2 Samuee̱ 7
7
Ni xi índajo̱ Néná Ndabii̱
(1Kr 17:1-27)
1Kó ngo ndi̱yà nga je kisꞌijña nda̱ ree̱ ndiꞌaa̱, ngije Néná katsjaá kjo̱a̱xió kjo̱a̱a̱ ngayeje kondra̱ xi kisꞌińdo nga ngo foaꞌatjiyajoo̱n, 2nda̱ ree̱, bi̱ katsoó nda̱chji̱ni̱e̱ꞌén Nataa̱n:
—Tsitsíjin ngotꞌe̱ ꞌne̱, nga ndiꞌa yákón boá nínga tikón an, kó koxa̱a̱ kjo̱a̱ꞌbíndaa̱ Néná ki̱a̱ tikón ngi̱jii̱n ńjño kortinaa̱.
3Kó Nataa̱n, bi̱ katsoó nda̱ ree̱:
—Ja̱ tꞌen ji, kó ti̱ꞌin ji ngayeje ni xi tjíjin ini̱màa̱, ngatꞌa̱ Néná ki̱a̱ tikónjoo̱ ji.
4Kó kui ni̱xtji̱e̱e̱n, Néná tsíchji̱a̱jo Nataa̱n, nga bi̱ katsoó:
5—Tꞌen ji, kó bi̱ tꞌíi̱n moso̱na Ndabii̱: Bi̱ tsó Néná: A jí xí si̱ꞌindení ngo ndiꞌa nínga kotíjña̱ an. 6Ngatꞌa̱ kji̱e̱ ngo ndiꞌa botíjña an ndeskande ni̱xtjin nga tsꞌaxié an xota̱ Israee̱l ki̱a̱ nangi Ejiptoo̱, ngaskande ngotꞌe̱, ta̱soboá ndiꞌańjño ko̱jo ndiꞌandikón boá nínga tikòn an. 7Ngayeje ngi̱ndie tikón an, nínga kistsoꞌbájo̱ an ngayeje xota̱ Israee̱l, kó a jè tsíchji̱a̱jo an ngo xtín xota̱ xi chji̱a̱ni Israee̱l, kui xi askoo̱n xota̱ na̱xi̱ńdána nga bi̱ kixiáa̱n: Ánní nga niꞌíndejínní ngo ndiꞌa xi yákón.
8Ngotꞌe̱ ꞌne̱, bi̱ tꞌíi̱n moso̱na Ndabii̱: Bi̱ tsó Néná xí tsi̱ꞌe̱ jájuún: Án boá xi tsꞌaxieé ki̱a̱ nchꞌoaá, kó jaꞌaxiín tsi̱ꞌe̱ nga ngiti̱ ki̱a̱jín ku̱i̱ṉtje̱tji̱ngìi̱ cho̱tsa̱nga̱a̱, kó nga ta̱sá ji xi ka̱ma ji ngito̱ko̱o̱ xota̱ na̱xi̱ńdána Israee̱l, 9kó an ki̱a̱ tikónjoo̱ ngayeje ngi̱ndie nínga kisꞌińtje̱ ji, kó ngindyikin ji katsꞌenkjié an ngayeje kondra̱ tse̱, kó án boá xi sa̱ꞌiin ngo nda̱ xi nda, xikoó jaꞌén xí tjiín xota̱ xi ꞌniú nkꞌa xi tjín kuí nga̱sondiee̱.
10Kó ti̱ bo̱a̱ ti̱ tsꞌén án je íjñanda an ngo ngi̱ndie tsi̱ꞌe̱ xota̱ na̱xi̱ńdána Israee̱l, kó je ijñá an kui ngi̱ndiee̱ tsi̱ꞌe̱ nga ki̱a̱ kꞌuíndo, kó nga jmíjín xi sa̱ꞌíntíyaá, ti̱nde xota̱ xi ꞌniú ndajiín, ngiti̱ bo̱a̱jín tsꞌén ndajín sa̱ꞌínjo̱, xikó katsꞌén nga tjón tjón, 11xikoó ndeskande ni̱xtjin nga indo an nendiꞌamasien xi ko̱tíxomaa̱ xota̱ na̱xi̱ńdána Israee̱l, kó ji tsjaa nga si̱ꞌinkjaꞌyé ji kjo̱a̱a̱ ngayeje kondra̱ tse̱. Kó ti̱ Néná boá xi tsꞌéntsóyaà nga kuí boá xi sa̱ꞌíndaa̱ ngo ndiꞌa nínga ku̱i̱ndyin ji.
12Kó ngije jatjosón ni̱xtjìi̱n, ngije ko̱yè jí nga kꞌuin jí nínga síndo xi xcháa̱, kósꞌe̱ kjiꞌá boá nga an sa̱ꞌinkjastjíe̱n ngo xota̱ tji̱e̱ tse̱ xi kjo̱tjojinni ngi̱jin yojòo̱, kó án boá xi ꞌniú kꞌuijñá an ngi̱ndie nínga botíxome. 13Kuí boá xi sa̱ꞌínda ngo ndiꞌa tsi̱ꞌe̱ jaꞌénna, kó án boá xi ꞌniú kꞌuijñá an ngi̱ndie nínga botixómá, ngatsjéni̱xtjin. 14Án boá xi na̱ꞌmii̱ kui ka̱ma an, kó kuí boá xi ndína ka̱ma kui. Ta̱nga tsi ndajín sa̱ꞌín, án boá xi sa̱ꞌinchji̱ni̱e̱ an, xikó tsꞌén niꞌánjeé ngo xota̱, kó koꞌon an, xikó tsꞌén moꞌon ndií ngo xota̱ kjiꞌanga ndajín tsꞌén. 15Ta̱nga jmíni̱xtjin kjoaꞌaxíi̱n kjo̱a̱ni̱ma̱takónna, xikótsꞌèn jaꞌáxíi̱n Sauu̱l, kui xi jaꞌaxín an ngindyikin ji.
