2 Samuee̱ 6
6
Nga kisꞌijña koxa̱a̱ kjo̱a̱ꞌbíndaa̱ Néná ki̱a̱ na̱xi̱ńdáꞌniú Jerusale̱n
(1Kr 13:5-14)
1Kó Ndabii̱ ti̱ ítikó nginí ngayeje xota̱ xi jaꞌájin ki̱a̱ na̱xi̱ńdá Israee̱l, kantié mi̱ kamá kui xotaa̱. 2Kó jastjíe̱n Ndabii̱, sꞌe̱ jatjoni nga kijí Baalaa̱ ngi̱ndie xi chji̱a̱ni nangi Jundáa̱, kó kijíjo̱ ngayeje xota̱ xi tsoꞌbájo̱, tsi̱ꞌe̱ nga ki̱a̱ ko̱e̱je̱nijíngijo̱ kui ngi̱ndiee̱ koxa̱a̱ kjo̱a̱ꞌbíndaa̱ Néná, kui xi kiniꞌánkjién nga kandokjo̱a̱a̱ Néná xí tsi̱ꞌe̱ jájuún, kui xi tikón ngi̱jii̱n keruu̱b.
3Kó ngo karro̱ kjo̱a̱xchán xí tja̱tsi̱e̱ íjñaya koxa̱a̱ kjo̱a̱ꞌbíndaa̱ Néná, kó ki̱a̱ kachjábéní ki̱a̱ ndiꞌaa̱ Abinandaa̱b, kui xi tikón ki̱a̱ nínga tji̱ngi̱i̱, kó Usaa̱ ko̱jo Ayíoo̱, nga jó ndií Abinandaa̱b katsꞌénxájo̱ kui karro̱ kjo̱a̱xcha̱án. 4Kó ki̱a̱ tsꞌaxiéni koxa̱a̱ kjo̱a̱ꞌbíndaa̱ Néná ki̱a̱ ndiꞌaa̱ Aminandaa̱b, kui xi tikón ki̱a̱ nínga tji̱ngi̱i̱, kó Ayíoo̱ kijítjoón kui koxa̱a̱. 5Kó Ndabii̱ ko̱jo ngayeje xota̱ Israee̱l nga kijí ngindyi̱ko̱n Néná, achichí tsjá kamaá nga katsꞌénkjanie ngayeje to̱ko̱ya ni xi niꞌánkjanie xi yáꞌabeto̱ kamándani, xikoó arpaa̱, ko̱jo salterioo̱, ko̱jo panderoo̱, ko̱jo yána̱xo̱ xi foniee̱, ko̱jo platiyoo̱. 6Ta̱nga nga jachó ki̱a̱ ngi̱ndie nínga niꞌántsjie to ndso̱ko̱a̱n ṉño̱paa̱n Nakoo̱n, Usaa̱ kijíkáꞌniú koxa̱a̱ kjo̱a̱ꞌbíndaa̱ Néná, kó katsꞌénjo̱, ngatꞌa̱ cho̱yojo xi̱ꞌii̱n kastingí. 7Kó kjo̱a̱xcha̱án Néná kjindibánié Usaa̱, kó Néná katsꞌénꞌoón ta̱ngatꞌanii̱ kui ni xi katsꞌén, kó ki̱a̱ tsꞌáka nga kꞌien tꞌa koxa̱a̱ kjo̱a̱ꞌbíndaa̱ Néná.
8Kó Ndabii̱ tsjájín kamaá kjo̱a̱a̱ nga Néná katsꞌénkꞌién Usaa̱, kuíni nga kui ngi̱ndiee̱ Peree̱-Usaa̱ ítꞌajaꞌén, kó bo̱a̱ ꞌmí ngaskande ngotꞌe̱. 9Kó Ndabii̱ katsakjónní Néná kuí ni̱xtjii̱n, kó bi̱ katsó: Kótsꞌèn kji̱ndi̱báni kꞌi̱e̱e̱ koxa̱a̱ kjo̱a̱ꞌbíndaa̱ Néná nínga tikón an.
10Kó kuíni nga Ndabii̱ kamámejénjiín kijíjo̱ koxa̱a̱ kjo̱a̱ꞌbíndaa̱ Néná nínga tikón na̱xi̱ńdáꞌniuú, kó ta̱sá ki̱a̱ kijíjo̱ ndiꞌaa̱ Obee̱nd-Endo̱n, nda̱ Jeteoo̱. 11Kó koxa̱a̱ kjo̱a̱ꞌbíndaa̱ Néná, ján sá kamaá nga kisꞌijña ndiꞌaa̱ nda̱ xi ꞌmí Obee̱nd-Endoo̱n nda̱ Jeteoo̱, kó Néná katsꞌénchikonñé xota̱ ndiꞌaa̱ Obee̱nd-Endoo̱n.
Ndabii̱ kijíjo̱ koxa̱a̱ kjo̱a̱ꞌbíndaa̱ Néná ki̱a̱ na̱xi̱ńdáꞌniú Jerusale̱n
(1Kr 15:1—16:6)
12Kó tjín xí katsóyaà nda̱ re Ndabii̱, nga bi̱ katsoó: Néná tjítsꞌénchíkonñé xota̱ ndiꞌaa̱ Obee̱nd-Endoo̱n ko̱jo ngayeje ni xi tjiín, ta̱ngatꞌanii̱ koxa̱a̱ kjo̱a̱ꞌbíndaa̱ Néná.
