2 Samuee̱ 3
3
1Kó achichí tsie tsꞌandíyaá kjo̱a̱xchán xí kisꞌiee̱ xota̱ ndiꞌaa̱ Sauu̱l, ko̱jo xota̱ ndiꞌaa̱ Ndabii̱, ta̱nga Ndabii̱ kisꞌie ngasee̱ ngaꞌniú, tji̱e̱nga Sauu̱l inda inda kijí ngindie jàn.
Ndií Ndabii̱ xi katsen ki̱a̱ nangi Ebroo̱n
(1Kr 3:1-4)
2Kó Ndabii̱ kisꞌiee̱ ndí ki̱a̱ nangi Ebroo̱n.
Ndí xí tjoón kui, Amnoo̱n kiꞌmí, kó na̱aa̱n kui nda̱a̱, na̱ Ainoaa̱n boá, na̱ xi chji̱a̱ni na̱xi̱ńdáꞌniú Jesree̱l boá.
3Ndí xí ma joó Kileaa̱b kiꞌmí, xi na̱ Abingaii̱l boá xi kamá na̱aa̱n, kui xi chjo̱ón Nabaa̱l, nda̱ xi chji̱a̱ni na̱xi̱ Karmeloo̱ kamá.
Ndí xí ma jaán Absaloo̱n boá, ndií na̱ Maakaa̱ tsa̱kji̱ín Talmaii̱, kui xi nda̱ ree̱ nangi Ngesuu̱r kamá.
4Ndí xí ma nijoón Andoniyaa̱ boá, ndií na̱ Angii̱t, kó ndí xí ma uún Sefatiyaa̱ boá, kui xi ndií na̱ Abitaa̱l kamá.
5Ndí xí ma juu̱n, Itreaa̱n boá, kui xi ndií na̱ Englaa̱ kamá, chjo̱ón Ndabii̱.
Ngayeje kui ndií xi kisꞌiee̱ Ndabii̱ ki̱a̱ nangi Ebroo̱n.
Abnee̱r ngo ni índajo̱ Ndabii̱ ki̱a̱ nangi Ebroo̱n
6Kó kjiꞌanga kisꞌiee̱ kjo̱a̱xchán xota̱ ndiꞌaa̱ Sauu̱l ko̱jo xota̱ ndiꞌaa̱ Ndabii̱, Abnee̱r katsꞌéngaꞌniú kjo̱a̱a̱ xota̱ ndiꞌaa̱ Sauu̱l. 7Kó Sauu̱l kisꞌiee̱ ingo chjo̱on xi kisꞌijñajo̱ xi kiꞌmí na̱ Rispaa̱ tsa̱kji̱ín Ajaa̱, kó Isbosee̱t, bi̱ katsoó Abnee̱r:
—Míkjo̱a̱a̱ nga chjo̱on xí kisꞌijñajo̱ na̱ꞌmina, ji titsjajnije̱ kon ji.
8Kó achichí katsꞌénxchán Abnee̱r kjo̱a̱a̱ ni xi katsoó Isbosee̱t, kósꞌe̱ bi̱ katsó Abnee̱r:
—A ńñá xí chji̱a̱ni nangi Jundáa̱ boá an. Ngaskande ngotꞌe̱ ꞌne̱ nga to̱kó kjo̱a̱ndaa̱ xota̱ tji̱e̱e̱ na̱ꞌmíi̱ Sauu̱l tikón an, ko̱jo kjo̱a̱ndaa̱ já ntsꞌi̱e̱, ko̱jo xota̱ xi nda yaꞌa, kó nga ki̱a̱jín tjítsꞌenkꞌasꞌieen ji ngi̱ya tsja Ndabii̱, kó ngotꞌe̱ ꞌne̱, a ngo ni xi kjo̱a̱a̱ ínchjín boá xi an tiniꞌínchínje̱ní. 9Néná ngatsꞌénjeé Abnee̱r, kó tsie ngase ni ngatásoón ni xi ka̱maa̱, tsi ni xi Néná je katsóyàtjoón Ndabii̱ nga sa̱ꞌínjo̱, sa̱ꞌinkjatjosónjín an, 10kó nga kjoaꞌaxíi̱n ngi̱ndie nínga botíxomaa̱ xota̱ ndiꞌaa̱ Sauu̱l, kó tsjangaꞌniúu̱ ngi̱ndie nínga botixómá Ndabii̱ nga kui xi ko̱tíxomaa̱ na̱xi̱ńdá Israee̱l ko̱jo nangi Jundáa̱, ndeskande nangi Ndaa̱n ngaskande nangi Beersebaa̱.
