2 Samuee̱ 5
5
Ndabii̱ kamá ree̱ na̱xi̱ńdá Israee̱l ko̱jo nangi Jundáa̱
(1Kr 11:1-3)
1Kósꞌe̱ ngayeje xota̱ tji̱e̱e̱ xota̱ Israee̱l jachó ngindyi̱ko̱n Ndabii̱ ki̱a̱ nangi Ebroo̱n, kó bi̱ katsoó:
Kꞌi̱e̱ tindyionjne̱ kꞌi̱e̱e̱, kó ti̱kuii ńda ko̱jo yojo xi tjiín jí, ti̱kuii xi tjínjne̱ ji̱n nga. 2Ngatꞌa̱ ni̱xtjin xi je jaꞌaa̱, kjiꞌanga Sauu̱l xi kamá rejne̱, jí boá xi kaꞌnaxié ji xota̱ Israee̱l nga kijí kjo̱a̱xcha̱án, kó ti̱ jí boá xi kamá ji ngito̱ko̱o̱ xota̱ na̱xi̱ńdá Israee̱l.
3Kó ngije ngayeje xota̱ xi xchaá na̱xi̱ńdá Israee̱l jachó ngindyi̱ko̱n nda̱ ree̱ ki̱a̱ nangi Ebroo̱n, nda̱ re Ndabii̱ ki̱a̱ índajo̱ ngo ni ki̱a̱ nangi Ebroo̱n ngindyi̱ko̱n Néná, kó kui xotaa̱ katsangijon isti̱ Ndabii̱ nga kui xi ka̱ma ree̱ na̱xi̱ńdá Israee̱l.
4Ndabii̱ kantié nó tjiín nga ítsꞌi̱yanii̱ nga atíxoma, kó yichán nó kamaá nga atíxoma. 5Ki̱a̱ nangi Ebroo̱n yito nó kamaá nga atíxomaa̱ nangi Jundáa̱, kó ki̱a̱ na̱xi̱ńdáꞌniú Jerusale̱n kantié ján nó kamaá nga atíxoma ngayeje na̱xi̱ńdá Israee̱l ko̱jo nangi Jundáa̱.
Ndabii̱ katsꞌéntsi̱ꞌe̱ na̱xi̱ńdáꞌniú Jerusalee̱n
(1Kr 11:4-9)
6Kósꞌe̱ nda̱ ree̱ ko̱jo já xí nijan tjimájo̱ kijí na̱xi̱ńdáꞌniú Jerusale̱n, nga kijíkjánjo̱ xota̱ Jebuu̱ xi kisꞌińdo kui ngi̱ndiee̱, kui xotaa̱, bi̱ katsoó Ndabii̱: Ku̱i̱tjásꞌi̱njín ji kui ngi̱ndiee̱, ngatꞌa̱ ngaskande xota̱ xi ti̱ka̱ ko̱jo xi fíni̱ma̱tꞌaa̱ sa̱ꞌínchꞌoó, nga bi̱ ka̱tso̱ nga skja̱ndáyà: Ka̱májín kꞌo̱sꞌien Ndabii̱ kui ngi̱ndiee̱.
7Ta̱nga Ndabii̱ katsꞌéntsi̱ꞌe̱ ngaꞌniuú na̱xi̱ńdáꞌniú Sioo̱n, kui xi na̱xi̱ńdáꞌniuú Ndabii̱. 8Kó kui ni̱xtjii̱n, bi̱ katsó Ndabii̱: Ngayeje xi mejeén nga sa̱ꞌínꞌoón xota̱ Jebuu̱, ngatjínijíngí xtji̱e̱e̱n nínga ndibajáyàni ndáfoaa̱, kó ngatsꞌénꞌoón xota̱ xi ti̱ka̱a̱ ko̱jo xi fíni̱ma̱tꞌaa̱, kui xi achichí chꞌo maá ini̱ma̱a̱ Ndabii̱ ngatꞌa̱ bi̱ katsó: Ka̱májín kꞌo̱sꞌien Ndabii̱ kui ndiꞌaa̱. 9Kó Ndabii̱ ki̱a̱ kisꞌijña kui ngi̱ndie ꞌniuú, kósꞌe̱ katsꞌénda ndiꞌa nga ngo foaꞌatjiyajoo̱n ki̱a̱ nangi Miloo̱ xtji̱e̱e̱n ngi̱yaa̱. 10Sꞌe̱ Ndabii̱ kisꞌie ngasee̱ ngaꞌniú, ngatꞌa̱ Néná xí tsi̱ꞌe̱ jájuún asíko̱jo.