16Kó ndiꞌàa̱ ko̱jo ngi̱ndie nínga ko̱ti̱xome ji ngatsjéni̱xtjin nga ꞌniú kꞌuijñá ngindyikin ji, kó ngi̱ndie nínga ko̱ti̱xome ji ngatsjéni̱xtjin nga kꞌuijñá.
17Xikó tsó ngayeje kui eén, ko̱jo kui ni xi akakoo̱, bo̱a̱ tsꞌén tsíchji̱a̱jo Nataa̱n kui Ndabii̱.
18Kósꞌe̱ nda̱ re Ndabii̱ ki̱a̱ kisꞌijña ngindyi̱ko̱n Néná, kó bi̱ katsó: Ji Ndi̱a̱, ji xi Néna ji. ꞌYání an, kó mí ni bo̱a̱ ndiꞌana nga ngaskande kꞌi̱e̱e̱ jéꞌe̱jèní. 19Kó xikoó tsi chiboa kamá kui nii̱ ngindyikin ji, ji Ndi̱a̱, ti̱ nda kandokjo̱e̱je ji kjo̱a̱a̱ ndiꞌaa̱ kui mosòo̱ kjo̱a̱a̱ ni xi jaskan ka̱ma. Ji Ndi̱a̱ jmíjín ingo xi bo̱a̱ kjiꞌi ni xi tsꞌén xikoó jí. 20Kó mí ni xi ka̱ma ka̱tso̱ ngasee̱ Ndabii̱ nga ku̱i̱chji̱a̱joo ji. Ji Ndi̱a̱, jè yé ji kui mosòo̱.
21Xikó kase ji, kó xikótsꞌèn mejeén ini̱màa̱ bo̱a̱ kjiꞌi ngayeje ni yiꞌi xi kiniꞌín ji, tsi̱ꞌe̱ nga akakèe̱ kui nii̱ mosòo̱. 22Kuíni nga, achichí kjo̱a̱je tjiín ji Ndi̱a̱, ji xi Néna ji, jmíjín ingo xi xikoó jí, ti̱nde jmíjín ingo Ne xi xikoó jí, xikó kjiꞌi ngayeje ni xi je tji̱bo̱a̱nijonjne̱ má xi je tsintꞌié. 23Kó a tjín ingo na̱xi̱ńdá kuí tꞌanangii̱ xi xikoó xota̱ na̱xi̱ńdáa̱ Israee̱l, kui xi Néná boá xi tsꞌaxiéꞌá tsi̱ꞌe̱ nga kui tsi̱ꞌe̱ ka̱ma, ko̱jo nga kuí boá xi katsjaá jaꞌeén, ko̱jo nga achichí ni xi yiꞌi ko̱jo ni xi ndikón katsꞌén, nga tsangatji̱ngii̱ xota̱ na̱xi̱ńdaá ko̱jo ne xi tsꞌéndíkón, kui xota̱ na̱xi̱ńdá xí kaꞌnaxié ji ki̱a̱ nangi Ejiptoo̱. 24Kó jí boá xi ikꞌíjñí ji nga xota̱ na̱xi̱ńdáa̱ Israee̱l, nga kui xi ka̱ma xota̱ na̱xi̱ńdáa̱ ngatsjéni̱xtjin, kó ji Ne, jí boá xi Nee̱ kui xotaa̱ kamá ji.
25Kó ngotꞌe̱ ꞌne̱, ji Ndi̱a̱, ji xi Néna ji, ngatsjéni̱xtjin bo̱a̱ ngatama xikó tsó én xí kandokjo̱e̱ ji kjo̱a̱a̱ mosòo̱ ko̱jo kjo̱a̱a̱ xota̱ ndiꞌaa̱, kó ti̱ꞌin ji xikó kase ji. 26Ngatamachikonñé jaꞌée̱n ngatsjéni̱xtjin, kó bi̱ nga tsó xotaa̱: Néná xí tsi̱ꞌe̱ jájuún, kuí boá xi Nee̱ xota̱ Israee̱l, kó ngatsjéni̱xtjin nga ꞌniú ngatꞌíjñá ndiꞌaa̱ nda̱ mosòo̱ Ndabii̱ ngindyikin ji.
27Ngatꞌa̱ ji Ne xi tsi̱ꞌe̱ jájuún, Nee̱ xota̱ Israee̱l, jí xí bi̱ kasée̱ mosòo̱: Án boá xí sa̱ꞌinda an ndiꞌáa̱. Kuíni nga kui mosòo̱, nda kasasiee̱n ini̱ma̱a̱ nga bi̱ kjiꞌi ni xi tsíchji̱a̱ ngindyikin ji. 28Ngotꞌe̱ ꞌne̱, ji Ndi̱a̱, jí boá xi Ne ji, kó ja̱koxi̱ boá ée̱n, kó jí boá xi kandokjo̱e̱je ji kui kjo̱a̱ndaa̱ kui mosòo̱. 29Ngotꞌe̱ ꞌne̱, ti̱ꞌinchikonñí ji xota̱ ndiꞌaa̱ kui mosòo̱, tsi̱ꞌe̱ nga ngatsjéni̱xtjin nga kꞌuijñá ngindyikin ji, ngatꞌa̱ ji Ndi̱a̱, jí boá xi kandokjo̱e̱ ji ko̱jo kiniꞌínchikonñí ji ngatsjéni̱xtjin xota̱ ndiꞌaa̱ kui mosòo̱.
Currently Selected:
2 Samuee̱ 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
