2 Samuee̱ 10
10
Anuu̱n katsꞌénkjaꞌa kjo̱a̱soboá Ndabii̱
(1Kr 19:1-19)
1Jaskan ngije kamá kui nii̱, kꞌien nda̱ re xi chji̱a̱ni xota̱ amonitaa̱, kó Anuu̱n ndií kui nda̱a̱ kisꞌijña ngajoo̱. 2Kósꞌe̱ bi̱ katsó Ndabii̱: Kꞌuiéná kjo̱a̱ni̱ma̱takón kjo̱a̱a̱ Anuu̱n ndií Najaa̱, xikótsꞌèn na̱ꞌmii̱ kui nda̱a̱ nda katsꞌénjo̱na.
Kó Ndabii̱ katsangiya mosoo̱ tsi̱ꞌe̱ nga kijítsꞌéndajoón Anuu̱n kjo̱a̱a̱ nga kꞌien na̱ꞌmii̱. Ta̱nga já mosoo̱ Ndabii̱ ki̱a̱ jachó nangi nínga síndo xota̱ amonitaa̱, 3kó xota̱ ngito̱ko̱o̱ xota̱ amonitaa̱, bi̱ katsoó Anuu̱n, kui xi ndi̱a̱a̱:
—A beriítakín nga Ndabii̱ tsꞌénbendikón na̱ꞌmíi̱ ngatꞌa̱ katsangiyaa xota̱ xi ndyi̱tsꞌéndajoón. A mí tsí Ndabii̱ katsangiya mosoo̱ tsi̱ꞌe̱ nga skotsíjee̱n kui na̱xi̱ńdáꞌniuú, kó sa̱ꞌíntsi̱ꞌe̱.
4Kósꞌe̱ Anuu̱n katsoboá já mosoo̱ Ndabii̱, kó íjoón masien tsja̱ngiꞌboa, sꞌe̱ tsatie ńjñoo̱ ngaskande tjatsꞌen, kósꞌe̱ katsꞌénkjí ngijee̱.
5Kó nga kiꞌmíyaà Ndabii̱ kui nii̱, katsangiyakjaꞌá kuí jaá, ngatꞌa̱ achichí soboá kamaá, kó nda̱ ree̱, bi̱ katsoó kui jaá: Ki̱a̱ ti̱ndyionrajnú ki̱a̱ na̱xi̱ńdáꞌniú Jerikoo̱, ngaskande nga xtjónginíjnú tsja̱ngiꞌboa, sꞌe̱ jaskan ndibá nginíjnú ngijee̱.
Ndabii̱ katsꞌeén xota̱ amonitaa̱
6Kó nga kamákjiín xota̱ amonitaa̱ nga chꞌo kamaá Ndabii̱, íchjií xota̱ Siria̱ xi chji̱a̱ni Bee̱t-Rejoo̱b, ko̱jo xota̱ Siria̱ xi chji̱a̱ni Sobaa̱, kó kan mi̱ kamá jáxíꞌín xi tjimá yise, ko̱jo ngo mi̱ jáxíꞌín xi chji̱a̱ni nda̱ ree̱ nangi Maakaa̱, ko̱jo tiejó mi̱ jáxíꞌín xi chji̱a̱ni Is-Too̱b kamá ngayejee̱.