11Kó Isbosee̱t nde kamájín tsíchji̱a̱ꞌa Abnee̱r, ngatꞌa̱ katsakjónnií.
12Kósꞌe̱ Abnee̱r katsangiyaa̱ chji̱ni̱e̱ꞌén Ndabii̱, nga bi̱ ka̱tso̱o̱: ꞌYá xí tsi̱ꞌe̱ tꞌanangii̱. Ko̱jo nga bi̱ ka̱tso̱o̱: Ngo ni tꞌíndeje̱ní jí, kó an kosiko̱joo tsi̱ꞌe̱ nga ngayeje xota̱ Israee̱l ji sku̱i̱e̱ndikoón.
13Kó Ndabii̱, bi̱ katsó:
—Ndakjiꞌi, ka̱má ngo ni kꞌuindajoo̱ ji, ta̱nga ngo tsí ni xi míꞌaá: Nga ngata̱ kꞌi̱e̱jín ndibé jí tsi kji̱ndi̱béje̱jínní na̱ Mikaa̱l tsa̱kji̱ín Sauu̱l nga kji̱ndi̱béchinní.
14Kó Ndabii̱ katsangiyaa̱ chji̱ni̱e̱ꞌén Isbosee̱t ndií Sauu̱l, kó bi̱ katsoó: Te̱ꞌéꞌoyé nginí chjo̱onna na̱ Mikaa̱l, kui xi úchán tji̱xi̱ín yojondikoón xota̱ Filisteaa̱ asitꞌani an tsi̱ꞌe̱ nga chjo̱onna kamá.
15Kósꞌe̱ Isbosee̱t katsangiya tsi̱ꞌe̱ nga kui naa̱ kachjeꞌéxiín Paltiee̱l nda̱ xi tikónjo̱, kui xi ndií Laii̱ kamaá. 16Kó xi̱ꞌii̱n kui naa̱ kijíjo̱ nga kijítji̱ngii̱, kó askjandá ngaskande nangi Baurii̱n, nínga Abnee̱r, bi̱ katsoó:
—¡Tꞌenꞌoyé nginí ji! Kósꞌe̱ kui nda̱a̱ kijíꞌoyá nginí.
17Kó Abnee̱r tsíchji̱a̱jo xota̱ xi xchaá na̱xi̱ńdá Israee̱l, nga bi̱ katsoó:
—Ngasꞌe̱ ikindyiséjnú nga Ndabii̱ xi ko̱tíxomájnú. 18Ngotꞌe̱ ꞌne̱, ti̱ꞌánjnú kui nii̱, ngatꞌa̱ Néná boá xi je bi̱ katsoó Ndabii̱: Moso̱na Ndabii̱ boá xi sa̱ꞌinkjièn Án nga kꞌoxiéꞌá An xota̱ na̱xi̱ńdána Israee̱l, ki̱a̱ ngi̱ya tsja xota̱ Filisteaa̱, ko̱jo ngi̱ya tsja ngayeje kondra̱a̱.
19Kó Abnee̱r ti̱ tsíchji̱a̱jo xota̱ tji̱e̱e̱ Benjaa̱ nga, kó ti̱ kijí nangi Ebroo̱n nga kijítsóyaà Ndabii̱, ngayeje ni xi nda kasasiee̱n xota̱ Israee̱l, ko̱jo ngayeje xota̱ tji̱e̱e̱ Benjaa̱. 20Kósꞌe̱ Abnee̱r jachókoón Ndabii̱ ki̱a̱ nangi Ebroo̱n, kó kan já tsoꞌbájo̱, kó Ndabii̱ katsꞌéndaa̱ tsie nichinie Abnee̱r ko̱jo já xí nijan tsoꞌbájo̱. 21Kó Abnee̱r, bi̱ katsoó Ndabii̱:
—Ta̱sá kjuín án, kó kꞌuitiko án ngayeje xota̱ Israee̱l nganda tsi̱ꞌe̱ ndi̱a̱na nda̱ ree̱, tsi̱ꞌe̱ nga ka̱ma ku̱i̱ꞌíndajoo̱ ji, nga ko̱ti̱xome ji xikótsꞌèn mejeén ini̱màa̱.