Kósꞌe̱ Ndabii̱ kijí, kó achichí tsja kisꞌiee̱ nga tsꞌaxiéni koxa̱a̱ kjo̱a̱ꞌbíndaa̱ Néná ndiꞌaa̱ Obee̱nd-Endoo̱n, sꞌe̱ kijíjo̱ ki̱a̱ na̱xi̱ńdáꞌniuú Ndabii̱. 13Kó ngije jun ndi̱yà iskjien se já xí ndyi̱yaꞌankꞌá koxa̱a̱ kjo̱a̱ꞌbíndaa̱ Néná, Ndabii̱ katsꞌénkꞌién ngo cho̱yojo toro̱ ko̱jo ngo cho̱tsa̱nga̱ xi jaꞌatji ndi̱ja̱a̱ xi ꞌniú yiꞌi.
14Kó Ndabii̱ ngayeje ngaꞌniuú nga iskjínkꞌatsja ngindyi̱ko̱n Néná, nga tsꞌényajá ngo ńjño ndio xi lino̱ kamándani. 15Kó bo̱a̱ tsꞌén Ndabii̱ ko̱jo ngayeje xota̱ na̱xi̱ńdá Israee̱l tsja kamaá nga kijíjo̱ koxa̱a̱ kjo̱a̱ꞌbíndaa̱ Néná, kó askjandáyatsja ko̱jo katsꞌénkjanie tjioo̱.
16Nga kjiꞌanga jachó koxa̱a̱ kjo̱a̱ꞌbíndaa̱ Néná ki̱a̱ na̱xi̱ńdáꞌniuú Ndabii̱, na̱ Mikaa̱l tsa̱kji̱ín Sauu̱l, askotsijenni ki̱a̱ nga̱ntjo̱a̱masienkjaá ndiꞌaa̱, kó kamábe nga nda̱ re Ndabii̱ tsꞌénkjínkꞌá nga tsja kjimaa̱ ki̱a̱ ngindyi̱ko̱n Néná, kó kui naa̱ tsjájín kamaá.
17Kó tsangínjo̱ koxa̱a̱ kjo̱a̱ꞌbíndaa̱ Néná, sꞌe̱ ki̱a̱ íjñá ngo ngi̱ndie xi tikón xtji̱e̱e̱n ngamasiee̱n ndiꞌańjño xi Ndabii̱ xá katsꞌéndani, kó Ndabii̱ katsꞌénkꞌasꞌien kjo̱a̱tjó xi ꞌbítí ko̱jo kjo̱a̱tjó kjo̱a̱a̱ kjo̱a̱xioó, ngindyi̱ko̱n Néná. 18Kó ngije kamaá Ndabii̱ nga katsꞌénkꞌasꞌien kjo̱a̱tjó xi ꞌbítií, ko̱jo kjo̱a̱tjó kjo̱a̱a̱ kjo̱a̱xioó, katsꞌénchikonñé xota̱ na̱xi̱ńdaá nga katsꞌénkjién jaꞌeén Néná xí tsi̱ꞌe̱ jájuún. 19Kó ngayeje xota̱ na̱xi̱ńdaá, ko̱jo ngayeje xota̱ kjín xi chji̱a̱ni na̱xi̱ńdá Israee̱l, xi chjo̱on xí xi̱ꞌin, katsjaá ngo ṉño̱ xi kjikjojó, ko̱jo ngo pan xi ndyi̱a̱a̱ toꞌndatii̱l, ko̱jo ngo pan xi ndyi̱a̱a̱ tostsi̱je̱è. Kósꞌe̱ ngayeje xota̱ na̱xi̱ńdaá ńgó ńgó kijí ndiꞌaa̱.
20Ta̱nga ngije kjindibá nginí Ndabii̱ nga sa̱ꞌínchikonñé xota̱ ndiꞌaa̱, na̱ Mikaa̱l tsa̱kji̱ín Sauu̱l kijíkjaꞌáyíndi̱yà Ndabii̱, kó bi̱ katsoó: Achichí ndikóntsꞌèn kisꞌijña ngotꞌe̱ ree̱ na̱xi̱ńdá Israee̱l, ngatꞌa̱ ngotꞌe̱ boá nga kisꞌiextí ngindyi̱ko̱n ínchjín chji̱ni̱e̱ꞌboo̱ mosoo̱, xikótsꞌèn ngo xota̱ xi ta̱chiboa.
21Kósꞌe̱ Ndabii̱, bi̱ katsoó na̱ Mikaa̱l:
—Ngindyi̱ko̱n Néná boá nga bo̱a̱ katsꞌén an, kui Néná xí jaꞌájinna nga nkꞌa ngase kisꞌijña an, ta̱bo̱a̱jiín na̱ꞌmíi̱ ko̱jo ngayeje xota̱ ndiꞌaa̱, tsi̱ꞌe̱ nga an xi ka̱ma an ngito̱ko̱o̱ xota̱ na̱xi̱ńdaá Néná, kui xi xota̱ Israee̱l. Kuíni nga ngindyi̱ko̱n Néná boá nínga skjínkꞌatsja an, 22kó ꞌniú ngase ni̱ma̱kjo̱a̱ sa̱ꞌin an yojona ngotꞌe̱ xikó sé ji, ta̱nga ngindyi̱ko̱n ínchjín chji̱ni̱e̱ꞌbo xi kase ji, xcha̱ndikónna.
23Kó na̱ Mikaa̱l tsa̱kji̱ín Sauu̱l jmí ndí kisꞌiejiín ngaskande nga kꞌien.
Currently Selected:
2 Samuee̱ 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
