Ni xi kamá 17

Bi̱ kamátaꞌin Pabloo̱ na̱xi̱ńdáꞌniú Tesalónika̱

1Kó ngije jaꞌa Pabloo̱ ko̱jo Silaa̱ na̱xi̱ńdáꞌniú xi ꞌmí Anfípoli̱ ko̱jo na̱xi̱ńdáꞌniú Apolonia̱, jachó na̱xi̱ńdáꞌniú Tesalónika̱, nínga xota̱ jundíoo̱ kisꞌijñaa̱ ngo ndiꞌa nínga ndokjo̱a̱ eén Néná. 2Kó Pabloo̱ xikótsꞌèn ngaá, nga xki̱ ni̱xtjin ndikón fí ndiꞌa nínga ndokjo̱a̱ eén Néná, ján ni̱xtjin ndikón kijí síkijí nínga askjotíjo̱ xota̱ jundíoo̱ xikó tsó xo̱jo̱n eén Néná, 3nínga katsóyaà kui xotaa̱ nga Kristoo̱ chjiéngá ta̱kó ko̱yà, kósꞌe̱ kjo̱a̱ꞌáꞌyá nginií ngi̱jii̱n xota̱ xi jesoón, kó bi̱ katsoó:

–Ti̱ kuíní Kjiso̱ xi tsꞌénꞌbini̱jmìjnúꞌun xi Kristoo̱.

4Kó tjín xota̱ jundío̱ xi kisꞌijii̱n, kó nijan kamájo̱ Pabloo̱ ko̱jo Silaa̱, kó ti̱ bo̱a̱ ti̱ tsꞌén kjín xota̱ ngriengo̱ xi kamábendikón Néná, ko̱jo achichí ínchjín xi ꞌniú ya kui ngi̱ndiee̱. 5Ta̱nga ta̱ngatꞌanii̱ kui ni xi kamaá, nga xota̱ jundío̱ xi sꞌijinjiín Néná achichí kamáchi̱ni̱, kó ítikó já xí chꞌokon maá yojoo̱ xi ta̱xà ꞌbítso̱maya ndi̱yàtié, tsi̱ꞌe̱ nga kisꞌie kjo̱a̱se ko̱jo kjo̱a̱chꞌokjiꞌi na̱xi̱ńdáꞌniuú, kó kui jaá tsꞌasꞌiennié ndiꞌaa̱ nda̱ xi ꞌmí Jasoo̱n nga tsangase Pabloo̱ ko̱jo Silaa̱, tsi̱ꞌe̱ nga kꞌo̱xié, ko̱jo sa̱ꞌínkꞌasꞌiee̱n xota̱ na̱xi̱ńdaá, 6ta̱nga nga kasakojiín Pabloo̱ ko̱jo Silaa̱ kui ngi̱ya ndiꞌaa̱, ta̱ kuí nda̱ xi ꞌmí Jasoo̱n ko̱jo ngi chiboa já ntsꞌie xi iskjifé iskjíńña nga kijíjo̱ ngindyi̱ko̱n xota̱xá xí chji̱a̱ni kui na̱xi̱ńdaá, kó bi̱ katsó kui jaá nga askjandáyà:

–¡Kuí já bí xi ndyi̱tsꞌènkjátsón ngayeje són nga̱sondiee̱, kó ti̱ je jeꞌe kꞌi̱e̱e̱ nga, 7kó kui nda̱ xi ꞌmí Jasoo̱n katsjandieè nga katsꞌénkꞌasꞌien ndiꞌaa̱! ¡Ngayeje kui jaá nga ndyi̱foaꞌatjé kjo̱a̱botíxomaa̱ nda̱ xtitjón xi ꞌmí Sesaa̱, ngatꞌa̱ bo̱a̱ ndyi̱tsó nga ndyi̱chji̱a̱, nga tikón xò ingo nda̱ re xi ꞌmí Kjiso̱!

