2 Samuee̱ 2
2
Ndabii̱ kamá ree̱ nangi Jundáa̱
1Jaskan ngije kamá kui nii̱, Ndabii̱ asíyaá Néná, nga bi̱ katsoó:
—A chjiéngá kjuínnijíngí an ngo na̱xi̱ńdáꞌniú xí chji̱a̱ni nangi Jundáa̱.
Kó Néná, bi̱ katsoó:
—Tꞌennijíngí ji.
Kó Ndabii̱ ti̱ bi̱ ti̱ katsó nginií:
—Ñání na̱xi̱ńdáꞌniú xí kjuínnijíngí an.
Kó Néná, bi̱ katsó: —Na̱xi̱ńdáꞌniú Ebroo̱n tꞌenijíngí ji.
2Kó kijí Ndabii̱ kui ngi̱ndiee̱, kó ti̱ kijíjo̱ nga jó ínchjiín, kui xi ꞌmí na̱ Ainoaa̱n xi chji̱a̱ni nangi Jesree̱l, ko̱jo na̱ Abingaii̱l, kui xi chjo̱on kamánii̱ Nabaa̱l, nda̱ xi chji̱a̱ni nangi Karmee̱l. 3Kó Ndabii̱ ti̱ kijíjo̱ já xí nijan kisꞌińdojo̱, ko̱jo xota̱ ndiꞌaa̱ nga ngo nga ngo, kó ki̱a̱ kisꞌińdo na̱xi̱ńdáꞌniú Ebroo̱n.
4Kó já xí chji̱a̱ni nangi Jundáa̱ jachó ki̱a̱a̱, kó katsangijon isti̱ Ndabii̱, nga je ree̱ xota̱ tji̱e̱e̱ Jundáa̱.
Kó tjín xí katsóyaà Ndabii̱, nga bi̱ katsoó:
—Já xí chji̱a̱ni na̱xi̱ńdáꞌniú Jabee̱, ngi̱ndie xi tikón ki̱a̱ Ngalaa̱nd, kuí boá xi yínijín Sauu̱l. 5Kó Ndabii̱ katsangiyaa̱ chji̱ni̱e̱ꞌén xota̱ xí chji̱a̱ni na̱xi̱ńdáꞌniú Jabee̱ ngi̱ndie xi tikón ki̱a̱ nangi Ngalaa̱nd, kó bi̱ katsoó: Néná ngatsꞌénchíkonñéjnú jún, ngatꞌa̱ ni̱ma̱ kamájnú ndi̱a̱jnú, kui xi kiꞌmí Sauu̱l nga akjanijínjnú.
6Ngotꞌe̱ ꞌne̱, Néná boá xi ko̱kójnú jún kjo̱a̱ndaxota̱a̱, kó ko̱jo an nda kꞌuichjíjnúꞌun kjo̱a̱a̱ ni xi kiniꞌánjnú. 7Ngotꞌe̱ ꞌne̱, te̱ꞌéngaꞌniújnúu̱ ndsa̱jnú, kó chꞌokon ti̱ꞌánjnú yojojnú, ngatꞌa̱ jè kꞌien Sauu̱l, kui ndi̱a̱jnú, kó xota̱ tji̱e̱e̱ Jundáa̱ án boá xi je katsjáxána nga an xi ka̱ma an nda̱ re xi ko̱tíxomaa̱ kui xotaa̱.
Kjo̱a̱xchán xí kisꞌiee̱ na̱xi̱ńdá Israee̱l ko̱jo nangi Jundáa̱
8Ta̱nga Abnee̱r ndií Nee̱r, kui nda̱ xi kamá ngito̱ko̱o̱ jájuún Sauu̱l, iskjíbé Isbosee̱t ndií Sauu̱l, kó kijíjo̱ nangi Maanaii̱n, 9kó kuí boá xi katsꞌén ree̱ ki̱a̱ nangi Ngalaa̱nd, ko̱jo nangi Ngesuu̱r, ko̱jo nangi Jesree̱l, ko̱jo nangii̱ xota̱ tji̱e̱e̱ Efraii̱n, ko̱jo nangii̱ xota̱ tji̱e̱e̱ Benjaa̱, ko̱jo ngayeje na̱xi̱ńdá Israee̱l. 10Yichán noó Isbosee̱t ndií Sauu̱l nga ítsꞌi̱yanii̱ nga atíxoma na̱xi̱ńdá Israee̱l, kó jó nó kamaá nga atíxoma.
