Ni xi kamá 20

Bi̱ tsꞌén kijí Pabloo̱ nangi Masendonia̱ ko̱jo Ngresia̱

1Sꞌe̱ ngije kamá kui kjo̱a̱xtii̱, Pabloo̱ tsíchji̱a̱a̱ xota̱ xi sꞌijii̱n Kjisoo̱, kó ngije katsjaá kjo̱a̱botíxoma, ko̱jo ngije janíkjá, katsꞌénkixotꞌa, sꞌe̱ kijí nangi Masendonia̱. 2Kó ngije jaꞌa ngayeje kui ngi̱ndie jàn nga kijítsjángaꞌniuú nga tsie én tsíchji̱a̱jo já ntsꞌiee̱, jaskan jachó nangi Ngresia̱, 3nínga ján sá kamaá nga kisꞌijña, kó tsijen kamaá nga tjín ni xi ndyi̱ꞌbínda xota̱ jundíoo̱ ngije ma kjíyá má ngo tjotso je nga ko̱e̱je̱ nangi Siria̱, kó ta̱sá katsꞌénkjó nga kjo̱a̱ꞌa nginí ingo ndi̱yà nangi Masendonia̱. 4Kó nijan kijíjo̱ nda̱ xi ꞌmí Sópatee̱r, ndií Piroo̱ xi chji̱a̱ni na̱xi̱ńdáꞌniú Berea̱, ko̱jo nda̱ xi ꞌmí Aristarkoo̱, ko̱jo nda̱ xi ꞌmí Sekoón xi chji̱a̱ni na̱xi̱ńdáꞌniú Tesalónika̱, ko̱jo nda̱ xi ꞌmí Ngayoo̱ xi chji̱a̱ni nangi Nderbe̱ ko̱jo Timoo̱, ko̱jo nda̱ xi ꞌmí Tikikoo̱, ko̱jo Trófimoo̱ xi chji̱a̱ni nangi Asia̱. 5Kui jaá kijítjón, kó ki̱a̱ askoyájne̱ na̱xi̱ńdáꞌniú Troa̱, 6kó ji̱n, ngije jaꞌa ni̱xtjin nga chinie pan xi jmí nisanjiín, jatjojne̱ na̱xi̱ńdáꞌniú Filipo̱ nga tsanginyájne̱ ngo tjotso je, kó xi ma ún ni̱xtjin jachótji̱ngijne̱ na̱xi̱ńdáꞌniú Troa̱ nínga yito ni̱xtjin kamájne̱ nga kixindyionjne̱ ki̱a̱.

Bi̱ tsꞌén jachó Pabloo̱ na̱xi̱ńdáꞌniú Troa̱

7Kó nga ni̱xtjin tjoón xomanaa̱ kamátikójne̱ nga akakjangajne̱ paa̱n, kó Pabloo̱ tsíchji̱a̱jo xota̱ xi sꞌijii̱n Kjisoo̱, ta̱nga kjo̱a̱a̱ nga kamángindyiojón ko̱e̱je̱, kuíni nga ngaskande masien ni̱xtji̱e̱n jachoó nga tsíchji̱a̱jo já ntsꞌiee̱. 8Kó ki̱a̱ kixindyiontikójne̱ ngo ngi̱yaꞌmaa̱ ngo ndiꞌa nkꞌa, nínga achichí ndiꞌíxò xi tjítí tjín. 9Kó ngo nda̱ xo̱ngò xi ꞌmí Eutiko̱ tikóntꞌa nga̱ntjo̱a̱masienkjaá ndiꞌaa̱, kó kjo̱a̱a̱ nga Pabloo̱ achichí tsꞌandíyaá nga tsíchji̱a̱, ti̱chaa̱n kamáńjñaá kui nda̱a̱ sꞌe̱ kisꞌifé, kó kjindibájén nga tsꞌákangí ngaskande xi ma ján tíkjaá kui ndiꞌa nkꞌaa̱, kó je kꞌien nga kachjaninkꞌa. 10Ta̱nga Pabloo̱ jatjajen, kó kaxaxixtienñé kui nda̱a̱, sꞌe̱ janíkjá, kó bi̱ katsoó já ntsꞌiee̱:

–¡Ngata̱ ndakonjínmájnú tikón kuí nda̱a̱!

11Sꞌe̱ jaskan Pabloo̱ ti̱ kijínijíngí nginí kui ndiꞌa nkꞌaa̱ nínga akjángá paa̱n, iskjinie, kó ta̱kó tsíchji̱a̱ ngaskande nga kisisie̱èn, sꞌe̱ kijí ngijee̱. 12Kó kui nda̱ xi tsꞌákangií, je tikón nga tsangínjo̱, kó kui ni xi kamaá achichí katsjangaꞌniú ngasee̱ kui xotaa̱.

