2 Samuee̱ 9
9
Ndabii̱ nda katsꞌénjo̱ Mefii̱-Bosee̱t,
1Ngo ndi̱yà Ndabii̱, bi̱ katsó nga asíyá: A tjín ngase xota̱ xi chji̱a̱ni Sauu̱l kꞌi̱e̱e̱, tsi̱ꞌe̱ nga nda sa̱ꞌinjo̱ an ta̱ngatꞌanii̱ nga tjó kamána Jonataa̱n.
2Kó ngo moso̱ xi ꞌmí Sibaa̱ xi chji̱a̱ni ndiꞌaa̱ Sauu̱l kisꞌijña ki̱a̱a̱, kó kandokjo̱a̱a̱ tsi̱ꞌe̱ nga ko̱e̱je̱ ngindyi̱ko̱n Ndabii̱, kó nda̱ ree̱, bi̱ katsoó: —A jí xí ꞌmií Sibaa̱.
Kó bi̱ katsó kui nda̱a̱:
—Mosòo̱ boá an.
3Kósꞌe̱ nda̱ ree̱, bi̱ katsoó Sibaa̱:
—A jmíjín ngase xota̱ xi chji̱a̱ni Sauu̱l xi ka̱mana ni̱ma̱takón sa̱ꞌinjo̱ an, xikoó kjo̱a̱ni̱ma̱takoón Néná.
Kó Sibaa̱, bi̱ katsoó nda̱ ree̱:
—Ta̱kó tikón ngase ingo ndií Jonataa̱n kui xi ni̱ma̱ nga jó seé.
4Kósꞌe̱ nda̱ ree̱, bi̱ katsó nga asíyaá:
—Ñá tikón kui nda̱a̱.
Kó Sibaa̱, bi̱ katsoó nda̱ ree̱:
—Ki̱a̱ tikón ki̱a̱ Londebaa̱r, ki̱a̱ ndiꞌaa̱ Makii̱r ndií Amiee̱l.
5Kósꞌe̱ nda̱ re Ndabii̱ katsangiyakjaꞌání ki̱a̱ ndiꞌaa̱ Makii̱r ndií Amiee̱l xi chji̱a̱ni Londebaa̱r. 6Kó Mefii̱-Bosee̱t, ndií Jonataa̱n, ndíndeè Sauu̱l jachó ngindyi̱ko̱n Ndabii̱, kó asiéntikoó ngaskande nga kisitꞌaa̱ kje̱n tꞌanangii̱ nga kamábendikón. Kó Ndabii̱, bi̱ katsoó:
—A jí boá xi Mefii̱-Bosee̱t ji.
Kó bi̱ katsó kui nda̱a̱:
—Jo̱o̱n, kꞌi̱e̱ tikòn mosòo̱ kꞌi̱e̱e̱.
7Kósꞌe̱ Ndabii̱, bi̱ katsoó:
—Ngata̱ ndakinjín má ji, ngatꞌa̱ nga ja̱koxi̱ kꞌuiéna kjo̱a̱ni̱ma̱takón kjo̱a̱a̱ ji, ta̱ngatꞌanii̱ nga achichí tjó kamána na̱ꞌmíi̱ Jonataa̱n, kó tsja ngiñaá ngayeje tꞌanangi xi tsi̱ꞌe̱ Sauu̱l kui xi tsi̱ꞌe̱ na̱ꞌmindyiboáa kamá, kó ji, ngatsjéni̱xtjin nga kꞌi̱e̱ ku̱i̱ndyintꞌe ji yámíxa̱na nga xi̱ni̱ ji nichinie.
8Kó Mefii̱-Bosee̱t asiéntikoó, kó bi̱ katsó:
—ꞌYá nda̱a̱ bo̱a̱ kui mosòo̱, nga ji titsitsijìn kóo̱n xi xikoó tsi ngo ńñá xi je kꞌien boá.
9Kósꞌe̱ nda̱ ree̱ tsíchji̱a̱a̱ Sibaa̱, kui xi kamá mosoo̱ Sauu̱l, kó bi̱ katsoó:
—Ngayeje ni xi tsi̱ꞌe̱ Sauu̱l ko̱jo xota̱ ndiꞌaa̱ kamá, án boá xi je tjítsꞌenkꞌasꞌièe̱n ndií ndi̱a̱ tse̱. 10Jí, ko̱jo ndíi̱, ko̱jo mosòo̱ boá xi sa̱ꞌínxájin kui tꞌanangii̱, kó jí boá xi si̱ꞌinkꞌasꞌíi̱n ndií ndi̱a̱ tse̱ tsi̱ꞌe̱ nga kꞌuieé nichinie, ndatsi Mefii̱-Bosee̱t, ndií ndi̱a̱ tse̱, ngatsjéni̱xtjin nga ki̱a̱ kꞌuijñátꞌa yámíxa̱na nga skji̱ni̱e̱ nichinie.
Sibaa̱ tjiꞌún ndí kisꞌiee̱, ko̱jo kan moso̱. 11Kó Sibaa̱, bi̱ katsoó nda̱ ree̱:
—Ngayeje ni xi ndi̱a̱na kui xi nda̱ ree̱ je atíxomaa̱ kui mosoo̱ nga sa̱ꞌín, bo̱a̱ tsꞌén sa̱ꞌinkjatjosón kui mosoo̱. Kó Mefii̱-Bosee̱t, ki̱a̱ skji̱ni̱e̱ nichinie tꞌa yámíxa̱a̱ nda̱ ree̱, xikoó tsi ngo ndií kamá. 12Kó Mefii̱-Bosee̱t kisꞌiee̱ ngo ndí xí kjindí xi Mikayiaa̱ kiꞌmí. Kó ngayeje xota̱ xi kisꞌińdo ndiꞌaa̱ Sibaa̱, mosoo̱ Mefii̱-Bosee̱t boá. 13Kó Mefii̱-Bosee̱t kui xi ni̱ma̱ kamá nga jó seé, ki̱a̱ kisꞌijña na̱xi̱ńdáꞌniú Jerusale̱n, ngatꞌa̱ ngatsjéni̱xtjin nga ki̱a̱ iskjinie nichinie, ki̱a̱ yámíxa̱a̱ ndiꞌaa̱ nda̱ ree̱.
Currently Selected:
2 Samuee̱ 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