Kó ta̱kuítsí xota̱ tji̱e̱e̱ Jundáa̱ xi kijítji̱ngii̱ Ndabii̱. 11Kó nda̱ re Ndabii̱ yito nó ko̱jo jun sá kamaá nga atíxomaa̱ xota̱ tji̱e̱e̱ Jundáa̱ ki̱a̱ na̱xi̱ńdáꞌniú Ebroo̱n.
12Kó Abnee̱r ndií Nee̱r, jatjoni nangi Maanaii̱n sꞌe̱ kijí nangi Ngabaóo̱n nga kijíjo̱ já mosoo̱ Isbosee̱t ndií Sauu̱l, 13kó kijíjo̱ Joaa̱b ndií Sarbiaa̱, ko̱jo já mosoo̱ Ndabii̱, kó ki̱a̱ jachó nínga tikón ti̱xa̱ je xi ndyi̱a̱ ndáfoaa̱ ki̱a̱ Ngabaóo̱n, kó ki̱a̱ kisꞌińdosón nga̱ndee̱ kui ti̱xa̱ je xi ndyi̱a̱ ndáfoaa̱, kó xi ngasee̱ ki̱a̱ kisꞌińdo xi ingo nga̱ndee̱. 14Kó Abnee̱r ndií Joaa̱b, bi̱ katsoó:
—Ngatjastjíe̱n já xo̱ngo̱ò, kó ngatꞌíndonda tsi̱ꞌe̱ nga skján.
Kó Joaa̱b, bi̱ katsó:
—Ngatjastjíe̱n. 15Kósꞌe̱ jastjíe̱n ngayejee̱, kó tiejó kamá xota̱ tji̱e̱ xi chji̱a̱ni Benjaa̱ xi katsangiya Isbosee̱t ndií Sauu̱l, kó ti̱ tiejó kamá xota̱ mosoo̱ Ndabii̱ nga. 16Kó nga ngo nga ngo kui jaá iskjien to̱ko̱ kondra̱a̱, kó ki̱cha̱ndojoó katsangisꞌiee̱n ni̱se̱e̱n, kó ńgó ńgó ixó nga jesón, kuíni nga kui ngi̱ndiee̱ Elkaa̱t-Asurii̱n ítꞌajaꞌén, kui ngi̱ndie ki̱a̱ tikón ki̱a̱ nangi Ngabaóo̱n.
17Kó achichí ꞌniú kamá kui kjo̱a̱xcha̱án kui ni̱xtjii̱n, ta̱nga Abnee̱r ko̱jo já xíꞌín xi chji̱a̱ni na̱xi̱ńdá Israee̱l kiniꞌánchaja ki̱a̱ ngindyi̱ko̱n já mosoo̱ Ndabii̱. 18Kó ki̱a̱ kisꞌińdo nga ján ndií Sarbiaa̱, kui xi ꞌmí: Joaa̱b, ko̱jo Abisaii̱, ko̱jo Asaee̱l. Asaee̱l achichí tsá kamá kijí, xikó maá ngo ndi̱kꞌijñá xí ꞌbé ngindie kꞌijñá jàn. 19Kó Asaee̱l tsangatji̱ngii̱ Abnee̱r, kó kijí na̱xo̱ na̱xo̱ nde xínjín kijí tsi xtji̱e̱e̱n nga skoón ko̱jo tsi xtji̱e̱e̱n nga fojnií. 20Kó Abnee̱r katsꞌénkꞌafóyá, kó bi̱ katsoó:
—A Asaee̱l boá ji.
Kó Asaee̱l, bi̱ katsó:
—Jo̱o̱n án boá.
21Kósꞌe̱ Abnee̱r, bi̱ katsoó:
—Tꞌen ji xtji̱e̱e̱n nga fojnií ko̱jo tsi xtji̱e̱e̱n nga skoón, kó chjábé jí ngo kui jaá, sꞌe̱ chje̱ꞌéxíi̱n ni xi tjiín.
Ta̱nga Asaee̱l kamámejénjiín nga íjñámasien nga kijítji̱ngii̱ Abnee̱r. 22Kó Abnee̱r ti̱ bi̱ ti̱ katsó nginií Asaee̱l:
—¡Ngiti̱ ánjín miyitji̱ngíní! Míkjo̱a̱a̱ nga an sa̱ꞌínꞌoón nga kꞌojmii tꞌanangii̱. Kótsꞌèn ka̱mana skjinínkꞌá an kje̱n án ngindyi̱ko̱n ntsꞌie ji Joaa̱b.