Bi̱ tsꞌén jatjoni Pabloo̱ na̱xi̱ńdáꞌniú Troa̱ sꞌe̱ kijí na̱xi̱ńdáꞌniú Mileto̱

13Kó ji̱n tsangíntjónjne̱, kó ngo tjotso je tsanginyájne̱ ngaskande na̱xi̱ńdáꞌniú Asoo̱n nga tsangínchjaꞌájne̱ Pabloo̱, ngatꞌa̱ bo̱a̱ tsꞌén kisꞌinda nga kamámejeén nga ndi̱yà ndsa̱ko kijí. 14Kó ngije kasakojne̱ Pabloo̱ ki̱a̱ na̱xi̱ńdáꞌniú Asoo̱n, nijan tsanginyájne̱ ngo tjotso je, kó tsangínjne̱ na̱xi̱ńdáꞌniú Mitilene̱. 15Ngije jatjojne̱ kui ngi̱ndiee̱, nga kamángindyiojón ikitjajne̱ tꞌa tji̱ngi̱ xi ꞌmí Kío̱, sꞌe̱ ingo ni̱xtjin ngase kamájne̱ nga jáchójne̱ na̱xi̱ńdáꞌniú xí ꞌmí Samo̱, kó ngije kixindyionjne̱ na̱xi̱ńdáꞌniú Trojilio̱, ti̱ ingo ni̱xtjin kamá nginíjne̱ nga jáchójne̱ na̱xi̱ńdáꞌniú Mileto̱. 16Ngatꞌa̱ Pabloo̱ bo̱a̱ katsó nga tsiejín kꞌo̱ndíyaá nangi Asia̱, kó kamámejénjiín jaꞌa na̱xi̱ńdáꞌniú Éfeso̱, ngatꞌa̱ tsá kamámejeén nga kjo̱chó na̱xi̱ńdáꞌniú Jerusale̱n, ngatꞌa̱ tsi ka̱ma ki̱a̱ kjo̱a̱ꞌaa̱ ni̱xtjii̱n sꞌué Pentekostee̱.

Bi̱ tsꞌén tsíchji̱a̱jii̱n Pabloo̱ xota̱ xi xchaá na̱xi̱ńdáꞌniú Éfeso̱

17Nga kisꞌijña Pabloo̱ na̱xi̱ńdáꞌniú Mileto̱, tsíchji̱a̱a̱ xota̱ xi xchaá na̱ngo̱xi̱ xi chji̱a̱ni na̱xi̱ńdáꞌniú Éfeso̱. 18Kó ngije jachókoón kui xota̱ xi xchaá, bi̱ katsoó:

–Jè yàjnú kó tjítsꞌen an ngaskande koó nga tjón jéꞌe̱ an nangi Asia̱, 19nga kꞌi̱e̱ ni̱ma̱ tikónjinjnúꞌun nga tjítsꞌénsée̱n Ndi̱a̱ná, nga tsꞌénkjandá án nga tsꞌénchji̱a̱ an, nga tsꞌénfoaꞌajin an kjo̱a̱ni̱ma̱ kjo̱a̱tjó ta̱ngatꞌanii̱ ni xi mejeén sa̱ꞌínjo̱na xota̱ jundíoo̱. 20Ta̱nga jmíni̱xtjin ijñámasien an nga ini̱jmijnúꞌun nganda tsa̱jún, nga tsꞌénbokoyájnúꞌun ngindyi̱ko̱n xota̱ na̱xi̱ńdaá, ko̱jo nga tsꞌénfikónjnúꞌun ndiꞌajnú, 21kó xota̱ xi jundío̱ ko̱jo xota̱ xi jundío̱jín tsꞌénxiyàa̱ nga sa̱ꞌínkꞌoyà yojoo̱, kó sku̱i̱e̱ Néná kó nga sꞌijii̱n Ndi̱a̱ná Jesukristoo̱. 22Kó ngotꞌe̱ ꞌne̱ tsꞌénfí an na̱xi̱ńdáꞌniú Jerusale̱n, nínga tjítsꞌénna kjo̱a̱ꞌniú A̱si̱énni̱xtjii̱n Néná, kó nde bejín an mí ni xi ka̱mana ki̱a̱a̱, 23ta̱ ngototo nga A̱si̱énni̱xtjii̱n Néná tsꞌéntsóyàna nga ngayeje na̱xi̱ńdáꞌniú, ndo̱bo̱a̱yà si̱ꞌankjína, ko̱jo nga tsie kjo̱a̱ni̱ma̱ xi kjo̱a̱ꞌatio an. 24Ta̱nga an, jmí ndasénjínna yojona, ti̱nde jmí ni tsjakjiꞌi míꞌájáa̱n kjo̱a̱mindyioo̱n, ngatꞌa̱ tsjákjiꞌina ngaskande nga kjóchotꞌáa̱ xá xí sa̱ꞌinkjatjosón an xi katsjána Ndi̱a̱ná Kjisoo̱, nga xiyà an éntjatsi̱e̱e̱ tsi̱ꞌe̱ kjo̱a̱ndaa̱ Néná.