Kósꞌe̱ Ndabii̱ katsꞌénkixotꞌa Abnee̱r, sꞌe̱ Abnee̱r kisꞌiee̱ kjo̱a̱xió nga kijí.
Joaa̱b katsꞌénkꞌién Abnee̱r
22Kó já mosoo̱ Ndabii̱ ko̱jo Joaa̱b nga ndyi̱ndibání kjo̱a̱xcha̱án xtji̱e̱e̱n ngi̱jin kꞌijñá jàn, achichí ni ndyi̱yaꞌa, ta̱nga Abnee̱r ki̱a̱jín tikónjo̱ Ndabii̱ ki̱a̱ nangi Ebroo̱n, ngatꞌa̱ Ndabii̱ jè katsꞌénkixotꞌa, kó jè kijí nga kisꞌiee̱ kjo̱a̱xió. 23Kó nga jachó Joaa̱b ko̱jo ngayeje jájún xi nijan tjimájo̱, kiꞌmíyaà Joaa̱b, nga bi̱ kiꞌmií: Abnee̱r ndií Nee̱r jeꞌe nínga tikón nda̱ ree̱, kó kui nda̱a̱ je katsꞌénkixotꞌa, sꞌe̱ kijí nga kisꞌiee̱ kjo̱a̱xió 24Kósꞌe̱ Joaa̱b kijíkoón nda̱ ree̱, kó bi̱ katsoó:
—Mí xí kiniꞌín ji. Jè jeꞌekoón ji Abnee̱r, kó ánní nga kiniꞌínkjí kon ji. Ngotꞌe̱ ꞌne̱, jè xín kijí. 25Jè yé ji nga Abnee̱r ndií Nee̱r, jeꞌekaṉcha̱joo̱ri tsi̱ꞌe̱ nga sku̱i̱e̱ ñá tiꞌmi ko̱jo ñá kjindibéni ji, ko̱jo tsi̱ꞌe̱ nga sku̱i̱e̱ ngayeje ni xi niꞌín ji.
26Kó ngije jatjo Joaa̱b nínga tikón Ndabii̱, katsangiya já chji̱ni̱e̱ꞌén xi kijítji̱ngii̱ Abnee̱r, kó kui jaá kjindibájo̱ꞌoyá nginí ndeskande ki̱a̱ ndáńchꞌi̱ Sira̱, kó kui nii̱ nde kamábejín Ndabii̱.
27Kó nga jachó nginí Abnee̱r ki̱a̱ nangi Ebroo̱n, Joaa̱b xín tji̱e̱n tsíchji̱a̱a̱ ki̱a̱ ngamasiee̱n nga̱ntjo̱a̱a̱ tsi̱ꞌe̱ nga ꞌma ku̱i̱chji̱a̱jo, kó ki̱a̱ katsꞌénꞌoón ńdanise̱n xi ma uún Abnee̱r, kó ki̱a̱ katsꞌénkꞌién ta̱ngatꞌanii̱ ntsꞌi̱e̱ xi kiꞌmí Asaee̱l. 28Jaskan ngije tsintꞌié kuí nii̱ Ndabii̱, bi̱ katsó:
Ngindyi̱ko̱n Néná, nga an ko̱jo ngayeje xota̱ xi botixomáa̱ nga jmí jéjínjne̱ kjo̱a̱a̱ nga kiniꞌánkꞌién Abnee̱r ndií Nee̱r. 29Ngo ni xi ndajín xi ngatamaa̱ ngayeje xota̱ ndiꞌaa̱ Joaa̱b, ko̱jo ngayeje xota̱ ndiꞌaa̱ na̱ꞌmii̱, ngatsjéni̱xtjin ngatꞌié ndiꞌaa̱ Joaa̱b xota̱ xi tsjién jín, ko̱jo xi kꞌuieé chiꞌin xi tsꞌénkjátsón tji̱xin yojoná, ko̱jo xi ni̱ma̱ ka̱ma nga yánísié ko̱a̱ꞌa̱, ko̱jo xi ki̱cha̱ndojó ko̱yàní, ko̱jo xi kꞌuiéjiín nichinie. 30Kó bo̱a̱ tsꞌén Joaa̱b ko̱jo ntsꞌi̱e̱ xi ꞌmí Abisaii̱, katsꞌénkꞌién Abnee̱r, ngatꞌa̱ kuí boá xi katsꞌénkꞌién Asaee̱l, ntsꞌi̱e̱ kui jaá ki̱a̱ kjo̱a̱xcha̱án xí kamá ki̱a̱ nangi Ngabaóo̱n.