23Kó nga kamámejénjiín xín kijí, Abnee̱r katsangisꞌiee̱n yá xí tjítokó ki̱cha̱ yojó Asaee̱l ki̱a̱ xi ma uún ńdanisee̱n, kó kui yá xí tjítokó ki̱cha̱ yojoó, xtji̱e̱e̱n nga̱xto̱n jatjoni, kó ki̱a̱ tsꞌáka, sꞌe̱ kꞌien.
Kó ngayeje xota̱ xi jachó nínga tsꞌáka ko̱jo kꞌien Asaee̱l, ki̱a̱ kixindyia. 24Ta̱nga Joaa̱b ko̱jo Abisaii̱ kijítji̱ngii̱ Abnee̱r, kó nga tsꞌasꞌien tsꞌueé jachó ki̱a̱ tji̱ngi̱i̱ Amaa̱, kui xi tikón kje̱n ndáńchꞌi̱ Ngiya̱, ki̱a̱ tꞌa ndi̱yà xí fí nangi kixií nangi Ngabaóo̱n. 25Kó xota̱ tji̱e̱e̱ Benjaa̱ kamátikó nga kijítji̱ngii̱ Abnee̱r, kó ta̱ ngo tjín kamá, kó ki̱a̱ kisꞌińdo nkꞌaa̱ tji̱ngi̱i̱. 26Kó Abnee̱r tsíchji̱a̱a̱ Joaa̱b, nga bi̱ katsoó:
—A ngatsjéni̱xtjin nga ki̱cha̱ndojóo̱ sa̱ꞌínkjié ta̱jmì niní. A yejín ji nga kjo̱a̱ndasen boá xi ka̱ma nii̱ nga kju̱i̱e̱tꞌani. Ngaskande kjiꞌání nga kꞌuiyée̱ xota̱ na̱xi̱ńdaá nga ngiti̱ ko̱e̱je̱tji̱ngijiín ntsꞌi̱e̱.
27Kó Joaa̱b, bi̱ katsó:
—Ja̱koxi̱ boá nga tikón Néná, tsi jijín xi kandokjo̱e̱ ji, xota̱ Israee̱l jera̱ ngiti̱ kijítji̱ngíjiín já ntsꞌi̱e̱ ndeskande ngoye ta̱jño̱ó.
28Kósꞌe̱ Joaa̱b katsꞌénkjanie ndi̱ja̱a̱ cho̱tsa̱nga̱ xi jaꞌatji ndi̱ja̱a̱, kó ngayeje xota̱ na̱xi̱ńdaá xió kixindyia, kó ngiti̱ tsangatji̱ngíjiín xota̱ Israee̱l, ti̱nde ngiti̱ askjanjo̱jín ngase kui xotaa̱. 29Kó Abnee̱r ko̱jo já xí nijan tjimájo̱, ki̱a̱ kijí xtji̱e̱e̱n nangi Arabaa̱ nga ngo kui ni̱xtji̱e̱e̱n, kó jaꞌatio ndejèꞌ Jorndaa̱n, jaꞌaxtikjaá ngayeje nangi Bitroo̱n, sꞌe̱ jachó nangi Maanaii̱n.
30Kó Joaa̱b ti̱ tsangatji̱ngi nginií Abnee̱r, kó íxki̱ ngayeje xota̱ na̱xi̱ńdaá, kó tjiꞌún nijón kamá jáxíꞌín xi chji̱a̱ni nda̱ mosoo̱ Ndabii̱, ko̱jo Asaee̱l. 31Ta̱nga já mosoo̱ Ndabii̱ katsꞌénꞌoón kó jesón ján úchán ichítié ko̱jo tie jáxíꞌín xi chji̱a̱ni xota̱ tji̱e̱e̱ Benjaa̱ ko̱jo xi chji̱a̱ni Abnee̱r.
32Sꞌe̱ iskjíbé Asaee̱l, kó ki̱a̱ yínijín nínga kjiꞌinijín na̱ꞌmii̱ ki̱a̱ na̱xi̱ńdáꞌniú Belee̱n, Sꞌe̱ nga ngo ni̱xtji̱e̱e̱n nga kijí, kó nga kisisie̱èn jachó nangi Ebroo̱n.
Currently Selected:
2 Samuee̱ 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