25Kó kuíni nga ngotꞌe̱ ꞌne̱ ꞌniú kixi̱ tikòn an nga nde ingojín jún, xi je ini̱jmìi̱ éntjatsi̱e̱e̱ nínga botixómá Néná xi sku̱i̱e̱ ngase kje̱n án. 26Kuíni nga ngotꞌe̱ ꞌne̱ xiyàjnúꞌun nga jmíjínna jé tsi xcha̱jàjnú, 27ngatꞌa̱ jè kasayajnúꞌun ngayeje ni xi mejeén sa̱ꞌín Néná, kó jmí ni iꞌmajínjnúꞌun. 28Kó bo̱a̱ tsꞌén nda chónjnú yojojnú, kó chónjnú ngayeje xota̱ na̱ngo̱xi̱i̱, nínga A̱si̱énni̱xtjii̱n Néná katsjájnú ngo xá nga stsitsíjenjnúu̱, tsi̱ꞌe̱ nga jún xi xchindàjnú xota̱ na̱ngo̱xi̱i̱ Ndi̱a̱ná, kui xi jiín ndí tsi̱ꞌe̱ íchjítjéni. 29Ngatꞌa̱ nga jè be an nga ngije kjuín án, kjo̱e̱ꞌe kje̱ꞌe xi xikó maá cho̱lobo̱ tamá nga ka̱mamejeén sa̱ꞌínkjié xota̱ na̱ngo̱xi̱i̱, 30kó ngaskande ti̱ juún tjín xí kjo̱tjojin xi ko̱kóyá kjo̱a̱ndiso, tsi̱ꞌe̱ nga xota̱ tsi̱ꞌe̱ Néná ki̱a̱ ko̱e̱je̱tji̱ngii̱. 31Kuíni nga ti̱ndyiondajnú, kó ti̱ꞌankjaꞌátsjienjnú nga ján nó kamána nga ni̱xtjin ko̱jo nga ni̱xtji̱e̱n nga askjandájo̱ májnúꞌun nga atixomájnúꞌun nga ngo nga ngojnú.

32Kó ngotꞌe̱ ꞌne̱, já ntsꞌie, míꞌátjée̱ Néná kjo̱a̱a̱ jún ko̱jo éntjatsi̱e̱e̱ kjo̱a̱ndaa̱ kui xi tjiín ngaꞌniú tsi̱ꞌe̱ nga ꞌniú ngase sꞌi̱jinjnú Néná, kó tsja̱ajnú jún ngayeje ni xi katsóyà nga tsja̱á xota̱ tsjiee̱.

33Jmí to̱ntiboa, ti̱nde jmí to̱nsinié, ti̱nde jmí ńjñoo̱ xotaa̱ kamámejénjínna, 34ta̱sá ti̱ juún kamáyàjnú nga ni xi kamáchjiénna ko̱jo xota̱ xi kisꞌińdojo̱na, ndsa̱ án xí katsꞌénxá nga kasakojne̱ kui nii̱. 35Ngatsjéni̱xtjin akoyájnúꞌun nga bo̱a̱ tsꞌén si̱ꞌanxá ko̱jo nga ko̱si̱ko̱jó xota̱ xi ni̱ma̱ tjimá, kó ti̱ꞌankjaꞌátsjienjnú kui én xí tsíchji̱a̱ Ndi̱a̱ná Kjisoo̱ xi bi̱ tsó: “Achichíra̱ tsjakjiꞌi ngase nga ñá ko̱e̱ꞌé, ta̱bo̱a̱jínnii̱ nga ñá ko̱e̱ꞌéná.”

36Jaskan ngije bo̱a̱ katsó nga tsíchji̱a̱ Pabloo̱ tji̱e̱nmá asiéntikoó, sꞌe̱ nijan tsíchji̱a̱a̱ Néná ko̱jo kui xotaa̱. 37Kó ngayeje kui xotaa̱ askjandá má nga janíkjá ko̱jo nga katsjaá ngo ndsó tꞌanijon Pabloo̱, 38achichí ndasen kisꞌińdo kui xotaa̱, ngatꞌa̱ bo̱a̱ katsoó Pabloo̱ nga ngiti̱ sku̱i̱e̱jínni. Sꞌe̱ nijan kijíjo̱ ngaskande tꞌa tjotso jee̱.

Currently Selected:

Ni xi kamá 20: MAIX

Highlight

Copy