8Kó nga tsintꞌié kuí nii̱ xota̱ na̱xi̱ńdaá ko̱jo jáxaá ꞌniú ngase kamákjaán, 9ta̱nga nda̱ xi ꞌmí Jasoo̱n, ko̱jo já xí ngasee̱ ngo to̱n íchjí xi íjñangi yojoo̱, kósꞌe̱ kiniꞌánkjíndé.

Bi̱ katsꞌén Pabloo̱ ko̱jo Silaa̱ na̱xi̱ńdáꞌniú Berea̱

10Kó ti̱ kjiꞌa, ngije kamájñoó, já ntsꞌie xi síndo kui na̱xi̱ńdáꞌniuú katsꞌénkjí Pabloo̱ ko̱jo Silaa̱ ki̱a̱ na̱xi̱ńdáꞌniú Berea̱, kó ngije jachó kui jaá, kijí ki̱a̱ ndiꞌa nínga chji̱a̱ eén Néná xota̱ jundíoo̱, 11kó kui xota̱ jundíoo̱ nda ngase xota̱ kamá ta̱bo̱a̱jínnii̱ xi síndo na̱xi̱ńdáꞌniú Tesalónika̱, ngatꞌa̱ achichí tsja kamaá nga tsintꞌieé eén Néná, kó ndyiojón ndyiojón iskjítꞌoyà xo̱jo̱n eén Néná kui já jundíoo̱, ta̱ tsi̱ꞌe̱ nga sku̱i̱e̱ tsi kjeén nga ja̱koxi̱ én xí tjíꞌmíyaà. 12Kó bo̱a̱ tsꞌén achichí kjín má kui xotaa̱ xi kisꞌijii̱n, kó ti̱ bo̱a̱ ti̱ tsꞌén kjín má xota̱ ngriengo̱ xi bo̱a̱ ti̱ tsꞌén kisꞌijii̱n nga, xi ínchjín ko̱jo xi xi̱ꞌin xi ꞌniú ya kui na̱xi̱ńdaá. 13Ta̱nga ngije kamábe xota̱ jundío̱ xi chji̱a̱ni na̱xi̱ńdáꞌniú Tesalónika̱ nga Pabloo̱ ko̱jo ki̱a̱ íni̱jmì eén Néná na̱xi̱ńdáꞌniú Berea̱, kijí kui nangi jàn, kó ti̱ bo̱a̱ ti̱ tsꞌén katsꞌénse ko̱jo indyiátsobeé xota̱ kjiín. 14Kuíni nga já ntsꞌie xi chji̱a̱ni kui ngi̱ndiee̱ tji̱e̱nmá katsóyaà Pabloo̱, tsi̱ꞌe̱ nga tsá ko̱e̱je̱ nínga tikóntꞌa ndáchíkoón, tji̱e̱nga Silaa̱ ko̱jo Timoo̱ ta̱kó kisꞌińdora na̱xi̱ńdáꞌniú Berea̱. 15Kó kui xota̱ xi nijan tsoꞌbájo̱ Pabloo̱ kijíjo̱ ngaskande na̱xi̱ńdáꞌniú Atena̱, ta̱nga Pabloo̱ katsjaákjo̱a̱ kui jaá nga ko̱e̱je̱ꞌoyá nginí na̱xi̱ńdáꞌniú Berea̱, kó nga ka̱tso̱yaa̱ Silaa̱ ko̱jo Timoo̱ nga tsá ko̱e̱je̱ na̱xi̱ńdáꞌniú Atena̱.