Ngo ndo̱bo̱a̱xa̱á xí tsi̱ꞌe̱ Ndabii̱
(1Kr 3:1-9; 14:3-7)
11Kó Iraa̱n nda̱ re xi chji̱a̱ni na̱xi̱ńdáꞌniú Tiroo̱ ti̱ katsangiyaa̱ xota̱xchà Ndabii̱, ko̱jo katsangiyaa̱ yákón, ko̱jo chji̱ni̱e̱yá, ko̱jo já xí botie chji̱ni̱e̱ ndi̱jo̱ tsi̱ꞌe̱ xoó, xi katsꞌénda ndiꞌa nínga kisꞌijña Ndabii̱. 12Kó Ndabii̱ kamákjiín nga Néná boá xi je re katsꞌén nga kui xi ko̱tíxomaa̱ na̱xi̱ńdá Israee̱l, ko̱jo nga Néná boá xi katsjaá kjo̱a̱je nínga botixómá ta̱ngatꞌanii̱ nga tjoó xota̱ na̱xi̱ńdá Israee̱l.
Ndií Ndabii̱ xi ngasee̱
(1Kr 3:1-9; 14:3-7)
13Kó jaskan ngije jatjoni Ndabii̱ nangi Ebroo̱n, kó nga jachó na̱xi̱ńdáꞌniú Jerusale̱n, kisꞌiee̱ ínchjín xí kisꞌińdojo̱, kó kisꞌie ngasee̱ ndí xí xi̱ꞌin ko̱jo ndí xí ínchjín. 14Kuí bí xi̱ꞌbi̱ jaꞌeén ndí xí katsen ki̱a̱ na̱xi̱ńdáꞌniú Jerusale̱n:
Samúaa̱,
ko̱jo Sobaa̱b,
ko̱jo Nataa̱n,
ko̱jo Salomoo̱,
15ko̱jo Ibaa̱r,
ko̱jo Elisuaa̱,
ko̱jo Nefee̱j,
ko̱jo Jafíaa̱,
16ko̱jo Elisamaa̱,
ko̱jo Eliandaa̱,
ko̱jo Elifelee̱t.
Ndabii̱ katsꞌeén nga askjanjo̱ xota̱ Filisteaa̱
(1Kr 14:8-17)
17Nga tsintꞌié xota̱ Filisteaa̱ nga Ndabii̱ je kachjeꞌéjin nga ree̱ na̱xi̱ńdá Israee̱l kamá, ngayeje xota̱ Filisteaa̱ kijíngase Ndabii̱, kó nga tsintꞌié Ndabii̱ kui nii̱, kijí ki̱a̱ ngi̱ndie ꞌniuú. 18Kósꞌe̱ xota̱ Filisteaa̱ jachó, kó ki̱a̱ kisꞌińdo ngayeje nangi soón Refaii̱n.
19Kósꞌe̱ Ndabii̱ asíyaá Néná, nga bi̱ katsoó:
—A kjuínnijíngí án nga kjuínkjánjo̱ an xota̱ Filisteaa̱. A si̱ꞌinkꞌasꞌínní ngi̱ya ndsa̱ án.
Kó Néná, bi̱ katsoó Ndabii̱:
—Tꞌennijíngí ji, ngatꞌa̱ ja̱koxi̱ boá nga ngi̱ya ndse̱ ji sa̱ꞌinkꞌasꞌien an xota̱ Filisteaa̱.
20Kó Ndabii̱ kijí ki̱a̱ Baa̱l-Perasii̱n, kó ki̱a̱ katsꞌeén nga askjanjo̱ kui jaá, kósꞌe̱ bi̱ katsó: Néná boá xi iskjíxꞌána ndi̱yà ngi̱jii̱n xota̱ xi kondra̱na, xikó maá ngaꞌniuú ngo ndejèꞌ xi tsꞌénmonga. Kuíni nga kui ngi̱ndiee̱ Baa̱l-Perasii̱n ítꞌajaꞌén. 21Kó xota̱ Filisteaa̱ ki̱a̱ índomasien ne xi tsꞌendikón, kó Ndabii̱ ko̱jo já xí nijan tjimájo̱, kijíjo̱ kui nii̱.
22Jaskan xota̱ Filisteaa̱ ti̱ jachó nginí ingo ndi̱yà, kó ki̱a̱ kisꞌińdo nangi soón Refaii̱n. 23Kó Ndabii̱ asíyaá Néná kjo̱a̱a̱ kui nii̱, kó Néná, bi̱ katsoó:
—Ngata̱ ꞌminijíngíjín ji, ta̱sá ti̱tje̱tjíyejìi̱n xtji̱e̱e̱n nga̱xto̱n kui xotaa̱, kó ki̱a̱ tja̱tjeni ji kje̱n nínga síndo kui yáꞌbálsamoo̱. 24Kó kjiꞌanga ko̱nda̱ꞌyé ji nga je ndyi̱fí ki̱a̱ xtji̱e̱e̱n nkꞌaa̱ yáꞌbálsamoo̱, tsá ye jí, ngatꞌa̱ Néná boá xi ko̱e̱je̱tjoón ji, tsi̱ꞌe̱ nga sa̱ꞌínꞌoón xota̱ Filisteaa̱.
25Kó Ndabii̱ bo̱a̱ katsꞌén xikó katsoó Néná nga sa̱ꞌín, kó katsꞌénꞌoón xota̱ Filisteaa̱ ndeskande nangi Ngebaa̱, ngaskande nangi Ngésee̱r.
Currently Selected:
2 Samuee̱ 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
