2 Samuee̱ 4
4
Nga kiniꞌánkꞌién Isbosee̱t
1Kó nga tsintꞌié ndií Sauu̱l, nga Abnee̱r ki̱a̱ kiniꞌánkꞌién ki̱a̱ nangi Ebroo̱n, ngiti̱ jmí ngaꞌniú kisꞌiejiín, kó ngayeje xota̱ Israee̱l achichí katsakjónní. 2Kó ndií Sauu̱l jó já kisꞌiee̱, xi ngito̱ko̱o̱ xtín xota̱ xi ndajiín kamá, ngo xi Baanaa̱ kiꞌmí, kó xi ingoo̱ Rekaa̱b kiꞌmí, nga jó kui jaá xi ndií Rimoo̱n kamá, nda̱ xi chji̱a̱ni Beeroo̱t, xi chji̱a̱ni xota̱ tji̱e̱e̱ Benjaa̱, 3ngatꞌa̱ xota̱ Beeroo̱t, kuí boá xi ki̱a̱ tsanga nínga ꞌmí Ngitaii̱n, kó ki̱a̱ síndo xikoó xota̱ xi xín nangi chji̱a̱ni ngaskande ngotꞌe̱.
4Kó Jonataa̱n, ndií Sauu̱l, kisꞌiee̱ ngo ndí xí ni̱ma̱ xi kixíyà sé. Kjiꞌanga kamá ún noó kui ndií, jachoó én xí kjindibáni nangi Jesree̱l nga je kꞌien Sauu̱l ko̱jo Jonataa̱n, kó na̱ xi tsꞌénxchá kuí ndií, iskjíbé kó tsanga, ta̱nga tji̱e̱nga tsꞌénmonga, tsꞌákaa̱ kui ndií, kó kijíni̱ma̱tꞌa̱. Mefii̱-Bosee̱t kiꞌmí kui ndií.
5Kó jaá Rimoo̱n, nda̱ xi chji̱a̱ni Beeroo̱t, kui xi ꞌmí Rekaa̱b ko̱jo Baanaa̱, kijí kó nga kamá ndisꞌueé jachó ndiꞌaa̱ Isbosee̱t, kó tji̱e̱nga kjiꞌifé ngotjón kui nda̱a̱, 6tsꞌasꞌien ngaskande ngi̱ya kjii̱n kui ndiꞌaa̱ xikó maá tsi to ndso̱ko̱a̱n ṉño̱pan kijíjo̱, kó xi ma ún ńdanisee̱n katsꞌénꞌoón, sꞌe̱ Rekaa̱b, ko̱jo Baanaa̱ tsanga. 7Kó nga ikitjasꞌi̱e̱n kui ndiꞌaa̱, Isbosee̱t ki̱a̱ kjiꞌijña nga̱són ṉchaa̱n ngi̱yaꞌmaa̱, kó kiniꞌánꞌoón nga kiniꞌánkꞌién, sꞌe̱ ikichásén to̱ko̱, kósꞌe̱ iskjíbé to̱ko̱, kó kijíjo̱ kui jaá ki̱a̱ ndi̱yà Arabaa̱ nga ngo ni̱xtji̱e̱e̱n. 8Kó tsangínjoo̱ to̱ko̱ Isbosee̱t Ndabii̱ ki̱a̱ nangi Ebroo̱n, kó bi̱ kiꞌmií nda̱ ree̱:
—Kꞌi̱e̱ tikón kꞌi̱e̱e̱ to̱ko̱ Isbosee̱t ndií Sauu̱l, kui xi kondra̱ tse̱, kui xi kamámejeén katsꞌénkꞌieén jí. Kó ngotꞌe̱ ꞌne̱, Néná boá xi je katsꞌéngojo̱ kjo̱a̱a̱ ni xi katsꞌén Sauu̱l ko̱jo xota̱ tji̱e̱e̱.
9Ta̱nga Ndabii̱, bi̱ katsoó Rekaa̱b ko̱jo Baanaa̱ ntsꞌi̱e̱, kui xi ndií Rimoo̱n, nda̱ xi chji̱a̱ni Beeroo̱t:
—Ja̱koxi̱ boá nga tikón Néná kui xi tsꞌaxiéꞌá ini̱ma̱na kjo̱a̱a̱ ngayeje ni xi ndajín xi kamána, 10kó kjiꞌanga ngo xi katsóyàna ngo én xí bi̱ katsó: Jè kꞌien Sauu̱l. Katsja an kjo̱a̱ nga kandobá ko̱jo nga kiniꞌánkꞌién ki̱a̱ na̱xi̱ńdáꞌniú Siklaa̱j, xikoó tsi íchjí én xí katsjána, ndatsi katsꞌénkjó nga én nda boá xi jeꞌetsóyàna katsaki, 11ngase má jún já xí ndajín, xi kiniꞌánkꞌiénjnú ngo nda̱ xi kixi̱, ki̱a̱ ndiꞌaa̱ ko̱jo nga kjiꞌijñasón ṉchaa̱n. Ngotꞌe̱ ꞌne̱, a chjiénjín nga jún xi kjoaꞌachjíjnúꞌun kjo̱a̱a̱ nga kiniꞌánkꞌiénjnú, kó nga sa̱ꞌinkjiéjnúꞌun nga̱són tꞌanangii̱.
12Kósꞌe̱ Ndabii̱ katsjaákjo̱a̱ já xo̱ngo̱ò tsi̱ꞌe̱ nga sa̱ꞌínkꞌién kui jaá, kó kui jaá katsꞌénkꞌién, kó tsatie tsja ko̱jo se, sꞌe̱ ki̱a̱ yejénboaꞌa nkꞌaa̱ ti̱xa̱ je xi ndyi̱a̱ ndáfoa xi tikón ki̱a̱ nangi Ebroo̱n. Sꞌe̱ jaskan kachjábé to̱ko̱ Isbosee̱t, kó ki̱a̱ akjanijín nínga ikꞌínijín Abnee̱r ki̱a̱ nangi Ebroo̱n nga.
Currently Selected:
2 Samuee̱ 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