Bi̱ katsꞌén Pabloo̱ nga kisꞌijña na̱xi̱ńdáꞌniú Atena̱

16Tji̱e̱nga Pabloo̱ tsꞌénkoyaa̱ Silaa̱ ko̱jo Timoo̱ ki̱a̱ na̱xi̱ńdáꞌniú Atena̱, Pabloo̱ achichí kamáxtií ngatꞌa̱ kui xota̱ na̱xi̱ńdaá achichí a̱sie̱én ngo ne xi tsꞌénda xotaa̱ katsꞌéndikón. 17Kó kuíni nga askjotíjo̱ já jundíoo̱, ko̱jo kje̱ꞌe xota̱ xi bendikón Néná ki̱a̱ ndiꞌa nínga ndokjo̱a̱ eén Néná, kó bo̱a̱ tsꞌén ndyiojón ndyiojón fotí ki̱a̱ ndi̱tsen nínga matikó xota̱ na̱xi̱ńdaá. 18Kó tjín xota̱ xi kjínkón xi ꞌmí filósofo̱ xi iskjítꞌoyà ni xi akóyá já xí ꞌmí Epikúreo̱, ko̱jo xi iskjítꞌoyà ni xi akóyá já xí ꞌmí estoiko̱ xi ítsꞌi̱yanii̱ nga askjotíjo̱ Pabloo̱, kó tjín xí bi̱ katsó:

–Mí ni xi tsꞌénchji̱a̱ kui nda̱ xi tá se chji̱a̱a̱.

Kó kje̱ꞌe xi bi̱ katsó:

–Máraá tsi kui nda̱a̱ xi tsꞌénꞌbini̱jmì kjo̱a̱a̱ Ne xi tja̱tsi̱e̱.

Kui nii̱ xi katsó kui jaá ngatꞌa̱ nga Pabloo̱ íni̱jmì éntjatsi̱e̱e̱ Kjisoo̱, ko̱jo kjo̱a̱a̱ nga jaꞌáꞌyá nginií. 19Kó tsangínjo̱ Pabloo̱ nínga síndo jáxá xí ꞌniú nkꞌa xaá xi botixómaá na̱xi̱ńdáꞌniú Atena̱, kó bi̱ tsꞌén asíyá kui jaá:

–A ka̱ma xcha̱jne̱ mí ni tja̱tsi̱e̱ xi kjoéꞌe̱kakoyéjne̱. 20Ngatꞌa̱ ni tja̱tsi̱e̱ ko̱jo ni xi makjínjínjne̱ xí tindokjo̱e̱jejne̱, kó mejénjne̱ xcha̱jne̱ mí ni xi tsó kui nii̱.

21Ngatꞌa̱ ngayeje xota̱ xi chji̱a̱ni na̱xi̱ńdáꞌniú Atena̱, ko̱jo xota̱ xi ki̱a̱jín chji̱a̱ni, xi kisꞌińdo kui ngi̱ndiee̱, ta̱soboá ni tja̱tsi̱e̱ xi sꞌe̱ kjima xí kamámejeén tsintꞌié.

22Kó Pabloo̱ tji̱e̱nmá jastjíe̱n ngi̱jii̱n xota̱xá xí chji̱a̱ni na̱xi̱ńdáꞌniú Atena̱, kó bi̱ katsoó:

–Jún bo̱a̱ já xí chji̱a̱ni na̱xi̱ńdáꞌniú Atena̱, jè kamákjínna nga jún kjén nga ta̱ yandikónjnú ne xi síndojnú. 23Ngatꞌa̱ nga tsꞌénkotsijen an ngi̱ndiejnú nínga niꞌándikónjnú nejnú, tsꞌénbe an ngo ṉchandikón xi bi̱ tsó én xí kjitꞌaa̱: “Tsi̱ꞌe̱ ngo Ne xi nde yàjín.” Ja̱ ndakjíꞌí, kui ni xi yàjínjnú, kó ndyi̱niꞌándikónjnú, kjo̱a̱a̱ kuí boá kui ni xi kjoéꞌe̱kꞌini̱jmìjnúꞌun.