31Kósꞌe̱ Ndabii̱, bi̱ katsoó Joaa̱b ko̱jo xota̱ na̱xi̱ńdá xí nijan síndojo̱:
—Chjándiyàjónjnú ńjñojnú, ko̱jo cha̱jájnú ńjño tokjuie, ko̱jo chaꞌátjéjnú Abnee̱r. Kó nda̱ re Ndabii̱ ki̱a̱ kijítji̱ngii̱ koxa̱a̱ nga kjifínijín kui nda̱a̱. 32Kó ki̱a̱ nangi Ebroo̱n akjanijín Abnee̱r, kó nda̱ ree̱ achichí ꞌniú tsíchji̱a̱ nga askjandá ki̱a̱ tꞌa nga̱tsjo̱ó Abnee̱r, kó ti̱ askjandá ngayeje xota̱ na̱xi̱ńdaá nga. 33Kó nda̱ ree̱ kui én ndasee̱n tsíchji̱a̱ kjo̱a̱a̱ Abnee̱r:
A chjiéngá bo̱a̱ tsꞌén ko̱yà Abnee̱r xikótsꞌèn ꞌme ngo xota̱ xi ndajín.
34Ndse̱ ikꞌítꞌaniújín, ti̱nde ndsa̱ki ji jmí ńꞌniúki̱cha̱ ikꞌítꞌaniújín,
ta̱sá bo̱a̱ tsꞌén tsꞌáka ji, xikoó xota̱ xi ꞌbóka ngindyi̱ko̱n xota̱ xi ndajiín.
Kó ngayeje xota̱ na̱xi̱ńdaá askjandátjé Abnee̱r. 35Kósꞌe̱ ngayeje xota̱ na̱xi̱ńdaá jachókoón Ndabii̱ tsi̱ꞌe̱ nga ꞌniú katsꞌeén nga skji̱ni̱e̱ chií nichinie kui ni̱xtjii̱n, ta̱nga Ndabii̱ katsjá tsꞌoa nga bi̱ katsó: Néná ngatsꞌénjo̱na kui nii̱, kó ngatásón ngasee̱ ni xi ndajínkjiꞌi, tsi ngindiee̱ nga kꞌo̱sꞌien tsꞌueé skjíni̱e̱ an nichinie ko̱jo tsi ta̱jmì niní.
36Kó ngayeje xota̱ na̱xi̱ńdaá tsintꞌié kuí nii̱, kó tsjá kamaá, ngatꞌa̱ ngayeje ni xi katsꞌén nda̱ ree̱, tsja kamaá ngayeje xota̱ na̱xi̱ńdaá. 37Kó ngayeje xota̱ na̱xi̱ńdaá, ko̱jo ngayeje xota̱ Israee̱l kamákjiín kui ni̱xtjii̱n nga nda̱ ree̱jín xi katsangiya nga kiniꞌánkꞌién Abnee̱r ndií Nee̱r.
38Kó nda̱ ree̱, bi̱ katsoó já mosoo̱:
—A yàjínjnú nga ngo nda̱ xi ꞌniú nkꞌa xaá boá xi kꞌien ngotꞌe̱ kꞌi̱e̱ na̱xi̱ńdá Israee̱l. 39Kó an, ndatsi re xi jaꞌájin Néná boá án, kó ndatsi nda an xota̱, tji̱e̱nga kui já xí ndií na̱ Sarbiaa̱, achichí tajá ngase ta̱bo̱a̱jiín án. Néná ngatsꞌénkꞌíchjí xota̱ xi ndajiín, xikó kjiꞌi ni xi ndajín xi ndyi̱tsꞌèn.
Currently Selected:
2 Samuee̱ 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
