2 Samuee̱ 8
8
Kje̱ꞌe ngase kjo̱a̱xchán nínga katsꞌén Ndabii̱
(1Kr 18:1-13)
1Jaskan ngije kamá kui nii̱, Ndabii̱ katsꞌeén nga askjanjo̱ xota̱ Filisteaa̱, kó katsꞌéntsi̱ꞌe̱ na̱xi̱ńdáꞌniú Metee̱j-Amaa̱ xi kisꞌijña ngi̱ya tsja xota̱ Filisteaa̱. 2Ti̱ katsꞌeén nga askjanjo̱ xota̱ tji̱e̱e̱ Moaa̱b nga, kó ngo ńchjón tsꞌenchi̱bo̱a̱ni nga yíyojo tꞌanangi, kó jó ńchjón katsꞌénkjién nga tsꞌenchi̱bo̱a̱ni tsi̱ꞌe̱ nga sa̱ꞌínkꞌién, sꞌe̱ ngo ńchjón katsꞌénkjién nga tsꞌenchi̱bo̱a̱ni tsi̱ꞌe̱ nga jmí ni si̱ꞌanjo̱jín. Kó bo̱a̱ tsꞌén nga xota̱ tji̱e̱e̱ Moaa̱b, mosoo̱ Ndabii̱ kamá, kó íchjí to̱n xi machjítjéni ni.
3Kó Ndabii̱ ti̱ katsꞌeén nga askjanjo̱ Andaa̱nd-Esee̱r, ndií Rejoo̱b, nda̱ ree̱ nangi Sobaa̱, kjiꞌanga kijí xtji̱e̱e̱n nínga ꞌbosꞌien tsꞌueé ndejèꞌ Éufratee̱, tsi̱ꞌe̱ nga ꞌniú ku̱i̱ꞌíjñá nangi nínga botixómá katsaki. 4Kó Ndabii̱ katsoboá ngo mi̱ yito úchán jájún xi síndosoón ndi̱je̱, ko̱jo kan mi̱ jájún xi fí yise, kó ti̱ iskjítꞌó sé ndi̱je̱ xi chji̱a̱ni na̱xi̱ńdáꞌniú Tiro̱, kó ta̱kuítsí ndi̱je̱ xi kjien úchán karro̱ kjo̱a̱xcha̱án xí índora.
5Kó kjiꞌanga xota̱ Siria̱ xi chji̱a̱ni na̱xi̱ńdáꞌniú Ndamasko̱ jachó tsi̱ꞌe̱ nga ko̱síko̱jo Andaa̱nd-Esee̱r, nda̱ re xi chji̱a̱ni nangi Sobaa̱, Ndabii̱ katsꞌénkꞌién kan jó mi̱ jáxíꞌín xi chji̱a̱ni xota̱ Siriaa̱. 6Kó Ndabii̱ índo jájún xi askondá nangi Siria̱ xi chji̱a̱ni na̱xi̱ńdáꞌniú Ndamasko̱, kó xota̱ Siriaa̱, mosoo̱ Ndabii̱ kamá, kó íchjí to̱n xi machjítjéni ni. Kó ta̱ nínga kijí Ndabii̱ nga Néná katsjaá nga kui xi katsꞌén kjo̱a̱xcha̱án.
7Kó Ndabii̱ iskjíbé ni xi ꞌbíchjánii̱ ni xi ndajín xi to̱nsinié xi yaꞌa já mosoo̱ Andaa̱nd-Esee̱r, kó na̱xi̱ńdáꞌniú Jerusale̱n kijíjo̱. 8Kó ki̱a̱ Betaa̱ ko̱jo Berotaii̱, kui na̱xi̱ńdáꞌniú xí tsi̱ꞌe̱ Andaa̱nd-Esee̱r, nda̱ re Ndabii̱ achichí ki̱cha̱ bronse̱ iskjíbéní kui ngi̱ndiee̱.
9Kósꞌe̱ nga tsintꞌié Toii̱, nda̱ ree̱ nangi Amaa̱t nga Ndabii̱ je katsꞌeén ngayeje jájuún nda̱ re Andaa̱nd-Esee̱r, 10katsangiya ndií Toii̱ kui xi ꞌmí Joraa̱n nínga tikón nda̱ re Ndabii̱, tsi̱ꞌe̱ nga sa̱ꞌíntinde ko̱jo nga sa̱ꞌíntsjaa̱ kjo̱a̱a̱ nga katsꞌeén Andaa̱nd-Esee̱r, ngatꞌa̱ Toii̱ kondraa̱ Andaa̱nd-Esee̱r kamá. Kó Joraa̱n tsaꞌa ni to̱ntiboa, ko̱jo ni to̱nsinié, ko̱jo ni xi ki̱cha̱ bronse̱ kamándani, 11kó nda̱ re Ndabii̱, Néná katsꞌénkꞌasꞌiee̱n kuí nii̱, ko̱jo ni to̱nsinié ko̱jo ni to̱ntiboa xi jaꞌáxiín ngayeje xota̱ na̱xi̱ńdá xí katsꞌeén nga askjanjo̱, 12xi chji̱a̱ni xota̱ Araa̱n, ko̱jo xota̱ Moaa̱b, ko̱jo xota̱ amonitaa̱, ko̱jo xota̱ Filisteaa̱, ko̱jo xota̱ Amalee̱k, ko̱jo ni xi katsꞌeén nga askjanjo̱ xota̱ Andaa̱nd-Esee̱r ndií Rejoo̱b, nda̱ ree̱ nangi Sobaa̱.
13Kó bo̱a̱ tsꞌén nga Ndabii̱ ꞌniú kamáyàndikón ngase jaꞌeén, kjiꞌanga jeꞌeꞌoyá nginí ngije katsꞌeén nga askjanjo̱ tjiꞌún ján mi̱ xota̱ Siria̱ ki̱a̱ Nangi Soón Na̱xa̱a̱. 14Kó índo jájún xi konda ki̱a̱ ngayeje nangi Endoo̱n, kó ngayeje xota̱ tji̱e̱e̱ Endoo̱n xi mosoo̱ Ndabii̱ kamá.
Kó ta̱ nínga kijí Ndabii̱ nga Néná katsjaá nga kui xi katsꞌén kjo̱a̱xcha̱án. 15Kó Ndabii̱ atíxomaa̱ ngayeje na̱xi̱ńdá Israee̱l, kó ni xi kixi̱ ko̱jo ni xi kjo̱a̱kixi̱ katsꞌénjo̱ ngayeje xota̱ na̱xi̱ńdaá.
Xota̱ xi asíko̱jo Ndabii̱
(2Sa 20:23-26; 1Kr 18:15-17)
16Joaa̱b ndií Sarbiaa̱ kamá ngito̱ko̱o̱ jájuún,
kó Josafaa̱t ndií Ailuu̱nd kamá nda̱ xi katsꞌénda xo̱jo̱o̱n,
17kó Sandoo̱k ndií Aitoo̱b,
ko̱jo Aimelee̱k ndií Abiataa̱r kamá chináꞌmii̱,
kó Seraiyaa̱ kamá nda̱ chji̱ni̱e̱xo̱jo̱o̱n,
18kó Benaiyaa̱ ndií Joyandaa̱, kuí boá xi kamá ngito̱ko̱o̱ xota̱ sereteoo̱, ko̱jo xota̱ peleteoo̱,
kó ndií Ndabii̱, kuí boá xi já ngito̱ko̱ kamá.
Currently Selected:
2 Samuee̱ 8: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