24Kui Ne xi katsꞌénda nga̱sondiee̱, ko̱jo ngayeje ni xi tjiín, kui xi Ndi̱a̱a̱ ndiꞌakꞌajmii̱ ko̱jo tꞌanangii̱, ki̱a̱jín tikón ngi̱ya ndiꞌa na̱ngo̱xi̱ xi katsꞌénda xotaa̱, 25ti̱nde tsja xotaa̱ chjiénjiín nga sa̱ꞌínseén, xikoó tsi ngo ni chjieén, ngatꞌa̱ kuí xí Néná xi tsjáná ngayeje kjo̱a̱mindyion, ko̱jo tjo̱ xi ndyi̱jnájén, ko̱jo ngayeje nii̱.

26Kó ta̱ ngo xota̱ xi ngo jín ngo yojo katsꞌénkjínni ngayeje xota̱ na̱xi̱ńdaá, tsi̱ꞌe̱ nga kꞌuíndo ngayeje són tꞌanangii̱, kó bo̱a̱ tsꞌén katsjaá chi̱bo̱a̱ mí ni̱xtjin, kó ñá ngi̱ndie nínga kꞌuíndo, 27tsi̱ꞌe̱ nga ko̱ngase Néná, kó tsi ta̱ꞌa sa̱ꞌínjo̱ nga sa̱ko̱ó, ndatsi nga ja̱koxi̱ nde kjinjín tikónná Néná nga ngo nga ngo ñá. 28Ngatꞌa̱ ta̱ngatꞌanií Néná nga tindyión, ko̱jo nga ndyi̱niꞌántíyá, ko̱jo xikó katsó xota̱ chji̱ni̱e̱jnú xi katsꞌéndaya eén, nga bi̱ katsó: “Ñá boá xi xota̱ tji̱e̱e̱ Néná.” 29Kó ja̱ kuíni tsi xota̱ tji̱e̱e̱ Néná ñá, ka̱májín bo̱a̱ tsꞌén si̱ꞌankjó nga Néná xikoó tsi ngo a̱si̱én xí to̱nsinié, xi to̱ntiboa, ko̱jo tsi ndi̱jo̱ xi xota̱ katsꞌénda xikótsꞌèn makjiín. 30Kuíni nga Néná katsꞌénjetakoón kje̱ꞌe ni̱xtjin ngayeje kjo̱a̱jñótokoó xotaa̱, ta̱nga ngotꞌe̱ ꞌne̱ ta̱jñà ngi̱ndiení tsꞌénbotixómáná tsi̱ꞌe̱ nga si̱ꞌankꞌoyá yojoná kó xcha̱ndikón kuí, 31ngatꞌa̱ nga Néná jè jaꞌájin ngo ni̱xtjin nga kixi̱ tsꞌén ko̱tíjeé xotaa̱ kui nga̱sondiee̱, kó jè jaꞌájin ngo nda̱ xi sa̱ꞌín kui nii̱, kó jè íjñá chi̱bo̱a̱ná ngayeje ñá, kjiꞌanga katsꞌénkjaꞌáꞌyaá ngi̱jii̱n xota̱ xi je jesoón.

32Kó nga tsintꞌié kuí xotaa̱ nga foaꞌáꞌyaá xota̱ xi fesoón, tjín xí tsajnókie Pabloo̱, kó kje̱ꞌe xí bi̱ katsó:

–Ta̱sá kje̱ꞌe ni̱xtjin ko̱nda̱ꞌyá nginí ji̱n kjo̱a̱a̱ ni xi tꞌísé ji.

33Kó bo̱a̱ tsꞌén Pabloo̱ jaꞌajin masien masiee̱n kui jaá. 34Ta̱nga tjín xí kisꞌijii̱n, kó kijítji̱ngii̱, ngi̱jii̱n kui jaá ki̱a̱ tsoꞌbá kui nda̱ xi ꞌmí Nisioo̱, ngo nda̱ xi ti̱ tjiín xá na̱xi̱ńdáꞌniú Atena̱, ko̱jo ngo xota̱chjo̱on xi ꞌmí na̱ Ndámari̱, ko̱jo kjín ngase xota̱.

Currently Selected:

Ni xi kamá 17: MAIX

Highlight

Copy