7Kó kjiꞌanga Ndabii̱ tsintꞌié kuí nii̱, katsangiya Joaa̱b ko̱jo ngayeje jájún xi ꞌniú chꞌokoo̱n. 8Kó xota̱ amonitaa̱ jatjo nga kijíkatsijee̱n kui kjo̱a̱xcha̱án ki̱a̱ nga̱ntjo̱a̱a̱ na̱xi̱ńdáꞌniuú, kó xota̱ Siria̱ xi chji̱a̱ni Sobaa̱, ko̱jo xi chji̱a̱ni Rejoo̱b, ko̱jo xi chji̱a̱ni Is-Too̱b, ko̱jo xi chji̱a̱ni Maakaa̱, xín kisꞌińdo ki̱a̱ ngi̱jin kꞌijñaá. 9Nga kamábe Joaa̱b nga je jachótꞌaa̱ kui kjo̱a̱xcha̱án xtji̱e̱e̱n kje̱n ko̱jo xtji̱e̱e̱n nga̱xto̱n, jaꞌájin já xí chꞌokon ngase xi chji̱a̱ni Israee̱l, kó índonda tsi̱ꞌe̱ nga skjánjo̱ xota̱ Siriaa̱. 10Kósꞌe̱ katsꞌénkꞌasꞌien jájún xi ngasee̱ ngi̱ya tsja nda̱ xi ꞌmí Abisai̱ ntsꞌi̱e̱, kó índonda tsi̱ꞌe̱ nga skjánjo̱ xota̱ amonitaa̱, 11kó bi̱ katsoó:
Tsi xota̱ Siriaa̱ ꞌniú ngase ta̱bo̱a̱jiín án, ji ko̱si̱ke̱jení, ta̱nga tsi xota̱ amonitaa̱ ꞌniú ngase ta̱bo̱a̱jiín ji, an kosiko̱joo. 12Ti̱ꞌingaꞌní jí, kó chꞌokon si̱ꞌan yojoná ta̱ngatꞌanii̱ nga tjóná nangíná, ko̱jo ta̱ngatꞌanii̱ na̱xi̱ńdáꞌniuú Néná, kó Néná ngatsꞌén ni xi nda ngindyi̱ko̱n kui.
13Kó Joaa̱b ko̱jo xota̱ na̱xi̱ńdá xí nijan síndojo̱, kijíkjánjo̱ xota̱ Siriaa̱, kó kui xotaa̱ tsanga ngindyi̱ko̱n Joaa̱b. 14Kó nga kamábe xota̱ amonitaa̱ nga je ndyi̱monga xota̱ Siriaa̱, ti̱ tsanga ndatsa kui nga ngindyi̱ko̱n Abisaii̱, kó ki̱a̱ tsꞌasꞌien ki̱a̱ na̱xi̱ńdáꞌniuú. Kósꞌe̱ Joaa̱b ti̱ kijí nginí nga kijíkjánjo̱ xota̱ amonitaa̱, sꞌe̱ kijí na̱xi̱ńdáꞌniú Jerusalee̱n.
Ndabii̱ katsꞌeén xota̱ Araa̱n
15Ta̱nga kjiꞌanga xota̱ Siriaa̱ kamábe nga je tjichájá ngindyi̱ko̱n xota̱ Israee̱l, kamátikó nginí, 16Kó Andaa̱nd-Esee̱r katsangiyakjaꞌájo̱ xota̱ Siria̱ xi síndo xi ingoboaá ndejeèꞌ, kó jachó nangi Elaa̱n nga kijítjoón Sobaa̱k, nda̱ ngito̱ko̱o̱ jájuún Andaa̱nd-Esee̱r.
17Nga kui nii̱ kiꞌmíyaà Ndabii̱, ítikó ngayeje xota̱ Israee̱l, jaꞌatio ndejèꞌ Jorndaa̱n, sꞌe̱ jachó nangi Elaa̱n, kó xota̱ Siriaa̱ kisꞌińdonda tsi̱ꞌe̱ nga skjánjo̱ Ndabii̱, kó askjanjo̱ kui. 18Ta̱nga xota̱ Siriaa̱ tsanga ngindyi̱ko̱n xota̱ Israee̱l, kó Ndabii̱ katsꞌénkꞌién yichán mi̱ jájún ndi̱je̱ xi síndoyá yito úchán karro̱ kjo̱a̱xchán, kó ti̱ katsꞌénꞌoón Sobaa̱k, kui xi nda̱ ngito̱ko̱o̱ jájuún, kó ki̱a̱ kꞌien.
19Kó kjiꞌanga ngayeje já re xi tsꞌenkꞌásꞌieén to̱n xi machjítjéni ni Andaa̱nd-Esee̱r kamábe nga je kiniꞌánchaja ki̱a̱ ngindyi̱ko̱n xota̱ Israee̱l, índajo̱ kjo̱a̱xió xota̱ Israee̱l, kó mosoo̱ kui jaá kamá. Kó xota̱ Siriaa̱ katsakjónní nga ti̱ ko̱síko̱jo nginí xota̱ amonitaa̱.
Currently Selected:
2 Samuee̱ 10: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
