia̱, nínga katsjángaꞌniuú ngayeje xota̱ xi tsi̱ꞌe̱ Néná.

Apoloo̱ bi̱ tsꞌén katsóyà eén Néná na̱xi̱ńdáꞌniú Éfeso̱

24Kui ni̱xtjin jàn jachó na̱xi̱ńdáꞌniú Éfeso̱ ngo nda̱ jundío̱ xi ꞌmí Apolo̱ xi chji̱a̱ni na̱xi̱ńdáꞌniú Alejandriya̱, ngo nda̱ kjínkón xi ta̱nisién ꞌniú kamábe xo̱jo̱n eén Néná. 25Kuí nda̱a̱ xi akakoyaá kjo̱a̱a̱ ndi̱ya̱à Ndi̱a̱ná Kjisoo̱, kó kisꞌiee̱ ngo a̱siénni̱xtjin xi achichí tsjatsꞌèn tsíchji̱a̱ nga nda akóyá cha̱n cha̱n kjo̱a̱a̱ Ndi̱a̱a̱, ndatsi ta̱kuítsí kjo̱a̱botíndaá Juaa̱ xi kamábe, 26kó kui nda̱a̱ jmíjín xi katsakjónní nga tsíchji̱a̱ ki̱a̱ ndiꞌa nínga ndokjo̱a̱ eén Néná, ta̱nga nga tsintꞌieé na̱ Prisilaa̱ ko̱jo Akilaa̱, kijíjo̱tꞌaxín, kósꞌe̱ katsóyà nda ndaa̱ kjo̱a̱a̱ ndi̱ya̱à Néná. 27Kó kui nda̱a̱ kamámejeén jaꞌa nangi Akaya̱, kó já ntsꞌiee̱ katsjaá ngaꞌniú, kó katsꞌéndaa̱ ngo xo̱jo̱n xota̱ xi sꞌijii̱n Kjisoo̱ xi síndo kui nangi jàn, tsi̱ꞌe̱ nga nda tsꞌén sa̱ꞌínseén Apoloo̱, ngije jachó nangi Akaya̱ ꞌniú asíko̱jo ngayeje xotaa̱, kui xi ta̱ngatꞌanii̱ kjo̱a̱ndaa̱ Néná nga je kisꞌijii̱n. 28Apoloo̱ ꞌniú tsíchji̱a̱jo já jundíoo̱ xi kisꞌijinjiín Kjisoo̱, kó ki̱a̱ iskjíbénií xo̱jo̱n eén Néná nga akoó nga ja̱koxi̱ nga Kjisoo̱ xi Kristoo̱.

Currently Selected:

Ni xi kamá 18: MAIX

Highlight

Copy